1 Ovakorinto 11
11
1Ntjolela ndjen̯i, ngaame hindji holela Kristus.#1 Kor. 4:16; Filp. 3:17
Himwa thele okukala meongalo
2Me mu pandula himu nt̯ipaluka movipuka avihe nahimwa kambulitha elongo lyandje, ngahi mbe mu longa. 3Iya me hala mu iwe okutya Kristus oye e li omutwe womulumentu auhe, nomulumentu oye e li omutwe womukadhintu, naKalunga oye e li omutwe waKristus. 4Omulumentu auhe nguma kumbu ne nguma teetha ae na tja komutwe okutya ma t̯itha ohon̯i Kristus. 5Iya omukadhintu auhe nguma kumbu ne nguma teetha ahe likutile komutwe, tje litha nae li nkulumutwe, ma t̯itha ohon̯i omulumentu we. 6Iya omukadhintu andaa ke likutile komutwe, odhondjutji dhe ngadhi heywe, iya ama t̯a ohon̯i okuheywa ne okukululwa onkulumutwe, nge likute. 7Omulumentu kaa ulu okulikuta komutwe, mena lyokutya ye otjithika netumbalo lyaKalunga. Iya omukadhintu etumbalo lyomulumentu,#Gen. 1:26-27 8mena lyokutya omulumentu ka dhile momukadhintu, iya omukadhintu oye a dha momulumentu.#Gen. 2:18-23 9Iya omulumentu haye a utilwa omukadhintu, iya omukadhintu oye a utilwa omulumentu. 10Iya mena lyovaengeli omukadhintu u tha okulikuta komutwe, a yulike okutya u li kohi yetumino lyomulumentu we. 11Nandaku tiwa otjo nyahoka, atu li muMuhona, omukadhintu kaa ulu okukala po ahape na omulumentu, omulumentu kaa ulu okukala po ahape na omukadhintu. 12Iya ngomukadhintu hiaa dhile momulumentu, nomulumentu otjo madhi momukadhintu. Iya ovipuka avihe vi dha kuKalunga.
13Tokolen̯i ovene andaa tji li nawa omukadhintu a kumbe kuKalunga mokati kovantu, hé likutile komutwe? 14Ountjitwe owene kombinga imo mau ku longo okutya omulumentu okukala nodhondjutji odhonde matji mu t̯itha ohon̯i. 15Iya omukadhintu ae na odhondjutji odhonde outhewe, mena lyokutya madhi mu thevetha nawa. 16Iya andaa pe na nguma tetha ombata, nt̯e nomaongalo aKalunga katu na po uke ondjila imo amatu kumbu.
Okulya Okudhilikwa kwaMuhona
(Mat. 26:26-29; Mark. 14:22-25; Luk. 22:14-20)
17Iya hehi hime mu heele, híme hala oku mu pandula, mena lyokutya amwa ongana pamo kamu ningi nawa, mu ninga navi unene. 18Olutenga, mba tyaa okutya amwa ongana, mpamu onganena mu liyapuka pokati, mu li movinkopo, otjipuka hehi mbe tji itavela. 19Iinga, okuliyapauka maku tha okukala mokati ken̯i, opo mbave tji i okuliun̯ikwa mokati ken̯i, va moneke. 20Iya amwa ongana pamo, kamu li Okulya Okudhilikwa kwaMuhona, 21mena lyokutya mu lithinta, kamu likevelele, tji tya vala hengu we thiwa nondjala, ngunya wa pyaluka. 22Iya kamu na tja odhonganda oko mu ka lila ne oko mu ka nwina? Mwa tomba eongalo lyaKalunga ne mu hala okut̯itha ohon̯i mbahave na hive na tjo? Nge mu heele vi? Nge mu pandule? Motjipuka hehi híme mu pandula.
23Iya elongo hendi ndimbe mu longa mbe li pewa kuMuhona okutya Muhona Jesus out̯iku mbwinya hiaa welelekwa, wa itha omungome, 24ha kumbu, he u nyembula, ha tyaa: “Hehi olutu lwandje ndumamu yandjelwa, tji ningen̯i amamu nt̯ipaluka.” 25Iya kon̯ima yokulya wa itha po otjinwino, ha tyaa: “Otjinwino hehi ewaneneno epe mombindhi yandje, amamu tji nu, tji ningen̯i amamu nt̯ipaluka.”#Eks. 24:6-8; Jer. 31:31-34
26Iya etango alihe amamu li namamu nu motjinwino hehi, mamu hipulula et̯o lyaMuhona katee me ya. 27Iya nguma li navi omungome hembu, ye ha nu navi motjinwino hehi, ma kala nodhonkali, ha tombetha olutu nombindhi yaMuhona. 28Iya omuntu nge lithongonone omwene hima li omungome hembu nahima nu motjinwino hehi. 29Iya nguma li, ye ha nu ahama tangan̯eke olutu lwaMuhona, me lilile, ye he linwine ekoyo omwene. 30Iya mena lyovipuka hembi, mokati ken̯i mu na ovingone ovingi novavedhi ovengi, ovengi va ka lala po. 31Iya ngaile twe lithongononene ovene, ngai katu koyelwe. 32Nt̯e twa koywa, ha tu longwa kuMuhona, opo hátu ka yumanekwa pamo nouye.
33Vakwetu, iya amwa ongana amamu li Okulya Okudhilikwa kwaMuhona, likevelelen̯i. 34Andaa pe na ngwaa t̯a ondjala, nga lye koyawo, amwa ongana, opo hámu lietele ekoyo lyaKalunga. Iya mbyaa hupu ko, hime ya, me ya oku mu longa vyo.
Currently Selected:
1 Ovakorinto 11: DBNT
Highlight
Copy
Compare
Share
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.