MRK 10
10
फेंडलीद बंधन परमेश्वर बनाय मतनेद मजबुती
1मंग येशुड आदी जागा इडशा इंगा यहुदीया प्रांतलोंग इंगा यार्देन वंका आतुक फोया. मंदीद गर्दी वगातळा आय्यी वान देगार वच्चीर इंगा वाड वान रितीलेका वारकी नेरप्या.
2आप्पुड परुशील येशुन तीकुड वच्चीर. वार वान आडगीर, “मोगुड वडतीन इडवाला इदी बरोबर उंडाद येम?” इदी वार वानदी परीक्षा तिस्कुनेदेंक आडगीर. 3येशुड वारकी उत्तर इच्या, “मोशेड मिक येम आज्ञा इच्चीनाड?” 4वार आनीर, “मोशेड मनशीक सोडचिट्ठी राशी मना वडतीन इडशेद परवानगी इच्चीनाड.”#अनुवाद 24:1-3. 5येशुड वारनी आन्या, “फक्त मी अंतकरण कठोरपणा इचांग मोशेड इदी आज्ञा मी इचांग राशा. 6पण उत्पत्ती सुरवातकेल परमेश्वर वारनी मोगोड इंगा आंडीद इल्ला बनायमत्या.#उत्पत्ती 1:27; 5:2.
7 दिनिचांग मनशी मना आम्मा-आब्बान इडशी मना वडती जताक उंडी.
8 इंगा वार इद्दार वगा शरीर आय्यार. दिनिचांग वार इद्दार लेर तर वगा शरीर उंडार. #
उत्पत्ती 2:24.
9 दिनिचांग परमेश्वर येम जोडशीनाड, दान मनशी तेम्पाराद.”
10यप्पुड येशुड इंगा शिष्यल इल्काडा उंडीर, शिष्यल दिन बद्दल वापस वान आडगीर. 11वाड वान आन्या, “यवाड मना वडतीन इडस्काडताड इंगा इंगोगो फेंडली शेस्कुंटाड वाड पहिला वडती विरुद्धला व्यभिचार शेस्ताड. 12इंगा जर वडती मना मोगुन इडस्ताद इंगा इंगोगो फेंडली शेस्कुंटाद, तर आदी पण व्यभिचार शेस्ताद.”
शिन्ना बिळ्ळाक येशुनदी आशिर्वाद
13येशुड बिळ्ळा मिंदा शेय फेट्टाला इंगा आशिर्वाद इयाला आंका मंदी बिळ्ळान वान तीकुड यकोचीर, पण शिष्यल वारनी बेद्रीचीर. 14यप्पुड येशुड इदी सुशा आप्पुड वाड कोफामला वारनी आन्या, “शिन्ना बिळ्ळान ना देगार दानिंडा. वारनी लेद आनाकुंडा येनटीक की परमेश्वरदी राज्य वार लेकाने उंडाद. 15निन मिक खरेम शपतान, यवाड पण बिडा लेका परमेश्वर राज्यद स्वीकार शेयाड वानदी प्रवेश परमेश्वर राज्यला काक फोई.” 16आप्पुड वाड बिळ्ळान यतकेन देगार तिस्कुन्या. मना शेय वार मिंदा फेट्या इंगा वारकी आशिर्वाद इच्या.
श्रीमंत जवान मोगाबिडा इंगा सार्वकालिक जीवन
17येशुड प्रवासकी फोयेताप्पुड वगा मनशी वान तीकुड फारका वच्ची इंगा वान मुंदार मोकाळलु टेकाशी आन्या, “हे उत्तम गुरु, सार्वकालिक जीवन शिक्काला आंका निन येम शेयदुन?” 18येशुड वान आन्या, “नु नन्नु उत्तम येनटीक आंटाव? परमेश्वरनी इडशी यवारुच उत्तम लेर. 19निक आज्ञाल तर यरकाने उंडाय; खुन शेयाक, व्यभिचार शेयाक, दोन्गा शेयाक, खोटा साक्ष इयाक, फसा मत्ताक, मना आब्बानदी इंगा आम्माद मान फेट.”#निर्गम 12:12-16. 20आ मनशी आन्या, “गुरु, निन जवानीकेल इ आज्ञाल पाळास्केन वचीनान.” 21येशुड वान तीकुड सुशा वाड वान मिंदा प्रेम शेशा इंगा वान आन्या, “नी लोना वगा माटाद कमी उंडाद. फो, नी देगार येम उंडाद आदी आंता आम्मु इंगा गरीबोरकी इचकाड, आंटे स्वर्गला निक धन शिक्की इंगा मंग नड, ना यंका दा.” 22इदी माटा इनी आ मनशी शेंगेम उदास आय्या इंगा दुखी आय्यी यल्ली फोया येनटीक की वान देगार शेंगेम संपती उंड्या.
