MRK 9
9
येशुनदी रुपांतर
1येशुड आ मंदीन आन्या, “निन मिक खरेम शपतान की, इंदु नीला फडीनोर काही मंदी इल्ला उंडार की, यवारकी परमेश्वरदी राज्य सामर्थ्यता वच्चीनेद कमशी नंताक सावदी अनुभव दाक फोई.” 2आर नाळा बाद येशुड पेत्रन, याकोबनी इंगा योहाननी वान जताक फेद्दा कोंडा मिंदीक येका फोया इंगा वार मुंदार वानदी रुपांतर आय्या. 3वानी बट्टाल चमकदार, शेंगेम तेल्लांग, इंता की पृथ्वी मिंदा यवारुच इंता तेल्लांग उत्की शकायार, इल्ला आयन्या. 4आप्पुड एलीयाड इंगा मोशेड वान मुंदार प्रकट आय्यीर, वार येशुन जताक माटलाडदुर. 5पेत्र येशुन आन्या, “रब्बी, मनाम इंदु उंडाम इदी बागा उंडाद. मनाम मुड मंडपलु बना मतुदाम. वगाट नी इचांग, वगाट मोशेन इचांग इंगा वगाट एलीयान इचांग.” 6पेत्र इल्ला आन्या येनटीक की, येम माटलाडेद इदी वानकी तेल्वाकुंदु येनटीक की वार यरस्कुनीर. 7आप्पुड वगाट मोडाम वच्या इंगा वार मिंदा साट शेशा इंगा मोडाम लोन्केल वगाट आवाज वच्या, “इड ना प्रिय कोडकु उंडाड वानदी मीर इनना.” 8अचानक, वार आजुबाजुक सुशीर आप्पुड वारकी येशुन इडशी यवारुच कमसा लेद.
9वार कोंडा मिंदकेल किंदीक वच्चेताप्पुड, येशुड वारकी आज्ञा इच्या की, “मीर येम सुस्तीर आदी मनशी कोडकु सच्चीनोर लोन्केल लेशी नंताक यवारकीच शप्पाकुंडा.” 10दिनिचांग वार पण इदी माटा वार नडमाने फेट्टीर, पण सावकेल लेशेद दिंदि अर्थ येम दिन बद्दल वगामेगारला चर्चा शेयदुर. 11वार येशुन आडगीर, “पहिला एलीयाड दावाबेक इल्ला नियमशास्त्रटोर शिक्षकलु येनटीक आंटार?” 12वाड वारनी आन्या, “हुं, एलीयाड पहिला वच्ची आंताच शिंगार शेशी इदी खरेम उंडाद. पण मनशी कोडकु बद्दल वाड शेंगेम दु:खल सहन शेशी इंगा नकार शेशेदेंक वच्ची इल्ला पवित्र शास्त्रला येनटीक राशीनार? 13निन मिक शपतान, एलीयाड वच्चीनाडच इंगा वान बद्दल यल्ला राशीनार, वारकी वाटाशा आल्ला वार वान जताक शेशीर.”
दुष्ट आत्माकेल छुटकारा
14यप्पुड येशुड इंगा मुग्गुर शिष्यल बाकी शिष्यला देगार वच्चीर, आप्पुड वार यंका फेद्दाद मंदी समुदाय उंड्या इंगा नियमशास्त्र शिक्षकलु वार जताक जगडाम शेयदुर इल्ला वारकी कमशा. 15आंता मंदी येशुन सुशी नग्रेम आश्चर्य चकीत आय्यीर इंगा वार वानदी स्वागत शेशेदेंक फारीर. 16येशुड शिष्यलान आडग्या, “मीर वार जताक येनटीक जगडाम आडतुनार?” 17आप्पुड समुदायलोन वगाड वानकी उत्तर इच्या, “गुरुजी, निन ना कोडकुन नी देगार यकोस्तीन. वान लोना दुष्ट आत्मा उंडाद याद वान माटलाडा नियाद. 18यप्पुड पण आदी वान फटताद आप्पुड वान किंदा आपटास्ताद इंगा मुतीक फेस यकोस्ताद, फंडलु कोरकुताद इंगा अकडाशी फोयताड. निन नी शिष्यलान तिशेदेंक शपतीन पण वार तिशी शकायालेद.”
