MRK 7
7
परुशी मंदीद दिखावटी स्वभाव
1काही परुशील इंगा नियमशास्त्र शिक्षकलु यवार यरुशलेम शहरकेल वच्चीनीर, वार येशुन देगार जमा आय्यीर. 2इंगा वार वान काही शिष्यलान अशुद्ध, आंटे विधी ग्रंथ लेका शेईल कडगांदे तिनेताप्पुड सुशीर. 3येनटीक की परुशी मंदी इंगा आंता यहुदी मंदी वार आब्बा-तातागारी परंपराल लेका शिंगार शेईल कडगीनशे तिनार. 4संतालेल यकोचीनेद वस्तु कडगीन शिवाय वार तिनार. वार पुर्वजलाय इंगोगो शेंगेम चालीरीतील इंगा शंबुल, तफ्याल, राग्याय बतकुल कडगेद इल्ला इंगोगो नियमलु पाळास्तार. 5मंग परुशील इंगा नियमशास्त्रला शिक्षकलु येशुन आडगीर, “नी शिष्यल आब्बा-तातागारी परंपराल येनटीक पाळायार? शेईल कडगांदे येनटीक तिंटार?”
6येशुड वारनी आन्या, “यशयाड यप्पुड मी ढोंगी मंदी बद्दल भविष्यवाणी शेशा आप्पुड वानदी बरोबर उंड्या. यशया रास्ताड,
‘इ मंदी नोरता नाद सन्मान शेस्तार
पण वारदी अंतकरण ना देगाटेल धुराम उंडाद.
7 वार इल्ले नाद उपासना शेस्तार
येनटीक की वार मंदीक शास्त्र आंका येम नेरपुतार आय मन्सुल शेशीनेय नियमलु उंडाय.’”
8 “मीर परमेश्वरदी आज्ञाद त्याग शेशी, मीर मनशीद परंपरा पाळास्तुनार.” 9इंगा वाड वारनी आन्या, “मीर मी परंपराल पाळायदेंक परमेश्वरदी आज्ञा तेम्पेदेंक मंचीद पद्धत फुडकी तिशीनार. 10मना पुर्वज मोशेड शप्पीनाड की, ‘नु नी आम्मा-आब्बानदी मान फेट्ट इंगा या मनशी स्वता आम्मा आब्बान बद्दल वाईट माटलाडताड, वान जेमफडा मत्ताला.’#निर्गम 20:12; अनुवाद 5:16. 11पण मीर नेरपुतार, यवाड पण वगा मनशी मना आब्बान इंगा आम्मान इल्ला आनी शकास्ताड येम, की, ‘मिक मदत शेशेदेंक ना देगार रव्वासाने उंडाद, पण मिक मदत शेशेदेंक निन आदी वापरायान, निन आदी परमेश्वरकी अर्पण शेशेदेंक फेटीनान.’ 12तर मीर वान आब्बान इचांग इंगा आम्मा इचांग वान मुंदारकी येमीच शेयानीयार. 13इल्ला मीर मी परंपराल चालु फेट्टी परमेश्वरदी वचन रद्द शेस्तार इंगा इल्लोनी शेंगेम माटलु शेस्तार.”
मनशीन अशुद्ध शेशे माटलु
14आप्पुड येशुड मंदीद समुदायनी वापस फिल्ची आन्या, “प्रत्येक मनशी नाद इनना इंगा इदी तेल्चकोंडा.”
15 “बैटीकेल मनशी लोनीक फोई वान अशुद्ध शेशी इल्ला येमीच लेद, तर मनशी लोनीकेल येम येलताय आय्ये वान अशुद्ध शेस्ताय. यवारकी आना गुम्माल उंटे वार इनाला.”
