LUK 9
9
बारा प्रेषितला फनी मिंदीक आंपेद
मत्तय 10:5-15
1मंग वाड बारा शिष्यलान वगातळा फिल्ची वारकी आन्नी दैयालनी इंगा बिमारीलान तिशेद सामर्थ्य इंगा अधिकार इच्या. 2इंगा वाड वारनी परमेश्वर राज्य बद्दल सुवार्ता शप्पेदेंक इंगा बिमारोरनी शिंगार शेशेदेंक आंप्या. 3वाड वारनी आन्या, “प्रवास इचांग येमीच तिस्कुनाकुंडा; कोला कट्ट्या लेकाते झोळी लेकाते रोट्याल लेकाते दुडलु मी फयला उंडीन बट्टालनी इंगा येमीच येकेन फोकुंडा. 4इंगा या इल्लुक मीर फोयार, आंदे निलना इंगा आंदुकेले फोंडा. 5जर मंदी मिद स्वागत शेयाक फोईर, तर आ उळेल यल्लेताप्पुड वार चेतावनी इचांग मी काळाद धुम्मु झटकास्काडना.” 6आप्पुड वार यल्लीर इंगा उळाउळाक फोई आन्नी जागालला सुवार्ता शपका इंगा बिमारील शिंगार शेस्का तिरगेदेंक आंटीर.
हेरोद विचारला फडताड
7यप्पुड घडाशीनेय आन्नी माटलु हेरोद राजाड इन्या आप्पुड वाड विचारला फडी फोया, येनटीक बाप्तिस्मा इच्चेतोड “योहान सच्चीनोर लोन्केल लेशीनाड.” इल्ला शेंगेम मंदी आंटुनीर; 8इंगा काही मंदी आंटुनीर की “एलीया संदेष्ट्याड प्रगट आयनाड” इंगा इंगोगोर आंटुनीर की “प्राचीन संदेष्ट्याल लोन्केल यवाड तरी वापस जिवंत आयनाड.” 9आप्पुड हेरोद आन्या, “बाप्तिस्मा इच्चेतोन योहानदी तलकाया तर निन कोशीन्टीन, यवान बद्दल निन इ माटलु इंटुनान इड यवाड उंडाड?” इंगा वानकी येशुन भेटाशेद उंड्या.
पाच हजार मंदीक तिना मतेद
मत्तय 14:13-21; मार्क 6:30-44; योहान 6:1-15
10प्रेषितलु वापस वच्ची वार येम-येम शेशीनीर आदी आंता येशुनकी शप्पीर. मंग वाड वारनी वान जताक बेथसैदा उरुक येका फोया. 11दिन बद्दल मंदी यरका आयनेंका मंदी वान यंका फोयेदेंक आंटीर. आप्पुड वाड वारदी स्वागत शेशी, परमेश्वर राज्य बद्दल माटलाडेदेंक आंट्या, इंगा यवारकी बागा आय्येद गरज उंड्या वारनी वाड बागा शेशा. 12यप्पुड फद्दु मुनगेदेंक आंटीन्या, आप्पुड बारा शिष्यल वान देगार वच्ची आनीर, “इ मंदीन सागेसकाड, आंटे वार देगार उंडीन उळालोंग फोई तिनेद सोय शेशार; येनटीक की मनाम मरु भुमीला उंडाम.” 13पण वाड वारनी आन्या, “मिरे वारकी येमाना तिनेदेंक इंडा.” वार आनीर “मिम फोई इ मंदी इचांग येमीच तिनेदेंक कोन्केन दालेद, इंगा मा देगार आय्यीद रोट्याल इंगा रोंड मिल इडशी येमीच लेद.” 14य्रणटीक की आंदु जवळपास पाच हजार मन्सुल उंडीर. आप्पुड वाड वान शिष्यलान आन्या, “पन्नास-पन्नास मंदीद पंगत शेशी वारनी कुसना मतना,” 15वार आल्ले शेशीर इंगा आंदारनी कुसना मतीर. 16वाड आय आय्यीद रोट्याल इंगा रोंड मिल तिस्कुन्या इंगा फैनिक स्वर्ग तिकुड सुशी परमेश्वरकी धन्यवाद इच्या इंगा आटलाय तुकडाल शेशी आय मंदीक सदरेदेंक शिष्यलाक इच्या. 17आप्पुड वार आंदार कडपु निंडा तिनीर; इंगा तेम्पीने रोट्याल तुकडाली वार बारा फुटकाल निंचकेन यतकुनीर.
