Lûkə 5
5
Yésuwə a bəŋí bawútú bá mɔ bá wúsúsúwə
1Bǔn bufɔ́ Yésuwə a tyə́bí a nsaŋ m mádí má Gɛnɛ́sárɛtə. Baʼ bá kámbú mɔ́ bá wúká ɛ́yala ɛ́ Dyǔ. 2Ti a míní mabwálu mábɛ̂ ámə́ bá tfúlíní a nsaŋ m mádí. Shwî ɛ́ bíliyǎ áwə́ átin. Bá bílí ɛ wǔ mbúnjá ɛ́ bɔ. 3Yésuwə a kwilí a bwálu bufɔ́, wú Sáyímɔnə, ti a pɔŋí mɔ nána, a kánan bwálu mǎ yǔm a madí átin. Ti a shumáni a bwálu átin, a butí baʼ ɛ lɛ́fu.
4Ngə a malíní álí byá, a pɔŋí Sáyímɔnə nána, “Kánan bwálu áfə́ ndib ɛ díní, ɛ shwá mbúnjá ɛ́ wə.” 5Sáyímɔnə a pushú nána, “Sísə̂, sí bwə́lí ɛbulú wudû wúsə́sə̌n ndé sí kúbíya ká yǔm! Ndé njí wə ɛ byábí nâ, ní sí shwá mbúnjá.”
6Bá shwátíní mbúnjá ɛ́ bɔ, bá wálí shwî jǐta ɛ́yə́ ɛ́pɛ́pɛ́ ɛ́ nyǎ mbúnjá ɛ́ bɔ. 7Yɔ́ bá bə́ŋíní basún bá bɔ á bwálu búpə́pə̂ nána bá pâʼ bá wúnjan bɔ́. Ngə basún bábɔ bá pílíní, bá lwínjí mabwálu má mábɛ̂ pum, kə́ŋkə́ŋ mápɛ́pɛ́ ɛ́ kwili á mádí áshí. 8Sáyímɔnə Píta a míníní yǔm ɛ́yə́ ɛ́ bwə́lání, a tɔ̂ mabɔ́ŋ má mɔ á wusú wú Yésuwə ti a byábí nána, “Sáŋgúwə́, sûn, n kúkiyǎ nána ɛ tyə́ álí wútan mî á ɛ́tútú nána, n dí mɔ m bî!”
9Sáymɔnə a byábí nâni á ɛ́tútú nána mɔ́ na basún bá mɔ, bá bílí manyáká á ɛkfúna shwî ɛ́yə́ bá kúwíní. 10Jémsə bû Jɔnə́, bǎn bá Zɛ́bɛ́dyə, ábə́ bá bílí á ndíŋgí n baʼ ábə́ bá bílí ɛ lú shwî, bɔ́ pə́ bá bílí manyáká. Ti Yésuwə á pɔŋí Sáyímɔnə nána, “Ɛ si wú bɔ̂ŋ.” Butya sɔnsɔ́nǎn nyí pəlán baʼ milə́m álí pɔ̌ŋ mî á mbís. 11Bá mákí mabwálu má bɔ á nsaŋ m madí, ti bá mákú byə̌m bísə́sə̌n, ti bá bútí ɛ pɔ̌ŋ Yésuwə á mbís.
Yésuwə a pwisí mɔ na akúnyə
12Bǔn bufɔ́ Yésuwə á bílí á nkí nfɔ́, áfə́ mɔ nfɔ́ a ŋ wɔ́ŋní ákúnyə á nyǔ ɛ́ mɔ ɛ́sə́sə̌n. Ngə á míníní Yésuwə, a kǐ mɔ́ ɛ tán, a kfúndí á mákwi má mɔ, ti á yɔ́mbí mɔ́ nána, “Sáŋgúwə́, njí wə ɛ nəŋí ɛ tiŋgání mi ɛ sáŋi.” 13Ti Yésuwə a sámí ɛkɛ́ ɛ́ mɔ a bándí yɔ́ á nyǔ ɛ́ mɔ, ti á byábí nána, “N nəŋí! Sáŋ!” Áfâ áshí áshí akúnyə a mɛ̌ mɔ́ á nyǔ. 14Yésuwə a bəkí ndaki á mɔ́ nána, “Wúkán mî, ɛ si pɔ̌ŋ ká mɔ̂ʼ yə̌ ɛ́yə́ ɛ́ bwə́lání wə̂. Ndé kə̌ ɛ lúfú nyǔ ɛ́ wə á prísə nána a táti wə. Ti ɛ bə̂ jabeya ngə mbéndá ɛ́ Mósisə ɛ byábíní álí lúfú baʼ nána ɛ́ mə́ ɛ sáŋ.”
