1 Ovakorinto 14
14
Otjali tjokupopya momalaka ngahae iwe netumwalaka lyaKalunga
1Landulen̯i ohole, mu kale amamu hala unene otjali tjopambepo, unene tuu otjali tjokupopya etumwalaka lyaKalunga. 2Nguu popya momalaka ngahae iwe, ka heele ovantu, iya u heela Kalunga, mena lyokutya kape na ngume mu tee. Ye u undapethwa kOmbepo Ondhilikwa ama popi oviholekwa. 3Iya nguu popya etumwalaka lyaKalunga, u heela ovantu, he ve popile, he ve vandhipaleke, ye he ve tendeleke. 4Nguu popya momalaka ngahae iwe, u litunga omwene, iya nguu popya etumwalaka lyaKalunga, u tunga eongalo.
5Me hala okutya amuhe mu popye momalaka ngahae iwe, iya unene tuu mu popye etumwalaka lyaKalunga. Nguu popya etumwalaka lyaKalunga, wa pon̯a nguu popya momalaka ngahae iwe, nkwai ama pitiya okutya eongalo li litunge. 6Iya vakwetu, andaa me ya kun̯e ame popi momalaka ngahae iwe, me mu popile tji, andaa nan̯i híme mu thitululile eholololo lyaKalunga ne ounongo ne etumwalaka lyaKalunga ne elongo?
7Ngahi tji li ovipuka mbii hikwa, ovisandji novihumba, omuntu ma koneke vi himavi popi, andaa koo hiki nawa? 8Iya nongoma yovita ahai teekele nawa, aan̯i ngume lilongekedhele okuya kovita? 9Iya nan̯e amamu popi odhondaka ndhihamadhi teeka nawa, aan̯i nguma tee okutya mamu tya vi? Odhondaka dhen̯i madhi i nombepo. 10Mouye mu na omalaka omengi ngae lili nangae lili, iya kape na tja nolimo ndihali teeka. 11Nguma popi elaka ndihe i okutya ndjingendi kuye, naye ama popi elaka ndihe i ongendi kwaame. 12Iya nan̯e wo himamu hala okukala amu na otjali tjopambepo, kalen̯i nontanto yokukondjela himatji tungu eongalo.
13Iya omuntu nguma popi momalaka ngahae iwe, nga kumbe kuKalunga, e mu pe ounongo wokupitiya omalaka ngoka himaa popi. 14Iya ame kumbu momalaka ngahae iwe, ombepo yandje oyo i kumba vala, atjaa omalipulo andje kae litwaa mo. 15Iya mba thele okuninga vi? Me kumbu nombepo yandje, iya he kumbu wo nomalipulo andje. Me imbi nombepo yandje, iya he imbi wo nomalipulo andje. 16Andaa mo yandja ompandu kuKalunga nombepo yoye, omukwen̯i nguhe na hiee i, ma tya vi “Amen” himo yandja ompandu? Ngunya ke ku yuvite himo popi. 17Tjikootjimo tji li nawa, mo yandja ompandu kuKalunga, atjaa komukwen̯i nguhe ku yuvite, kaatji mu tungu.
18Ame me pandula Kalunga okutya ndji popya momalaka ngahae iwe oku mu pon̯a amuhe. 19Iya meongalo, he popi po odhondaka ntano ndhii yuvitwe, ndhimadhi longo, onawa okupon̯a okupopya odhondaka omayovi omulongo ndhihadhi yuvitwe.
20Vakwetu, hámu lipula ngodhondele. Kalen̯i odhondele movipuka ovivi, iya momalipulo kalen̯i ovanene. 21Moveta mwa sonekwa okutyaa:
“Muhona ma tya,
ame me ka heela ovantu vandje hemba
okupitila momalaka ngae lili
nomovinyo vyodhongendi,
atjaa nandaku tiwa otjo nyahoka,
kaava ka nteelela.”#Jes. 28:11-12
22Iya okupopya omalaka ngahae iwe, etangan̯eko kumbahava itavelele, hakumbava itavela, tainkolo otjali tjokupopya etumwalaka lyaKalunga, etangan̯eko kovaitaveli, hakumbahave thi ovaitaveli.
23Iya andaa eongalo alihe lya ongana pamo, avehe hava utu okupopya omalaka ngahae iwe, atjaa hamu ya mbahave tji i ne mbahave thi ovaitaveli, kaava tya mamu vele epamba? 24Iya andaa avehe mava popi etumwalaka lyaKalunga, atjaa hamu ya nguhe thi omwiitaveli ne omuntu vala, me liteyulula, ha londolwa kondaka ndjee yuvite, 25noviholekwa vyomomutima we mavi hololoka poluhandja, he lit̯imike po, ha tumbaleke Kalunga, ha hipulula ama tyaa: “Otjatjili, Kalunga u li pun̯e.”
Okuliteelela meongalo
26Vakwetu, napano tji li vi? Amwa ongana pamo meundapelokalunga, umo u na eimbilo, umo ma longo ovakwawo, umo ma hololele ovakwawo oviholekwa vyaKalunga, umo ma popi momalaka ngahae iwe umo ma pitiya. Iya ovipuka avihe hembi ngavi kale amavi tungu eongalo. 27Iya andaa pe na nguma popi elaka ndihali iwe, kon̯ima yomapopyo avali ne atatu, ngaku landule nguma pitiya. 28Iya andaa kape na nguma pitiya, nguma hala okupopya meongalo nga nyime, nkwai nga kale vala ame lipopile ne ama popi kuKalunga. 29Vavali ne vatatu mbava pewa etumwalaka lyaKalunga, ngava popye, tainkolo ovakwawo mava thongonona soka ovakwawo himava popi. 30Iya andaa umo mumbava kala pohi, u na hiaa holololelwa kuKalunga, ngwaa vadhwa ama popi ngetji nyimi. 31Amuhe mamu ulu okupopya etumwalaka lyaKalunga, atjaa lipen̯i omaluvedhe ooumo naumo, opo omuntu auhe e li longe, ye a vandhipalekwe. 32Mbava pewa otjali tjokupopya etumwalaka lyaKalunga, ngave tji kambule nawa, 33mena lyokutya Kalunga ka hala tu kale atwa ngwangwana, iya u hala tu kale atwa tutuvala, atu li nawa.
Ngahi tji li momaongalo aehe ovadhilikwa vaKalunga, 34ovakadhintu meongalo ngava kale ava nyimi, oveta yOvajuda ngahi mai popi okutya ovakadhintu háva kala ovaviyuli. 35Andaa ve na himava hala okwiiwa, ngava pule kovalumentu vawo modhonganda. Iya omukadhintu okupopya meongalo, ohon̯i.
36Ne odhondaka dhaKalunga dha uta mun̯e? Ne okun̯e vala dha vadha? 37Andaa pe na ngume lipula okutya ye omuprofeti ne u na otjali tjopambepo, nga koneke nawa okutya ovipuka mbime mu sonekele vya dhi kuMuhona. 38Iya andaa pe na nguhe na ko natja notjipuka hehi, Muhona naye kaa kala ae na ko natja naye.
39Vakwetu, iya kalen̯i amamu hala okupopya etumwalaka lyaKalunga, hámu tjaele nguma popi omalaka ngahae iwe. 40Ovipuka avihe ngavi ningwe monkalo ombwa ndjaa vyuuka.
Currently Selected:
1 Ovakorinto 14: DBNT
Highlight
Copy
Compare
Share
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.