Mâkə 9
9
1Ti Yésuwə a kǐ á wusú álí pɔ̌ŋ bɔ́ nána, “Á mbálɛ m pɔ̌ŋ nyə́, baʼ bafɔ́ bá dí áfánán ábə́ bá sî wáká kə́ŋ bá mín janiya lí Dyǔ ngə lí paʼní á ngínya.”
Nyǔ ɛ́ Yésuwə ɛ pəlání
2Ngə madû ntyǔ má túmbíní, Yésuwə a nuŋí Píta, Jémsə na Jɔnə́ a kanání bɔ́ á wúkul a bə wú yábí ámǐn. Bá bílí á wə́ bɔ́ na bɔ́. Ngə bá bílíní á wə́, bawútú bá míní ngə Yésuwə a pəlání. 3Mabaʼ ámə́ má bílí mɔ́ á nyǔ, má bílí ɛ nwaŋ, má púwa jǐta. Má bílí ɛ pú á nya ɛyə̌ mɔʼ ká nfɔ́ á nkínshíyə a si púlání mɔ́ ɛ bwə má pú litúm nâ. 4Yɔ́ bá míníní Ɛláyíja na Mósisə bá nyítí təlí bá byábá na Yésuwə. 5Yɔ̂ Píta a byábíní á Yésuwə nána, “Mulɛ̂ ɛ́ lɔ́lí ngə sí díní á fánán! Sí lúŋ bitatá bílán, pɔ́ á wə, pɔ́ á Mósisə, pɔ́ á Ɛláyíja.” 6Píta a n sî bí yǔm ɛ́yə́ a bílíní ɛ byá á ɛ́tútú nána bɔ̌ŋ búnə̂n bû n kú mɔ́ na bawútú bání. 7Libáŋ lí pílí təlí, lí kfútí bɔ́. Ngɔli ɛ fí á libáŋ ɛ́ lî átin ɛ́ byábá nána, “Mwǎn m myə a nlə́m mɔ́ anín. Nyí wúkan mɔ́.” 8Píta na bawútú bání bá tátí áshí áshí ndé bá míniyǎ mɔʼ ampə́pə̂. Yésuwə mɔ́mə̌n nfɔ́ a bílí na bɔ́. 9Ngə bá bílíní ɛ shǔl wukul wúyábíyə́ bû, Yésuwə a nəmí bɔ́ matwî a pɔŋ bɔ́ nána, “Nyí si pɔŋ ká mɔʼ yə̌ ɛ́yə́ nyí míníní kə́ŋ kə́ŋ Mwǎn a Mɔnyuŋ a mə̌ ɛ pumú á liwá.” 10Bá bwə́lí ngə a byábíní, ndé áwútitîn wú bɔ, bá bílí ɛ kɔndɛ́ na bɔ́mə̌n nána, “Yə̌ ɛ́ dí yándá lí lípumu á liwá?” 11Ti bá kɔ́ndɛ́ Yésuwə nána, “Yə̌ ɛ́ bwə́lí ka balɛ̂ bá mbéndá bá byá nána Ɛláyíja a lɔlí ɛ kɔ́sɛ́ ɛ́ paʼ byáná Awə̌ bá Wɔ́kílíní ǎ paʼ?” 12Yésuwə a pushú bɔ́ nána, “Á mbálɛ, Ɛláyíja a lɔ́lí ɛ kɔ́sɛ́ ɛ paʼ álí tyə́sí pə́ mísam mísə́sə̌n. Yə̌ ɛ́ bwəlí ka ɛ́ tílan á kâti ɛ Dyǔ nána Mwǎn a Mɔnyuŋ á taʼ jǐta, ti baʼ bá báŋ mɔ́ á nyǔ? 13N pɔŋ nyə́ ká ná wə́kə́ nána, Ɛláyíja a mə̌ ɛ paʼ, ndé baʼ bá bwə́lí mɔ́ ngə bá nə́ŋíní. Misam mínán mí bwə́lání tɛyí tɛyí ngə ɛyala ɛ́ Dyǔ ɛ́ byábíní tɛ́ŋgɛnɛ mɔ́.”
