Lûkə 13
13
Nyí máku wubî nyí tîm á Dyǔ
1Á púndá ɛni duŋgu lí baʼ bá pɔ́ŋí Yésuwə ngə Páyíletə a búlúní baʼ bá Gálilî, ngə bá bílíní ɛ bə mabeya álí sákán Dyǔ. 2Yésuwə a pushú bɔ́ nána, “Nyí kaní kə́ nána baʼ bá Gálilî bâ ábə́ bá gvúlí liwá lí ɛbɛn, bá bə́bí litúm á bání básə́sə̌n á ɛ́tútú ɛ liwá álə́ bá gvúlíní? 3Á yě! Á mbálɛ nǎn pɔŋ nyə́ nána, njí nyí mákuwǎ wubî wú nyə wúsə́sə̌n, nyí tím á Dyǔ, ní nyí wá nyə́ baʼ básə́sə̌n, nyí yɔ́ti. 4Yán na baʼ dyǔm na wam ábə́ ndáʼ ɛ ndɛ́ki ɛ́ kfúndíní bɔ́ á nyǔ á nkí n Sílomə, ka bá wá bɔ́ baʼ básə́sə̌n? Nyí kaní nána wubî wú bɔ wú túmbí wú baʼ bápə́pə̂ ábə́ bá dyɛ́kí á Jerúsálɛmə? 5Á yě! Á mbálɛ nǎn pɔŋ nyə́ nána njí nyí mákuwǎ wubî wú nyə nyí tîm á Dyǔ, ní nyí wá nyə́ baʼ básə́sə̌n nyí yɔ́ti.”
Ŋganú ɛ ɛju ɛ bwə̌ ɛ́yə́ ɛ́ bíliyǎ ɛ́ jyɛ́
6Ti Yésuwə a pɔŋí bɔ́ ŋganú nána, “Mɔ nfɔ́ a bílí awə̌ a n wɔ́ŋ ɛju ɛ́ bwə̌ á ndfukú ɛ́ mɔ. A bílí ɛ kə áwə́ ɛtîtɛ́ álí tátí bipum a bwə̌ bû ámǐn, ndé a míniyǎ ɛpum ká ɛfɔ́. 7Ti a byábí á ntátyá a ndfukú ɛ́ mɔ nána, ‘Tátí ɛ́ kə̌ mimbvú mílán ɛ́yə́ nǎn paʼní fán álí sa bipum á bwə̌ bún, ndé n nan míníyǎ ká ɛfɔ́. Kfwə bɔ́. Yán bú tiŋgání ɛ́ butí ɛ́ mǎ lifɔ́m lí ndɔʼ ngɛ́ngɛ́n’ 8Ti ntátyá a ndfukú a pushú mɔ́ nána, ‘Sísə́, makú bɔ́ bú dyɛ pə́ mbvú nfɔ́. N tambú bɔ́ áshí, n bán ndɔʼ á ɛ́ju ɛ mɔ álí bwə nána lifɔ́m lí kwilí á wə́. 9Njí wú jyɛ́ bípum á mbvú ámə́ nán paʼ, ní ɛ́ lɔ́lí. Njí ka wú jyɛ̂, ní ɛ tiŋgání bɔ́ ɛ kfwə.’”
Yésuwə a pwisí mwalân á Bǔn bú Likɔ́mbɛ
10A Bǔn bú Likɔ́mbɛ, Yésuwə a bílí ɛ lɛ́fú á ndáʼ ɛ makáni ɛ́ baʼ bá Ísrɛl pɔ́. 11Mwalân nfɔ́ á bílí áwə́ awə̌ á mimbvu dyǔm na wam n wɔ́ŋ mudî m bî. Mudî m bî mû n bwə́lí mbís ɛ́ mɔ ɛ níkan, a si púlá ɛ́ tyə́ ámǐn bwâm. 12Ngə Yésuwə a míníní mɔ́ a bəŋí mɔ́, ti a pɔŋí mɔ́ nána, “Mǎ nyambɛ̂ awə̌ a dí wə á nyǔ a mɛ̌.” 13Ti a bándí makɛ́ má mɔ á mwalân ani, mulimlim m púndá mwalân ani a nəmí nyǔ ɛ́ mɔ ti á butí ɛ kɛsí Dyǔ.
