MRK 5
5
गरसेकर दैयाम फट्टीनोन येशुड शिंगारा शेस्ताड
1मंग येशुड इंगा वान शिष्यल सरोवर आतुक, गरसेकर प्रदेशला वच्चीर. 2येशुड जहाज लोन्केल दिगी नग्रेम अशुद्ध आत्मा आंटीने वगा मनशी कबरलेल यल्ली वानकी भेटाशा. 3वाड कबरला निलदु इंगा वान साखळीलता इंगा कट्टी फेट्टेद इप्पुड यवारकीच शक्य लेकुंड्या. 4येनटीक की वान शेंगेम तुकुल बेड्यालता इंगा साखळीलाता कट्टीगास पण, वाड साखळील तेम्पेस काडीन्या इंगा वान ताबाला फेट्टेद शक्ती यवारताच लेकुंड्या. 5वाड नेहमी मोब्बु-फगुल कबरला इंगा कोंडा मिंदा उंडी कीरलुदु इंगा कुशिंग रायता वान शरीरनी मतकुनु. 6येशुन धुराम केले सुशीन नग्रेम, वाड फारका वच्या इंगा वानी काळलु मोक्या. 7इंगा बेग्गे कीरलीगास आन्या, “हे येशु, परात्पर परमेश्वर कोडकु, नु नडमा येनटीक फडताव? निन नीक परमेश्वरदी वट्टु इस्तान, नाक त्रास इयाक.” 8येनटीक की येशुड वान आंदु, “अरे अशुद्ध आत्मा, इ मनशी लोन्केल यल्ली फो.” 9येशुड आप्पुड आडग्या, “नी फेर येम?” वाड उत्तर इच्या, “ना फेर सैन्य, येनटीक की मिम शेंगेम उंडाम. 10इंगा मोमलान इ प्रदेशलेल बैटीक गेदमाक” इल्ला वाड वानकी शेंगेम विनंती शेयदु. 11आंदु कोंडा मिंदा फंदुलाद वगाट फेद्दाद खांड मेसदु. 12आप्पुड अशुद्ध आत्माल वानकी विनंती शेशा की, “मिम आ फंदुला दुराला, दिनिचांग आटला तीकुड मोमलान आंपकाड.” 13इंगा वाड वारकी परवानगी इच्या. आप्पुड आ अशुद्ध आत्माल यल्ली फंदुला लोना दुर्या इंगा आंदु दोन हजार फंदुलाद खांड फारका फोई कंटाम मिंदकेल सरोवरला फड्या इंगा नेळाला मुनगी सच्ची फोया. 14फंदुल मेपेतोर फारीर इंगा वार उळ्या इंगा शेलाला इदी आंताच शप्पीर, आप्पुड येम आय्या इदी सुशेदेंक मंदी वच्चीर. 15वार येशुन देगार वच्ची नेंका वाड दैयाल फट्टीनोड, आंटे यवान लोना सैन्य उंड्या वाड, बट्टाल फेटकुनोड इंगा शुद्धी मिंदा वच्चीनोड वारकी कमशा, इंगा वारकी येरपु आय्या. 16यवार आदी सुशीनीर वार दैयाल फट्टीनोनकी येम आय्या आदी इंगा फंदुला बद्दल हकीकत इंगोगोरकी शप्पीर. 17आप्पुड मनाम मा प्रांतकेल यल्ली फोवाला इल्ला वार वानकी विनंती शेशीर. 18इंगा मंग वाड नावला फोयेताप्पुड, पहिला यवाड दैयाल फट्टीने मनशी वानकी विनंती शेशा की, नन्नु पण नी जताक तिस्को. 19पण वाड वान मना जताक दानीयाल्या, तर वान आन्या, “नु नी इल्लुक नी इंटल्योन्टोर तीकुड फो इंगा प्रभुड नी इचांग येंता फेद्दा फनी शेशा इंगा निमिंदा यल्ला दया शेशा इदी वारकी शप.” 20आप्पुड वाड यल्या इंगा येशुड याद फेद्दा फनी वान इचांग शेशीन्या आदी दकापलीस इंदु जाहीर शेशेदेंक आंट्या. आप्पुड आंदारकी आश्चर्य वाटाशा.