Yésuwə a pwisí mwǎn awə̌ mudî m bî m bílíní ɛ taki
14Ngə Yésuwə na bawútú bá mɔ bálán bá shúlíní wukul, bá pílí áfə́ bawútú á bání bá bílíní. Ti bá tání ngə limuti lí kámbúní bɔ́. Balɛ̂ bá mbéndá bafɔ́ bá bílí ɛ táŋ na bɔ́. 15Ngə baʼ á bâ bá míníní Yésuwə, bá bílí manyáká jǐta. Bá búŋgú álí kə mɔ́ ɛ samban. 16Ti Yésuwə a kɔndɛ́ bawútú bâ nána, “Yə̌ nyí táŋní na bɔ́?” 17Mɔ nfɔ́ á limuti ɛ́ lî a pushú nána, “Ǎ mulɛ̂, m panání mwǎn m myə a mumân á wə á ɛ́tútú nána mudî m bî n dí mɔ́ átin, na nána m bwə́lí mɔ́ a sɛ̌ ɛ́ púl ɛ́ byá. 18Ká njá púndá ɛyə̌ mudî mû ŋ wálíní mɔ́, nán shwá mɔ́ áshí, nkfwɛn n fíyá mɔ́ á nsu. Á púndá ɛni ǎ dyá masuŋ má mɔ á nsu, na ǎ nyitan. M pɔŋí bawútú bá wə nána bá fúl mudî mû átinə́ m mɔ ndé bá púlíyǎ” 19Ti Yésuwə a byábí á bɔ́ nána, “Wó wó, nyə́ baʼ bá ɛ́tɛ̂n nyí wɔ́ŋiyǎ dúbɛ. Yán n tiŋgání nyə́ ɛ wɛnsan? Nyí pánan mi mwǎn awə̌.” 20Bá pánání mwǎn ani á Yésuwə. Ngə mudî mû m míníní Yésuwə, n sákí mwǎn ani na ngínya, n púmbí mɔ́ áshí, ǎ nɔ́tíyá áshí, nkfwɛn n fíyá mɔ́ á nsu. 21Ti Yésuwə a kɔndɛ́ sáŋ m mɔ nána, “Njá ɛ́tfûm ɛ́ púndá a mə́ní ɛ taʼ nán?” Sáŋ m mɔ a pushú Yésuwə nána, “Butya á púndá ɛyə̌ á bílíní mwǎn ndəm. 22Bitî jǐta mudî m bî mû m mə́ mɔ́ ɛ shwá á mwǐ na á mádí átin álí búlú mɔ́. Njí yǔm ɛ́ dí ɛ́yə́ ɛ tiŋgání ɛ bwə, wú sə́ likini, ɛ wúnjan sə́.” 23Yésuwə a pushú nána, “Wə̌ njí yǔm ɛ́ dí ɛ́yə́ n tiŋgání ɛ bwə? Misam mísə́sə̌n mí tíŋgání ɛ bwəlan á mɔ awə̌ a wɔ́ŋí dúbɛ” 24Áfâ áshí áshí sáŋ m mwǎn ani a búní nána, “Ŋ wɔ́ŋí dúbɛ́, wúnján dúbɛ lí myə álə́ lí kúkiyǎ.” 25Yésuwə á míní nána limuti lí bâʼ lí bílí ɛ shwinjan á fǔm bû shámshám. Ngə Yésuwə a míníní nâ, a kándí mudî m bî mû nána “Wə mudî m bíbúbú na bipə́ŋtí bí matwî, nǎn kándí wə nyít mɔ́ átin, ɛ kwílíyá pə́ á nyǔ ɛ́ mɔ.” 26Mudî m mû n kándí ámǐn, n sákí mwǎn ani na ngínya, ti n nyítí á nyǔ ɛ́ mɔ. Mwǎn a bílí ngə a mə̌ ɛ́ wá, kə́ŋ kə́ŋ duŋgu lí baʼ lí byábá nána, “A wúlí.” 27Ndé Yésuwə a kúbí mɔ́ ɛkɛ́, a wúnjání mɔ́ álí tyə́ ámǐn, ti mwǎn ani a tyə́bí. 28Yésuwə a kwilí á ndáʼ átin. Bawútú bá mɔ bá pílí mɔ́ ɛ kɔ́ndɛ́ á kfun nána, “Á ɛ́tútú ɛ́yə́ sí púliyaní ɛ fúl mudî m bî mû?” 29Yésuwə a pushú bɔ́ nána, “Ɛbú ɛ́ mudî ɛ́yî, makáni mɔ́ na mɔ́, má tíŋgání mɔ́ ɛ fúl.”
