Mateus 25
25
Ovathukona omulongo wongendjo
1“Iya otjilongo tjeulu tji ngala ovathukona omulongo wongendjo mbava itha odholamba dhawo, hava i va ka wanene nomukupi.#Luk. 12:35 2Vatano owomuwo va li ovahima, vatano va li ovanongo. 3Iya ovahima va tjinda odholamba dhawo, wo ahamava tjindi ovipuka vyomahooli. 4Iya ovanongo va tjinda ovipuka vyomahooli nodholamba dhawo. 5Napano omukupi wa kala ko, ovathukona wongendjo avehe va uta okunyekuka, hava lala.
6“Mokati kovit̯iku kwa wololokwa haku tiwaa: ‘Omukupi we ya, enden̯i mu ka wanene naye.’ 7Ovathukona wongendjo avehe va imuka po, hava ningi nawa odholamba dhawo. 8Iya ovahima va heela ovanongo hava tyaa: ‘Tu pen̯i mo wo momahooli en̯i, mena lyokutya odholamba dhetu madhi dhimi.’ 9Ovanongo ve ve yaka hava tyaa: ‘Mpaeli kaae tu hulu, nt̯e nan̯e, enden̯i mu ke lilandele kovalandethi.’ 10Iya hiva i, va ka lande, omukupi we ya. Mboka mbava vadhwa ave lilongekedha, va hita mo pamo naye motjipito tjolukupo, omuvelo hau yedhilwa.
11“Iya kon̯ima ovathukona ovakwawo wo wongendjo ve ya, hava tyaa: ‘Muhona, Muhona, tu yelula!’#Luk. 13:25
12“Iya we ve yaka ha tyaa: ‘Otjatjili me mu heele okutya ame hí mu i.’
13“Iya pathumuken̯i, mena lyokutya etango nowola kamu i i.
Eeli lyodhombongo
(Luk. 19:11-27)
14“Iya matji ka ngala omulumentu ngwaa ya kovilongo, wa ithana ovapika ve, he ve thiile emona lye.#Luk. 19:11-27 15Umo we mu pa odhombongo dhotjingoldo#25:15 odhombongo dhotjingoldo: Ombongo yotjingoldo ndjii lithike podhondenari omayovi epandu. Ondenari imo i thutwa omuundapi metango limo. omayovi atano, nomukwawo yaavali, nomutyatatu ilimo, omuntu auhe wa pewa hitja yeleke podhonkono dhe, dhivadhiva ye ha ka valula. 16Iya ngwaa pelwe atano, wa ya dhiva, he dhi ndingosa, ha mono mo omakwawo atano. 17Nomukwawo ngwaa pelwe avali, wa ndingosa mo omakwawo avali. 18Iya ngwaa pelwe limo, wa ya, ha tha otjitoto pohi, ha thithilile po odhombongo dhomuhona we.
19“Iya hipa piti olule, omuhona wovapika wa tjuna, ha hava pamo nawo otjihavelo tjovitalenti. 20Iya ngwaa pelwe ovitalenti vitano we ya, ha eta ovikwawo vitano, ha tyaa: ‘Muhona, ove wa mpele ovitalenti vitano. Ame mba ndingosa ovitalenti ovikwawo vitano.’ 21Iya omuhona we we mu yaka ha tyaa: ‘Iiya, oove omupika omuwa omuliun̯ikwa. Wa li omuliun̯ikwa movipuka ovinunu, me ku pa u tumine ovipuka ovingi. Enda mehuluko lyomuhona woye.’
22“Nahengu wo ngwaa pelwe ovitalenti vivali, we ya, ha tyaa: ‘Muhona, ove wa mpele ovitalenti vivali, taa tuutuu, ame mba nganyana mo ovikwawo vivali.’
23“Omuhona we we mu yaka ha tyaa: ‘Iiya, oove omupika omuwa omuliun̯ikwa. Ove wa li omuliun̯ikwa movipuka ovinunu, me ku pa okutumina ovipuka ovingi. Enda mehuluko lyomuhona woye.’
