1 Ovakorinto 15
15
Eimuko lyaKristus kout̯e
1Iya napano vakwetu, me mu thipalukitha ondaka ombwa, ondaka ombwa ndjimbe mu teethela, ndjoka wo ndjimwa tambula mumwa kulama wo. 2Mwa hupithwa kondaka hendji ombwa ndjimbe mu teethela, andaa mwe i kambulitha, nkwai amwa itavele vala nyahoka.
3Mbyaa tumbala unene komeho yovipuka avihe mbyoka mbimba pewa, mbe mu etela vyo, okutya Kristus wa t̯ila odhonkali dhetu, omisonekwa ngahi mavi popi,#Jes. 53:5-12 4okutya ye wa pakwa, wa imunwa kout̯e etango etyatatu, omisonekwa ngahi mavi popi.#Eps. 16:8-10; Mat. 12:40; Ovil. 2:24-32 5We liholololela Petrus, okudha mpoka he ke liholololela omulongo navavali.#Mat. 28:16-17; Mark. 16:14; Luk. 24:34,36; Joh. 20:19 6Kon̯ima we ke liholololela ovakwetu omathele atano potjikando tjimo. Ovengi owomuwo tee napano oko ve li, iya vamo va ka lala. 7Kon̯ima we ke liholololela Jakob, okudha mpoka he ke liholololela ovayapostoli avehe.
8Otjikando tjathiinina we ke lintjolololela, ame ngundji ngala mba yumukwa oluvedhe ahaluye thika.#Ovil. 9:3-6 9Ame mba pon̯wa kovayapostoli avehe, hímba thele okutiwa ndjimuyapostoli, mena lyokutya mba tatethele eongalo lyaKalunga.#Ovil. 8:3 10Iya ame ndji li po ket̯ilonkenda lyaKalunga ngahi ndji li hinyahi. Et̯ilonkenda lye kali hepelele mo mwaame, iya mba undapa tjatjili okupon̯a ovayapostoli avehe, nandaku tiwa hí tji ningile mwaame omwene, et̯ilonkenda lyaKalunga olyo lya ndjundapetha. 11Iya kutya aame ne ovakwetu, nt̯e otjo tu teetha nyahoka, nan̯e mwa itavela.
Eimuko kout̯e lyovat̯e
12Iya andaa tu teetha okutya Kristus wa imunwa kout̯e, ovi iya nan̯i hiku na vamo mbava tya kaku na tja eimuko kout̯e? 13Iya andaa kaku na tja eimuko kout̯e, naKristus ka imuninwe kout̯e. 14Andaa Kristus ka imuninwe kout̯e, neteetho lyetu olyanyahinya vala, neitavelo lyen̯i olyanyahinya vala. 15Iya nan̯i matu kuminine Kalunga, himatu tya wa imuna Kristus kout̯e, ye hé mu imunine, andaa ovat̯e kaava imunwa kout̯e. 16Andaa ovat̯e kaava imunwa kout̯e, okutya naKristus wo ka imuninwe kout̯e. 17Andaa Kristus ka imuninwe kout̯e, okutya neitavelo lyen̯i kali na otjilinga, n̯e mu li uke moulundhi wen̯i. 18Iya namboka wo mbava ka lala, mbava vadhwa ava itavela muKristus, va keka. 19Andaa tu na eliun̯iko muKristus lyomonkalamwenyo vala yokombanda yohi, matu etetha onkenda okupon̯a ovantu avehe.
20Iya Kristus wa imunwa kout̯e, oye e li omutenga muhemba mbava ka lala. 21Nget̯o hilye ya mena lyomuntu umo, neimuko kout̯e wo otjo mali ya mena lyomuntu umo. 22Avehe ngahi va t̯ila muAdam, avehe otjo mava ka kala wo nomwenyo muKristus. 23Iya omuntu auhe kaa imunwa kout̯e moluvedhe lwe: Olutengatenga oKristus, okudha mpoka haku landula ovaKristus, hime ya. 24Iya tjau, ehulilo lyouye hali ya, Kristus hima ka han̯auna po ovatumini, omatumino novanankono, ye ha ka yandja otjilongo tjaKalunga kuKalunga Ihe. 25Iya Kristus u tha okutumina katee Kalunga ma ton̯a odhondjedhi dhe adhihe, he dhi twaa kohi yodhompadhi dhaKristus.#Eps. 110:1 26Ondjedhi yathiinina ndjimai ka han̯aunwa po, oyo i li et̯o. 27Iya omisonekwa mavi tyaa: “Kalunga ovipuka avihe we vi twaa kohi yodhompadhi dhaKristus,” himaku tiwa “ovipuka avihe” kamu kambulililwe Kalunga ngwaa twaa ovipuka avihe kohi yaKristus.#Eps. 8:6 28Iya ovipuka avihe avya tuwa kohi yetumino lyaKristus, okutya Omuna me ke litwaa wo omwene kohi yetumino lyaKalunga, ngoka ngwaa twaa ovipuka avihe kohi yetumino lyaKristus, Kalunga opo a ile omutumini wovipuka avihe.