14Nlú n ndáʼ ɛ makáni ɛ́ baʼ bá Ísrɛl a kfwî á ɛ́tútú nána Yésuwə a pwisí mwalân ani á Bǔn bú Líkɔ́mbɛ. Ti a byábí á baʼ nána, “Sí wɔ́ŋí madû ntyú álí bwə ɛ́bulú. Áfánikə̌, pakáni á madû mâ bá pwisí nyə́, suká á Bǔn bú Likɔ́mbɛ.” 15Sáŋgúwə́ a pushú mɔ́ nána, “Nyə́ baʼ bá ɛlaŋgá, njá a si kákuwá nyaʼ ɛ́ mɔ tɔ jakásə ɛ́ mɔ á libún tɔ á ɛtátá ɛ́ mɔ álí kánán yɔ́ á madí á Bǔn bú lí kɔ́mbɛ? 16Mwalân ani a fí á njaʼ mú Ábrahâmə. Sátan ɛ tfúlí mɔ́ na nyambɛ̂ á mimbvú dyǔm na wam. Nyí pɔ̌ŋ mî njí ɛ́ dí wubî álí kákú mɔ́ mikɔʼ mí nkfulu á Bǔn bú Líkɔ́mbɛ?” 17Yə̌ ɛ́yə́ a byábíní ɛ́ bwə́lí baʼ ábə́ bá bílí mɔ́ ɛ tɛ́ŋgɛn bá wúkí wusɔ́n. Baʼ básə́sə̌n bá wúkí munyɛŋgɛ á misam mí mányáká ámə́ Yésuwə a bwəlíní.
Ŋganú ɛ ngəni ɛtə́kə̂n
18Yésuwə a kɔndɛ́ nána, “Yán wudya wú Dyǔ wú kúkíní ɛ bá? Na yə̌ n tiŋgání ɛ nǔŋ ɛ́láŋgsan na bɔ́? 19Wú dí ngə ngəni ɛ́tə́kə̂n ɛ́yə́ mɔ a nuŋíní a sǔ á ndukú átin. Ngə mbvum ɛni ɛ́ kɔlíní ɛ timbí bwə̌, ti manɔn má lúŋí mandáʼ á milâ mí mɔ́ ámǐn.”
Ŋganú ɛ ɛfulan
20Yésuwə a kɔndɛ́ pə́ nána, “Na yə̌ n tiŋgání ɛ nɔŋ ɛláŋgsán na wudya wú Dyǔ? 21Wú dí ngə ɛfulan ɛ́yə́ mwalân a puŋgúní na kúmbu ɛ́lán ɛ́ mpupú n ngvwi kə́ŋkə́ŋ n fûl.”