15Ndé ndúm ɛ mabwəlan má Yésuwə ɛ kǐ kfwáŋ. Ɛ́yî ɛ́ bwə́lí limuti lí bâʼ lí pílí á mɔ álí wúkán mɔ́ na nána á pwisí bɔ́. 16Ndé a makú bɔ́ a kǐ ɛ bwə makáni áfə́ a bílíní mɔ́mə̌n nfɔ́, ngə a luŋgúni ɛ bwə.
Yésuwə á pwisí mɔ a Libyə́ŋ
17Bǔn bufɔ́ ngə Yésuwə á bílíní ɛ lɛ́fu, duŋgu lí Bafárisî na balɛ̂ bá mbéndá pə́ bá pílí áwə́. Baʼ bâ bâ n fí á míkí mísə́sə̌n mí Gálilî, mí Judéya na nkí n Jerúsálɛmə. Ngínya ɛ Dyǔ ɛ bílí na Yésuwə álí pwisí baʼ. 18Baʼ bafɔ́ bá pánání mɔ a libyə́ŋ á likɛʼ. Bá wánání álí kwisán mɔ́ á ndáʼ átin, álí lə́ mɔ́ á wusú wú Yésuwə. 19Ndé ɛpúlu ɛ́ bíliyǎ álí kwisán mɔ́ á ndáʼ átin á ɛ́tútú ɛ́ limuti lí baʼ álə́ lí bílí áwə́. Bá kánání mɔ́ á ndáʼ ámǐn, bá fúlí bibə́nyə́, ti bá shúlí mɔ́ na likɛʼ lí mɔ átitîn ɛ baʼ á wusú wú Yésuwə. 20Ngə Yésuwə á míníní dúbɛ álə́ baʼ bâ bá wɔ́ŋíní, a byábí á mɔ a libyə́ŋ ani nána, “Nsún m myə, n laksɛ́ wubî wú wə.”
21Balɛ̂ bá mbéndá na Bafárisî bá bílí ɛ tɔʼ átin na bɔ́mə̌n nána, “Njá ani awə̌ á lwí Dyǔ? Dyǔ lɔ́mə̌n lɔ́ lí wɔ́ŋí wúnja álí laksɛ́ wubî wú baʼ!”
22Ngə Yésuwə a yəmbíní yǔm ɛ́yə́ bá bílíní ɛ kani á mílə́m mí bɔ, a kɔndɛ́ bɔ́ nána, “Yán nyí wɔ́ŋíní ɛbú ɛ likani ngə ɛ́yî á mílə́m mí nyə́? 23Yə̌ ɛ́ kámbyǎ álí byá, álí byá nána, ‘N laksɛ wubî wú wə,’ tɔ ‘Tyə́ ámǐn ɛ kə̂?’ 24Ndé n lúfú nyə́ nána Mwǎn a Mɔnyuŋ a wɔ́ŋí wunja á nkínshíyə álí laksɛ́ wúbî.” Yɔ̂ a pɔŋíní mɔ a libyə́ŋ nána, “Mi nǎn pɔ̌ŋ wə̂ nána, falú áshí, ɛ nûŋ ngushú ɛ́ wə, ɛ tîm á ndáʼ.”
25Áfâ áshí áshí mɔʼ ani á tyə́bí ámǐn á wusú wú baʼ básə́sə̌n, a nɔŋí ngushú ɛ́ mɔ, a sákániyá Dyǔ ngə a bílíní ɛ kə á ndáʼ ɛ́ mɔ. 26Baʼ básə́sə̌n ábə́ bílí á wə́ bá bílí manyáká! Bɔŋ bú kúwí bɔ́, bá kɛsiyá Dyǔ, bá byábá nána, Njá mísam mí manyáká ámə́ sí míníní na wúyə̂!
