MRK 12
12
दुष्ट शेतकरीलाद दाखला
1येशुड वारकी दाखला शप्पी नेरपेदेंक आंट्या, “वगा मनशी अंगुरलाद बगीच्या आंच्या इंगा दानभोवती कुंपण आंच्या. वाड अंगुरला इचांग गुंताल तव्या इंगा लक्ष फेटदेंक मच्च्या कट्ट्या. वाड आदी शेन शेशेतोरकी बटाइता इच्ची धुराम प्रवास शेशेदेंक यल्ली फोया. 2अंगुरलाद फंटा यल्लेताप्पुड शेतकरी मंदी तीकेल अंगुरला फळलाद हिस्सा शिक्काला दिनिचांग वाड वगा नोकरनी आंप्या. 3पण वार नोकरनी फट्टीर, मत्तीर इंगा उत्ता शेतलाता आंपीर. 4मंग वाड इंगोगो नोकरनी आंप्या. वार वानदी नत्ती फगला मत्तीर इंगा वानदी अपमान शेशीर. 5मंग मालकुड इंगा वगा नोकरनी आंप्या.वार वान जेमफडा मतेसकाडीर. वाड शेंगेम मंदीन आंप्या. शेतकरी मंदी काही मंदीन मत्तीर तर काही मंदीन जेमफडा मतेशीर. 6मालकुन देगार आंपेदेंक इप्पुड फक्त वान कोडकु उंड्या. वाड आन्या, नक्कीच वार ना कोडकुक मान इच्यार. वाड वान प्रिय कोडकु उंड्या आखरीक वाड वान आ शेतकरीला तीकुड आंप्या. 7मंग वार शेतकरील वगा-मेगारनी आनीर, इड तर वारीस उंडाड. नंडा, मनाम इन जेमफडा मतेशेद आंटे जागा मनाद आय्यी! 8मंग वार वान फट्टीर, जेमफडा मतेशीर इंगा अंगुरला बगीच्या लोन्केल बैटीक फेकेशीर. 9तर मंग अंगुरला बगीच्या मालकुड येम शेशी? वाड वच्ची इंगा शेतकरी मंदीन मतेशी इंगा अंगुरला बगीच्या इंगोगोरकी इच्ची.”
10 “मीर इदी शास्त्रला वाचायालेद येम?
याद राय कट्टेतोर नाकारीच्चीर आदी कोनशीला आय्या.
11 इदी परमेश्वर तीकेल आय्या,
इंगा आदी मा कंडलाला अद्भुत फनी उंडाद.” #
स्तोत्रसंहिता 118:23.
12धार्मिक पुढारील येशुन फट्टेदेंक दावा सुदुर. पण वारकी मंदीद येरपु उंड्या. वान फट्टेद वारदी इच्छा उंड्या येनटीक की वारकी यरका उंड्या की, इदी दाखला वाड वारनी सुशीगास शपतुन्या. मंग वार वान इडशी यल्ली फोईर.
कैसरकी कर इच्चे बद्दल प्रश्न
13यंकसार यहुदी पुढारील वान चुकीता माटलाडेताप्पुड फट्टाला आंका काही परुशी इंगा काही हेरोदी मंदीन वान तीकुड आंपीर. 14वार वान देगार वच्चीर इंगा आनीर, “गुरुजी, नु इमानदार उंडाव इंगा पक्षपात शेयांदे नु परमेश्वरदी दावा खरेम नेरपुताव इदी माक यरका उंडाद तर मंग कैसरकी कर इच्चेद योग्य उंडाद की लेद? इंगा मिम आदी इय्याला की इयाराद?” 15पण येशुड वारदी ढोंगीपना ओळखाशा इंगा वारनी आन्या, “मीर नाद परीक्षा येनटीक सुस्तार? ना तीकुड वगाट यंडीद कलदार येका दांडा आंटे निन आदी सुस्तान.” 16मंग वार वान तीकुड वगा कलदार यकोचीर. वाड वारनी आडग्या, “इ कलदार मिंदुडदी चित्र इंगा फेर यवारदी उंडाद?” वार वान आनीर, “कैसरदी.” 17यंकसार येशुड वारनी आन्या, “येम कैसरदी उंडाद आदी कैसरकी इंडा इंगा याद परमेश्वरदी उंडाद आदी परमेश्वरकी इंडा.” आप्पुड वार शेंगेम आश्चर्य चकीत आय्यीर.
