PHP 4
4
विश्वासी मंदी इचांग पौलदी शिक्षण
1दिनिचांग हे ना प्रिय आक्का तम्मुळ्ळालाला, यल्ला मीर नाद आनंद इंगा मुकुट उंडार मी तीकुड नाद मन आंटी उंडाद, हे ना प्रिय मंदी, मीर प्रभुला टीकाशी निलना.
आखरीद उपदेश — 4:2-9
2निन युवदीया दानकी इंगा सुंतुखे दानकी विनंती शेस्तान की, मीर प्रभुला वगामन कावाला. 3ना खरेम सोबती निन निक पण विनंती शेस्तान की, नु वारदी मदत शेय, येनटीक की वार ना जताक शुभवर्तमान प्रचार शेशे दिंटल्या, तम्मुड क्लेमेंत इंगा ना बाकीचे सहकर्मीला जताक मेहनत शेशीर, यवारदी फेर जीवन पुस्तकला राशीनेद उंडाद.
4प्रभुला नेहमी आनंद शेयना; इंगा शपतान, आनंद शेयना. 5आंता मंदीक मिद सहनशीलता तेल्वाला; प्रभुड लग्गान वच्चेतोड उंडाड. 6यादुच माटाद काळजी शेयाकुंडा पण प्रार्थना इंगा विनंती शेशी धन्यवाद इच्ची मिक येम बेक आदी परमेश्वरकी शपना; 7आंटे आंता बुद्धी काना आतुक उंडीनेद परमेश्वर इच्चीनेद शांती मी अंतकरणनी इंगा विचारलान ख्रिस्त येशुला सांभाळीच्ची फेट्टी.
8हे आक्का तम्मुळ्ळालाला, आखरीक इंते शपतान की, येम पण खरेम उंडाद, येम पण आदरनीय उंडाद, येम पण शिंगार उंडाद, येम पण शुद्ध उंडाद, येम पण प्रशंसनीय उंडाद, येम पण श्रवणीय, येम पण सद्गुण, येम पण स्तुती, दान मिंदा विचार शेयना. 9ना तीकेल येम मीर नेरस्तीर, येम स्वीकार शेस्तीर इंगा ना तीकेल येम इंटीर इंगा सुस्तीर आदी मीर पाळायना इंगा शांती इच्चेतोड परमेश्वर मीर जताक निलची.
धन्यवाददी शब्द — 4:10-20
भेट इचांग पौलदी आभार
10नाक प्रभुला शेंगेम आनंद आय्या. इप्पुड मिद ना बद्दल काळजी इंगा जागृत आय्या. मीर नक्की नाद पहिलाकेल काळजी शेयदुर, पण मिक संधी लेकुंड्या. 11नाक येमाना कमी फडीनाद आंका निन इल्ला माटलाडतुनान इल्ला लेद, येनटीक की निन या परिस्थितीला उंडान आ परिस्थितीला खुश निलचेद नेरशीनान. 12गरीबीला यल्ला निलचेद इदी नाक यरका उंडाद इंगा भरपुरीला यल्ला निलचेद इदी पण नाक यरका उंडाद; प्रत्येक माटाला इंगा परिस्थितीला निन तृप्त आय्येद, उपास निलचेद इंगा वाढाशेद कमी आय्येद नेरशीनान. 13इंगा यवाड नाक शक्ती इस्ताड आ ख्रिस्त तीकेल निन आंताच शेशी शकास्तान. 14तरी मीर शिंगार शेस्तीर की ना दुखला मीर सहभागी आयतीर.
15हे फिलिप्पैलोन मंदीलाला, मिक यरका उंडाद की, शुभवर्तमान सुरवातकी निन मासेदोनिया शहर लोन्केल यलतीन, आप्पुड मी शिवाय इंगोगोट यादुच मंडळी इच्चे-तिस्कुने बद्दल नाद मदत शेयालेद. 16यप्पुड निन थेस्सलनीका नगरला उंटीन आप्पुड मीर वगातुक लेद तर रोंड तुकुल नाद गरज भागाय मततीर. 17इल्ला लेद की नाक दान बेक पण नाक इल्लोनदी फळ बेक याद मी फायदा इचांग वाढास्का फोवाला. 18ना देगार आंताच उंडाद इंगा भरपुर उंडाद इंगा एपफ्रदीत शेयता मीर आंपतीर आदी शिक्या आंकेन नाक शेंगेम आयनाद. आदी तर जस्काय सुगंधीत समर्पण उंडी, परमेश्वरकी शिंगार इंगा खुश शेशेद अर्पण इल्ला उंडाद.#इब्री 13:16. 19ना परमेश्वर वान धनसंपत्तीता मिद आंता गरज ख्रिस्त येशुला गौरवता भागायमती. 20मना परमेश्वर आब्बानदी गौरव युगानयुग कावाला. आमेन.
आखरीद दंडाम — 4:21-23
आखरीद निरोप
21यवार ख्रिस्त येशुला उंडार आ परमेश्वर मंदीक सलाम शपना. यवार तम्मुळ्ळु ना जताक उंडार वार मिक सलाम शपतार. 22आंदार परमेश्वर मंदी, विशेषतः यवार कैसर इंटल्योन्टोर उंडार मिक सलाम शपतार. 23मना प्रभु येशु ख्रिस्तद कृपा मी जताक उंडाला.
Currently Selected:
PHP 4: WNT
Highlight
Copy
Compare
Share
Want to have your highlights saved across all your devices? Sign up or sign in