Álí kwilí á ɛku ɛ́yə́ ɛ́ kɔ́ŋí
22Yésuwə a bílí wə̌ a nji álí kə a Jerúsálɛmə. Nkí n nə̂n tɛ́ na nkí ntə́kə̂n tɛ́, ámə́ a túmbíní áwə́ a bílí baʼ ɛ lúfú. 23Mɔ nfɔ́ a kɔndɛ́ mɔ́ nána, “Sísə́, nsɔŋgí mbaʼ ábə́ Dyǔ lí shuŋgɛ́ní bá bwǐ átin tɔ̌ bá si bwíyǎ átin?” Yésuwə a pɔŋí baʼ ábə́ bá bílí áwə́ nána, 24“Nyí wánán álí kwili á ɛ́kuʼ ɛ́yə́ ɛ́ kɔ́ŋí, á ɛ́tútú nána á mbálɛ, limuti lí baʼ bá wánán álí kwili ndé bá sí púlá. 25Púndá ɛ̌ paʼ ɛyə̌ ngɔ́ŋ a ndáʼ á kɔ́lí ɛku. Á púndá ɛni yɔ́ nyí tyə́ní á ɛbúkatîn nyí kfumbá ɛku, ti nyí byá nána, ‘Sísə́ dvulí sə́ ɛku.’ Á pushú nyə nána, ‘M bíyǎ áfə́ nyí fíní.’ 26Ti nyí púshú mɔ́ nána, ‘Si dílí lidyá si mwá mǐm na wə́ fǔm bufɔ́, ɛ bílí pə́ ɛ lɛ́fú á mikí mí sə.’ 27Ndé á byá pə́ nána, ‘N bíyǎ áfə́ nyí fíní. Nyí fálu á wusú wú myə, nyə́ baʼ bá bî.’ 28Á púndá ɛyə̌ nyí mín ní Ábrahâmə, Áyízikə, na Jekɔ́bə, na balaku bá mudî á wudya wú Dyǔ, ɛ́yə́ nyə́mə̌n nyí tíkíní á ɛbúkatîn, á púndá ɛni nyí butí ɛ́ ji nyí dyá masuŋ á nsu. 29Baʼ bá fí á likwi na á mbəŋ, á pɛsi ɛyə̌ dúlu lí nyíní, na á pɛsi ɛ yə̌ dúlu lí shulní, bá nûŋ bibuŋ bí ŋgandu ɛ wudya wú Dyǔ. 30Á púndá ɛni baʼ ábə́ bâ m bukɛ á mbí bá tǐm á wusú, ti ábə́ bá bílí á wusú bá tim á mbí.”
Yésuwə a wúkí likini á baʼ bá Jerúsálɛmə
31Á mulimlim m púndá duŋgu lí Bafárisî bá pílí á Yésuwə ti bá pɔ́ŋí mɔ́ nána, “Ɛ́ lɔ́lí nána ɛ fálu á fán, ɛ kə̌ á fǔm bú pə́pə̌ á ɛ́tútú nána Hɛ́rɔdə ǎ sa wə́ ɛ búlu.” 32Yésuwə a pushú bɔ́ nána, “Kəkáni nyí pɔ̂ŋ mbɛ ɛni nána, ‘Wúyə̂ na wúyánə n fúl baʼ midî mí bî, m pwisí pə́ baʼ, ndé álí paʼ madû mábɛ̂ m mǎ ɛbulú ɛ́ myə.’ 33Ndé n lɔlí ɛ bá a nji wúyə́, wúyánə na bǔn búní, á ɛ́tútú nána ɛ́ lɔ́lyǎ nána nlakuwa-a-mudî a wá á fǔm búpə́pə̂ ɛ́sitúm á Jerúsálɛmə. 34Wǒwó! Ǎ baʼ bá Jerúsálɛmə, nyí búlú balakuwa bá mudî, nyí bwə́lání malɛ́ álí búlú baʼ ábə́ Dyǔ lí lúmíní! N wanání bitî jǐta álí shwinj nyə́ ngə nyǎ a kfú ǎ kfútíní bǎn bá mɔ. Ndé nyí bə́kiyǎ mí ɛtə́ʼ. 35Nyí tátí, Dyǔ lí makú ndáʼ ɛ́ nyə́. Á mbálɛ nǎn pɔŋ nyə́ nána, nyí si míná pə́ mí na mǐ kə́ŋ ta á púndá ɛyə̌ nyí byání nána, ‘Wunam na awə̌ a pilí á dǐn lí Sáŋgúwə́.’”
Currently Selected:
Lûkə 13: bwt
Highlight
Copy
Compare
Share
Want to have your highlights saved across all your devices? Sign up or sign in
