Lûkə 22
22
Bá kǐ kfun álí búlú Yésuwə
1Púndá ɛ Ŋgandu ɛ Blɛ̂t ábə́ bí Wɔ́ŋiyǎ Ɛfulan ɛ n mə̌ ɛ́ wútan. Ŋgandu ɛni ɛ n wɔ́ŋ dǐn nána Litúm Ámǐn. 2Baprîsə bánə̂n na balɛ̂ bá mbéndá bá bílí ɛ sǎ nji á kfun átin álí búlú Yésuwə. Ndé bá bílí ɛ báŋ nána baʼ bá sɔ́ntan
Júdasə a pushú álí súm Yésuwə
3Sátan a kwilí muwútú nfɔ́ n Yésuwə á nlə́m, awə̌ bá bílíní ɛ bə̌ŋ bá Júdasə. Dǐn lí mɔ lípə́pə̂ lí bílí Ískáriyɔtə. A bílí muwútú nfɔ́ á ndíngí m bawútú dyǔm na bábɛ̂. 4Yɔ́ a kǐní ɛ tán baprîsə bánə̂n na milú mí baʼ bánə̂n ábə́ bá bílí ɛ janiya Tɛ́mpɛl álí wikí mwanu álí súmbí bɔ́ Yésuwə. 5Ɛ́yî ɛ́ bwə́lí bɔ́ bá wúkí munyɛŋgɛ jǐta, ti bá pɔ́ŋí Júdasə nána bá bə́ mɔ́ ngáʼ. 6Júdasə a pushwání bɔ́, ti a butí ɛ sǎʼ ɛ́púlu ɛ́ mbâ álí bə bɔ́ Yésuwə ɛ́yə́ baʼ bá bíyaní.
Yésuwə ǎ bunsán Ŋgandu ɛ Litúm Ámǐn
7Sɔnsɔ́nǎn kə bǔn bú Ŋgandu ɛ Blɛ̂t ábə́ bú Wɔ́ŋiyǎ Ɛfulan, á púndá ɛyə̌ bá búlúní mwǎn a nlɔŋgi mí Litúm Ámǐn bú pílíní. 8Ti Yésuwə a lúmí Píta bû Jɔnə́ nána, “Kəkáni nyí búnsán sə́ lidyá lí Ŋgandu ɛ Litúm Ámǐn.” 9Bá kɔ́ndɛ́ mɔ́ nána, “Áfə́ ɛ́ saʼní nána sí búnsan yɔ́?” 10Ti a timbí bɔ́ nána, “Ngə nyí kwílíní á nkí n nə̂n átin, mɔ awə̌ a pə́mbí mbam a madí á tán nyə́. Pɔŋáni mɔ́ á mbís a ndáʼ ɛyə̌ á kwílíní. 11Kəkáni nyí pɔ̂ŋ nwɔ́ŋ-a-ndáʼ nána, ‘Mulɛ̂ n sə ǎ kɔndɛ́ wə̂ nána áfə́ tfǔŋ ɛ bakən ɛ díní ɛyə̌ mi na bawútú bá myə si tíŋgání ɛ dyá lidyá lí Litúm Ámǐn?’ 12Á lúfú nyə́ tfǔŋ ɛnə̂n a ndɛ́ki ámǐn ɛyə̌ bá mə́ní ɛ tambú, nyí bwə mbunsan áwə́.” 13Bá kǐ, bá tání byə̌m bísə́sə̌n ngə Yésuwə a pɔŋíní bɔ́, ti bá búnsání lidyá lí Litúm Ámǐn.
