Yohanes 16

1I Yesus mansangapi manjaruma, “Samuana di’en kujarumanga memen lo’in mainto’ na’anna sorot kaparasaya’annin,” ingka kenang manjaruma lo’da’. 2“Ona’ ira to’ mauser lo’in dari sao sambayangen. Andian bea ona’ yang mauno’en lo’in. Yang mauno’en lo’in dinen, daia tapat-tapat marasa mandua’ basa dinen, dala mangamuroang lo’a Alatala kalo’a. 3Poangsi ira dinen kenanga, kole’a nampina mangilala lo’ku’. Nampi bea mangilala lo’a Ama’ku’,” ingka kenang manjaruma i Yesus lo’da’. 4“Kujarumanga memen lo’in mainto’ ona’ ti’ mamin adari, mainto’ iparandama ikin jarumku’. Ijolo na’an kujarumang lo’in kole’a de’i lagi’akpi sarilao’ nannin,” ingka kenang i Yesus lo’da’.

5Jaji manjarum i Yesus, “Daiak barik di’en to’ inyapak. Mole’ak lo’a tau manyuro’en lo’ku’. Kosankin bea matoaniin lo’ku’ palamba’anku’ dinen,” ingka kenang. 6“Kujarumanga lo’in di’en, susa tapat atenin. 7Poangsi manjarumak tapat-tapat lo’in. Ti’enak inyap di’en, dinen lalo bajao’ maama. Kole’a ti’enak na’an inyap, kosan ratina lo’in, na’an mondok Panggulungiku’ lo’in. Ti’enak ona’ inyap to’ kusuro’ mondok lo’in,” ingka kenang lo’da’ manjarumang mondoka Sumangat Bareseen.

8“Jaji ti’ mondok ona’ Panggulungiku’, daia to’ mawa bukti lo’a tau duniaan mainto’ datamuna barik sala’a. Sala’a uka’ dinen, kole’a ratina dosana na’an datamu, ratina tapatku’ di’en na’an datamu, ratina Alatala malao’ ukuma lo’a tauen, na’an bapi datamu. 9Jaji buktina sala’da’ lo’a soal dosana, kole’a na’anna parasaya’ lo’ku’. 10Buktina sala’da’ lo’a soal tapatku’ di’en kole’a mole’ku’ lo’a Ama’ku’; na’anak lagi’ ikita ikin. Inang itamuna tapatku’. 11Buktina sala’da’ lo’a soal ukuma Alatala yang to’ dalao’iin, kole’a i Pangabo dinen yang tau mamarintangen di duniaan di’en mamin lalo dadua’ ukum. Jaji samuana di’en to’ dasaksiang lo’a tau duniaan kole’a Panggulungiku’ yang to’ kusuro’ mondok lo’in,” ingka kenang i Yesus lo’da’.

12“Sabenara di’en,” ingka i Yesus, “Bayu’ beapi jaluun to’ kujarumang lo’in. Poangsi to’ kujarumang awandi’en, badidit jaji. Aboratpi lo’in, nampi kule’ iangkam ikin,” ingka kenang. 13“Ona’ poang ijarumanga. Arung mondok Sumangat Bareseen. Inang ona’ itamuna ikin ratina jalu tapaten, dajarumang lo’in manyuro’ paita jalu tapaten dari nanna Alatala. Jaji Sumangat Bareseen dinen, okan jarum kuasa diri’a yang to’ dajarumangen. Jalu dadalingaan, dinen bua yang dajarumangen bapi lo’in. To’ dabayaang memen jalu to’ adariin di ona’en,” ingka kenang lo’da’. Bil. 23:19; Hos. 6:3; 1Kor. 2:13-14. 14“Jaji Sumangat Bareseen dinen to’ mawa pudi lo’ku’, kole’a jalu maminen kujarumang lo’in, dinen to’ daparandamang bapi lo’in,” ingka kenang lo’da’. 15“Jaji jalu tapaten yang di Ama’ku’ dinen, nanna jalu tapaten yang nanku’ kosan beda. Samuana yang Ama’ku’ ampunaan, dinen daiak ampunaan bea. Dinen lalo ratina jarumku’ de’i masanen kole’a Sumangat Bareseen to’ mala jarumku’, to’ dajarumang bapi lo’in,” ingka kenang i Yesus lo’da’.

Nyawada’ yang susaan to’ tapalin padari sasau nyawada’

16Jaji manjarum i Yesus lo’da’, “Na, di’en sikadangki’pi poang sikitaan. Mamin dinen na’an lagi’ki’ sikita. Sikadang bapi ona’ sikitaki’,” ingka kenang manjaruma lo’da’.

