MRK 8
8
चार हजार मंदीक तिना मतेद
1आ दिनमुलाला वापस मंदीद फेद्दा समुदाय जमा आय्या इंगा वार देगार तिनेदेंक येमी लेकुंड्या. येशुड वान शिष्यलान फिलच्या इंगा वारनी आन्या, 2“नाक इ मंदी मिंदा दया वस्ताद, येनटीक की इबद मुड नाड वार ना जताक उंडार इंगा वार देगार तिनेदेंक येमीच लेद. 3निन जर वारनी उपाशी इल्लुक आंपतीन की तर वार दावाताने चक्कर वच्ची फड्यार इंगा वार दिंटल्या काही मंदी तर धुराम केल वच्चीनार.” 4वान शिष्याल उत्तर इच्चीर, “इंदु सुनसान जागाला वार तृप्त आय्यार इन्नोट रोट्याल यंदुकेल येका दावाला?” 5वाड वारनी आडग्या, “मी देगार यन्नी रोट्याल उंडाय?” वार आनीर, “योड.” 6वाड मंदीन किंदा कुसनेदेंक आज्ञा शेशा. वाड योड रोट्याल तिस्कुन्या, आभार मानाशा इंगा आय तेंप्या इंगा वान शिष्यलाक आय फंचेदेंक इच्या इंगा वार आय मंदीक फनचीर. 7वार देगार शिन्नाय मिल उंड्या, आटलाक वाड आशिर्वाद इच्ची आय पण फंचेदेंक शप्या. 8वार तिनी तृपत आय्यीर इंगा मिल्गीने योड फुटकाल शिष्यल निम्पीर. 9वार सुमारे चार हजार मन्सुल उंडीर. इंगा येशुड वारनी इल्लुक आंप्या. 10इंगा लगेच वाड शिष्यल जताक जहाजला कुसन्या इंगा दल्मनुथा शहरलोंग फोया.
परुशी मंदी चिन्ह आडगुतार
11मंग काही परुशी मंदी वच्ची वान जताक जगडाम आडेदेंक आंटीर. वानदी परीक्षा सुडाला आंका वार वान स्वर्गलेल चिन्हल आडगीर. 12वान आत्माला फेद्दा श्वास इडशी वाड आन्या, “इदी पिढी चिन्ह येनटीक आडगुताद? निन खरेम शपतान की, इ पिढीक चिन्हल इयाक फोयार.” 13मंग वाड वारनी इडशी इंगा नावला फोई कुसन्या इंगा सरोवर आतकुड बाजुक फोया.
14आप्पुड शिष्यल रोट्याल येकेन वच्चेद मरशी फोयनीर इंगा नावला वार देगार वगाटे रोट्या उंड्या. 15सुडना येशुड चेतावनी इच्ची आन्या, “परुशीलाद खमीर इंगा हेरोद खमीर देगार केल सावधान उंडा.” 16मंग वार वगामेगारनी आनेदेंक आंटीर की, “मना देगार रोट्याल लेव आंका वाड आन्या येम?” 17वार येम माटलाडदुर इदी गुरतु फट्टी येशुड वारनी आन्या, “मी देगार रोट्याल लेव दिन बद्दल चर्चा येनटीक आंटार? इप्पुड पण मिक ध्यानाम लेद येम इंगा मिक तेल्ची पण तेल्वालेद येम? मी अंतकरण कठोर आयनाद येम? 18कंडलु उंडी पण कमसाद येम? गुम्माल उंडी मिक इना दाद येम? मिक ध्यानाम दाद येम? 19निन पाच हजार मंदीक आय्यीद रोट्याल फंचतीन आप्पुड मीर रोट्या तुकडाली यन्नी गम्पाल निंचकुंटीर.” शिष्यल उत्तर इच्चीर, “बारा.” 20“इंगा चार हजार इचांग निन सात रोट्याल तेम्पुतीन, आप्पुड मीर तुकडाली यन्नी गम्पाल जमा शेस्तीर?” शिष्यल उत्तर इच्चीर, “योड.” 21मंग येशुड वारनी आन्या, “मिक इप्पुड पण तेल्वाद येम?”
