Lukas 12

Hámu kala ovalinomi

(Mat. 10:26-27)

1Iya owingi wovantu omayovi nomayovi wa ongana, have lilyatalyata kodhompadhi. Jesus olutenga wa uta okuheela ovalongwa ve ha tyaa: “Lungamenen̯i ontathi yOvafarisai, matji tya okulinoma kwawo.#Mat. 16:6; Mark. 8:15 2Kaku na tja soka hitja t̯imikwa, hihamatji ka holololwa, ko kaku na tja soka hitja holekwa, hihamatji ka kala atji iwe.#Mark. 4:22; Luk. 8:17 3Iya atjihe soka himamu popi met̯iku, matji ka teeka poluhandja, nasoka himamu linyongotolele pokutwi modhondjuwo, matji ka popilwa pokati kovantu.

Aan̯i ngwaa thele okutilwa

(Mat. 10:28-31)

4“Me mu heele mapanga andje okutya hámu tila mboka mbamava dhipaa olutu, wo okudha mpoka háve na uke himava ulu okuninga. 5Iya me mu yulikile ngoka ngumu tha okutila. Tilen̯i Kalunga, nguu na odhonkono okudhipaa nokuyundulila moheli. Iinga, otjo me mu heele okutya Kalunga hengu ngaye mu tila.

6“Odhontjo ntano kadhi landethwa omapeni avali? Mudho kamu na tja noimo ndjaa dhimbwa kuKalunga. 7Iya nodhondjutji dhokomitwe vyen̯i adhihe dha hawa. Hámu tila, n̯e mwa valela okupon̯a odhontjo odhingi.”

Okuhipulula nokulitendela Kristus

(Mat. 10:32-33; 12:32; 10:19-20)

8 Jesus we ve heela ha tyaa: “Iya me mu heele okutya auhe ngoka nguma ntjipulula movipathi vyovantu, nOmuna wOmuntu me ke mu hipulula wo movipathi vyovaengeli vaKalunga. 9Iya ngoka ngume lintendele movipathi vyovantu, naye wo me ke litendelwa movipathi vyovaengeli vaKalunga.

10“Auhe ngoka nguma popi ondaka ndjimai kondjetha Omuna wOmuntu, ma ithilwa po odhonkali, iya nguma penye Ombepo Ondhilikwa, kaa ithilwa po.#Mat. 12:32; Mark. 3:29

11“Andaa mave mu twala kodhosinagoga nokovipala vyovanene novyovatumini, hámu kala notjiho okutya mamu ke ve yaka vi ne mamu ka popya tji,#Mat. 10:19-20; Mark. 13:11; Luk. 21:14-15 12mena lyokutya Ombepo Ondhilikwa mai ke mu longa powola yatjo vala ndjoka soka himu tha okupopya.”

Eeli lyomuhona omuhima

13Iya umo owomowingi wovantu wa heela Jesus ha tyaa: “Mulongethi, heela omukulwandje tu liyandjele epingo.”

14Iya Jesus we mu heela ha tyaa: “Mulumentu ove, aan̯i ngwaa ntwaa po ndji kale omukoyi ne omuyandji wepingo lyen̯i?” 15Ye wa heela ovantu ha tyaa: “Lungamen̯i, n̯e mu yepe olwiho aluhe, mena lyokutya omuntu kaa ulu okuhupitha omwenyo we koun̯ingi wemona lye.”

16Jesus we ve heela eeli ha tyaa: “Otjana tjomulumentu umo omuhona tja kwata nawa. 17Ye we lipopila momwenyo we ha tyaa: ‘Me ningi vi, mena lyokutya hí na tja mpoka mpame ungula ovilya vyandje?’ 18Iya ye wa popya ha tyaa: ‘Me ningi hinyahi, me tungulula ovindhi vyandje, he tungu po ovinene, ndji ungule mo ovilya vyandje avihe novipuka vyandje. 19Me heele omwenyo wandje he tyaa: Wa ungulilwa ovipuka ovingi vyodhombula odhingi. Thuva, lya, nwa, ove u hulukwe.’ 20Iya Kalunga we mu heela ha tyaa: ‘Mulumentu ove omuhima, out̯iku hembu wandino omwenyo woye mo u nyekwa, ovipuka mbyoka avihe mbiwa longekedha mavi ningi ovyaan̯i?’

