MRK 13
13
परमेश्वर भवनदी इंगा युगदी शेवट दिन बद्दल येशुनदी भविष्यवाणी
1मंग येशुड परमेश्वर भवन लोन्केल यल्लेताप्पुड वान शिष्यल लोन्केल वगाड आन्या, “गुरुजी, सुड, इ यंता अद्भुत राळ इंगा फेद्दाद भवन उंडाद.” 2येशुड वान आन्या “नु फेद्दाद भवन सुस्तुनाव? आंदु वगा राय इंगोगो राय मिंदा निलवाक फोई. दांटल्योन्केल प्रत्येक राय किंदा फडी फोई.” 3येशु परमेश्वर भवन मुंदार जैतुन कोंडा मिंदा कुसनीगास उंड्या. पेत्र, याकोब, योहान इंगा अंद्रिया इर वान एकांतला आडगीर, 4“इ माटलु यप्पुड घडाशी इदी माक शप इंगा इ माटलु पुर्ण आय्येद वेळ वच्ची आप्पुड याद चिन्हल घडाशी?” 5मंग येशुड वारकी शप्या, “मिमलान यवार फसाय मताराद आंका सावधान उंडा. 6शेंगेम मंदी ना फेरता वच्यार इंगा आन्यार की, ‘निन ख्रिस्त उंडान’ इंगा वार शेंगेम मंदीन फसाय मत्यार. 7यप्पुड मीर युद्धला बद्दल इंगा युद्धला अफवाल बद्दल इन्यार आप्पुड यरस्कुनाकुंडा. इदी नक्की आय्यीच. पण दिनता शेवट काक फोई. 8वगा राष्ट्र इंगोगो राष्ट्र मिंदा लेशी, वगा राज्य दुसरा राज्य मिंदा लेशी, जागा-जागा मिंदा भुकंप आय्यी इंगा दुष्काळ फडी. पण इ माटलू आंटे नाशदी सुरुवात उंडाद.”#यिर्मया 6:24.
9 “मीर सावध उंडना. वार मिमलान न्यायालयला इच्यार इंगा सभास्थानला मिमलान देब्बाल मत्यार. वारकी साक्ष कावाला दिनिचांग मिक राज्यपाल इंगा राजाल नीला फडाबेक आय्यी. 10इ माटलु घडाशेकाना मुंची आन्नी राष्ट्रला सुवार्ताद घोषणा कावाने बेक. 11यप्पुड वार मिमलान तुरुंगला येशी चौकशी इचांग यकोच्यार आप्पुड पहिलाने मीर येम माटलाडा बेक दिंदी काळजी शेयाकुंडा, येनटीक की आप्पुडे सुचाय मतेदेंक वच्ची आदी माटलाडाना, येनटीक की माटलाडेतोर मीर लेर तर पवित्र आत्मा मी इचांग माटलाडी. 12तम्मुड तम्मुन इंगा आब्बाड स्वता कोडकुने मतेशेदेंक फटीची, बिळ्ळु आम्मा-आब्बान मिंदा लेशार इंगा वार वारनी मतेशार.#लूक 21:16; मीखा 7:6. 13इंगा ना फेर इचांग आंता मंदी मिद कोफाम शेशार, पण यवाड आखरी नंताक टीकाशी वानदे तारण आय्यी.”
कष्टद वेळ
मत्तय 24:15-28; लूक 21:22-24
14 “यप्पुड मीर नाशकी कारण इल्ला भयंकर माटा, दानिएल संदेष्ट्याड शप्पीनेय ‘उजाड शेशेय घान माटलु’ याद यंदु बेकालेद आंदु सुशार. (वाचाशेतोर दिंदि अर्थ येम इदी समजाशी तिस्कुनाला) आप्पुड यवार यहुदिया प्रांतला उंडार वार कोंडा तीकुड फारका फोवाला. #
दानिएल 9:27; 12:11. 15या मनशी मना इल्लु मिंदा उंडी वाड इंटल्योन्केल येमाना येकेन वद्देंक किंदीक दिगाराद. 16इंगा जर वगाड तरी मनशी शेल्ला उंटे तर वाड मना झगा येकेन वद्देंक यंकाक इल्लुक फोवाराद. 17आ दिनमुलाला या आंड्योर रोंजलमनशी इंगा बिळ्ळाक फाल तापेतोर उंड्यार वार इचांग इदी यंता भयानक उंडी. 18इदी सलीकालाम कावाराद आंका प्रार्थना शेयना. 19येनटीक की आ दिनमुलाला याद त्रास आय्यी आदी परमेश्वर दुन्याम निर्माण शेशीनकेल इबद नंताक काले कुंड्याला इंगा यप्पुडुच काक पण फोई. #मत्तय 24:21. 20परमेश्वर जर आदी दिनमु कमी शेय्या लेकुंटे तर यवार पण बतकाकुनीर. पण यवारनी वाड निवडाशीनाड इल्ला निवडासने मनशी इचांग आदी दिनमु वाड कमी शेशीनाड. 21इंगा यवाडाना मिमलान आन्या की ‘सुड, ख्रिस्त इंदु उंडाड लेकाते आंदु उंडाड,’ तर वान मिंदा विश्वास फेट्टाकुंडा. 22येनटीक की खोटा ख्रिस्त इंगा खोटा संदेष्ट्याल नीला फड्यार इंगा शक्य आयते तर वार निवडाशीने मंदीन फसाय मतेदेंक चिन्हल इंगा आश्चर्यय फनुल शेशार. 23सुडना, आप्पुड मीर सावधान उंडा. निन वेळ कावा काना मुंची मिक आंता शप्पी फेटनान.”