Lidyá lí Sáŋgúwə́
14Púndá ɛ lidyá ɛ pílíní, Yésuwə a shumání á tíbili na bawútú-bálí-mín. 15Ti a pɔŋí bɔ́ nána, “Mi n wɔ́ŋí nyɔ́ngí jǐta ɛtfûm ɛ́yínán ɛ́sə́sə̌n álí dyá lidyá lí Litúm Ámǐn línán na nyə́ byáná nǎn kə ɛ́ taʼ.” 16Á mbálɛ n pɔŋ nyə́ nána, “Mi n sî dyá pə́ lɔ́ kə́ŋkə́ŋ ti á púndá ɛyə̌ Dyǔ lí lwínjíní lɔ́ á púndá ɛyə̌ Wudya wú mɔ wú paʼní.”
17Yɔ́ Yésuwə a nuŋíní mbwindí a bəkí masákan á Dyǔ ti a pɔŋí bɔ́ nána, “Kuwáni nán, nyí mwá, nyí bə yɔ́ á mɔtɛ́.” 18Á mbálɛ, nǎn pɔ̌ŋ nyə́ nána butya sɔnsɔ́nǎn, álí kə á wusú, “Mi n sî mwá pə́ mǐm mǎ kə́ŋ ti púndá ɛyə̌ wudya wú Dyǔ wú paʼní.”
19Ti a nɔŋí pə́ blɛ̂t, a bəkí masákan á Dyǔ, a kabí bɔ́, a bəkí bɔ́, ti a byábí nána, “Ɛ́bínán bí dí nyǔ ɛ́ myə ɛ́yə̌ ɛ bəkání nyə́. Nyí bwə na álí kaní mi.” 20Ngə bá málíní álí dyá lidyá, a bwəlí pə́ mulimlim na mbwindí ɛ mǐm. A byábí nána, “Mbwindí ɛnín ɛ́ dí ngu ɛ kɔ́nɛ́ ɛyə̌ ɛ́ tɔ̌ na makǐ má myə, ámə́ bá súwíní á ɛ́tútú ɛ́ nyə.” 21“Ndé tátyáni, mɔ awə̌ á súm mi ǎ dyá fán á tíbili na mi.” 22Mwǎn a Mɔnyuŋ á wá ngə ɛ́ tílání, ndé ɛbómán na mɔ awə̌ á súm mɔ́. 23Ti bawútú bɔ́mə̌n bá bútí ɛ kɔndɛ́ mɔ na mɔtɛ́, álí bí mɔ awə̌ á púl ɛ́ bwə nsam ngə mú.
Bawútú bá shúmí penda tɛ́ŋgɛnɛ awə̌ a dí a nə̂n
24Bawútú bá Yésuwə bá bútí ɛbámí na bɔ́mə̌n. Bá bílí ɛ sa álí bî mɔ awə̌ a dí a nə̂n litúm bɔ́ básə́sə̌n. 25Yésuwə a pɔŋí bɔ́ nána, “Kə̂ŋ ɛ́ bikumbu ɛ́ janiya baʼ bá bɔ ná mangínya. Bajaniya bâ bá bəŋ bɔ́mə̌n nána, ‘Baʼ ábə́ bá lɔ́lí milə́m.’ 26Ndé suká nâ ɛ́ lɔ́líní ɛ bá na nyə́. Awə̌ a dí a nə̂n á wutitîn wú nyə a lɔlí ɛ timbí mɔ́mə̌n ngə mwǎndəm á nyə́ básə́sə̌n. Awə̌ a dí nlú á lɔlí ɛ timbí mɔ́mə̌n mɔ a ndutu. 27Njí baʼ bábɛ̂ bá dí, nfɔ́ a shumání á tíbili, aníní ka ǎ bwəlí mɔ́, njá a túmbí wá? Nga awə̌ a shumání á tíbili? Ndé mi, n dí fánán á wutitîn wú nyə ngə mɔ awə̌ ǎ bwəlí nyə́. 28Nyə́ nyí dí baʼ ábə́ bá wɛ́nsání mi á púndá ɛ mutakaʼ nə̂n. 29Áfánikə̌ ngə Sáŋ m myə a bəkíní mi wunja lí janiya, nâ mi pə́ n bəní nyə́. 30Ɛ́yî ɛ́ bwə nána nyí dyá lidyá, nyí mwá mǐm á fǔm bufɔ́ á wudya wú myə. Nyə́ mɔtɛ́ nyí shuman á ɛbuŋ ɛ́ janya, nyí butí ɛ́ kásí matúmbá dyǔm na mábɛ̂ má Ísrɛl.”
