Mâkə 16
16
Yésuwə a pumú
1Bǔn bú Líkɔ́mbɛ lí mə́ ɛ túm, Meríyə́ Magdalɛnə, Meríyə́ nyǎ mú Jémsə na Salómɛ, bâ n yǎn bílúŋgísán ábə́ bá bwəlaní álí tambú mbimba álí kə̌ ɛ́ wɔ́kílí mbimba m Yésuwə. 2Á bǔn bú wúsúwə wú Sɔ́ndi, mushú pilílí á púndá ɛyə̌ dúlu mə́ ɛ nyít bá kǐ á ndim. 3Ngə bá bílíní ɛ kə, yɔ̂ bá kɔ́ndɛ́ní átitîn na bɔ́ nána, “Njá á maʼ sə́ lilɛ́ álə́ lí dí á nsu mú ndim?” 4Ndé ngə bá wɛ́njíní mǐ ámǐn álí tátí ndim, bá míní nána lilɛ́ álə́ lî n kɔʼ jǐta, álə́ lí bílí á nsú mú ndim, bâ m mə́ lɔ́ ɛ maʼ á nsaŋ. 5Ngə bá kwílíní á ndim átin, bá míní mǎ kɔ́l-ɛ-mɔʼ awə̌ a fílí mbɔ́m ɛyabíyə́, a shumaní á pɛsi ɛ ɛkɛ́ ɛ́ mbâ ɛ ndim. Ɛ́yínán ɛ́ bwə́lí bɔ́ bá wúkí mbúʼ. 6Kɔ́l-ɛ-mɔ ɛni ɛ pɔŋí bɔ́ nána, “Nyí si wú mbúʼ. M bí nána nyí saʼ Yésuwə mɔ a Názárɛtə, awə̌ bá búmíní á mbásá. A mə̌ ɛ pumu, a shiyá fán. Nyí táti fǔm ábə́ bâ n nanjíní mɔ́. 7Nyí kə̂ sɔnsɔ́nǎn nyí pɔ́ŋ bawútú bá mɔ sipɔ́n Píta nána Yésuwə a mə̌ ɛ pumu, ‘Ǎ kə á wusú wú nyə á Gálilî. Nyí kə̂ áwə́. Nyí mín mɔ́, ngə a m məní nyə́ ɛ pɔŋ.’” 8Balân bâ nyǔ ɛ́ bɔ ɛ butí ɛ sáʼ á manyáká ámə́ bá míníní. Bá nyítí á ndim átin bá bútí ɛ kə̌ mifílí. Bá pɔŋiyǎ mɔ ká nfɔ́ ká yǔm á ɛ́tútú nána bá bílí ɛ báŋ.
Li shúkan lí jindíyə lí Kâti ɛ́ Mâkə #16:9 Dungu lí kâti ɛ́ wusúwə ɛ́ wɔ́ŋiyǎ mijɔŋ 9-20
Yésuwə a lufú Meríyə́ Magdalînə nyǔ ɛ́ mɔ
9Ngə Yésuwə a pumúní mushú pilílí á bǔn bú wusúsuwə wú Sɔ́ndi, á kɔ́sɛ́ ɛ lúfú nyǔ ɛ́ mɔ́ á Meríyə́ Magdalînə. Á nyǔ ɛ́ mwalân ani yɔ́ Yésuwə a n fúlní midî míbî shyǎmbɛ. 10Mwalân anín a kǐ ɛ pɔ̌ŋ baʼ ábə́ bá bílí na Yésuwə ɛtîtɛ́. A n tán ngə bá bílíní ɛ ji liwá lí Yésuwə. 11Ngə bá wúkíní nána Yésuwə a dí luŋgɛ́, na nána Meríyə́ a míní mɔ́, bá sî n dúbɛ̌ mɔ́.
Yésuwə a lúfú baʼ bá mɔ bábɛ̂ nyǔ ɛ́ mɔ
12Á mbísi púndá Yésuwə a lúfú nyǔ ɛ́ mɔ á nya ɛpə́pə̂ á baʼ bábɛ̂ bápə́pə̂, ngə bá bílíní ɛ nyí á nkí átin. 13Baʼ ábâ bá tímbí bá pɔŋí á bání, ndé bɔ́ pə́ bá dúbɛ̌.
Yésuwə a lúfú nyǔ m mɔ á bawútú bá mɔ́ dyǔm na nfɔ́
14Á mbís ɛ púndá, Yésuwə a lúfú nyǔ ɛ́ mɔ́ á bawútú bá mɔ dyǔm na nfɔ́ ngə bá bílíní ɛ dyá lídyá. A kándí bɔ́ á ɛ́tútú nána bá sî wɔ́ŋ dúbɛ́ na nána bá m kpú mílú álí dúbɛ́ baʼ ábə́ bâ m mə mɔ́ ɛ mín ngə a m məní ɛ pumu. 15A pɔŋí bɔ́ nána, Nyí kə̂ á nkínshíyə nsə́sə̌n nyí pɔ̂ŋ baʼ básə́sə̌n ndúm ɛ mbâ tɛ́ŋgɛnɛ mi. 16Ká njá mɔ́ awə̌ a dúbɛ́ ti a kwísí dumsɛ, á kwisí líshuŋgɛ. Ndé ká njá awə̌ a dúbɛ̌, á kwisí kɔ́ksɛ. 17Baʼ ábə́ bá dúbɛ́ bá wɔ́ŋ ngínya álí bwə mísam mí manyáká: Bá fúl baʼ midî míbî átinə́ m bɔ á dǐn lí myə na bá byá mibyá mikɔ́nə́. 18Bá kú nyɔ̌ na makɛ́, ɛ sî bwəlíyá bɔ́ ká yǔm, ká bá mwílí pɔ́sun, ɛ sî bwəlá bɔ́ ká yǔm. Bá bán mákɛ́ má bɔ́ á nyǔ ɛ baʼ banyambɛ̂, baʼ bá banyambɛ̂ bâ bá pwi.
Yésuwə a fumú
19Ngə Sáŋgúwə́ Yésuwə a mə́ní ɛ maʼ álí pɔŋ bɔ́ misam mín, Dyǔ lí bwə́lí mɔ́ a fumú ámǐn. A shumání á ɛ́kɛ́ ɛ́ mbâ ɛ́ Dyǔ. 20Bawútú bá mɔ bá kǐ bá byábá ɛyala ɛ́ Dyǔ á mábú másə́sə̌n, Sáŋgúwə́ a bílí na bɔ́, a bəkí bɔ́ ngínya álí bwə mísam mí mányáká, álí lúfú nána yə̌ ɛ́yə́ bá bílíní ɛ byá ɛ́ bílí mbálɛ.
Currently Selected:
Mâkə 16: bwt
Highlight
Copy
Compare
Share
Want to have your highlights saved across all your devices? Sign up or sign in