21“Otjo matji ka ningilwa ngume liongedhele emona puye omwene, ye ahe na tja ouhona puKalunga.”

Hámu kala notjiho

(Mat. 6:25-34)

22 Jesus wa heela ovalongwa ve ha tyaa: “Iya me mu heele okutya hámu t̯ile omienyo vyen̯i otjiho okutya mamu li tji, nomalutu en̯i okutya mamu dhala tji. 23Iya omwenyo wa pon̯a ovikulya, nolutu lwa pon̯a omidhalo. 24Talen̯i omakwala: Kaa kunu, kaa teya, o kae na ovindhi, iya Kalunga u e tekula. N̯e mwa valela unene okupon̯a ovidhila. 25Aan̯i mun̯e, nanda kala notjiho, nguma ulu okuwedha ko koule womatango e, nandaku tiwa okantimbu kamo? 26Movinunu andaa kamu na himamu ulu, otjitji himu t̯ila otjiho ovipuka ovikwawo? 27Talen̯i odhontemo hidhi kula, kadhi undapa, dho kadhi pampa. Iya ame me mu heele okutya naSalomo metumbalo lye alihe ka dhalele a ngale imo modhontemo ndhoka.#1 Hamb. 10:4-7; 2 Hip. 9:3-6 28Kalunga andaa ma dhaleke ehodhi lyomokuti ndii kala po vala ndino, komuhuka hali yumbwa momulilo, kaa kala hé mu dhalekele, n̯e owokaitavelo okanunu.

29“Hámu twaa omitima vyen̯i mumbimamu li na mbimamu nu. Hámu kala notjiho navyo. 30Iya ovapaani owo va kala notjiho tjovipuka mbyoka avihe. Iya Iho u tji i okutya mamu hepa ovipuka hembi avihe. 31Iya taendhen̯i otjilongo tjaKalunga, ovipuka ovikwawo mamu vi wedhelwa ko.

32“Hámu tila, mukangundwa okanunu, mena lyokutya Iho wa mona okutya tji li nawa oku mu pa otjilongo. 33Landethen̯i po omamona en̯i, n̯e mu e yandje kovathona. Litaendhelen̯i oundjato wodhombongo mbuhamau kulupa nemona meulu ndihali hulu, moka muhamu i ovimpulu, mo muhamu tukwa kotundu. 34Iya hoka huku na emona lyen̯i, oko ku na wo omitima vyen̯i.

Kalen̯i amwa pathumuka

35“Iya omivya vyen̯i ngavi kale avya kutwa, nodholamba dhen̯i ngadhi kale adha tema.#Mat. 25:1-13 36N̯e mu ngale ovantu mboka mbamava kevelele omuhona wawo ama dhi kotjipito tjolukupo, opo ve mu yelule dhiva, hima popitha monganda.#Mark. 13:34-36 37Ovanalao ovapika mboka mbava vadhwa komuhona wawo ava pathumuka. Me mu heele otjatjili okutya ye me lilongekedha, he ve twiile po ovikulya. 38Iya nande ya mokati kovit̯iku ne momahuka, he ve vadha nyahoka, ovantu mbaka ovanalao. 39Iya kalen̯i amu tji i okutya ngaile omwene wonganda u tji i okutya otjimpulu matji ya powola patji, ngai kaa yetha onganda ye i teywe.#Mat. 24:43-44 40Nan̯e wo kalen̯i amwe lilongekedha, mena lyokutya Omuna wOmuntu me ya powola ndjihamamu mu kevelele.”