मनशी कोडकुद वापस वच्चेद
24 पण आ दिनमुलाला इ संकटलु वच्ची फोईनेंका,
“सूर्य नल्लांग फडी फोई,
चंद्र यलगु इयाक फोई.”
25 “मोडाम लोन्केल सुक्काल फडी फोई
इंगा मोडामला शक्तील हालाशी फोई.” #
प्रकटीकरण 1:17; यशया 34:4. 26इंगा मंदी मनशी कोडकुन मोडाम मिंदा कुसनी फेद्दा सामर्थ्यता इंगा गौरवता वच्चेताप्पुड सुशार.#दानिएल 7:13. 27यंकसार वाड वान स्वर्गदुतलान आंपी इंगा नालुंग दिशाल केल, पृथ्वी कोनाकेल वार मोडाम कोना नंताक वान निवडाशी नोरनी जमा शेशार.#अनुवाद 30:4; मत्तय 24:31.
अंजीर शट्टुद दृष्टांत
मत्तय 24:32-35; लूक 21:29-33
28 “अंजीर शट्टु तीकेल नेरस्कोंडा. यप्पुड दानी डांकुल कवळांग आयताय दानकी आकलु फुटताय आप्पुड यंडाकालाम देगार वच्चीनाद इदी मिक तेलस्ताद. 29आल्ले मीर यप्पुड इ माटलु आय्येताप्पुड सुशार आप्पुड मिक तेल्ची की, वाड आदी वेळला कवाड देगार वच्चीगास उंडाड. 30निन मिक खरेम शपतान की, इ आन्नी माटलु आय्यी नंताक इदी पिढी संपायाक फोई. 31मोडाम इंगा पृथ्वी नष्ट आय फोई पण नाय वचनलु नष्ट काक फोई.”#यशया 48:8; लूक 21:33.
सावधान उंडेद गरज
मत्तय 24:36-44
32 “आ दिनमु बद्दल लेकाते आ वेळ बद्दल यवारकीच यरका लेद, स्वर्गलोन स्वर्गदुतलाक पण लेद इंगा कोडकुक पण लेद. फक्त आब्बानकी यरका उंडाद. 33सावध उंडा, प्रार्थनाला मेल्का उंडा येनटीक की आदी वेळ यप्पुड वच्ची इदी मिक यरका लेद. 34आदी वेळ इल्ला उंडाद की, वगा मनशी प्रवासकी फोयेताप्पुड इल्लु इडस्ताड इंगा वान प्रत्येक नोकरकी फनी नेमाशी इस्ताड. वाड लक्ष फेटेतोरकी मेल्का उंडेद आज्ञा इच्या. 35दिनिचांग मीर मेल्का उंडा, येनटीक की इल्लु मालकुड यप्पुड वच्ची इदी मिक यरका लेद. वाड फद्दु मुनगेताप्पुड, निम्मा मोब्बुल्ला, फद्दीना कोडी आरवाकाना मुंची लेकाते फद्दीना यप्पुड वच्ची इदी मिक यरका लेद. 36जर वाड अचानक वच्या तर मिमलान निद्दारला उंडेताप्पुड सुडाराद. 37येम मिक शपतान, आदी आंदारकी शपतान, मेल्का उंडा.”
Currently Selected:
MRK 13: WNT
Highlight
Share
Compare
Copy
Want to have your highlights saved across all your devices? Sign up or sign in