पुनरुत्थान इंगा फेंडली
18मंग, याद पुनरुत्थान काद इल्ला मानाशेतोर सदुकी मंदी वान देगार वच्ची वार वान आडगीर, 19“गुरुजी, मोशेड मा इचांग पवित्र शास्त्रला इल्ला राशीनाड की, जर यादाना मनशी तम्मुड सच्ची फो इंगा वान वडती निलच्या, पण दानकी बिळ्ळु लेर तर मना तम्मुनदी वंश मुंदारकी नडवाला आंका आ मनशी दान जताक फेंडली शेस्कुनाला इंगा सच्चीने तम्मुनदी वंश वाढाय मताला.#उत्पत्ती 38:8; अनुवाद 25:5. 20इल्ला यवार तरी योड तम्मुळ्ळु उंडीर. फेद्दा तम्मुड वडती शेस्कुन्या इंगा वाड बिळ्ळु कावांदे सच्ची फोया. 21दुसरा तम्मुड दान जताक फेंडली शेस्कुन्या, वाड पण बिळ्ळु कावांदे सच्ची फोया. 22तिसरा तम्मुन जताक पण आल्ले आय्या. आ योड तम्मुळ्ळाला वगारकी पण आ आंडीदान तीकेल बिळ्ळु कालेद. आखरीक आदी आंडीद पण सच्ची फोया. 23योड तम्मुळ्ळु पण दान जताक फेंडली शेस्कुनींडीर तर पुनरुत्थान नाबद यप्पुड मंदी सच्चीनोर लोन्केल लेशार आप्पुड आदी यवार वडती आय्यी? येनटीक की योड पण तम्मुळ्ळु दान जताक फेंडली शेस्कुनींडीर.” 24येशुड वारनी आन्या, “शास्त्रलेख इंगा परमेश्वरदी सामर्थ्य मिक यरका लेद दिनिचांग मीर इल्ला चुक शेस्तुनार. 25येनटीक की यप्पुड मंदी सच्ची फोयनोर लेशार आप्पुड वार फेंडली शेस्कुनाक फोयार इंगा शेशीयाक पण फोयार, पण वार स्वर्गलोन स्वर्गदुत लेका उंड्यार. 26पण सच्ची फोयनोर वापस लेशे बद्दल मीर मोशेन पुस्तकला आग्गी आंटीने झुडपु बद्दल वाचायालेद येम? आंदु परमेश्वर मोशेन आन्या, निन अब्राहाम परमेश्वर, इसहाक परमेश्वर इंगा याकोब परमेश्वर उंडान. 27वाड सच्चीनोर परमेश्वर लेड तर जिवंत मंदी परमेश्वर उंडाड. मीर शेंगेम फेद्दाद चुक शेस्तुनार.”
