Mâkə 11
11
Yésuwə a kwilí á Jerúsálɛmə ngə kə̂ŋ
1Ngə Yésuwə na bawútú bá mɔ bá wútání Jerúsálɛmə, álí wútán mikí mí Bɛ́tfajə na Bɛ́táni á Wúkul wú Ólifə, ti Yésuwə a lúmí bawútú bá mɔ bábɛ̂ á wusú, 2ti a pɔŋí bɔ́ nána, “Nyí kə̂ á mǎ nkí ámə́ n dí á wusú wú nyə. Ngə nyí kwilíní áwə́, nyí mín mǎ jakásə ɛyə̌ bá tfúlíní, ɛyə̌ mɔʼ ká nfɔ́ a nan púlúwání. Nyí káku yɔ́ nyí pánan mi yɔ́ fán. 3Njí mɔʼ a kɔndɛ́ nyə nána, ‘Á ɛ́tútú ɛ́yə́ nyí bwəní nâ?’ Nyí pɔ̂ŋ mɔ́ nána, ‘Sáŋgúwə́ ǎ sa yɔ́, á timbí yɔ́ mulimlim m púndá ámə́ a mə́ní yɔ́ ɛ bwəlan.’” 4Áfánikə̌ bawútú bâ bábɛ̂ bá kǐ á nkí mû, bá míní mǎ jakásə ɛyə̌ bá tfúlíní á nsaŋ mú ɛku ɛ́ ndáʼ. Ngə bá bílíní yɔ́ ɛ káku, 5duŋgu lí baʼ ábə́ bá tyə́bí fâ á nsaŋ bá kɔ́ndɛ́ bɔ́ nána, Yə̌ nyí bwəní nâ, nyí kákúní mǎ jakásə ɛni? 6Bawútú bâ bábɛ̂ bá pushú bɔ́ mulimlim ngə Yésuwə a ŋ pɔŋní bɔ́, ti baʼ bâ bá mákú bɔ́ bá kǐ na mǎ jakás ɛni. 7Ngə bá pánání mǎ jákasə ɛni á Yésuwə, bá wɛ́tí kúti ɛ́ bɔ á jákasə ɛni ámǐn, ti a shumání á mǐn. 8Baʼ jǐta bá wɛ́tí kúti ɛ́ bɔ á mbuka álí bə mɔ́ ɛdúbɛ́. Á bání bá shyə́lí milâ mí tə́kə̂n mí bikabílɛ́n, bá wɛ́tí mɔ́ á mbuka. 9Baʼ ábə́ bá bílí Yésuwə ɛ kə á wusú na ábə́ bá bílí mɔ́ ɛ́ pɔŋ á mbís, bá bílí ɛ kɔ́n ámǐn nána,
“Hósána, kɛsíyáni
Wunam wú dí na awə̌ a pilí á dǐn lí Sáŋgúwə́!
10Wunam wú dí na janiya lí sáŋ n sə Devídə, álə́ lí kə̌ ɛ́ paʼ.
Hósána, kɛsíyáni Dyǔ álə́ lí dí kə́ŋ ti ámín!”
11Ngə Yésuwə a pilíní á Jerúsálɛmə, a kwilí á Tɛ́mpɛl. A táti misam mísə́sə̌n ámə́ mí bílí ɛ bwəlan áwə́. Ndé ngə púndá ɛ məní ɛ túm, a kǐ á nkí m Bɛ́táni na bawútú bá mɔ dyǔm na bábɛ̂.
Yésuwə a bəkí ɛju ɛ́ bwə̌ ɛ́ fík ɛbúmán
12Ngə bǔn bú yílíní, Yésuwə na bawútú bá mɔ bá fálú á Bɛ́táni, njɛ ɛ bílí Yésuwə ɛ wa. 13Ti Yésuwə á míní ɛju ɛ́ bwə̌ ɛ́ fík kfwáŋ, na byɛ̌ á wə́. A kǐ á bwə̌ bû álí mín njí mûŋ wɔ́ŋ bípum. Ndé ngə a pilíní áwə́ a míní nána bipum bí shiyǎ, byɛ̌ bɔ́ na bɔ́ bí bílí áwə́, á ɛ́tútú nána ɛ bíliyǎ púndá ɛyə̌ mə̌ má fík má lɔ́líní ɛ yɛ́ bípum. 14Ti Yésuwə a byábí á ɛju ɛ́ bwə̌ ɛ́ fík ɛ́yî nána, “Ɛ sî yɛ́ pə́ bípum ká bwín.” Bawútú bá mɔ pə́ bá wúkí yə̌ ɛ́yə́ a byábíní.
Yésuwə a naní baʼ bá nyúŋgáʼ á Tɛ́mpɛl
15Yésuwə na bawútú bá mɔ bá pílí á Jerúsálɛmə. Ngə bá pílíní, Yésuwə a kwilí á Tɛ́mpɛl, a butí ɛ nǎn baʼ ábə́ bá bílí ɛ bwə nyungá á wə́. A wɛ́sí makwi má tíbili ámǐn ɛ́ baʼ ábə́ bá bílí ɛ pəlǎn ngáʼ, ti a wɛ́sí pə́ bibuŋ ámǐn bí baʼ ábə́ bá bílí ɛ́ súm mbíŋgáʼ. 16A púshúwǎ nána mɔ ká nfɔ́ a kwísan byə̌m bí nyúŋgá á ɛbúkatîn ɛ́ Tɛ́mpɛl. 17Ti a bútí baʼ ɛ lɛ́fú, á lúfúwá bɔ́ nána, “Ɛ́ shiyǎ mbálɛ nána ɛ́ tílání á kâti ɛ Dyǔ nána
‘Ndáʼ ɛ́ myə bá bə̌ŋ yɔ́ nána ndáʼ ɛ makáni ɛ bíkumbu bísə́sə̌n.’
