Mâkə 2
2
Yésuwə a pwisí mɔ a libyə́ŋ
1Ngə ngushú ɛ́ madû ɛ́ túmbíní, Yésuwə a timbí á nkí n Kapɛ́nahûmə. Baʼ bá wúkí nána a mə́ ɛ tim á mbís. 2Limuti lí bâʼ lí lwínjí á ndáʼ ɛyə̌ a bílíní átin na á ɛbúkatîn kə́ŋkə́ŋ ká mǎ ɛpúlu ɛ́ bíliyǎ. Yésuwə á byábá ɛyala ɛ́ Dyǔ á bɔ́. 3Á púndá ɛyə̌ á bílíní ɛ byá ɛ́yala ɛ́ Dyǔ, baʼ bánîn bá pánání mɔʼ a libyə́ŋ á mɔ́. 4Á ɛ́tútú ɛ́ limuti lí baʼ álə́ lí bílí áwə́, bá púliyǎ mɔ́ ɛ panan á líbú álə́ Yésuwə a bílíní. Áfánikə̌, bá púlú á nlú ndáʼ ámǐn, bá púwí nlú ndáʼ ámǐn áfə́ Yésuwə a n tyə́ní. Ti bá shúlí mɔ ani na ngushú ɛyə̌ a nalíní áfə́ Yésuwə a bílíní. 5Ngə Yésuwə a míníní dúbɛ ɛyə̌ baʼ bâ bâ ŋ wɔ́ŋní átin, a byábí á mɔ a libyə́ŋ ani nána, “Mwǎn m myə, mi m mə́ ɛ laksɛ́ wúbî wú wə.”
6Ndé balɛ̂ bá mbéndá ábə́ bâ n shuman áfâ bá butí ɛ tɔʼ á milə́m mí bɔ átin nána, 7“Yán mɔʼ ani a tíŋgání ɛ byá ɛ́bú ɛ́ nsam ngə mû? Ǎ lwí Dyǔ. Dyǔ lɔ́mə̌n lɔ́ lí wɔ́ŋí wúnja álí laksɛ wubî wú baʼ!” 8Mulimlim m púndá Yésuwə a n bí yə̌ ɛ́yə́ bá bílíní ɛ kani. Ti a kɔndɛ́ bɔ́ nána, “Yə̌ ɛ́ bwə́lí ka nyí kaníyá ɛ́bú ɛ́ misam ngə mín á mílə́m mí nyə? 9Ɛfə́ ɛ́ kámbiyǎ álí byá, álí byá nána, ‘Mi m mə́ ɛ laksɛ́ wúbî wú wə’, tɔ̌ álí byá nána, ‘Falú áshí, nǔŋ ngushú ɛ́ wə ɛ kə̂?’ 10Ndé n lúfú nyə́ nána Mwǎn a Mɔnyuŋ a wɔ́ŋí wunja á nkínshíyə álí laksɛ́ wúbî.” Yɔ̂ a pɔŋíní mɔ a libyə́ŋ nána, 11“Mi nǎn pɔ̌ŋ wə̂ nána, falú áshí, ɛ nûŋ ngushú ɛ́ wə, ɛ tîm á ndáʼ.” 12Áfâ, ngə baʼ básə́sə̌n bá bílíní ɛ táti, mɔ a libyə́ŋ ani a falú áshí, a nuŋí ngushú ɛ́ mɔ, a butí ɛ kə. Ɛ́yínán ɛ́ nyákí mɔʼ ansə́sə̌n jǐta, bá kɛ́síyá Dyǔ, bá byábá nána, “Sí nan míníyá wə̂ ɛbú ɛ́ nsam ngə ɛ́yínán ká bwín.”
Yésuwə a bəŋí Lɛ́viyə
13Á mbís ɛ púndá, Yésuwə a timbí pə́ á nsaŋ m mbô ɛ Gálilî. Limuti lí bâʼ lí kǐ mɔ́ ɛ tán, a butí bɔ́ ɛ lɛ́fu. 14Ngə a bílíní ɛ túm á mbuka, a míní Lɛ́viyə mwǎn mú Álféyusə a shumání áfə́ á bílíní ɛ kû táks. Yésuwə a pɔŋí mɔ́ nána, “Pɔ̌ŋ mî á mbǐ.” Lɛ́viyə a tyə́bí, ti a pɔŋí mɔ́ á mbǐ.
15Á mbís ɛ púndá, Yésuwə a bílí ɛ dyá lídyá á ndáʼ ɛ́ Lɛ́viyə. Baku-bá-táks jǐta na baʼ bá bî bápə́pə̂, bá bílí mɔ́ ɛ pɔŋ á mbís. Mɔ́ na bɔ́ bá shúmání á tíbili na bawútú bá mɔ. 16Ngə duŋgu lí balɛ̂ bá mbéndá ábə́ bá bílí Bafárisî bá míníní Yésuwə ǎ dyá na baʼ bábî na baku-bá-táks, bá kɔ́ndɛ́ bawútú bá mɔ nána, “Yán mɔ́ ǎ dyání na baku-bá-táks, na baʼ bábî?” 17Yésuwə a wúkíní nâ, a byábí á bɔ́ nána, “Baʼ ábə́ bá dyɛ bwǎm bá sə̌ ɛ́ sǎ mɔ-a-bwə̌. Ndé baʼ ábə́ bá kfulu bɔ́ bá sǎ mɔ-a-bwə̌. Mi m píliyǎ á nkínshíyə álí bəŋ baʼ ábə́ bá tyə́bí sîm á wusú wú Dyǔ, ndé mi pilí á ɛ́tútú ɛ́ baʼ bábî.”