Yésuwə a byábí pə́ tɛ́ŋgɛnɛ liwá lí mɔ
30Yésuwə na bawútú bá mɔ bá mákú fǔm bû, bá túm á pɛsi ɛ mbú ɛ́ Gálilî. Yésuwə a bíliyǎ ɛ́ sa nána baʼ bá bî á fə́ bá bílíní, 31á ɛ́tútú nána a bílí ɛ lɛ́fú bawútú bá mɔ nána, “Bá bə̌ Mwǎn a Mɔnyuŋ á makɛ́ má bǎnyûŋ. Bá búlú mɔ́. Ndé wə̌ti madû málán má túmbí á pumu.” 32Ndé bawútú bá mɔ bá púliyǎ ɛ́ sɔ́ntán yə̌ ɛ́yə́ a bílíní ɛ lɛ́fú, na bá bílí ɛ báŋ álí kɔndɛ́ mɔ́.
Njá a dí mɔ a nə̂n jǐta litúm bání
33Yésuwə na bawútú bá mɔ bá pílí á nkí n Kapɛ́nahûmə. Ngə bá kwílíní á ndáʼ, Yésuwə a kɔndɛ́ bɔ́ nána, “Yə̌ nyí bílí ɛ táŋ á mbuka?” 34Ndé bá púshuwǎ mɔ́ á ɛ́tútú nána bá bílí ɛ táŋ bɔ́mə̌n tɛ́ŋgɛnɛ mɔ awə̌ a dí a nə̂n jǐta átitîn á bɔ́. 35Yésuwə a shúmání áshí, a bəŋí bawútú bá mɔ dyǔm na bábɛ̂, ti a pɔŋí bɔ́ nána, “Ká njá á ndíŋgí n nyə́ awə̌ ǎ sa ɛ́ bá mɔʼ a nə̂n, a lɔlí ɛ bá ndinja makwi, a lɔlí ɛ bá mɔʼ a ndutu á baʼ básə́sə̌n.” 36Ti a nuŋí mwǎn ndəm a tyə́sí mɔ́ áwútitîn wú bɔ. Ti a pə́mbí mwǎn ani a byá nána, 37“Ká njá mɔlə́ awə̌ a kasí mwǎn ndəm ngə anínán á dǐn lí myə, ní a kasí mî. Na ká njá awə̌ a kasí mî, a kásiyǎ wɔ̂ mi. A kasí pə́ ani awə̌ a lúmí mî.”
Ká njá awə̌ a sɛ sə́ ɛ tɛ́ŋgɛn ní a dí na sɛ́
38Ti muwútú n Yésuwə Jɔnə́ a pɔŋí mɔ́ nána, “Mulɛ̂, sí míní mɔ awə̌ a bílí ɛ bwəlán dǐn lí wə álí fúl mídî míbî á nyǔ ɛ baʼ. Sí pɔ́ŋí mɔ́ nána a sí bwə pə́ á ɛ́tútú nána a shiyǎ á ndíŋgí n sə.” 39Yésuwə a pɔŋí bɔ́ nána, “Nyí si pɔŋ mɔ́ nána a makú álí bwə. Mɔ ká nfɔ́ a shiyǎ awə̌ njí a mə̌ ɛ bwə mísam mí manyáká á dǐn lí myə, ti a timbí ɛ byá mísam mí bî tɛ́ŋgɛnɛ mi.” 40Á ɛ́tútú nána mɔʼ awə̌ a sɛ sə́ ɛ́ tɛ́ŋgɛn a dí na sɛ́. 41M pɔ̌ŋ nyə́ na mbálɛ nána, mɔ awə̌ a bəkí nyə́ madí má lí mwá á dǐn lí myə á ɛ́tútú nána nyí dí baʼ bá Krísto, a wɔ́ŋí álí kwisí nsáwu m mɔ.