24“Iya ngwaa pelwe otjitalenti tjimo, we ya wo, ha tyaa: ‘Muhona, ame ndji ku i okutya oove omulumentu omukukutu, u teya mpaho kunine, u ongedha mpaho twiile ombuto. 25Iya ame mba tila, mba ya, he thithilile pohi otjitalenti tjoye. Taa tuutuu, tji tambula otjoye!’
26“Iya omuhona we we mu yaka ha tyaa: ‘Mupika ove omuvi wondende! Iya u ndji i okutya ndji teya mpahe kunine, ndji ongedha mpahe twiile ombuto? 27Wa thele okuyandja odhombongo dhandje kovandingosi, hime tjuna ndji vadhe adha nganyana. 28Iya mu nyeken̯i otjitalenti, n̯e mu tji pe nguu na omulongo. 29Iya nguu na tja, ma pewa, ha kala ae na otjingi unene. Iya nguhe na tja, nahiee na tjo, me tji nyekwa.#Mat. 13:12; Mark. 4:25; Luk. 8:18 30Iya omupika hengu omuvi, mu yumben̯i met̯iku pondje, moka mumamu ka kala otjililo nelikweyo lyomayoo.’#Mat. 8:12; 22:13; Luk. 13:28
Ekoyo lyathiinina
31“Iya Omuna wOmuntu hime ya metumbalo lye novaengeli ve avehe, ma ka kala pohi kotjipunditumino tjetumbalo lye.#Mat. 16:27; 19:28 32Oviwan̯a avihe mavi ongedhwa kotjipala tje, ha pungu ovantu movakwawo, ngomut̯ita hiaa punga odhondhu modhonkombo. 33Odhondhu u dhi ameka kokulyo kwe, nodhonkombo okokumbinda kwe. 34Iya ohamba mai heele owokokulyo kwe hai tyaa: ‘N̯e ovapewa velao vaTate, indjen̯i mu ka pingane otjilongo tjaKalunga himwa longekedhelwa okudha keuto lyouye. 35Iya ame mba t̯ile ondjala, n̯e mwa mpele ovikulya. Mba t̯ile onyota, mwa mpele okunwa. Mba li ongendi, mwa mpele omulalo. 36Mba li nyahinya, mwa mpele omudhalo. Mba velele, mwe dhile okuntala po. Mba li mokaliwoso, mwe dhile okuntala.’
37“Iya ovavyuuki mave mu yaka hava tyaa: ‘Muhona, onalun̯i twe ku mwene awa t̯a ondjala, nt̯e hatu ku pa ovikulya ne mpa wa t̯ile onyota, hatu ku pa okunwa? 38Onalun̯i twe ku mwene ongendi, hatu ku pa omulalo, ne au li nyahinya, hatu ku pa omudhalo? 39Onalun̯i twe ku mwene amo vele ne au li mokaliwoso, hatu ya kwoove?’
40“Iya ohamba mai ve yaka hai tyaa: ‘Otjatjili me mu heele okutya avihe hembi mbimwa ningila umo owomovakwetu ovanunu, aame mwe vi ningila.’
41“Iya mai heele wo mboka owokokumbinda kwayo hai tyaa: ‘Dhen̯i po pwaame, n̯e ovathingwa, enden̯i momulilo waapehe mbwaa undapelwa omudiapoli novaengeli ve. 42Iya ame mba t̯ile ondjala, n̯e kamu mpele ovikulya. Mba t̯ile onyota, n̯e kamu mpele okunwa. 43Mba li ongendi, n̯e kamu mpele omulalo, mba li nyahinya kamu mpele omudhalo. Mba velele, mba li mokaliwoso, atjaa n̯e kamu dhile okuntala.’
44“Iya mboka mave mu yaka wo hava tyaa: ‘Muhona, onalun̯i twe ku mwene awa t̯a ondjala ne onyota ne au li ongendi ne au li nyahinya ne amo vele ne au li mokaliwoso, atjaa ahamatu ku popile?’ 45Iya me ve yaka ha tyaa: ‘Otjatjili me mu heele okutya atjihe soka hihamu ningilile umo owomovanunu, naame kamu tji ndingilile.’ 46Iya mboka mava i moluyuma lwaapehe, ovavyuuki mava i momwenyo waapehe.”#Dan. 12:2
Currently Selected:
Mateus 25: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.