येशुड दैयाम फट्टीने मोगाबिडान बागा शेस्ताड
19येशुड वारनी आन्या, “हे अविश्वासी पिढी, निन यन्नी नाळ मी जताक उंड्यान? निन मी जताक यन्नी नाळ सहन शेयदुन? मोगाबिडान ना देगार येका दांडा.” 20मंग वार मोगाबिडान येशुन देगार यकोचीर, यप्पुड आ दुष्टात्मा येशुन तीकुड सुशा आप्पुड मोगाबिडान फिंडेस काड्या इंगा वाड भुमी मिंदा फडी नोरुक फेस यकोची लोळाशेदेंक आंट्या. 21यंकसार येशुड वान आब्बान आडग्या, “यप्पुडकेल इड इल्ला उंडाड?” आब्बाड उत्तर इच्या, “फुट्टीनकेल इड इल्ला उंडाड. 22शेंगेम तुकुल मतेदेंक आदी वान आग्गीला इंगा नेळाला येशा. जर नी शेयता येमाना आय्येद शक्य उंटे तर मा मिंदा दया शेय इंगा माक मदत शेय.” 23येशुड वान आन्या, “शक्य उंटे तर, इल्ला येनटीक आंटाव? विश्वास फेटेतोरकी आंता शक्य उंटाद.” 24आप्पुड लगेच मोगाबिडा आब्बाड बेग्गे कीरली आन्या, “निन विश्वास शेस्तान, नाद अविश्वास तिस्काड.” 25येशुड मंदी समुदाय मना तीकुड फारका वस्तुनाद इल्ला सुशा आप्पुड येशुड आ दुष्टात्मान बेद्रीची आन्या, “हे मुकी बहिरी आत्मा, निन निक आज्ञा इस्तान की, इन फय लोन्केल बैटीक यल इंगा यप्पुडुच इन लोना दुराक.” 26मंग आदी कीरली इंगा वान शेंगेम फिंडी बैटीक यल्या इंगा मोगाबिडा सच्चीने लेका आय्या इंगा मंदीक वाटाशा, वाड सच्ची फोया. 27पण येशुड वान शेय फट्टी लेप्या इंगा वाड नीला फड्या.
28यंकसार येशुड इल्लुक फो इल्काडा वान शिष्यल वान एकांतला आडगीर, “मिम आदी अशुद्ध आत्मा येनटीक तिशी शकायालेम?” 29येशुड वारनी आन्या, “इदी जात प्रार्थना इडशी इंगा दुसरा येनटीता पण यल्लेद शक्य लेद.”
वान साव बद्दल येशुनदी दुसरा भविष्यवाणी
30येशुड इंगा वान शिष्यल आंदुकेल यल्लीर इंगा गालील प्रांतकेल प्रवास शेस्का नडदुर. इदी यवारकीच यरका कावाराद इदी येशुनदी इच्छा उंड्या. 31येनटीक की वाड मना शिष्यलकी नेरपु. वाड वारनी आन्या, “मनशी कोडकुन विश्वासघात शेशी फट्टी मंदी शेतल्या इच्चेदेंक वच्ची. वार वान जेमफडा मतेशार. पण सच्चीनेंका वाड मुड नाळाक लेशी.” 32पण इ माटाद अर्थ वारकी तेल्वालेद इंगा दान बद्दल वान आडगेदेंक वार यरस्कुंदुर.