Makiksɛ ámə́ má bwə baʼ bá bwə́ wúbî
42Ká njá mɔ́lə́ awə̌ a bwəlí mwǎn ngə anínán a bwə wúbî, ɛ́ lɔ́ nána bá tfúl lilɛ́ línə̂n á libɔ lí mɔ, bá shwá mɔ́ á mbû ɛnə̂n. 43-44Áfánikə̌, njí ɛkɛ́ ɛ́ mwə ɛ́ bwə́lí wə álí bwə wúbî, shə́ yɔ́ ɛ pûm. Ɛ́ lɔʼ nána ɛ kwísi luŋgɛ́ álə́ lí sɛ̌ mɛ na ɛ pɛsí ɛ́ nyǔ búká na wə lí wɔ́ŋ mákɛ́ mábɛ̂ ti bá shwá wə á mwǐ ámə́ n sə̌ dím.#9:43-44Dungu lí kâti ɛfɔ́ ɛ́ wusúwə ɛ́ bándí njɔŋ 44 Á wə́, bikfwi ábə́ bí dyá baʼ bí sə̌ ɛ́ wá, na mwǐ mû n sɛ̌ ɛ́ dím. 45-46Njí ɛkwi ɛ́ wə ɛ bwəlí wə ɛ bwəlí wubî, shə́ yɔ́ ɛ pûm. Ɛ́ lɔ́lí nána ɛ kwísi luŋgɛ́ álə́ lí sɛ̌ ɛ́ mɛ na ɛ pɛsí ɛ́ nyǔ búká na wə lí wɔ́ŋ makwi mábɛ̂ ti bá shwá wə á mwǐ ámə́ n sə̌ ɛ́ dím.#9:45-46 Dungu lí kâti ɛfɔ́ ɛ́ wusúwə ɛ́ bándí njɔŋ 46 Á wə́, bikfwi á bə́ bí dyá baʼ bí sə̌ ɛ́ wá, na mwǐ mû n sɛ̌ ɛ́ dím. 47Njí dǐ lí wə lí bwə́lí wə̂ ɛ bwə̂ wubî fúl lɔ́ ɛ pûm lɔ́. Ɛ̌ nlɔʼ nána ɛ kwíli á Janiya lí Dyǔ na dǐ lifɔ́, na nána ɛ wɔ́ŋ mǐ mábɛ̂ ti bá shwátí wə á mwǐ ámə́ n sɛ̌ dím. 48Áwə́, “Bikfwi ábə́ bí dyá baʼ bí sə̌ ɛ́ wá, na mwǐ mû n sə̌ ɛ́ dím.”
49Wukwá wú kwíli á nyǔ ɛ́ mɔtɛ́ ngə wú kwilíní á lídyá. 50Wukwǎ wú dí yǔm ɛ́ mbâ. Ndé wə̌ti wukwǎ wú bɔ́lɔ́ní wumwəm wú mɔ, yán bá tíŋgání ɛ timbí wúmwəm wú mɔ? Wukwá wû wú wɔ́ŋiyǎ pə́ yǔm ɛli bwəlan. Nyí mwə̌m ngə wukwǎ, nyí dyɛ̌ na musaŋgu mɔ na mɔtɛ́.
Currently Selected:
Mâkə 9: bwt
Highlight
Copy
Compare
Share
Want to have your highlights saved across all your devices? Sign up or sign in
