1 Ovakorinto 12
12
Otjali tjOmbepo Ondhilikwa
1Vakwetu, iya napano hime popi ouhunga novipuka vyopambepo, híme hala mu kale hámu tji i.
2Mu tji i okutya himwa li ovapaani, mwa twalwatwalwa kovikalunga mbihavi popi, havi mu pukitha. 3Iya me mu heele okutya kaku na tja omuntu nguma viyulwa kOmbepo yaKalunga, ha popi okutyaa: “Jesus nga thingwe,” ko kaku na tja omuntu nguma ulu okutyaa: “Jesus oye e li Muhona,” kakele vala ama viyulwa kOmbepo Ondhilikwa.
4Pe na otjali tjOmbepo hitji lili nahitji lili, atjaa tji yandjwa kOmbepo yatjo ndjoka.#Rom. 12:6-8 5Pe na odhondjila ndhii lili nandhii lili okuundapa ovilinga, iya Muhona, Kalunga yuumo. 6Pe na ounongo mbuu lili nambuu lili okuundapa, iya Kalunga yuumo, nguu undapa movipuka avihe movantu avehe. 7Iya omuntu auhe ma pewa eholololo lyOmbepo Ondhilikwa mena lyouwa wovantu avehe. 8Omuntu umo ma pewa ondaka younongo kOmbepo Ondhilikwa, omukwawo ha pewa ondaka yodhondunge kOmbepo yatjo tuu ndjoka, 9umo ma pewa eitavelo kOmbepo, tainkolo omukwawo ma pewa odhonkono dhokuvelula ovavedhi kOmbepo yatjo tuu ndjoka. 10Omuntu umo ma pewa otjali tjokuninga ovilingankono, umo ma pewa otjali tjokupopya etumwalaka lyaKalunga, umo ma pewa otjali tjokutangan̯eka notjokuthongonona odhombepo. Omuntu umo ma pewa otjali tjokupopya momalaka ngahae iwe, umo okupitiya omalaka. 11Iya ovipuka hembi avihe vi undapwa kOmbepo yatjo tuu ndjoka Ondhilikwa ndjii li imo, oyo i yandja komuntu auhe ngahi mai hala.
Olutu ilumo, lwo lu na ovin̯ipo ovingi
12Iya olutu ngahi lu li lumo, lwo lu na ovin̯ipo ovingi, ovin̯ipo nandaku tiwa ovingi, vyo olutu lumo, naKristus otjo e li wo nyahoka.#Rom. 12:4-5 13Iya nant̯e wo atuhe kutya nee Ovajuda ne Ovagreka ne ovapika ne ombahave thi ovapika twa tjatjelwa molutu lumo kOmbepo Ondhilikwa imo, hatu pewa Ombepo yatjo tuu ndjoka.
14Iya olutu kalu tungilwe wo notjin̯ipo tjimo, lwa tungwa novin̯ipo ovingi. 15Ompadhi ngai tyaa: “Ame hitjin̯ipo tjolutu, mena lyokutya hikuwoko,” hehi kaatji i tjaele okutya i kale ahai thi otjin̯ipo tjolutu. 16Iya okutwi ngaku tyaa: “Ame hitjin̯ipo tjolutu, mena lyokutya ame haame eho,” hehi kaatji ku tjaele okutya ku kale ahaku thi otjin̯ipo tjolutu? 17Olutu aluhe ngaile lwa li eho, ngai olutu malu tee vi? Olutu aluhe ngaile lwa li okutwi, ngai olutu malu thimbuna vi? 18Iya Kalunga oye a twaa ovin̯ipo avihe molutu ngahi ma hala omwene. 19Iya ngaile ovin̯ipo avihe vya li otjin̯ipo tjimo, ngai olutu lu li pi? 20Iya ovin̯ipo ovingi, olutu ilumo.
21Eho kaali ulu okuheela okuwoko hali tyaa: “Ame híme ku hepa,” nomutwe kaau ulu okuheela ompadhi hau tyaa: “Ame híme ku hepa.” 22Ovin̯ipo vyolutu mbii ngala ovingone, ovyo tu hepa unene. 23Iya ovin̯ipo vyolutu mbihavi tumbalele, ovyo tu thevetha nawa, mbimatu t̯i ohon̯i, hatu vi tjikile 24okupon̯a ovin̯ipo vyetu mbyoka mbyee thewa. Iya Kalunga wa twaa kumo ovin̯ipo vyolutu, ovin̯ipo mbihavi tumbalele, he vi pa etumbalo enene, 25molutu opo hámu kala eliyapauko, iya ovin̯ipo vi lit̯ile otjiho pokati. 26Iya otjin̯ipo tjimo amatji ihama, ovin̯ipo ovikwawo mavi ihama pamo natjo wo, ne otjin̯ipo tjimo atja tumbalekwa, ovin̯ipo avihe mavi hulukwa.
27N̯e amuhe mulutu lwaKristus, nomuntu auhe otjin̯ipo tje. 28Iya Kalunga ovantu avehe we ve twaa pomaluvedhe awo meongalo, olutenga ovayapostoli, olutyavali ovaprofeti nolutyatatu ovalongethi. Iya ku na uke mbava ninga ovilingankono, haku landula mbava pewa odhonkono okuvelula ne okupopila ovakwawo ne oku ve viyula ne okupopya momalaka ngahae iwe.#Efes. 4:11 29Ovantu avehe ovayapostoli? Ovantu avehe ovaprofeti? Ovantu avehe ovalongethi? Ovantu avehe va ninga ovilingankono? 30Ovantu avehe ve na ounongo wokuvelula? Ovantu avehe va popya momalaka ngahae iwe? Ovantu avehe va pitiya? 31Iya tween̯i omitima vyen̯i movipuka mbii na otjilinga otjinene. Me mu yulikile uke ondjila ombwa unene.
Currently Selected:
1 Ovakorinto 12: DBNT
Highlight
Copy
Compare
Share
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.