Mateus 26

Etompo lyokukambulitha Jesus

(Mark. 14:1-2; Luk. 22:1-2; Joh. 11:45-53)

1 Jesus hiaa mana okupopya odhondaka ndhoka adhihe, wa heela ovalongwa ve ha tyaa: 2“Mu tji i okutya kon̯ima yomatango avali ku na Opaasa, Omuna wOmuntu ma ka yandjwa, a ka papelwe komutjaakano.”#Eks. 12:1-27

3Iya ovayambethi ovanene novanene wotjiwan̯a va ongana monganda yomuyambethi omunene nguu tiwa oKaifas. 4Va tompola okutya va kambule Jesus movineya, wo ve mu dhipae. 5Va popya hava tyaa: “Hátu tji ningile motjipito, opo hátji eta ovipolokota mokati kovantu.”

Jesus ma vavekwa

(Mark. 14:3-9; Joh. 12:1-8)

6 Jesus hiaa li moBetania monganda yaSimon owovilundu, 7omukadhintu umo ngwaa li notjivavelo hitja li nomadhi okalu, we ya kuJesus, he e tile komutwe waJesus, tainkolo a li aa kala pohi pokulya.#Luk. 7:37-38 8Ovalongwa hive tji mono, va li ava yumana, hava tyaa: “Iya maa yonakele tji nyahika? 9Ngaile a landethelwe po, ngai a eta odhombongo odhingi, dhi yandjwe kovathona.”

10Iya Jesus hiee tji mono, we ve heela ha tyaa: “Omukadhintu hengu mamu mu ningithile tji omutima omuvi? Ngunya wa ndjundapele otjilinga otjiwa. 11Ovathona apehe mamu kala nawo, iya ame híme kala nan̯e apehe.#Deut. 15:11 12Iya omukadhintu hengu hiaa tile omadhi henga kolutu lwandje, we tji ningile epako lyandje. 13Me mu heele otjatjili okutya akuhe hoka mouye auhe ondaka ombwa humai ka teethelwa, nahehi wo ye hiaa ningi, matji ka hipululwa, ha thipalukilwa ko.”

Judas ma landetha Jesus

(Mark. 14:10-11; Luk. 22:3-6)

14Iya umo owomomulongo navavali nguu tiwa oJudas Iskariot, wa ya kovayambethi ovanene, 15ha tyaa: “Mamu mpa tji, andaa mbe mu pa Jesus?” Ve mu pa odhombongo omilongo vitatu dhotjisilveri.#26:15 odhombongo dhotjisilveri: Ombongo yOvaroma ndjii tiwa uke ondenari ndjii thutwa omuundapi metango limo. #Sak. 11:12 16Iya okudha mpoka Judas Iskariot wa li ama taendha okaluvedhe koku mu yandja.

Jesus ma li Opaasa pamo novalongwa ve

(Mark. 14:12-21; Luk. 22:7-13,21-23; Joh. 13:21-30)

17Etango lyolutenga lyotjipito tjomingome mbihavi tuwa ontathi, ovalongwa ve ya kuJesus, hava tyaa: “Opi mpamo hala oku ka lila Opaasa, opo tu ke ku longekedhela?”

18Ye we ve heela ha tyaa: “Enden̯i kotjitungwalongo komulumentu umo, mu mu heele mu tyee: ‘Omulongethi ma tya otembu yandje ye thiki, me ya okulila Opaasa monganda yoye pamo novalongwa vandje.’ ”

19Iya ovalongwa va ninga ngahi va heelwa kuJesus, va longekedha Opaasa.

20Iya okawiiwii hika wile pohi, Jesus wa kala pohi, hava li novalongwa ve omulongo navavali. 21Iya tainkolo va li amava li, we ve heela ha tyaa: “Ame me mu heele otjatjili okutya umo mun̯e ma ka mbweleleka.”

22Wo va etetha onkenda unene, hava utu oku mu pula koumo naumo hava tyaa: “Muhona, ame haame ngundhe?”

23Jesus we ve yaka ha tyaa: “Umo ngumatu himi naye mombiyona, oye ma ka mbweleleka.#Eps. 41:9 24Iinga, Omuna wOmuntu ma i, ngahi tja sonekwa ouhunga naye, atjaa utatyei omuntu ngoka nguma ka weleleka Omuna wOmuntu! Omuntu ngoka ngaile ka yumukilwe, ngai hahe.”

25Judas ngwee ke mu weleleka, we mu pula ha tyaa: “Rabbi, ame haame ngundhe?”

Jesus we mu yaka ha tyaa: “Oove, ngahi wa popi.”

Okulya Okudhilikwa maku utwa

(Mark. 14:22-26; Luk. 22:14-20; 1 Kor. 11:23-25)

26Hiva li amava li, Jesus wa itha po omungome, ha kumbu, he u nyembula, he u pa ovalongwa ve, ha tyaa: “Tambulen̯i, lyen̯i, hehi olutu lwandje.”