16-17मंदी समुदायनी इडशी येशुड इल्लुक फोया आप्पुड शिष्यल वान आ दाखला बद्दल आडगीर, 18वाड वारनी आन्या, “मिक पण इदी तेल्वाद येम? याद बैटीकेल मनशी लोना फोयताद आदी वान अशुद्ध शेय्याद इदी मिक तेल्वाद येम? 19येनटीक की आदी वान अंतकरणलोंग फोद तर वान कडपुलोंग फोयताद इंगा यंकसार बैलीकला शरीर बैट्या फडताद.” इल्ला शप्पी आन्नी प्रकारी आन्नामलान वाड शुद्ध घोषित शेशा. 20इंगा वाड आन्या, “याय मनशी अंतकरण लोन्केल बैटीक येलताय आय्ये मनशीन अशुद्ध शेस्ताय. 21येनटीक की लोनीकेल आंटे अंतकरण लोन्केल वाईट विचार बैटीक येलताय. खोटा माटलु, दोंगा, खुन, 22व्यभिचार, लोभ, वाईटपणा, कपट, असभ्यता, हेवा, तीटलु, अहंकार इंगा मुर्खपणा, 23इ आन्नी वाईट माटलु लोनीकेल वस्ताय इंगा मनशीन अशुद्ध शेस्ताय.”
सुरफिनी आंडीदांदी विश्वास
24येशुड आंदु यल्ली इंगा सिदोन प्रांतला फोया. आंदु वाड वगा इल्लुक फोया इंगा इदी यवारकी तेल्वाराद इल्ला वानदी इच्छा उंड्या. तरी वानकी दोक्केन निलचेद शक्य लेकुंड्या. 25पण यादान शिन्ना कुतुरकी अशुद्ध आत्मा आंटीन्या इल्ला वगा आंडीद वान बद्दल लगेच इन्या इंगा आदी वच्ची वानी काळलु मोक्या. 26आदी आंडीद ग्रीक उंड्या इंगा सिरीयालोन फिनीशिया इंदु फुट्टीन्या. आदी येशुन दान कुतुरलोनदी दैयाम तिशेदेंक विनंती शेशा. 27वाड दान आन्या, “पहिला बिळ्ळान कडपु निंडा तिनानी येनटीक की बिळ्ळाद रोट्या तिस्केन आदी कुक्कालकी येशेद शिंगार लेद.” 28पण आदी वान आन्या, “प्रभु, कुक्काल पण बिळ्ळा शेतला लोन्केल तल्यालोनदी सल्लीनेद खरकाटा तिंटाय.” 29वाड आ आंडीदान आन्या, “नी इ माटला इचांग फो, नी कुतुरलोनदी दैयाम यल्ली फोयनाद.” 30इंगा आदी इल्लुक वच्या आप्पुड दान कुतुर गादीमिंदा फडीनाद इंगा दान लोन्केल दैयाम यल्ली फोयनाद. इल्ला आदी सुशा.
येशुड बहिऱ्या-तोतऱ्या मनशीन शिंगार शेस्ताड
31येशुड सोर प्रदेशकेल वापस वच्या इंगा सिदोन केल दकापलीस दावाता गालील सरोवर तीकुड वच्या. 32आंदु काही मंदी वगा बहिऱ्या-तोतऱ्या मनशीन येशुन तीकुड यकोचीर इंगा नु वान मिंदा शेय फेट्ट इल्ला विनंती शेशीर. 33येशुड वान आ मंदी देगार केल वगा बाजुक येका फोई वान गुम्माला बोटलु येशा इंगा येन्गील उंची वान न्यालकाक शेय आंच्या. 34वाड स्वर्ग तीकुड सुशी श्वास इडशा इंगा आन्या, “इफ्फाथा.” आंटे, “मोकळा का.” 35इंगा आद्दे वेळला वानी गुम्माल मोकळा आय्या इंगा न्यालका मोकळा इड्या इंगा वानकी माटलाडा वच्या. 36आप्पुड इदी यवारकी शप्पाकुंडा इल्ला वाड वारकी आदेश इच्ची शप्या. पण वाड वारनी यंता मना शेशा, आल्ला वार जास्तने शपका फोईर. 37वार मंदी शेंगेम आश्चर्य चकीत आय्यीर इंगा आनीर, “वाड आंता बागा शेशीनाड. वाड बहिऱ्योकी इनेद इंगा मुक्योरकी माटलाडेद शक्ती इस्ताड.”
Currently Selected:
MRK 7: WNT
Highlight
Share
Compare
Copy
Want to have your highlights saved across all your devices? Sign up or sign in