Yésuwə á byábí nána Píta á báŋ mɔ́ á wusú wú púndá
31“Sáyímɔnə, Sáyímɔnə, wúká! Sátan a kwisí wunja álí kiksɛ́ nyə́ baʼ básə́sə̌n, á ka nyə́. Á pwɛ bá mbâ na bábî, ngə mɔ awə̌ ǎ gbí ɛ́sakâ. 32Ndé m mə̌ ɛ káni á wə nána, dúbɛ lí wə lí si shǔl. Á púndá ɛyə̌ ɛ́ timní pə́ na mi kpútí bǎn-bá-nyǎ bá wə.” 33Píta a pushú nána, “Mbunsání álí kə na wə ká áfə́ na fə́, ká á bíbuwa, tɔ álí wá.” 34Ti Yésuwə a pushú mɔ́ nána, “Wə̌ n pɔŋ wə Píta, byáná njúm á kfú ǎ kɔ́n ɛ́ báŋ mî bitî bílán.”
Púndá ɛ́ mutaka ɛ̌ kə ɛ́ paʼ
35Yésuwə a kɔndɛ́ bawútú bá mɔ nána, “Á púndá ɛyə̌ n lúmíní nyə́, nyí lə́kiyǎ yǔm ká ɛfɔ́, ká ɛkpa ɛ́ ngáʼ, ɛkpa, ka bitámbí, yə̌ nyí bílíní ɛ sa?” Bawútú bá pushú nána, “Ká yǔm.” 36Yésuwə a pɔŋí bɔ́ nána, “Sɔnsɔ́nǎn ká njá mɔ́lə́ awə̌ a wɔ́ŋí ɛkpa ɛ́ ngáʼ, tɔ ɛkpa, a lɔlí yɔ́ ɛ wálí á nyǔ. Ká njá mɔ́lə́ awə̌ á wɔ́ŋiyǎ pɛ́ ɛ misu míbɛ̂, a súm kúti ɛ́ mɔ a yán lɔ́.” 37“Nǎn pɔŋ nyə́ nána kâti ɛ Dyǔ ɛ byábí nána, ‘Bá fílí mɔ́ fǔm bufɔ́ na bajíb.’ Nâ ɛ́ bwəlání pə́ mi. Yə̌ ɛyə́ ɛ́ tílání tɛ́ŋgɛnɛ mi, ɛ́ lɔ́lí ɛ bwəlan.” 38Bawútú bá pɔ́ŋí mɔ́ nána, “A Sáŋgúwə́, tátí, sí wɔ́ŋí pɛ́ ɛ misu míbɛ̂ ɛ́bɛ̂ áfán.” Mɔ́ pə́ a pushú bɔ́ nána, “Sí máku nâ.”
Yésuwə a kǐ ɛ káni á Wúkul wú Ólifə
39Yésuwə a nyítíní á nkí átin, a kǐ á wukul wú Ólivə, ngə a lúngúní ɛ kə. Bawútú bá mɔ bá pɔŋí mɔ á mbǐ. 40Ngə bá pílíní áwə́, á pɔ́ŋí bɔ́ nána, “Nyí káni nána nyí sí kwílí á makiksan.”