27Wa itha po otjinwino, ha kumbu, he ve pa tjo, ha tyaa: “Nwen̯i mo amuhe. 28Hehi ombindhi yandje, ombindhi yewaneneno, ndjimai tilwahi mena lyovengi okwiitha po odhonkali.#Eks. 24:8; Jer. 31:31-34 29Me mu heele okutya híme ka nwa uke ovinyu katee etango ndyoka hime ka nwa ovipe motjilongo tjaTate pamo nan̯e.”

30Iya hiva dhi pokwiimba eimbilo, va ya kOndundu yomiholivi.

Jesus ma londola ovalongwa ve

(Mark. 14:27-31; Luk. 22:31-34; Joh. 13:36-38)

31Iya Jesus we ve heela ha tyaa: “Otjit̯iku hehi tjandino n̯e amuhe mamu ka ndjetha, mena lyokutya omisonekwa mavi tyaa: ‘Me dhipaa omut̯ita wodhondhu, otjuunda tjodhondhu hatji handjana.’#Sak. 13:7 32Iya amba imunwa kout̯e, me ke mu tenga koGalilea.”#Mat. 28:16

33Petrus wa yaka Jesus ha tyaa: “Nandaku tiwa avehe ve ke ku yetha, ame híme ke ku yetha nokanunu.”

34Jesus we mu heela ha tyaa: “Me ku heele otjatjili, otjit̯iku tjandino tainkolo onkondombolo háiya popya, ove mo lintendele tutatu.”

35Petrus we mu yaka ha tyaa: “Nandaku tiwa mba ka t̯a pamo naove, híme ke litendela ove.” Ovalongwa ovakwawo avehe nawo otjo va yaka.

Jesus ma kumbu moGetsemane

(Mark. 14:32-42; Luk. 22:39-46)

36Iya Jesus we ya novalongwa koluvedhe nduu tiwa oGetsemane. Wa heela ovalongwa ha tyaa: “Kalen̯i pohi hempa, tainkolo ame me i hehunya ndji ka kumbe.” 37Wa itha po Petrus noomunkwaSebedeus vavali. Wa uta okweetetha onkenda, he ihamenwa. 38Iya we ve heela ha tyaa: “Omwenyo wandje wa pongo katee ket̯o. Kalen̯i hempa, pathumuken̯i pamo naame.”

39Wa hweena uke komeho kanunu, ha wile pohi ompupama, ha kumbu, ha tyaa: “Taa, andaa matji tjiiwa otjinwino#26:39 Otjinwino: Matji tya “omatatetho”. hehi ngatji mpon̯oke. Iya hangahi me hala, ongahi mo hala.”

40Iya Jesus hiaa tjuna kovalongwa ve, we ve vadha ava lala. Wa pula Petrus ha tyaa: “Iya mwa anyenwa okupathumuka owola imo vala pamo naame? 41Pathumuken̯i, mu kumbe, hámu pwile momatyoletho. Ombepo yomuntu mai hala, iya olutu olunkundi.”

42Iya Jesus wa tjuna ko uke otjikando otjityavali, wa kumba ha tyaa: “Taa, andaa kaatji tjiiwa otjinwino hehi tji mpon̯oke, ahame tji nu, ehalo lyoye ngali hwithilwe po.” 43Iya hiaa tjuna uke, we ve vadha uke ava lala, mena lyokutya va li nolupot̯i momeho.

44Iya we ve thiaa po uke otjikando otjityatatu, ha ka kumba. Iya otjipuka soka otjo a popya uke. 45Iya wa tjuna uke kovalongwa, ha tyaa: “Mu na tjo, mwa lala tuu, mamu thuva? Taa tuutuu, owola ye thiki, Omuna wOmuntu ma yandjwa momawoko ovalundhi. 46Kulamen̯i, tu enden̯i. Taa tuutuu, nguma mbweleleke u li popedhi.”

Jesus ma kambulwa

(Mark. 14:43-50; Luk. 22:47-53; Joh. 18:3-12)

47Iya taa tuutuu, Jesus tainkolo a li ama popi, Judas, umo owomuhemba omulongo navavali, we ya nengundwa enene lyovantu ndii na omikonda nodhonkunye, va tumwa okudha kovayambethi ovanene nokovanene wotjiwan̯a. 48Omuweleleki wa vadhwa ae ve n̯anga onyala, ha tyaa: “Ngume hupita, oye e li ye, mu kambulen̯i.”

49Judas wa ya kuJesus dhivadhiva, ha tyaa: “Rabbi, iyaa!” We mu hupita.

50Iya Jesus we mu yaka ha tyaa: “Ove, ninga hiwa endele.”