येशुड बेथसैदा इंदुड गुड्ड्योन बागा शेस्ताड
22वार बेथसैदा इंदुक वच्चीर. आप्पुड मंदी वान देगार वगा गुड्ड्योन यकोचीर इंगा वाड वान मुट्टाला इल्ला विनंती शेशीर. 23मंग वाड गुड्ड्योनदी शेय फट्टी वान उर बैटीक येका फोया येशुड आ गुड्ड्योन कंडला मिंदा उंच्या इंगा वान शेईल मिंदा शेईल फेट्टी आडग्या, “निक येमाना कमस्तुनाद येम?” 24वाड फैनिक सुशा इंगा आन्या, “नाक मन्सुल कमस्तुनार इल्ला वाटास्तुनाद येनटीक की वार नाक शटला लेका कमस्तुनार, तरी पण वार नडस्तुनार.” 25मंग येशुड वापस वानी शेईल मनशी कंडला मिंदा फेट्या. वाड कंडलु तेरशा आप्पुड वानी कंडलु उघडाशा इंगा वानकी आंता स्पष्ट कमशेदेंक आंट्या. 26येशुड वान आन्या, “आ उळ्या वापस फोक” इल्ला शप्पी इल्लुक आंप्या.
येशुड ख्रिस्त उंडाड इल्ला पेत्रद कबुली
27मंग येशुड इंगा वान शिष्यल फिलिप्प कैसरीया फेर प्रदेशकी फोयेदेंक यल्लीर. दावाता वाड वान शिष्यलान आडग्या, “मंदी नन्नु येम आंका गुरतु फटतार?” 28वार वानकी उत्तर इच्चीर, “काही मंदी आंटार, नु बाप्तिस्मा शेशेतोड योहान, तर काही मंदी एलीया समजास्तार, तर इंगोगोर काही मंदी नु संदेष्ट्याल लोन्केल वगाड उंडाव इल्ला आंटार.”
29मंग येशुड वारनी आडग्या, “मिक निन यवाड उंडान इल्ला वाटास्ताद?” पेत्रड उत्तर इच्या, “नु ख्रिस्त उंडाव.” 30येशुड शिष्यलान आन्या, “निन यवाड उंडान इदी यवारकीच शप्पाकुंडा.”
येशुनदी सेवा, दुख इंगा साव — 8:31—10:52
स्वतः सच्चे बद्दल येशुनदी भविष्यवाणी
31वाड वारकी नेरपेदेंक आंट्या, मनशी कोडकु शेंगेम दु:ख सहन शेय्याला. आब्बागार, मुख्य याजक मंदी, नियमशास्त्र शिक्षकलु इर तीकेल नाकारादेंक दावाला, वान जेमफडा मतेशेदेंक दावाला इंगा मुड नाळाक वाड इंगा जिवंत आय्यी इदी आय्येद नक्की उंडाद. 32वाड इदी स्पष्ट मनता शप्या, आप्पुड पेत्र येशुन बाजुक तिस्केन वान बेद्रीच्या. 33येशुड तिरगीगास वान शिष्यल तीकुड सुशा इंगा पेत्रन बेद्रीची आन्या, “हे शैतान, ना देगाटेल यल्ली फो! येनटीक की नु परमेश्वर माटला तीकुड ध्यानाम इयाव, तर मनशी माटला तीकुड ध्यानाम इस्ताव.”
येशुन यंका नडशेद अर्थ
34मंग येशुड मना शिष्यलान इंगा मंदीन फिलच्या इंगा वारनी आन्या, “जर यवारकी आना ना यंका वच्चेद उंटे तर वाड स्वताद नकार शेयाला. वानदी क्रुस येत्ताला इंगा ना यंका दावाला. 35यवाडाना स्वताद जेम वाचाय मतेदेंक सुशी वाड जेम गमायमती इंगा यवाडाना ना इचांग इंगा सुवार्ता इचांग जेम गमायमती वाड स्वताद जेम वाचायमती. 36मनशी आंता दुन्याम जिंकाश्या इंगा स्वता जेमुद नाश शेशा तर वानकी येम फायदा? 37जेम बद्दल मनशी येम इच्ची? 38व्यभिचारी इंगा पापी पिढीला यवार पण नाद इंगा ना वचनलाद शिग्गु फेटतार तर मनशी कोडकु यप्पुड मना आब्बान गौरवला पवित्र दुतला जताक वच्ची आप्पुड वारदी शिग्गु फट्टी.”
Currently Selected:
MRK 8: WNT
Highlight
Share
Compare
Copy
Want to have your highlights saved across all your devices? Sign up or sign in