41Ti a falú á nsaŋ n nyǔ m bɔ, a kǐ á wusú mǎ yǔm, a shúmí mabɔ́ŋ áshí, ti a butí ɛ kání nána, 42“Sáŋ m myə, njí ɛ́ lɔ́lɔ́ní wə, nuŋán mî mutakaʼ n nə̂n mún. Ndé kánâwə̌, suká ngə ɛ́ lɔ́lɔ́ní mi, ndé ɛ bwə ngə ɛ́ lɔ́lɔ́ní wə” 43Ngə Yésuwə a bílíní ɛ kání, áŋgɛl ɛ fí ámǐn, ɛ pílí mɔ́ ɛ wúsi átin. 44A wúsí makáni má mɔ ngə á bílíní á ndutu ɛnə̂n átin. Ɛdiʼ ɛ́yə́ ɛ́ bílí mɔ ɛ́ fí á nyǔ, ɛ́ tímbí ngə matɔ́tɔ́ má makǐ ámə́ má bílí ɛ́ kfún á ndɔʼ.#22:44 Dungu lí kâti ɛ́ wusúwə ɛ́ wɔ́ŋyǎ njɔŋ 43 na njɔŋ 44 45Ngə á malíní makáni, a tyə́bí á mǐn, a kǐ áfə́ bawútú bá mɔ bá bílíní. A tání bɔ́ bá nalíyá wuyɔ́ á ɛ́tútú ɛ́ ndutu ɛnə̂n. 46Ti á kɔ́ndɛ́ bɔ́ nána, “Yə̌ nyí nalíní wuyɔ́? Wumwáni nyí káni nána nyí sí kfún á makiksan.”
Bá kúwí Yésuwə
47Ngə Yésuwə a bílíní wə̌ ɛ́ byá, limuti lí baʼ lí pílí. Mɔ awə̌ a buŋgání bɔ́ á wusú, a bílí Júdasə, awə̌ a bílí á ndíŋgí m bawútú dyǔm na bábɛ̂ bá Yésuwə. Ngə bá pílíní álí wútán Yésuwə, Júdasə a kátání mɔ́. 48Ti Yésuwə a kɔ́ndɛ́ mɔ nána, “A Júdasə, ngə ɛ kátání Mwǎn a Mɔnyuŋ, ɛ́ dí yə̌ álí súm mɔ̂?” 49Á púndá ɛyə̌ bawútú ábə́ bá bílí na Yésuwə, bá míníní yǔm ɛ́yə́ ɛ́ kə̌ ɛ́ bwəlan, bá kɔ́ndɛ́ mɔ́ nána, “A Sáŋgúwə́, sí tíŋgání ɛ wan na pɛ́ ɛ́misu míbɛ̂ má sə?” 50Ti muwútú nfɔ́ a shəlí ɛtwî ɛ́ ɛ́kɛ́ ɛ́ mbâ ɛ́ ntáŋ nfɔ́ prísə anə̂n anə̂n. 51Ti Yésuwə á pɔŋí bɔ́ nána, “Nyí makú nâ kəkə.” A nyɔtí mɔ ani á fə́ ɛtwî ɛ́ mɔ ɛ́ bílíní, ti a pwisí mɔ́ 52Yésuwə á kɔndɛ́ baprîsə bánə̂n, milú mi batátiya bá Tɛ́mpɛl, na bajaniya bá nkí ábə́ bá pílí álí kú mɔ́ nána, “Nyí wɔ́ŋí álí paʼ na ngámbá na pɛ́ ɛ misu míbɛ̂ álí kú mí ngə n dí njíb?” 53N bílí na nyə́ bǔn tɛ́ á Tɛ́mpɛl, nyí bándiyǎ makɛ́ á nyǔ ɛ́ myə. Ndé púndá ɛ́ nyə ɛ mə̌ ɛ paʼ. ɛfínjan yɔ̂ ɛ́ janiyá sɔnsɔ́nǎn.