पेत्रद विश्वासदी कबुली
मत्तय 16:13-20; मार्क 8:27-30
18वगा नाड वाड मंदी समुदायनी इडशी वक्काडे प्रार्थना शेशेदेंक फोया, फक्त वान शिष्यल वान जताक उंडीर, आप्पुड वाड वारनी आडग्या, “मंदी नन्नु यवार आंका आंटार?” 19मंग वार उत्तर इच्ची आनीर, “बाप्तिस्मा इच्चेतोड योहान, काही मंदी आंटार ‘एलीया,’ इंगा काही मंदी आंटार की, प्राचीन संदेष्ट्याल लोन्केल वगाड तरी वापस जिवंत आयनाड.” 20येशुड वारनी आन्या, “पण मीर नन्नु यवार आंका आंटार?” आप्पुड पेत्रड उत्तर इच्ची आन्या, “परमेश्वरान ख्रिस्त.” 21आप्पुड वाड वारकी चेतावनी इच्ची शप्या, इदी यवारकीच शप्पाकुंडा.
येशुनदी स्वता साव बद्दल भविष्यवाणी
22येशुड आन्या, “मनशी कोडकु शेंगेम दुखल सोसायाबेक आय्यी इंगा आब्बागार, मुख्य याजकलु, नियमशास्त्र शिक्षकलु इर तीकेल वान नाकारीच्चेदेंक वच्ची इंगा वानदी जेम तिस्कुनेदेंक वच्ची इंगा मुड नाळाक वाड वापस जित्ता आय्यी.”
येशुन यंका नडशेद अर्थ
मत्तय 16:24-28; मार्क 8:34
23आप्पुड येशुड आंदारनी आन्या, “जर यवारकी आना ना यंका वच्चेद इच्छा उंटे तर वाड स्वतान नाकारीयाला इंगा धीन्नाम वानदी क्रुस यतकेन ना यंका नडवाला. 24येनटीक की यवाड पण स्वताद जेम वाचाय मतेदेंक सुशी वाड दान गमाय मतकुनी, पण यवाड ना इचांग स्वताद जेम गमायमती वाड दान वाचाय मतकुनी. 25येनटीक की मनशी आंता दुन्याम मिळाय मती स्वतान गमाय मतकुनी लेकाते स्वताद नाश शेस्कुनी तर वानकी येम फायदा आय्यी? 26यवाड पण ना बद्दल लेकाते ना वचनला बद्दल शिग्गु फडी, वान बद्दल मनशी कोडकु पण यप्पुड वान आब्बान इंगा पवित्र दुतला गौरवला वच्ची आप्पुड शिग्गु फडी. 27इंगा निन मिक खरेम शपतान की, इंदु नीला फडीनोर दिंटल्या काही मंदी इल्ला उंडार की, वार परमेश्वर राज्य सुशी नंताक वारकी सच्चेद अनुभव दाके फोई.”