संपत्तीद नडमा वच्चेद
23येशुड आजुबाजुक सुशा इंगा वाड वान शिष्यलान आन्या, “परमेश्वर राज्यला धनवान मनशीद प्रवेश यंता कठीण उंडाद.” 24वानी माटलु इनी शिष्यलकी नवल वाटाशा, पण येशुड वारनी वापस आन्या, “ना बिळ्ळालाला, परमेश्वर राज्यला प्रवेश यंता कठीण उंडाद! 25धनवान मनशीद परमेश्वर राज्यला प्रवेश आय्येद दिन काना वंट्याक सुदी मुक्कु लोन्केल फोयेद सोपा उंडाद.” 26वार इंगा जास्त आश्चर्य चकीत आय्यीर इंगा वगामेगारनी आनीर, “तर मंग यवारदी तारण आय्येद शक्य उंडाद?” 27वार तीकुड सुशी येशुड आन्या, “मन्सुलाक इदी अशक्य उंडाद पण परमेश्वरकी लेद, येनटीक की परमेश्वरकी आन्नी माटलु शक्य उंडाय.”#ईयोब 42:2; लूक 1:37. 28पेत्र वान आनेदेंक आंट्या, “सुड, मिम आंता इडशीनाम इंगा नी यंका वच्चीनाम.” 29येशुड आन्या, “निन मिक खरेम शपतान, यवार-यवार ना इचांग इंगा सुवार्ता इचांग इल्लु, शेल्याल, तम्मुड, आम्मा-आब्बान, बिळ्ळान इंगा शेन-शट्टु इडशीनार, 30इल्ला प्रत्येक मनशीक शेवट काळला छळनुक जताक शंभरपटता इंडलु, तम्मुळ्ळु, शेल्यांलु, आम्मा, बिळ्ळु, शेनलु इंगा वच्चे युगला सार्वकालिक जीवन मिळाय मत्यार. 31पण शेंगेम मंदी यवार पहिला उंडार वार आखरीक आय्यार इंगा आखरीक उंडार वार पहिला आय्यार.”
मना सच्चे बद्दल येशुनदी तिसरा भविष्यवाणी
32येशुड इंगा शिष्यल यरुशलेम शहर दावाता फोयेताप्पुड येशुड वार मुंदारकी नडदु. वान शिष्यल चकीत आयनीर इंगा वान यंका वच्चेतोर यरस्कुन्नीर. मंग येशुड आ बारा शिष्यलान वापस वगा तीकुड तिस्कुन्या इंगा वान बद्दल येम आय्यी इदी वारकी शप्या. 33“सुडना! मनाम मिंदीक यरुशलेम शहर तीकुड फोयतुनाम इंगा मनशी कोडकुन फट्टी मुख्य याजक मंदी इंगा नियमशास्त्र शिक्षकलु इर शेयता इच्यार. वार वानकी सच्चेद शिक्षा इच्यार इंगा वार वान गैर यहुदी मंदी शेतल्या इच्यार. 34वार वानदी मजाक यगरा मत्यार, वान मिंदा उंच्यार, वानकी देब्बाल मत्यार, मतेशार इंगा मुड नाळाक वाड वापस जिवंत आय्यी.”