याईर कुतुर
21मंग येशुड नावला कुसनी आतुक फोया वान देगार मंदीद फेद्दाद समुदाय जमा आय्या इंगा वाड सरोवर देगार उंड्या. 22आप्पुड याईर फेरोड वगा सभास्थानोड अधिकारी आंदुक वच्या इंगा वान सुशी वानी काळलु मोक्या. 23वाड आग्रहता वानकी विनंती शेशा की, “ना शिन्ना कुतुर सच्चेदेंक टेकाशीनाद. आदी बागा कावाला आंका नु वच्ची दान मिंदा शेय फेट.” 24मंग वाड वान जताक यल्या आप्पुड शेंगेम मंदी वान यंका नडदुर इंगा वानभोवती गर्दी शेयदुर.
येशुड वगा रक्तस्त्रावी आंडीदान बागा शेस्ताड
25इंगा आंदु रक्तस्त्रावता बारा यंडलाकेल त्रासला उंडीने वगा आंडीद उंड्या. 26आदी शेंगेम वैद्यला शेतलाता शेंगेम हाल सोसासी दान देगार येम उंड्या आदी आंता खर्च शेशीन्या तरी पण आदी बागा काकुंदु दांदी दुखुम जास्तने आयन्या. 27येशुन बद्दल माटलू इनी आदी आ गर्दीला दुर्या इंगा वान यंकाटेल वच्ची वान बट्टान मुट्ट्या. 28येनटीक की आदी आंदु, “फक्त वान बट्टान जरी मुटतीन तरी निन बागा आय्यान.” 29आप्पुड लगेच दानदी रक्तस्त्राव थांबाशा इंगा आदी आ रोगकेल बागा आय्या इल्ला दानकी शरीरला अनुभव वच्या. 30मना लोन्केल शक्ती यल्या इदी येशुड स्वता बद्दल लगेच ओळखाशा इंगा गर्दीला तिरगी आन्या, “ना बट्टान यवार फट्टीर?” 31वान शिष्यल वान आनीर, “मंदीद समुदाय मनाभोवती गर्दी शेस्तुनार इदी मनाम सुस्तुनाम, तरी नु आंटाव, नाक यवार धक्का आंचीर?” 32मंग यवात इदी शेशीन्या दान सुशेदेंक वाड आन्नी तीकुड सुशा. 33आप्पुड आ आंडीद स्वता बद्दल येम घडाशा, आदी जानाशी यरस्कुं-यरस्कुं इंगा नडगुका-नडगुका वान देगार वच्या इंगा वानी काळलु मोक्की आदी वानकी आंता खरेम शप्या. 34वाड दान आन्या, “बाई, नी विश्वास निन्नु शिंगार शेशीनाद. शांतीता फो इंगा नी पिडा केल मुक्त का.”
येशुड याईर कुतुरनी जिवंत शेस्ताड
35येशुड इदी माटलाडतुनाड इंताटला सभास्थान अधिकारी इल्लु तीकेल काही मंदी वच्ची वान आनीर, “नी कुतुर सच्ची फोयनाद, इप्पुड गुरुजीक त्रास येनटीक इस्ताव?” 36पण येशुड वार माटला तीकुड ध्यानाम इयांदे, सभास्थान अधिकारीन आन्या, “यरस्कुनाक फक्त विश्वास फेट.” 37वाड पेत्र, याकोब इंगा याकोब तम्मुड योहान, इर शिवाय यवारनीच वान जताक दानीयाक फो. 38मंग वार सभास्थान अधिकारी इल्लुक वच्चीर, आप्पुड येडशी कल्ला शेशेतोर गर्दीन वाड सुशा. 39वाड लोनीक फोई वारनी आन्या, “मीर येनटीक येडस्तार इंगा गर्दी शेस्तार? आनबिडा सय्यालेद, फंडकुंडाद.” 40आप्पुड वार वान नग्गेदेंक आंटीर. पण वाड आ आंता मंदीन बैटीक तिस्काड्या इंगा आनबिडा आम्मा-आब्बाड इंगा वान सोबत शिष्यल इरनी येका फोया आनबिडा उंड्या आंदुक वाड लोनीक फोया. 41मंग आनबिडाद शेय फट्टी वाड आन्या, “तलीथा कुम,” दिनदी अर्थ, “आनबिडा, निन निक शपतान, लेय.” 42इंगा लगेच आदी आनबिडा लेशी नडशेदेंक आंट्या; (आदीबारा वर्षद उंड्या.) वार शेंगेम आश्चर्य चकीत आय्यीर. 43इदी यवारकी यरका कावाराद, इल्ला वाड वारकी आज्ञा इच्या इंगा दानकी तिनेदेंक इंडा इल्ला शप्या.
Currently Selected:
MRK 5: WNT
Highlight
Share
Compare
Copy
Want to have your highlights saved across all your devices? Sign up or sign in