17Jaji ira palola’a sapa dua sikatoanan sera lo’a seraan, “Ai te’ ratina jaruma dinen? Sikadang poangpi sikitaki’ mamin dinen na’an lagi’ki’ sikita, ingka kenang kakaru’. Sikadang bapi ona’ sadinga poangki’ sikitaan. To’ mole’ak bua lo’a Ama’ku’, ingka kenang. 18Ai bua ratina sikadangen dinen? Na’an itamu iki’,” ingka kenang ira sikatoananda’.

19Jaji manjarum bapi i Yesus lo’da’, kole’a datamuna ira to’ mangatoani dinen, “Jarumku’ dinen de’i, sikadang poangpi sikitaan, sikadang bapi ona’ sikitaki’, aiaka dinen yang ipasijarumangen ikin?” ingka kenang. 20“Manjarumak lo’in tapat-tapat. Daikin ona’ to’ anangiskin manyanyarawang. Poangsi tau duniaan dinen to’ sasau nyawana,” ingka kenang. “To’ susa nyawanin dinen. Poangsi ona’ barik susana nyawanin, kabalikanna to’ sasau nyawanin rabarik,” ingka kenang.

21“Kaungkasi babainye yang araanaken. Mulakata susa atena kole’a mondoka apadisa to’ aranak. Mamin dinen maam barik nyawana, sasau nyawana. Dalilu’ dinen susana kole’a maminna daia kalapasan, mamin mandua’ang anak,” ingka kenang. 22“Jaji awan dinen bea daikin. Susa nyawanin awandi’en kole’a to’ sarakku’ nannin. Barik ona’ ti’ak mamin sidua’ nannin, kabalikanna sasau nyawanin. Jaji sasauna nyawanin dinen na’an mainya’ inyap, na’an dakule’ dala dari atenin,” ingka kenang.

23“Di mondoka ona’ aso dinen, na’ankin lagi’ matoani lo’ku’. Manjarumak tapat-tapat lo’in. Ona’ dinen rabarik, ai poang yang ipitaan ikin atas asanku’, ka’ bea dameangin kole’a Ama’ku’. 24Daikin di’en nampi kala’ mamita atas asanku’ poangsi awandi’en rabarik, arungkin mamita atas asanku’ mainto’ sasau jaji nyawanin,” ingka kenang lo’da’.

I Yesus mangataloang lo’a kuasa duniaan

25“Launna di’en,” ingka kenang i Yesus, “majarku’ lo’in, mamakai sama’ jarumak lapoang. Poangsi ona’ barik na’an lagi’ kenang. Terus terang lo’in kujarumang Ama’ku’,” ingka kenang lo’da’. 26“Mondok ona’ dinen, laloang poangkin mamitaan lo’a Ama’ku’ atas asanku’. Okan dinen iak mamitaangen itiang lo’in, ikin pitaangen kalenin. 27Kole’a Ama’ku’ daia diri’a mangasaangen lo’in. Mangasaanga lo’in kole’a maminkin mangasaang lo’ku’, maminkin parasaya’ lo’ku’ mondokku’ dari nanna Ama’ku’,” ingka kenang. 28“Dari nanna Ama’ku’ lalo mondokku’ di’en, mondok lo’a duniaan. Awandi’en rabarik to’ inyapak di duniaan to’ mole’ balikak lo’a Ama’ku’,” ingka kenang manjaruma i Yesus lo’a palola’a.

29“Na, awandi’en barik,” ingka dinen palola’a, “daiko na’anko lagi’ mamakai sama’ jarum, mamakai jarum tapatko,” ingka kenang. 30“Itamu ikam barik. Daiko dinen manamu kausa jaluun. Kole’a kosan paruluna tauen matoani lo’u. Mamin de’i itamu iko ratina isi’ atenam nanna jalu to’ ikatoanang ikam lo’u,” ingka kenang lo’a. “Dinen lalo manyuro’ parasaya’ lo’am. Parasaya’kam lo’u mondoku dari nanna Alatala,” ingka kenang ira dinen lo’a i Yesus.

31Manjarum barik i Yesus lo’da’, “Ai daikin, parasaya’kin rabarik lo’ku’?” ingka kenang manjaruma i Yesus lo’da’. 32“Poangsi daikin ona’ to’ tambor-amborkin bua, to’ ararikin sera-seranin lo’a ambata sao diri’in, to’ irantang unjangak kakaleku’. Mamin lalo mainso’ to’ adariin. Poangsi dinen yang kuasan to’ arantang poang kakaleku’, sabenara okan bea kakaleku’. Andian Ama’ku’ nanku’,” ingka kenang. 33“Jaji kujarumang memen ararinin dinen mainto’ ona’ ti’ mamin adari daikin na’ankin kalanggangan, mainto’ maama nyawanin kole’a maminkin dapasera nanku’. Tau duniaan di’en to’ parinsa’i lo’in,” ingka kenang. “Poang maam-maam atenin. Pakarasang ikin kole’a maminak manalo lo’a kuasa duniaan,” ingka kenang i Yesus lo’da’.

Currently Selected:

Yohanes 16: EBE

Highlight

Copy

Compare