याकोब इंगा योहानदी विनंती
35आप्पुड याकोब इंगा योहान इर जब्दी कोडकुल वान देगार वच्चीर इंगा वान आनीर, “गुरु, मिम येम नी देगार आडग्याम आदी नु आदी मा इचांग शेय इल्ला माद इच्छा उंडाद.” 36येशुड वारनी आडग्या, “निन मी इचांग येम शेयदुन इल्ला मिद इच्छा उंडाद?” 37वार आनीर, “नी वैभवला मालोन्केल वगान तिने शेय तीकुड इंगोगोन रोड्डा शेय तीकुड कुसनेद अधिकार माक इ.” 38येशुड वारनी आन्या, “मीर येम आडगुतुनार इदी मिक यरका लेद. निन याद प्याला तागेतोड उंडान, आदी मिक तागेद शक्य उंडाद येम? का निन याद बाप्तिस्मा तिस्कुंटुनान आदी मिक तिस्कुनेद शक्य उंडाद येम?” 39वार वान आनीर, “माक शक्य उंडाद.” मंग येशुड वारनी आन्या, “निन याद प्याला तागतान आदी मीर ताग्यार इंगा याद बाप्तिस्मा निन तिस्कुन्यान आदी मीर तिस्कुन्यार, 40पण ना तिने शेय तीकुड लेकाते रोड्डा शेय तीकुड कुसना निच्चेद ना शेतल्या लेद. यवार इचांग आय जागाल तैयार शेशीनार, वार इचांग आय राखाशी फेटनाड.”
खरेम मोठेपणा
41फदी शिष्यल इदी विनंती इनीर आप्पुड वार याकोब इंगा योहान मिंदा शेंगेम कोफाम फडीर. 42आप्पुड येशुड वारनी देगार फिलच्या इंगा आन्या, “मिक यरका उंडाद की, यहुदी लेनोर यवार अधिपतील उंडार वार-वार मिंदा स्वामीत्व गाजामतुतार इंगा वार मिंदा अधिकार शेस्तार. 43पण मी बद्दल आल्ला लेद. मी दिंटल्योन्केल यवारकी आना फेद्दावोड आय्येद उंटे वाड सेवक कावाला. 44इंगा यवारकी पण पहिला आय्येद उंटे वानकी आंदार सेवक कावाला. 45येनटीक की मनशी कोडकु पण सेवा शेशी तिस्कुनेदेंक दालेद तर सेवा शेशेदेंक वच्चीनाड, शेंगेम मंदीन इडपीयाला आंका वानदी जेम इच्चेदेंक वच्चीनाड.”
गुड्डी बार्तीमयकी दृष्टी दान
46येशुड इंगा शिष्यल यरीहो शहरकी वच्चीर. मंदी गर्दी जताक वार यरीहो इडशी फोयेताप्पुड तीमयान कोडकु बार्तीमय इड वगा गुड्ड्योड भिकारी दावा बाजुक कुशींड्या. 47यप्पुड वाड इन्या की, नासरेथकर येशुड आंदुकेल फोयतुनाड आप्पुड वाड बेग्गे कीरली आनेदेंक आंट्या, “येशु, दाविद राजान कोडका ना मिंदा दया शेय.” 48आप्पुड वाड तेप्पांग उंडाला आंका शेंगेम मंदी वान बेद्रीचीर. पण वाड इंगा बेग्गे कीरली आनदु, “येशु दाविद राजा कोडका ना मिंदा दया शेय.” 49मंग येशुड थांबाशा इंगा आन्या, “वान फिलच्या,” आप्पुड वार आ गुड्डी मनशीन फिल्ची आनीर, “दम फट, येशुड निन्नु फिलस्तुनाड.” 50आ गुड्डी मनशी वानदी झगा फेकेशा, इंगा लगेच लेशी येशुन तीकुड वच्या. 51येशुड वान आन्या, “निन नी इचांग येम शेयदुन इल्ला नीद इच्छा उंडाद?” गुड्डी मनशी वान आन्या, “रब्बी, नाक वापस कमसाला.” 52मंग येशुड वान आन्या, “फो! नी विश्वास निन्नु शिंगार शेशा.” लगेच वाड सुदेंक आंट्या इंगा दावाता वाड येशुन यंकाने नडदेंक आंट्या.
Currently Selected:
MRK 10: WNT
Highlight
Share
Compare
Copy
Want to have your highlights saved across all your devices? Sign up or sign in