Yésuwə a bəŋní Lɛ́vyə
27Á mbísi púndá, Yésuwə a falú á fǔm bû. Ngə a bílíní ɛ kə, a míní Lɛ́viyə mɔ awə̌ á bílí ɛ ku táks. Lɛ́viyə a shumání á ndáʼ ɛyə̌ a bílíní ɛ kuʼ táks. Ti Yésuwə a byábí á mɔ́ nána, “Paʼ sí kə̂.” 28Ti Lɛ́viyə a tyə́bí ámǐn, a makú byə̌m bí mɔ bísə́sə̌n, a pɔŋí mɔ́ á mbǐ.
29Ti Lɛ́viyə a bwəlí ŋgandu ɛnə̂n á ndáʼ ɛ́ mɔ á dǐn lí Yésuwə. Á ndíŋgí m baʼ ábə́ a bəŋíní, baku bá táks bá bílí áwə́ jǐta, na baʼ bápə́pə̂. 30Duŋgu lí Fárisî na dungu lí balɛ̂ bá mbéndá bá bɔ bá bílí ɛ tɔʼ átin á bawútú bá Yésuwə nána, “Yán nyí dyání, nyí mwáká pə́ na baʼ ábə́ bá ku táks na baʼ bá bî bápə́pə̂?”
31Ti Yésuwə a pushú bɔ́ á ŋganú átin nána, “Baʼ ábə́ bá dyɛ bwǎm bá sə̌ ɛ́ sa mɔ-a-bwə̌. Ndé baʼ ábə́ bá kfulu bɔ́ bá sa mɔ-a-bwə̌. 32Nyí lɔ́lí ɛ bí nána m píliyǎ álí bəŋ baʼ ábə́ bá tyə́bí sîm á wusú wú Dyǔ álí pəlán mílə́m, ndé m pilí álí bəŋ baʼ bábî nána bá si bwə pə́ wubî.”
Likɔndɛ tɛ́ŋgɛnɛ njɛ-á-mákáni átin
33Duŋgu lí Bafárisî bá byábí á Yésuwə nána, Bawútú bá Jɔnə́ bá dyɛ̌ njɛ-á-makáni átin. Mulimlim na pə́ bawútú Bafárisî bá dyɛní. Yán kə́ bawútú bá wə bá dyání bá mwáká mǐm? 34Yésuwə a pushú bɔ́ nána, Yán baʼ ábə́ bá bə́ŋíní á ŋgandu ɛ wuwə́ bá tíŋgání ɛ dyɛ̌ njɛ á makáni átin, ɛ́yə́ mɔʼ awə̌ ǎ kasí sɔ́mbɔ́ a díní wə̌ na bɔ́? 35Ndé bǔn bú paʼ ɛ́yə́ bá kúwání bɔ́ mɔʼ awə̌ ǎ kasí sɔ́mbɔ́. Á bǔn bû, yɔ́ bá dyɛní njɛ á mákáni átin.
36Yésuwə a timbí pə́ bɔ́ ŋganú ɛnín nána, Mɔ ká nfɔ́ a tíŋganyǎ ɛ shə́ mǎ ɛpɛsí libaʼ a libaʼ lí kɔnə́ álí jǔm ɛpɔn á ɛtfu ɛ́ libaʼ. Njí a bwəlí nâni, ní a nyabí libaʼ lí kɔ́nə́. Mǎ ɛpɛsí libaʼ ɛ kɔ́nə́ pə́ ɛ́si kə̌ na ɛtfu ɛ́ libaʼ. 37Tɔ mɔ ká nfɔ́ a sə̌ fá mǐm má kɔ́nə́ á mbam ɛyə̌ amə̌ ɛ jin. Njí a bwəlí nâ, mǐm má kɔ́nə́ mâ má pulu kə́ŋkə́ŋ mbam ani a gbíli, mǐm má súwí áshí, mbam pə́ a fɛnji. 38Ndé ɛ́ saki nána, ɛ fá mǐm má kɔ́nə́ á mbam ɛ kɔ́nə́. 39Bamwá bá mǐm bá tíŋganyǎ ɛ maku álí mwá mǐm ámə́ má mə́ ɛ jin, ti bá butí ɛ sa mǐm má kɔ́nə́. Nga bá byá nána, “Mǐm ámə́ má mə̌ ɛ jin mɔ́ má lɔ́lí?”
Currently Selected:
Lûkə 5: bwt
Highlight
Copy
Compare
Share
Want to have your highlights saved across all your devices? Sign up or sign in