Tjau, mbenya have mu yumbu omawoko, have mu kambula. 51Iya umo owomumboka mbava li naJesus, wa pweya mo omukonda we, ha tono nawo omupika womuyambethi omunene, he mu kopola okutwi. 52Jesus we mu heela ha tyaa: “Tjun̯a mo omukonda woye motjilalo. Iya avehe mbamava dhipaa nomukonda, mava ka t̯a komukonda. 53Ne mo soko okutya ame híme ulu okwiithana Tate, a ntumine ovaengeli mbava pon̯a ovilombo omulongo navivali? 54Iya omisonekwa ngai mavi hwithilwa po vi, mbimavi tya hehi tja thele okuningwa?”

55Iya powola ndjoka Jesus wa heela engundwa lyovantu ha tyaa: “Mwe ya nomaonga nodhonkunye ngambamamu kambula otjimpulu? Omatango aehe ndji kala motempeli, ndji longa ovantu, n̯e kamu nkambula.#Luk. 19:47; 21:37 56Iya hehi atjihe matji ningwa okutya omisonekwa vyovaprofeti opo vi hwithilwe po.” Iya ovalongwa avehe ve mu thiaa po, hava ka inkola.

Jesus kovipala vyovanene

(Mark. 14:53-65; Luk. 22:54-55,63-71; Joh. 18:13-14,19-24)

57Mboka mbava kambula Jesus, ve mu twala komuyambethi omunene Kaifas, hukwa li akwa onganene ovalongiveta novanene. 58Petrus we mu landula, ae li kon̯ima kokule, we ya katee monganda yomuyambethi omunene. Wa hita monganda, ha kala pohi povayungi wonganda, a mone atjaa himatji ningwa. 59Ovayambethi ovanene nOtjoongi atjihe tjovanene va li amava taendha oumbangi wovithithi, opo ve tjiiwe okudhipaa Jesus, 60atjaa kave u mwene, nandaku tiwa pa li odhombangi odhingi dhovithithi. Iya kon̯ima pe ke ya odhombangi mbali dhovithithi, 61hadhi tyaa: “Omuntu hengu wa tile: ‘Ame me ulu okuhan̯auna po otempeli yaKalunga, he i tungulula moule womatango atatu.’ ”#Joh. 2:19

62Iya omuyambethi omunene wa kulama, ha pula Jesus ha tyaa: “Koo yaka ovantu mbaka mbamave ku popi?” 63Iya Jesus wa nyima vala. Omuyambethi omunene we mu heela ha tyaa: “Me ku anetha Kalunga omunamwenyo. Tu heela andaa oove Messias OmunwaKalunga.”

64Jesus we mu yaka ha tyaa: “Iinga, otjo ngahi wa popi. Iya ame me mu heele ame tyaa: ‘Okudha ndino mamu ka mona Omuna wOmuntu, aa kala pohi kokulyo kOmunadhonkono, ame ya kombanda yomakaka okeulu.’ ”#Dan. 7:13

65Iya omuyambethi omunene wa taula omidhalo vye, ha tyaa: “Wa penye Kalunga. Twa hepa uke odhombangi dhatji? Taa tuutuu, napano epenyo lye mwe li tee.#Lev. 24:16 66Mamu tya vi?”

Iya ve mu yaka hava tyaa: “U na onkali yokut̯a.”

67Iya ve mu tjakela omate motjipala, have mu tono nodhongonyo. Vamo ve mu tona nomapi,#Jes. 50:6 68hava tyaa: “Messias, thimbila u tu heele okutya aan̯i ngwee ku tono.”

Petrus me litendele Jesus

(Mark. 14:66-72; Luk. 22:56-62; Joh. 18:15-18,25-27)

69Napano Petrus wa li aa kala pohi pontanga yonganda. Puye pe ya omukadhona umo, ha tyaa: “Naove wa li pamo naJesus Omugalilea.”

70Iya we litendela movipathi vyovantu avehe, ha tyaa: “Ame himo popi, hí tji i.” 71Iya hiaa li ama piti mo, aa vyuuka kotjivelo, omukadhona umo we mu mona, ha heele ovantu mbava li mpoka ha tyaa: “Omuntu hengu wa li pamo naJesus Omunasareta.”

72Petrus wa ana, he litendele uke, ha tyaa: “Omulumentu hengu hí mu i.”

73Kon̯ima yokaluvedhe mbava li ava kulama mpoka, ve ya kuPetrus hava tyaa: “Naove wo oove umo owomuwo, mena lyokutya nelaka lyoye lye ku hololola.”

74Iya wa uta okulithinga, ha ana ha tyaa: “Omulumentu hengu, hí mu i.”

Iya dhivadhiva onkondombolo ya popya. 75Iya Petrus wa thipaluka odhondaka dhaJesus ndhaa popya ha tyaa: “Onkondombolo tainkolo háiya popya, ove mo lintendele tutatu.” Iya wa pita pondje ama lili unene.

Currently Selected:

Mateus 26: DBNT

Highlight

Copy