आंदार काना फेद्दावोड यवार
33येशुड इंगा वान शिष्यल मुंदारकी कफर्णहुमकी वच्चीर. येशुड इल्काडा उंड्या आप्पुड वाड वारनी आडग्या, “दावाता मीर या माटा मिंदा चर्चा शेयदुर?” 34पण वार तेप्पांग निलचीर येनटीक की दावाता आंदार काना फेद्दावोड यवाड उंडाड इ माटा मिंदा चर्चा नडशीन्या. 35मंग येशुड किंदा कुसन्या, वाड बारा शिष्यलान फिल्ची वारनी आन्या, “जर यवारकी आना फेद्दावोड आय्येद उंटे तर वाड आंदार काना शिन्नावोड कावाला इंगा आंदार सेवक कावाला.” 36यंकसार येशुड वगा बिडान वार नडमा नीला फडामत्या इंगा आन्या? 37“यवाड पण इ शिन्ना बिडान ना फेरता स्वीकार शेस्ताड वाड नन्नु स्वीकार शेस्ताड इंगा यवाड पण नन्नु स्वीकार शेस्ताड वाड फक्त नन्ने स्वीकार शेस्ताड इल्ला लेद तर यवाड नन्नु आंपीनाड वान पण स्वीकार शेस्ताड.”
यवाड मना विरोधला लेड वाड मना तीकुड उंडाड
38योहान येशुन आन्या, “गुरुजी, मिम वगान नी फेरता दैयाल तिशेतापुड सुस्तीम इंगा मिम वान लेद आंटीम, येनटीक की वाड मना दिंटल्योन्टोड लेकुंड्या.” 39पण येशुड आन्या, “वान लेद आनाकुंडा, येनटीक की यवार पण ना फेरता चमत्कार शेस्ताड वाड इंगा ना बद्दल वाईट माटलाडाड. 40यवार मना विरुद्ध लेर वार मना तीकुड उंडार. 41निन मिक खरेम शपतान, ख्रिस्त सेवक आंका यवाड मिक वगा शंबाड नेळ इस्ताड वाड नक्की वानदी प्रतिफळ शिक्कीच.”
तटरायदी कारण आय्येद
42 ना मिंदा विश्वास फेटेतोन इ शिन्नावोरलोन वगान पण यवाडाना पाप शेशेदेंक आंचताड, वान गोंतुला इसरायदी राय कट्टी वान समुद्रला फेकेशेद इदी वान इचांग शिंगार उंडाद. 43-44जर नीद तिने शेय निन्नु पाप शेशेदेंक आंस्ते तर आदी कोसकाड. रोंड शेतुल उंडी नरकला यप्पुडुच आराद इल्लोन आग्गीला फोये काना वगा शेय लेन्दे सार्वकालिक जीवनला फोयेद शिंगार उंडाद. 45-46इंगा जर नीद काल निन्नु पाप शेशेदेंक आंस्ते तर आदी तिस्काड. रोंड काळ उंडी नरकलोंग फोये काना कुंट्योड आय्यी सार्वकालिक जीवनलोंग फोयेद शिंगार उंडाद. 47-48जर नीद मंची कन्नु निन्नु पाप शेशेदेंक आंस्ते तर आदी तिस्काड. रोंड कंडलु उंडी यंदु फुल्गुल यप्पुडुच सय्याव इंगा आग्गी आराद इल्लोन नरकला फेकेस्कामला दावाला दान काना वगा कन्नु उंडी परमेश्वर राज्यला फोयेद इदी शिंगार उंडाद, 49येनटीक की आंदारदी आग्गीता परीक्षा तिस्कुनेदेंक वच्ची. 50“उप्पु शिंगार उंडाद. पण जर उप्पुद चव फोया तर दान वापस यल्ला रोस शेशार. मीर मी लोना उप्पु उंडा निंडा इंगा वगामेगार जताक शांतीता निलना.”
Currently Selected:
MRK 9: WNT
Highlight
Share
Compare
Copy
Want to have your highlights saved across all your devices? Sign up or sign in