Píta a báŋí Yésuwə á nyǔ
54Ti bá kúwí Yésuwə, bá kánání mɔ́, bá kwísání mɔ́ á ndáʼ ɛ́ prísə anə̂n. Píta á bílí bɔ́ ɛ pɔŋ a mbí ndé a wútaniyǎ bɔ́. 55Bá búndí mwǐ á wutitîn wú ɛbúkatîn, baʼ bá bílí áwə́. Píta pə́ á kǐ a shumání áwə́. 56Mɔ a ndutu a mwalân a míní Píta a shúmání álí wútan mwǐ mû. Ti a tátí mɔ́ jǔŋ, ti a byábí nána, “Mɔ́ anín pə́ a bílí bû Yésuwə.” 57Ndé Píta a báŋí nána, “Amâ m bíyǎ mí mɔ́.”
58Bá dyɛ́ní mǎ yǔm mɔ ampə́pə̂ a yəmbí mɔ́. Ti a byábí nána, “Wə pə́ ɛ dí na bɔ́.” Píta a pushú mɔ́ nána, “Ashí, n shyǎ na bɔ́.”
59Ngə háwa pɔ́ ɛ túmbíní, mɔ a mpə́pə̂ a byábí pə́ nána, “Penda ɛ shyǎ fán. Ká yə́ ɛ́ bwə́la wɛ́sə́ anín a bílí na Yésuwə, á ɛ́tútú nána a dí mɔ a Gálilî.” 60Ti Píta a timbí mɔ́ nána! “Áshí, n bíyǎ yǔm ɛ́yə́ ɛ̌ byání.”
Ngə a byábíní nâ áfâ áshí áshí, njúm á kfú a kɔ́ní. 61Ti Sáŋgúwə́ a wɛ́sí nyǔ, mǐ má mɔ má búnjání na má Píta. Áfâ áshí áshí Píta a kaní biyala ábə́ Sáŋgúwə́ a pɔŋíní mɔ́ nána, “Byáná njúm á kfú ǎ kɔ́n wúyə̂ ɛ́ báŋ mî bitî bílán.” 62Píta a kǐ á ɛbúkatîn, a fə́mí átin. Ti a jǐ tǐ.
Bá lábí Yésuwə, bá nyásí pə́ mɔ́
63Sɔnsɔ́nǎn baʼ ábə́ bá bílí ɛ tátí Yésuwə, bá bútí mɔ́ ɛ nyasi, bá lábá mɔ́ mbɛ́ti. 64Bá tfúlí mɔ́ mǐ, bá kɔ́ndɛ́ mɔ́ nána, “Pɔŋ sə́, njá a lábí wə?” 65Bá lwí pə́ mɔ́ bilwíya nya na nya.
Bá pánání Yésuwə á bajaniya bá nkí
66Ngə bǔn bú yílíní mushú bajaniya bá nkí, baprîsə bánə̂n, na balɛ̂ bá mbéndá, bá wálí mbum, ti bá pánání Yésuwə á ngvwa ɛ́ bɔ. 67Bá kɔ́ndɛ́ mɔ́ nána, “Pɔ̌ŋ sə́ njí ɛ dí Ani awə̌ bá Wɔ́kílíní?” Ti Yésuwə a pushú bɔ́ nána, “Njí m pɔ́ŋí nyə́ nyí sí dúbɛ́ mí. 68Njí ka pə́ n kɔ́ndɛ́ nyə́ yǔm, nyí sí bəká mî yálabɛ́. 69Butya sɔnsɔ́nǎn Mwǎn a Mɔ́nyuŋ, á shúmání á ɛ́kɛ́ ɛ́ mbâ ɛ́ Dyǔ lí ngvum.” 70Ti bɔ́ mɔ́ ansə́sə̌n bá kɔ́ndɛ́ mɔ́ nána “Nâni ɛ dí kə̌ mwǎn a Dyǔ?” A pushú bɔ́ nána, “Nyə́mə̌n nyí byábí nána nâ ɛ́ díní.” 71Ti bá byábí nána, “Yándá lí fə́ kə́ pə́ sí saʼní? Sə́mə̌n sí wúkí mɔ́ á nsu.”
Currently Selected:
Lûkə 22: bwt
Highlight
Copy
Compare
Share
Want to have your highlights saved across all your devices? Sign up or sign in