Omupika omuliun̯ikwa

(Mat. 24:45-51)

41Petrus we mu pula ha tyaa: “Muhona, eeli hendi ont̯e we li heele ne ovantu wo avehe?”

42Muhona we mu heela ha tyaa: “Iya aan̯i omuyungi wonganda omuliun̯ikwa nguu na odhondunge ngwaa pewa okuyunga ovapika womuhona we, e ve pe odhondya powola yokulya? 43Omupika omunalao onguma vadhwa ama undapa hinyahi, omuhona we hime ya. 44Me mu heele otjatjili okutya ye me mu twaa po a yunge ovipuka vye avihe. 45Iya omupika andaa me lipopile momutima we ha tyaa: ‘Omuhona wandje kee ya dhiva,’ iya ha utu okutona ovapika ovakwawo, ovalumentu novakadhintu, ye ha utu okulya nokunwa, ha pyaluka, 46omuhona womupika ngoka me ya etango ndyoka ndihame mu kevelele, nowola ndjoka ndjihe i. Omuhona we me mu kapaula, ye he mu pa ondjambi imo namboka mbahava itavele.

47“Omupika ngoka ngwaa li ae i ehalo lyomuhona we, iya ye ahame lilongekedha ne ahama hwithile po ehalo lyomuhona, ma tonwa unene. 48Iya ngoka ngwaa li ahe na hiee i, ye ngwee lihalela okutonwa, oye ma tonwa kanunu. Iya auhe ngoka ngwaa pewa otjingi, ma pulwa otjingi, nangoka ngwee liun̯ikwa motjingi, ma pulwa otjingi unene.

Hauwa, okuliyapauka

(Mat. 10:34-36)

49“Ame mbe ya okuyumba omulilo kombanda yohi, ndji na ehalo enene ngaile omulilo wa ten̯wa ae. 50Ame ndji tha okutjatjwa etjatjo, atjaa mba pongo katee mali hwithilwa po.#Mark. 10:38 51Mamu lipula okutya ame mba eta ouwa kombanda yohi? Aai, hí etele ouwa, iya mba eta okuliyapauka. 52Iya okudha hempa monganda imo, ovantu vatano mave liyapauka, vatatu mava t̯i onki navavali, navavali mava t̯i onki navatatu. 53Wo mave ke liyapauka, ihe ma ka kondjetha omuna omudhantu, nomuna omudhantu ma ka kondjetha ihe, ina ma ka kondjetha omuna omukadhona, nomuna omukadhona ma ka kondjetha ina, inaivi ma ka kondjetha omunaivi, nomunaivi ma ka kondjetha inaivi.”#Mika 7:6

Omatangan̯eko otembu

(Mat. 16:2-3)

54 Jesus wa heela wo owingi wovantu ha tyaa: “Andaa mwa mono omwaamba mbuu li koutokelo, mu tyaa: ‘Ombula mai ya,’ yo hai ya. 55Ombepo yokomakumbinda otjilongo andaa mai pepe, mu tyaa: ‘Maku dhi ombava,’ yo hai ya. 56Valinomi n̯e, mu tji i okukoneka omatangan̯eko okeulu nohi. Iya omena lyatji hihamu koneke otembu hendji?

Omunavipopya naove

(Mat. 5:25-26)

57“Omena lyatji hihamu likoyele ovene soka hitja vyuuka? 58Andaa ngume ku kondjetha me ku twala kosekulu, lolokela tjatjili mu lipe ouwa, tainkolo amu li mondjila, ye ahame ku twala komukoyi, omukoyi ahame ku yandja kopulisa, opulisa ahamai ku yedhilile mokaliwoso. 59Me ku heele okutya ove koo dhi mo, tainkolo hóya thuta okapeni kathiinina.”

Currently Selected:

Lukas 12: DBNT

Highlight

Copy