MRK 6
6
येशुनदी नासरेथला तिरस्कार
1मंग येशुड कफर्णहुम केल यल्ली नासरेथकी वान नगरकी वच्या इंगा वान शिष्यल वान जताक वच्चीर. 2शब्बाथ दिनमु वाड यहुदी सभास्थानला नेरपु. शेंगेम मंदी वानदी शिक्षण इनीर आप्पुड वार थक्क आय्यीर. वार आनीर, “इ मनशीक इदी शिकवण यंदुकेल शिक्या? वानकी इदी ज्ञान यंदुकेल शिक्कीनाद? इंगा इन शेयता इ यंनी चमत्कारलु आयताय? 3यवाड सुतार, मरीयादान कोडकु इंगा याकोब, योसे, यहूदा इंगा शिमोन इर तम्मुड वाड इडे उंडाड गरा?” इंगा इर मना जताक उंडार वार वान शेल्यांलु लेर येम? वानदी स्वीकार शेशे बद्दल वारकी प्रश्न फड्या. 4इंगा येशुड वारनी आन्या, “संदेष्ट्यालदी सन्मान काद इल्ला लेद. फक्त वान नगरला, वान नातेवाईकलाला इंगा वान परिवारला वानदी सन्मान काद.” 5काहीक बिमार मंदी मिंदा शेय फेट्टी वाड वारनी बागा शेशा, दिन शिवाय इंगोगोट यादुच चमत्कार वानकी आंदु शेयालेद. 6वार अविश्वास इचांग वारकी आश्चर्य वाटाशा. मंग येशुड नेरपका उळाउळाक तिरग्या.
बारा प्रेषितलान आंपेद
7मंग येशुड बारा शिष्यलान वान तिकुड फिलच्या इंगा वारनी जोडी-जोडीता आंप्या, वाड वारकी अशुद्ध आत्माल मिंदा अधिकार इच्या. 8इंगा वारकी आज्ञा इच्या की, “कट्ट्यान इडशी प्रवास इचांग इंगोगोट येमीच येका फोकुंडा. रोट्याल, झोळी इंगा खिशाला दुडलु तिस्कुनाकुंडा. 9पण शप्पुल फेटकेन नडना; रोंड आंगुल तिस्कुनाकुंडा.” 10इंगा वाड वारनी आन्या, “यादी पण इल्लुक मीर फोतार आंदु मीर आदी शहर इडशी नंताक निलना. 11इंगा या जागाला मिद स्वागत काक फोई लेकाते मिद इनाक फोयार आंदुकेल यलेताप्पुड, वारकी साक्ष कावाला आंका मी काळाद मन्नु आंदे झटकास काडना.” 12मंग शिष्यल आंदुकेल यल्लीर इंगा मंदी पश्चात्ताप शेयाला दिनिचांग वार घोषणा शेशीर. 13वार शेंगेम दैयाल तिशीर इंगा शेंगेम बिमार मंदीन नुन्या तीक्की वारनी बागा शेशीर.
योहान बाप्तिस्मा इच्चेतोनदी हत्या
14हेरोद राजा येशुन बद्दल इन्या येनटीक की येशुनदी फेर आन्नी तीकुड पसराशीन्या. काही मंदी आंदुर, “बाप्तिस्मा शेशेतोड योहान सच्चीनोर लोन्केल लेशीनाड, आंका वान देगार चमत्कार शेशेद सामर्थ्य उंडाद.” 15बाकी मंदी आंटार, “येशुड एलीया उंडाड.” तर काही मंदी आंदुर, “इड संदेष्टा शेंगेम पहिला संदेष्ट्याल लोन्केल वगाड उंडाड.” 16इंगा हेरोद यप्पुड इन्या आप्पुड वाड आन्या, “या योहानदी निन तलकाया कोशिन्टीन वाडे लेशीनाड.” 17हेरोद स्वता योहाननी फट्टी तुरुंगला येशेद आज्ञा इच्चीन्या येनटीक की वान तम्मुड फिलिप्प इन वडती हेरोदियादान जताक हेरोद फेंडली शेस्कुंड्या. 18इंगा योहान हेरोदकी शपदु की, “नु नी तम्मुन वडती फेटकुनेद इदी शास्त्र नुसार लेद.” 19दिनिचांग हेरोदीयाद योहान बद्दल मनला कोफाम फेटन्या. आदी वान मत्तेस्काडेद मोका सुदु. पण आदी वान मती शकायालेद, 20येनटीक की योहान नितीमान इंगा पवित्र मनशी उंडाड इदी जानाशी हेरोद वानकी यरस्कुंदु इंगा वानदी रक्षा शेयदु. हेरोद योहानी माटलु इनदु आप्पुड, शेंगेम यरस्कुंदु, तरी वाड वानी माटलु खुशीता इनदु. 