29Iya napano andaa kaku na tja eimuko kout̯e, ovi ouhunga novantu mbava tjatjwa poluvedhe lwovat̯e? Andaa ovat̯e kaava imunwa kout̯e nokanunu, omena lyatji mu tjatjwa poluvedhe lwovat̯e? 30Iya nant̯e wo tu litwiila tji momaudheu owola aihe? 31Vakwetu, ame etango alihe ndji hala okut̯a, me hala okutya ndji litanga mena lyen̯i muKristus Jesus, Muhona wetu. 32Iya andaa mba lwa novithitu moEfeso monkalo yountu, mba nganyana tji? Andaa ovat̯e kaava imunwa kout̯e, okutya
“Ngatu lye, tu nwe,
mena lyokutya muhuka matu t̯i,”
ngahi tji hewa.#Jes. 22:13
33Hámu pukithwa, ku tiwaa: “Ngumo ende notjimpulu naove mo ile otjimpulu.” 34Kalen̯i ovanadhondunge n̯e mu yethe oulundhi. Pe na ovantu vamo mbahave i Kalunga. Hehi me mu heele tjo, opo mu t̯e ohon̯i.
Olutu ndwaa imunwa kout̯e
35Iya ovantu vamo va pula amava tyaa: “Ovat̯e mava imunwa vi kout̯e? Mava ka imunwa kout̯e nomalutu ngae li vi?” 36Umuhima wanavi! Amo kunu, ombuto kai mene, andaa kai t̯ile. 37Amo kunu, ku kunu otjilya, iya u kuna ombuto, pamo oyomahangu ne atjihe soka himo kunu. 38Iya Kalunga u ninga ombuma i ete otjilya, ngahi ma hala. Ombuma aihe, i ete otjilya tjayo.
39Omalutu aehe kae lithele, iya omalutu ovantu e lili, oovidhila e lili, noodhohi e lili.
40Pe na omalutu omeulu nomalutu opohi. Elaimo lyomalutu omeulu e lili, elaimo lyomalutu opohi e lili. 41Elaimo lyetango li lili, elaimo lyomwedhi li lili, elaimo lyodhonyothi li lili, iya onyothi aihe i na elaimo lyayo.
42Iya eimuko kout̯e lyovantu otjo mali ka kala wo nyahoka. Meheke mu pakwa olutu nduu anda, meimuko kout̯e mu dha olutu nduhalu anda. 43Mu kunwa hitja tombwa, himatji imunwa kout̯e tja tumbala. Mu kunwa hihatji kolele, himatji imunwa kout̯e tja kola. 44Mu pakwa olutu lwountu, hamu imunwa olutu lwopambepo. Ngahi pe na olutu lwountu, otjo pe na wo olutu lwopambepo. 45Kwa sonekwa wo okutyaa: “Omuntu omutenga, Adam, wa ninga omwenyo,” Adam owathiinina wa ninga Ombepo yokuyandja omwenyo.#Gen. 2:7 46Otjopambepo hátjo tje ya olutenga, iya hitje ya olutenga, otjonkalo yountu, okutya haku landula otjopambepo. 47Omuntu omutenga wa mewa meheke, owomeheke, omuntu omutyavali wa dha meulu. 48Ovantu wokombanda yohi va ngala omuntu ngoka ngwaa mewa meheke, ovantu womeulu va ngala omuntu ngoka ngwaa dha meulu. 49Ngahi tu na olupe lwomuntu ngwaa mewa meheke, otjo tu na wo olupe lwomuntu ngwaa dha meulu.
50Vakwetu, me mu heele hinyahi okutya olutu nombindhi kaavi pingana otjilongo tjaKalunga, nahimatji anda, kaatji pingana hihamatji anda.
51Taa tuutuu, me mu heele otjiholekwa okutya haatuhe matu ka t̯a, iya atuhe matu ka lundululwa.#1 Tes. 4:15-17 52Mokaluvedhe okanunu, ngepathaelo lyeho, odhonkwino dhathiinina madhi ka hikwa. Odhonkwino himadhi ka hikwa, ovat̯e mava ka imunwa kout̯e, kaava ka anda uke, iya nt̯e matu ka lundululwa. 53Hitji anda, matji dhala hihatji anda, nahitji t̯a, matji dhala hihatji t̯i. 54Katango himatji anda, matji dhala hihamatji anda, himatji t̯i matji dhala hihatji t̯i, okutya himatji popiwa komusonekwa matji ile otjatjili okutyaa: “Et̯o lya han̯aunwa po, outon̯i we ya.”#Jes. 25:8
55T̯o, outon̯i woye u li pi?
T̯o, eonga lyoye li li pi?#Hos. 13:14
56Eonga lyet̯o oulundhi, nodhonkono dhoulundhi oveta. 57Iya Kalunga nga pandulwe, nguu tu pa outon̯i mena lyaMuhona wetu Jesus Kristus.
58Vahivilikwa vandje, pamen̯i, hámu tenguka. Kalen̯i odhombandhi apehe movilinga vyaMuhona, mu kale amu tji i okutya otjilinga tjen̯i muMuhona katji li vala.
Currently Selected:
1 Ovakorinto 15: DBNT
Highlight
Copy
Compare
Share
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.