येशुनदी रुपांतर
28इंगा इ माटलु शप्पीनेंका यनमीद नाळाक इल्ला आय्या की, पेत्र, योहान इंगा याकोब इरनी जताक तिस्केन येशुड कोंडा मिंदीक प्रार्थना शेशेदेंक फोया. 29आप्पुड वाड प्रार्थना शेशेताप्पुड वान मुतीद रुप बदलाशा इंगा वानी बट्टाल तेल्लांग चमकदार आय फोया. 30इंगा सुडना, इद्दार मन्सुल वान जताक माटलाड तुनीर; वार मोशेड इंगा एलीयाड उंडीर, 31वार तेजस्वी कमस्तुनीर इंगा वार येशुन वान आ उद्देश बद्दल माटलाडदुर, याद वाड यरुशलेम शहरला सच्चीगास पुर्ण शेशेतोड उंड्या. 32आप्पुड पेत्र इंगा वान जताक यवार शिष्यल उंडीर वार निद्दारला उंडीर, पण यप्पुड वार लेशीर आप्पुड वार वारदी तेज इंगा या इद्दार मन्सुल वान देगार नीला फडीनीर वारनी सुशीर. 33मंग वार येशुन देगाटेल फोयेताप्पुड पेत्रड येशुन आन्या, “हे गुरु, मिम इंदु उंडाम इदी मा इचांग यंता शिंगार उंडाद; मिम मुड मंडपलु बनाय मतताम, वगाट नी इचांग, वगाट मोशेन इचांग इंगा वगाट एलीयान इचांग.” वानकी यरका लेकुंड्या की वाड येम माटलाडदु. 34वाड इदी माटलाडेताप्पुड वगा ढग वच्ची वारनी मुस्कुन्या आप्पुड ढग वारनी घेरासकुन्या आप्पुड वार यरस्कुनीर. 35इंगा आ ढगलेल आवाज वच्या, आदी आन्या, “इड ना निवडाशीनोड कोडकु उंडाड, इनदी मीर इनना.” 36इदी आवाज आयनेंका येशुड वक्काडे कमशा इंगा वार शांत आय फोईर इंगा याय माटलु वार सुशीनीर आ दिनमुलाला आय यवारकीच शप्पाक फोईर.
दैयाम फट्टीने मोगाबिडा
मत्तय 17:14-21; मार्क 9:14-29
37मंग इल्ला आय्या की इंगोगो नाड वार कोंडा मिंदकेल किंदीक वच्चीर आप्पुड मंदीद फेद्दाद समुदाय येशुन भेटाशेदेंक वच्या. 38आप्पुड सुडना, समुदायलोन वगा मनशी बेग्गे कीरली आन्या, हे गुरु, निन नीक विनंती शेस्तान, ना मोगाबिडा तीकुड सुड, येनटीक वाड नाक वक्का कोडकु उंडाड. 39यादो दुष्टात्मा वान फटताद इंगा वाड अचानक कीरलुताड इंगा वान इल्ला फिंडताड की, वान मुतीद फेस यलताद, आदी वानकी शेंगेम त्रास इस्ताद इंगा वानदी नाश शेशेदेंक सुस्ताद. 40इंगा दान तिशेद निन नी शिष्यलाक पण विनंती शेस्तीन, पण वार दान तिशी शकायाक फोईर. 41आप्पुड येशुड उत्तर इच्ची आन्या, “हे अविश्वासी इंगा कुटील पिढी, निन याड नंताक मी जताक निलच्यान इंगा मिद सहन शेशान? नु नी मोगाबिडान इक्काड येकेन दा.” 42मंग वान येशुन देगार येका फोयेताप्पुड, दुष्टात्मा वान किंदा आपटाशी फिंडेदेंक आंट्या, पण येशुड आ अशुद्ध आत्माक धमकाय मती आज्ञा इच्या इंगा आ मोगाबिडान बागा शेशी वान आब्बानकी वापस इच्या.
येशुनदी स्वता साव बद्दल दुसरा भविष्यवाणी
मत्तय 17:22-23; मार्क 9:30-32
43मंग इदी परमेश्वरदी महान सामर्थ्य सुशी आंता मंदीक आश्चर्य आय्या आप्पुड वाड वान शिष्यलान आन्या, 44“इ माटलु मीर ध्यानाम फेटना, येनटीक की मनशी कोडकुन मंदी शेतल्या इच्चेदेंक वच्ची.” 45पण इ माटलु वारकी तेल्वालेद इंगा वारकी तेल्वाराद आंका आय वार तीकेल गुप्त फेटनेय उंड्या; इंगा वार इ माटला बद्दल वान आडगेदेंक यरस्कुंदुर.