21मंग वगा नाड इल्ला संधी शिक्या की हेरोदीयाद येम तरी शेशी शकाशा. हेरोद वान वाढदिवस नाबद वान प्रधान, सेनापतीलाक इंगा गालील प्रांतलोन मुख्य मंदीक तिनकाम इच्या. 22हेरोदियादान कुतुर लोनीक फोई नाचाशी हेरोद इंगा वच्चीने सुट्टालनी खुश शेशा. आप्पुड हेरोद राजा कुतुरनी आन्या, “निक येम बेक आदी आडगु निन निक इच्यान.” 23वाड वट्टु येस्केन दान आन्या, “ना आर्दाम राज्य नंताक येम पण नु आडग्याव आदी निन निक इच्यान.” 24आदी बेटीक फोया इंगा दान आम्मान आन्या, “निन येम आडगुदुन?” आम्मा आन्या, “बाप्तिस्मा इच्चेतोड योहानदी तलकाया.” 25मंग आदी आनबिडा लगेच लोनीक राजा तीकुड फोया इंगा आन्या, “नाक नु इप्पुडे बाप्तिस्मा इच्चेतोड योहानदी तलकाया तल्याला फेट्टी यकोची इल्ला नाद इच्छा उंडाद.” 26राजाक शेंगेम वाईट वाटाशा, पण वान वट्टु इचांग इंगा तिनेदेंक वच्चीने सुट्टाल इचांग वानकी दानकी लेद आना दाक फो. 27आप्पुड राजा लगेच जल्लादनी आंपी योहानदी तलकाया यकोची इच्चेद आज्ञा इच्या. मंग वाड फोया इंगा जेललोंग फोई योहानदी तलकाया कोसकाड्या. 28आदी तलकाया तल्याला फेट्टी कुतुरकी इच्या इंगा कुतुर आदी आम्माक इच्या. 29इदी इनी. योहान शिष्यल वच्चीर इंगा वार वानदी फिनग्या येकेन फोईर इंगा कबरला फेट्टीर.
बारा प्रेषितलाद वापस वचकाम
30दिन बाद प्रेषितलु येशुन देगार जमा आय्यीर इंगा वार येम शेशीर इंगा नेरपीर आदी आंता वानकी शप्पीर. 31इंगा वाड वारनी आन्या, “मीर जंगल्लोंग शांत जागालोंग नंडा इंगा रवा आराम शेयना.” येनटीक की आंदु शेंगेम मंदी फोयेद वच्चेद शेयदुर इंगा वारकी तिनेदेंक पण वेळ शिक्काकुंदु. 32आप्पुड वार आंदार नावला कुसनी शांत जागालोंग फोईर. 33पण शेंगेम मंदी वारनी फोयेताप्पुड सुशीर इंगा वार यवार उंडार इदी वारकी तेलच्या आप्पुड उळ्योन्टोर मंदी नडस्का फारका यल्लीर इंगा वार दावा काना मुंची वार आंदुक पोहचाशीर.
पाच हजार मंदीक तिना मतेद
34येशुड कंटाम मिंदा दिगीनेन्का, वाड शेंगेम मंदीद गर्दी सुशा; वार मेपेतोड लेने मेंढऱ्याल लेका उंडीर, दिनिचांग वानकी वारदी दया वच्या; दानिचांग वाड वारकी शेंगेम माटला बद्दल नेरपेदेंक आंट्या. 35शेंगेम फद्दु मुनगी फोयनेंका वान शिष्यल वान तीकुड वच्ची आनीर, “इदी सुनसान जागा उंडाद इंगा इप्पुड शेंगेम माफ आयतुनाद. 36मंदीन फोनी आंटे वार देगार शेलालोंग इंगा उळ्ळाक फोई वार इचांग तिनेदेंक येमाना कोन्केन वच्यार.” 37पण वाड वारकी उत्तर इच्या, “मिरे वारकी तिनेदेंक येमाना इंडा.” वार वान आनीर, “मिम फोई वारकी तिनेदेंक दोनशे यंडी कलदारलाय #6:37 दोनशे यंडी कलदारलाय दोनशे नाळाद मजदुरी रोट्याल कोंका दावाला येम?” 38वाड वारनी आन्या, “फोंडा इंगा सुडना की मी देगार यन्नी रोट्याल उंडाय?” सुशी नेंका वार आनीर, “मा देगार आय्यीद रोट्याल इंगा रोंड मिल उंडाय.”