Li kɔndɛ tɛ́ŋgɛnɛ li dyɛ lí njɛ-á-mákáni átin
18Ɛtî ɛfɔ́ ɛ́ bílí, bawútú bá Jɔnə́ a Dumsɛ na Bafárisî bá bílí ɛ dyɛ̌ njɛ-á-mákáni átin. Duŋgu lí baʼ bá pílí, bá kɔ́ndɛ́ Yésuwə nána, “Yán ɛ́ díní nána bawútú bá Jɔnə́ a Dumsɛ na Bafárisî bá dyɛ̌ njɛ-á-mákáni átin, ndé bá wə bá sə̌ bwə nâ?” 19Yésuwə a pushú bɔ́ á ŋganú átin nána, “Yán baʼ ábə́ bá bə́ŋíní á ŋgandu ɛ wuwə́ bá tíŋgání ɛ dyɛ̌ njɛ á makáni átin, ɛ́yə́ mɔʼ awə̌ ǎ kasí sɔ́mbɔ́ a díní wə̌ na bɔ́? Bá tíŋganiyǎ ɛ́ dyɛ́ njɛ-á-mákáni á púndá ɛyə̌ mɔʼ awə̌ ǎ kasí sɔ́mbɔ́ a díní na bɔ́. 20Ndé bǔn bú paʼ ɛ́yə́ bá kuwání bɔ́ mɔʼ awə̌ ǎ kasí sɔ́mbɔ́. Á bǔn bû, yɔ́ bá dyɛní njɛ-á-makáni átin. 21Nyí lɔ́lí ɛ bí nána wə̌ti mɔʼ ǎ tambú líbaʼ, a sə̌ ɛ́ nǔŋ mǎ ɛpɛsí ɛ́ líbaʼ lí kɔ́nə́ álí tambú líbaʼ álə́ lí mə́ ɛ́ jin, á ɛ́tútú nána, njí mǎ ɛpɛsí ɛ́ líbaʼ lí kɔ́nə́ lí mə́ ɛ nyiŋti, ɛ́ falú lí líbaʼ álə́ lí mə̌ ɛ́ jin. Ɛ́yî ɛ́ bwə ɛ́pɔn ɛ́yî ɛ́ púwán litúm ɛ́ wúsúwə. 22Mulimlim, mɔʼ ká nfɔ́ a sə̌ ɛ́ fá mǐm má kɔ́nə́ á mbam ɛyə̌ ɛ mə́ ɛ jin ti a kɔ́lí. Á ɛ́tútú nána, njí a bwəlí nâ, ní mǐm mâ má pulu, kə́ŋ kə́ŋ mbam ɛ gbíli, mǐm mâ má súwí másə́sə̌n, ti mbam ɛ fɛnjí. Ndé, bá nǔŋ mǐm má kɔ́nə́ bá fá á mbam ɛ kɔ́nə́.”
Likɔndɛ tɛ́ŋgɛnɛ Bǔn bú Líkɔ́mbɛ
23Á Bǔn bú Líkɔ́mbɛ wufɔ́, Yésuwə na bawútú bá mɔ́ bá bílí ɛ túm á mandfukú má ngvwi átin. Ngə bá bílíní ɛ kə, bawútú bá mɔ bá bútí álí kí bilɔŋ bí ngvwi. 24Ti Bafárisî bá kɔ́ndɛ́ Yésuwə nána, “Tátí, yə̌ ɛ́ bwə́lí ɛ́yə́ bawútú bá wə bá bwəní nsam ámə́ mbéndá ɛ bə́kiyaní wunja álí bwə á Bǔn bú Líkɔ́mbɛ?” 25Ti Yésuwə a pushú bɔ́ nána, “Nyí nan láŋiyǎ wə́ á kâti ɛ Dyǔ yǔm ɛ́yə́ Kə̂ŋ Devídə na baʼ bá mɔ bá bwə́líní á púndá ɛyə̌ bá bílíní ɛ sǎ yǔm ɛ́ lídyá, ɛ́yə́ njɛ ɛ́ bílíní bɔ́ ɛ wa? 26Á madû má Abyáta, prísə a nə̂n, Kə̂ŋ Devídə a kwilí á Tɛ́mpɛl. A dílí blɛ̂t ábə́ bá mə́ní ɛ bə̌ jábeya á Dyǔ. Ndé mbéndá ɛ́ sə ɛ bə́kiyǎ mɔʼ ampə́pə̂ wunja álí dyá blɛ̂t bî ɛ́sitúm prísə. Ndé kə̂ŋ Devídə a dílí bɔ́ ti a bəkí pə́ duŋgu lí baʼ ábə́ bá bílí na mɔ.” 27Ti Yésuwə a shulí mbyá nána, “Dyǔ lí kɔ́sɛ́ ɛ wikí mɔnyuŋ, ti a tyə́sí bǔn ábə́ baʼ bá kɔ́mbɛ́ní. A kɔ́siyǎ ɛ́ tyə́sí bǔn ka a wíki mɔnyuŋ nána a kɔ́mbɛ á bǔn bû. 28Áfánikə̌, Mwǎn a Mɔnyuŋ a wɔ́ŋí janiya ká á Bǔn bú Líkɔ́mbɛ.”
Currently Selected:
Mâkə 2: bwt
Highlight
Copy
Compare
Share
Want to have your highlights saved across all your devices? Sign up or sign in
