2 Ovakorinto 5
5
Onganda yetu yomeulu
1Iya napano tu tji i okutya andaa esase lyetu mutu kala kombanda yohi, lya han̯aunwa po, tu na onganda puKalunga, onganda ndjihai tungilwe nomawoko, onganda yaapehe meulu. 2Iinga, matu kema, matu hala okudhalekwa omudhalo womeulu, 3iya andaa twe u dhalekwa, kaatu vadhwa nyahinya. 4Iinga, iya tainkolo atu li mesase hendi lyokombanda yohi, matu kema, twa twikwa omaudheu. Kaatu hala okudhulwa, iya matu hala okudhalekwa, opo himatji t̯i, tji n̯inwe po kuhitji na omwenyo. 5Iya ngwee tu longeletha motjipuka hehi, oye e li Kalunga, ngwee tu pa Ombepo ye, i kale opinyolo.
6Nt̯e apehe tu na eliun̯iko. Iya tu tji i okutya tainkolo atu li monganda yolutu hendu, katu li monganda puMuhona. 7Iya onkalamwenyo yetu i li meitavelo, hamokumona. 8Iya tu na eliun̯iko, nt̯e twe hulukilwa okudha molutu hendu, matu hala okukala monganda yetu puMuhona. 9Iya nt̯e matu hala wo okuthevelwa Muhona kutya nee tu li molutu hendu ne katu mo. 10Iya atuhe matu ka hololoka kotjipala tjotjipunditumino tjaKristus, opo omuntu auhe a pewe soka hiaa undapa, tainkolo a li molutu kutya otjiwa ne otjivi.#Rom. 14:10
Otjilinga tjokutwaa kumo ovantu
11Iya nt̯e tu tji i okutya okutila Muhona matji tya vi, matu kondjo okuhekelela ovantu puKalunga. Kalunga u tu i nawa, me liun̯ike okutya nan̯e wo mu tu i. 12Nt̯e kaatu linomene n̯e uke, iya matu mu pa oluvedhe mu litange mena lyetu, opo mu tjiiwe okuyaka mbamave litangele himatji moneka, hahitji li momutima. 13Iya andaa matu vele epamba, matu vele mena lyaKalunga. Iya andaa tu li nawa, tu li nawa mena lyen̯i. 14Iya ohole yaKristus mai tu tumine, mena lyokutya twa koneka okutya omuntu umo wa t̯ila ovantu avehe. Hehi matji tya ovantu avehe va t̯a. 15Kristus wa t̯ila ovantu avehe, opo mboka mbave na omwenyo ahamava kala uke muwo ovene, iya va kalele hengu ngwaa t̯a mena lyawo, ye ngwaa imunwa kout̯e mena lyawo.
16Iya napano kape na tja uke ngutu i monkalo yountu, nandaku tiwa twa ivilwe Kristus monkalo yountu, iya napano katu mu i uke nyahoka. 17Iya andaa pe na nguu li muKristus, wa ile omuutwa omupe, ovikulu vya i, taa tuutuu, ye wa ile omupe. 18Ovipuka avihe vi dha kuKalunga ngwee tu wan̯en̯eka naye omwene okupitila muKristus. Kalunga we tu pa otjilinga tjewan̯en̯eko. 19Iya Kalunga wa kala muKristus, ha wan̯en̯eke ouye naye omwene. Iya ke u havelele odhonkali dhawo, iya we tu pa ondaka yewan̯en̯eko.
20Iya nt̯e tuvakalelepo vaKristus. Kalunga omwene oye me tu undapetha, tu mu ilikin̯e, iya poluvedhe lwaKristus matu mu kumbu, mu wan̯en̯ekwe naKalunga. 21Kristus kaa li nodhonkali, iya Kalunga we mu twika odhonkali dhetu, opo moukumo naye tu pewe ouvyuuki waKalunga.
Currently Selected:
2 Ovakorinto 5: DBNT
Highlight
Copy
Compare
Share
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.