आंदार काना फेद्दा आज्ञा
28यंकसार वगा नियमशास्त्र शिक्षक वारनी जगडाम आडेताप्पुड इन्या. येशुड वारकी शिंगार उत्तर इच्या आदी सुशा. आप्पुड वाड आन्या, “आन्नी आज्ञाल काना फेद्दाद इल्ला पहिला आज्ञा याद?” 29येशुड उत्तर इच्या, “पहिला आज्ञा इदी, ‘हे इस्राएला, इन, प्रभुड मना परमेश्वर वक्काडे परमेश्वर उंडाड. 30नु नी पुर्ण अंतकरणता, पुर्ण जेमता, पुर्ण मनता इंगा पुर्ण शक्तीता नी प्रभु परमेश्वर मिंदा प्रेम शेय.’ 31दुसरा आज्ञा इदी उंडाद, ‘यल्ला स्वता मिंदा प्रेम शेस्ताव आल्ले नी शेजाऱ्यान मिंदा प्रेम शेय.’ इटलाकाना फेद्दाद यादुच आज्ञा लेद.” 32आ मनशी उत्तर इच्या, “परमेश्वर वक्काडे उंडाड, गुरुजी इंगा वान इडशी यवारुच लेर इल्ला नु आंटी आदी खरेम उंडाद.#यशया 45:18; अनुवाद 4:35. 33वान मिंदा पुर्ण अंतकरणता, पुर्ण बुद्धीता, पुर्ण शक्तीता इंगा यल्ला स्वता मिंदा प्रेम शेस्ताव आल्ले नी शेजाऱ्यान मिंदा प्रेम शेय इ आन्नी यज्ञल इंगा अर्पणलु, याय मनाक शेशेद आज्ञा इच्चीनेय उंडाय, दान काना जास्त फेद्दाद उंडाद.”#अनुवाद 6:4-5. 34येशुड सुशा की, आ मनशी इमानदारीता उत्तर इच्चीनाड. आप्पुड वाड वान आन्या, “नु परमेश्वर राज्यकेल धुराम लेव.” दिन नंतर वान प्रश्न आडगेद हिम्मत यवारुच शेयालेद.
ख्रिस्त दाविद कोडकु इंगा प्रभुड
35येशुड परमेश्वर भवनला नेरपेताप्पुड, वाड आन्या, “ख्रिस्त दाविद राजा कोडकु उंडाड इल्ला नियमशास्त्र शिक्षकलु आंटार आदी यल्ला शक्य उंडाद? 36दाविद राजा स्वता पवित्र आत्माता प्रेरित आय्यी आन्या,
‘प्रभु परमेश्वर, ना प्रभुनकी शप्या की,
निन नी शत्रुलान नी काळा किंदा येशी नंताक,
नु ना मंची शेय तीकेल कुसुन.’
37 दाविद स्वता ख्रिस्तन ‘प्रभु’ आंटाड तर मंग ख्रिस्त दाविद कोडकु यल्ला?” इंगा मंदीद गर्दी वानदी आनंदता इनदुर.
शास्त्री मंदी विषयला इशारा
38नेरपेताप्पुड वाड आन्या, “नियमशास्त्र शिक्षकला बद्दल सावधान उंडना. वारकी जंपु-जंपु बट्टाल फेटकेन तिरगेदेंक इंगा संताला दंडाम तिस्कुनेदेंक आवडास्ताद. 39सभास्थानलोन इंगा पंगतलोन आंदार काना मंची जागाद वारकी आवड उंटाद. 40वार विधवा आंड्योरी इंडलु तिनेस्तार इंगा मंदीक सुपेदेंक वार फेद्दा-फेद्दाय प्रार्थनाल शेस्तार. इ मंदीक शेंगेम कडक शिक्षा आय्यी.”
कंगाल विधवादानदी दान
41येशुड परमेश्वर भवनला दानपेटी मुंदार कुसनी मंदी पेटीला दुडलु येयदुर इदी सुदु इंगा शेंगेम धनवान मंदी शेंगेम दुडलु येयदुर. 42मंग वगा गरीब विधवाद वच्या इंगा आदी रोंड राग्याय कलदारलु आंटे वगा दमडी येशा. 43येशुड मना शिष्यलान फिलच्या इंगा आन्या, “निन मिक खरेम शपतान की, आंदार यवार आ पेटीला दान येशीर वार आंदार काना इ विधवाद जास्त येशीनाद. 44निन इल्ला आंटान येनटीक की वार देगार याद शेंगेम उंड्या दांटल्योन्केल वार काहीक दान इच्चीर, पण आदी गरीब उंडी पण दान देगार येम उंड्या आदी आंताच इचकाड्या. आदी आंताच दानदी जीवन जगाशेद सहारा उंड्या.”
Currently Selected:
MRK 12: WNT
Highlight
Share
Compare
Copy
Want to have your highlights saved across all your devices? Sign up or sign in