39येशुड आंता मंदीक आज्ञा इच्या की गड्डी मिंदा कुसुंडा. 40आप्पुड वार शंभर-शंभर इल्ला पंगतता कुसनीर. 41येशुड आय्यीद रोट्याल इंगा रोंड मिल तिस्केन फैनिक स्वर्ग तीकुड सुशी, धन्यवाद इच्या इंगा रोट्याल तेंपी फंचेदेंक वान शिष्यल देगार इच्या इंगा मिलपण फंची इच्या. 42इंगा वार आंदार कडपु निंडा तिनीर. 43इंगा वार मिल्गीने तुकडाली बारा फुटकाल निंचकुनीर इंगा मिलाय पण तुकडाल येका फोईर. 44रोट्या तिनेतोर पाच हजार मन्सुल उंडीर. 45यंकसार निन मंदीन सागेस्तान इंगा मीर नावला कुसनी आतुक बेथसैदा इंदुक फोंडा, इल्ला शप्पी येशुड लगेच शिष्यलान वान मुंदारकी फोयेदेंक शप्या. 46मंदीन आंपी वाड प्रार्थना शेशेदेंक कोंडा मिंदीक फोया. 47फद्दु मुनग्या आप्पुड नाव सरोवर नडमा उंड्या इंगा येशुड वक्काडे भुमी मिंदा उंड्या. 48इंगा वारकी वल्ही मतेदेंक कठीण फोयतुनाद इल्ला वानकी कमशा, येनटीक की घाली वार उलटा उंड्या. इंगा फद्दीना मुड ते सहा वागीन नडमा येशु सरोवर मिंदकेल नडस्का वार तीकुड वच्या, वार देगार केल वानकी मुंदारकी फोयेद उंड्या. 49पण वान सरोवर नेळा मिंदा नडशेताप्पुड सुशी, वारकी वाड दैयाम उंडाड इल्ला वाटाशा इंगा वार कीरलीर. 50येनटीक की वार आंदार वान सुशीर इंगा वार येरस्कुनीर. वाड लगेच वारनी आन्या, “दम फटना, यरस्कुनाकुंडा, निन उंडान.” 51मंग वाड वार तीकुड नावलोंग फो आप्पुड घाली शांत आय्या. आप्पुड वार शेंगेम आश्चर्य चकीत आय्यीर. 52येनटीक की वारकी रोट्याद माटा तेल्वा लेकुंड्या इंगा वारी मनलु कठोर आयन्या.
येशुड गनेसरेतला रोग्यालनी बागा शेस्ताड
53वार सरोवर दाटीनेंका गनेसरेतकी वच्चीर इंगा नाव कट्टेशीर. 54वार नावलेल दिगे ताप्पुडे मंदी येशुन ओळखाशीर. 55इंगा वार आसपास आन्नी भागला आन्नी तीकुड फारका तिरगीर इंगा येंदू पण वाड उंडाड इल्ला मंदी गुम्मा मिंदा फडू, आंदु-आंदुक मंदी बिमार मंदीन मंचाम मिंदा यतकेन फोदुर. 56वाड उळ्योंग लेकाते शेल्लोंग येंदूक पण फोयना, आंदुक मंदी बिमार मंदीन भर संताला यकोची फेटदुर इंगा वान बट्टाल गोंड्यालनी तरी फट्टानिंडा इल्ला विनंती शेयदुर इंगा यंता मंदी वान फट्टीर आंता मंदी बागा आय्यीर.
Currently Selected:
MRK 6: WNT
Highlight
Share
Compare
Copy
Want to have your highlights saved across all your devices? Sign up or sign in
