PHP 2
2
एकजुट निलचेदेंक विनंती
1जर ख्रिस्तला काही आश्वासन, प्रेमला काही सांत्वन, पवित्र आत्माद सहभागीता, काही कळवळा इंगा करुणा उंडाद, 2तर मीर वगामन उंडाला, वगा-मेगार मिंदा सारखाने प्रेम शेयाला, वगाजेमता इंगा वगामनता कावाला. इल्ला नाद आनंद पुर्ण शेयाला.
नम्रताद विनंती
3इंगा स्वार्थला लेकाते घमंडला येमीच शेयाकुंडा, पण नम्रतागोन इंगोगोरनी मना काना शिंगार समजायना. 4मीर यवारुच स्वतादे फायदा सुडाकुंडा, तर इंगोगोरदी पण सुडना.
प्रभु येशुन नम्रताद इंगा बलिदानदी उदाहरण
5मिद स्वभाव आल्ले उंडाला यल्ला येशु ख्रिस्तद उंडाद.
6यवाड परमेश्वर स्वरुपला उंडी पण,
परमेश्वर बरोबरीक उंडेद मना फायदा उंडाद इल्ला समजायालेद,
7तर स्वतान खाली शेशा, आंटे मनशी समानताला आय्यी,
दासदी स्वरुप धारण शेशा,
8इंगा मनशी रुपला प्रकट आय्यी वाड स्वतान नम्र शेशा,
इंगा वाड साव, आदी पण क्रुस मिंदुडदी साव सहन शेशा;
इड नंताक आज्ञापालन शेशी वाड स्वतान नम्र शेशा.
9दिनिचांग परमेश्वर वान आंदार काना उंच शेशा,
इंगा वानकी आदी फेर इच्या याद आन्नी फेरलाला श्रेष्ठ उंडाद.
10दिनिचांग की, स्वर्गला, पृथ्वी मिंदा इंगा पृथ्वी किंदा,
प्रत्येक मोकाल येशुन फेरता टेकायाला,
11इंगा परमेश्वर आब्बान गौरव इचांग,
प्रत्येक न्यालका कबुल शेयाला की येशु ख्रिस्तने प्रभुड उंडाड.
यलगु लेका चमकायना
12दिनिचांग हे ना प्रिय मंदी, मीर यवार नेहमी आज्ञापालन शेस्का वच्चीनार, येरस्केन इंगा नडगुकेन मी तारण इचांग फनी शेस्केन उंडना, फक्त निन देगार उंटान आप्पुडे लेद, तर विशेष शेशी आप्पुड पण यप्पुड निन मी देगार लेकुंटान.#१पेत्र 1:17. 13येनटीक की वाड परमेश्वरे उंडाड यवाड वान इच्छाता मिद इच्छा पुर्ण शेस्ताड, इंगा मी शिंगार इच्छा इचांग फनी शेस्ताड.
14येम पण मीर शेस्तार, आदी कुरकुर इंगा वादविवाद शेयांदे शेयना; 15दिनिचांग की, इ कुटील इंगा भ्रष्ट आय्यीने मंदी नडमा मीर निर्दोष इंगा निष्कपट परमेश्वर निष्कलंक बिळ्ळु इल्ला कावाला, आ मंदी नडमा मीर जीवनदी वचन मुंदारकी शेशी सुपेताप्पुड येलगु लेका दुन्यामला कमस्तार. 16जीवनदी वचन गच्चे फटना, जर इल्ला आयते, तर निन घमंड शेशान, ख्रिस्त वच्चे दिनमुला नाद फारेद व्यर्थ कालेद, इंगा नाद मेहनत वाया फोलेद.
17मी विश्वास बलिदानला इंगा सेवाला नाद जेम जरी फोयते तरी निन आनंदीत उंडान, इंगा मी जताक आनंद शेस्तान; 18इल्ले आनंद शेयना, इंगा ना जताक पण आनंद शेयना.
तीमथ्यद कौतुक
19प्रभु येशुला नाक आशा उंडाद की, निन लग्गाने तीमथ्यन मी तीकुड आंप्यान, दिनिचांग की मी बद्दल इनी निन आनंदीत आय्यी शकाशान. 20येनटीक ना देगार वान लेका इंगोगोड यवाडुच लेड यवाड पुर्ण अंतकरणता मिद काळजी तिस्कुनी; 21येनटीक की आंदार स्वतादे फायदा सुस्तार, ख्रिस्त येशुनदी सुडार.#१तीमथी 4:10; 4:16; गलती 4:17. 22पण मिक यरका उंडाद, की तीमथ्यड वानदी योग्यता सुपीचीनाड, यल्ला बिडा मना आब्बान जताक सेवा शेस्ताड, आल्ले वाड शुभवर्तमान प्रचार शेशेदेंक ना जताक सेवा शेशीनाड. 23दिनिचांग नाद आशा उंडाद, की ना जताक येम आय्यी इल्ला नाक यरका आय्यीन नग्रेम निन वान मी तीकुड आंपकाड्यान. 24पण नाक प्रभुन मिंदा विश्वास उंडाद, की निन स्वता लगेच मी तीकुड वच्यान.
एपफ्रदीतदी कौतुक
25पण निन एपफ्रदीतनी यवाड ना तम्मुड, इंगा सहकर्मी इंगा सहसैनिक इंगा मी प्रेषित इंगा नाद गरज भागायमती नाद सेवा शेशेतोड, वान मी तीकुड आंपेद नाक शिंगार वाटाशा. 26येनटीक की मीर इनीनार, की वाड बिमार उंडाड, वाड मिमलान भेटाशेदेंक शेंगेम उत्सुक उंड्या इंगा परेशान उंड्या; 27वाड खरेमे बिमार उंड्या इंगा सच्चेदेंक टेकाशीन्या, पण परमेश्वर वान मिंदा दया शेशा इंगा फक्त वान मिंदाने लेद तर, ना मिंदा पण दया शेशा, दिनिचांग की नाक दुख मिंदा दुख कावाराद. 28आंका, निन वान आंपेद जास्त घाई शेस्तीन, दिनिचांग की वान जताक वापस भेटाशी मीर आनंद शेयाला, इंगा नाद दुख पण कमी कावाला. 29दिनिचांग पुर्ण आनंदता प्रभुला वानदी स्वागत शेयना. इल्लोन्टोरदी मान फेटना. 30येनटीक की वाड ख्रिस्तन फनी इचांग वानदी जेम धोकाला येशी सच्ता-सच्ता बतक्या, दिनिचांग की मीर नाद सेवा शेशेदेंक यंदु कमी फडतीर आदी पुर्ण शेयाला.
Currently Selected:
PHP 2: WNT
Highlight
Copy
Compare
Share
Want to have your highlights saved across all your devices? Sign up or sign in