Ndé nyí tímbí yɔ́ ngə wusɔmɔ́n wú bá bajíb.” 18Ngə baprîsə bánə̂n na balɛ̂ bá mbéndá bá wúkíní ngə Yésuwə a byábíní nâ, bá bútí ɛ sǎ nji álí búlú Yésuwə. Ndé bá bílí mɔ́ ɛ báŋ á ɛ́tútú nána, limuti lísə́sə̌n álə́ lí bílí áwə́ lí bílí manyáká á mísam ámə́ a bílíní ɛ lɛ́fu. 19Ngə nkwin nkwin m pílíní, Yésuwə na bawútú bá mɔ bá fálú á nkí n Jerúsálɛmə.
Lilɛ́fu tɛ́ŋgɛnɛ ɛju ɛ́ fík ɛ́yə́ ɛ́ n wá
20Ngə bǔn bú yílíní, Yésuwə na bawútú bá mɔ bá bílí ɛ tǐm mbǐ, ti bá míní ɛju ɛ́ bwə̌ ɛ́ fík ɛ́yî, ngə ɛ́ mə́ní ɛ wá butya á byɛ̌ kə́ŋ ti á míkanga mí mɔ. 21Píta a kaní yə̌ ɛ́yə́ Yésuwə a n bwəní, ti a byábí á Yésuwə nána, “Ǎ Mulɛ̂, tátí! Ɛju ɛ́ bwə̌ ɛ́ fík ɛ́yə́ ɛ bəkíní ɛbúmán ɛ́ mə́ ɛ wá.” 22Ti Yésuwə a pushú bɔ́ nána, “Nyí dúbɛ Dyǔ na milə́m mí nyə mísə́sə̌n. 23Á mbálɛ nǎn pɔ̌ŋ nyə́ nána ká njá awə̌ a pɔŋí wukul wúnə̂n nána, ‘Falú fánán ɛ shwá wəmə̌n á mbô ɛ nə̂n átin’, ti a dúbɛ́ na nlə́m m mɔ nsə́sə̌n nána yǔm ɛ́yə́ ǎ byábí nána ɛ́ bwə́lan ɛ́ bwəlan. 24Áfánikə̌, nǎn pɔ̌ŋ nyə́ nána, ká njá yǔmə́ ɛ́yə́ nyí kɔ́ndɛ́ní Dyǔ á mákáni átin, ti nyí dúbɛ nána nyí kwisi yɔ́, nyí wɔ́ŋ yɔ́. 25-26Ká njá púndá nyí tyə́bíní álí káni, nyí kɔ́sɛ ɛ laksɛ́ ká njá awə̌ a bwəlí nyə́ wubî, álí bwə nána, Sáŋ n nyə awə̌ á dí ámǐn mɔ́ pə́ á laksɛ́ wubî wú nyə.”#11:25-26 Dungu lí kâti ɛ́ wusú wú bándí njɔŋ 26“Ndé njí nyí láksɛ̌ wubî wú baʼ bápə́pə̂, sáŋ n nyə́ a wə̌ a dí á mǐn mɔ́ pə́ a sî laksiyǎ nyə́ wubî wú nyə.”
Áfə́ wunja wú Yésuwə wú fíní?
27Á mbís ɛ púndá, Yésuwə na bawútú bá mɔ bá pílí pə́ á Jerúsálɛmə. Ngə Yésuwə a bílíní ɛ yə́ŋ á Tɛ́mpɛl, baprîsə bánə̂n, balɛ̂ bá mbéndá na bankúmə́ bá pílí mɔ́ ɛ tán, 28ti bá kɔ́ndɛ́ mɔ́ nána, “Njá wúnja ɛ wɔ́ŋíní álí bwə̌ mísam mínán? Njá a bəkí wə wunja wû?” 29Yésuwə a pushú bɔ́ nána, “N kɔndɛ́ nyə́ wɔ̂ nsam nfɔ́, njí nyí bə́kí mi yálabɛ́, ní m pɔ̌ŋ nyə́ wunja ábə́ ŋ wɔ́ŋíní álí bwə mísam mínán. 30Nyí pɔ̂ŋ mi, njá á bəkí Jɔnə́ a Dumsɛ́ wunja álí dumsɛ́ bâʼ? Wú fí á Dyǔ tɔ á bǎnyûŋ?” 31Baprîsə bánə̂n, balɛ̂ bá mbéndá na bankúmə́ bá bútí ɛ táŋ na bɔ́mə̌n nána, “Njí sí byábí nána, ‘Wunja wú Jɔnə́ wú fí á Dyǔ,’ ní á kɔndɛ́ sə́ nána, ‘Yán kə́ nyə́ nyí sî n dúbɛ́ní Jɔnə́?’ 32Ndé njí sí byábí nána, ‘Wunja wú Jɔnə́ wú fí á bǎnyûŋ.’” (Bá wú búʼ á bâʼ á ɛ́tútú nána, baʼ básə́sə̌n bâ n dúbɛ́ nána Jɔnə́ a bílí nlakuwa-a-mudî a mbálɛ a Dyǔ.) 33Áfánikə̌, bá púshú Yésuwə nána, “Sə́ sí bíyǎ.” Ti Yésuwə á pushú bɔ́ nána, “Ká mí pə́, n sí pɔŋá nyə́ wunja ábə́ ŋ wɔ́ŋíní álí bwə mísam mínán.”
Currently Selected:
Mâkə 11: bwt
Highlight
Copy
Compare
Share
Want to have your highlights saved across all your devices? Sign up or sign in