नम्रता इंगा सहन शेशेद
मत्तय 18:1-5; मार्क 9:33-37
46मंग मना दिंटल्या फेद्दावोड यवाड दिन बद्दल वार नडमा वादविवाद आय्या. 47आप्पुड येशुड वार मनलोनदी माटा तेल्चकेन वगा शिन्ना बिडान तिस्केन वान देगार नीला फडामत्या, 48इंगा शिष्यलान आन्या, “यवार ना फेरता इ बिडान स्वीकार शेस्ताड वाड नन्नु स्वीकार शेस्ताड इंगा यवाड नन्नु स्वीकार शेस्ताड वाड यवाड नन्नु आंपीनाड वान स्वीकार शेस्ताड; येनटीक मी आंदार दिंटल्या यवाड आंदार काना शिन्नावोड उंडाड वाडे फेद्दावोड उंडाड.”
49आप्पुड योहान उत्तर इच्ची आन्या, “हे गुरु, मिम वगान नी फेरता दैयाम तिशेताप्पुड सुस्तीम इंगा वान मिम लेद आंटीम. येनटीक की वाड मा जताक नी यंका नडवाड.” 50आप्पुड येशुड वारनी आन्या, “लेद आनाकुंडा, येनटीक की यवार मी विरोधला लेर वार मी पक्षला उंडार.”
क्रुस मिंदा येशुनदी प्रगती — 9:51—19:27
येशु यरुशलेम शहरकी फोयेदेंक यलताड
51मंग इल्ला आय्या की वानदी स्वर्गलोंग तिस्कुनेद वेळ देगार वच्या आप्पुड वाड यरुशलेम शहरकी फोयेद निश्चय शेशा इंगा यरुशलेमकी यल्या. 52मंग वाड वान मुंदारकी संदेशदुतलान आंप्या, आप्पुड वार यल्ली वान इचांग तैयारी शेशेदेंक शोमरोनलोन वगा उरुक फोईर, 53पण मंदी आंदु येशुनदी स्वागत शेयालेद, येनटीक की वाड यरुशलेम शहरकी फोदु. 54आप्पुड वान शिष्यल याकोब इंगा योहान इदी सुशी आनीर, “हे प्रभु, एलीयाड शेशीन्या आल्ले मोडामलेल आग्गी फडी वारदी नाश शेयाला इल्ला मिम आज्ञा इयाला, इदी नीद इच्छा उंडाद येम?”#2 राजे 1:10. 55पण वाड वारनी धमकाय मती आन्या, “मीर या आत्मा तीकेल उंडार इदी मिक यरका लेद येम; 56मनशी कोडकु मंदी जीवनदी नाश शेशेदेंक दालेद, तर वारदी तारण शेशेदेंक वच्चीनाड.” मंग वार इंगोगो उरुक फोईर.
येशुन शिष्य आय्येद किंमत
मत्तय 8:18-22
57येशुड इंगा वान शिष्यल दावाता नडशेताप्पुड यवाडो वगा मनशी वच्ची वान आन्या, “नु फोयाव आंदुक निन नी यंका वच्यान.” 58आप्पुड येशुड वान आन्या, “लांडगालकी गुफाल इंगा मोडामलोन गुवालकी इंडलु उंडाय, पण मनशी कोडकुक नत्ती टेकाशेदेंक जागा लेद.” 59मंग वाड इंगोगोन आन्या, “ना यंका दा,” पण वाड आन्या, “हे प्रभु, पहिला नन्नु ना आब्बान बुडशेदेंक फोनी,” 60आप्पुड येशुड वान आन्या, “यवार आत्मिक रुपता सच्ची फोयनार वारनी सच्चीनोरनी बुडवानी, पण नु फोई परमेश्वर राज्या बद्दल सुवार्ताद घोषणा शेय.” 61आप्पुड इंगा वगाड आन्या, हे प्रभु, निन नी यंका वच्यान, पण पहिला नन्नु फोई ना इंटल्योन्टोरनी सागेशी दानी.#1 राजे 19:20. 62पण येशुड वान आन्या, “यवाड पण नांगरकी शेय आंचीनेंका यंका सुस्ताड, वाड परमेश्वर राज्यक उपयोगी लेड.”
Currently Selected:
LUK 9: WNT
Highlight
Share
Compare
Copy
Want to have your highlights saved across all your devices? Sign up or sign in
