Yohanes 15

I Yesus asan kalena awan bararan angguren

1“Daiak di’en,” ingka kenang i Yesus, “kusama’ang kaleku’ awan bararan angguren yang tapaten. Ama’ku’ daia awan lalo tau manuntuaniin kobonen. 2Daanna yang na’anen ambua’, dinen dasapa’. Anu daan ambua’enpi dinen dabarese, datoto’i mainto’ insang bayu’a bua’a,” ingka kenang i Yesus. 3“Ikin yang palola’ku’, daikinpi maminkin dabarese malaloi ambata pangajaranku’ lo’in,” ingka kenang. 4“Awan daan angguren, yang ambua’enpi dinen ti’ na’an malakat lo’a batanga, na’an bea dari bua’a,” ingka kenang. “Ialalo daikin arungkin tio’ sisiau’ nanku’, daiakpi barik tio’ sisiau’ak nannin. Na’an ikule’ ikin ambua’ jalu maamen ati’enkin na’an tio’ sisiau’ nanku’,” ingka kenang i Yesus lo’a palola’a.

5Jaji manjarum i Yesus, “Iak lalo batang angguren. Ikin lalo daanku’. Intain tio’ sisiau’en nanku’, sarata iakpi tio’ sisiau’ak nanna, dinen lalo yang ambua’ bayu’en,” ingka kenang. “Kole’a daikin ti’en na’ankin tio’ sisiau’ nanku’, kosan jalu pande ianu ikin,” ingka kenang. 6“Intain yang na’anen tio’ sisiau’ nanku’, dinen lalo daan yang idunjangen, padari akalas. Awan kabiasa’anen, ambata daan dinen ikapulungang, itampeang lo’a apiin, itutung,” ingka kenang. 7“Ti’enkin tio’ sisiau’ nanku’, jarumku’pi ti’ lalako’ bua nannin, pandekin mamita suka ate. Tentu danoang bua lo’in. 8Ti’kin ambua’ bua’ bayu’, dinen lalo yang padariin lo’in palola’ku’, yang manyuro’ lo’a tauen mamudi lo’a Ama’ku’,” ingka kenang i Yesus lo’da’.

9Jaji manjarum i Yesus, “Awan lalo Ama’ku’ mangasaangen lo’ku’, awan dinen bea mangasaangku’ lo’in. Jaji arungkin tio’ sikasaang nanku’. 10Ati’enkin malola’ani parintaku’, inang lalo timbula mangasaangku’. Awan lalo iak nanna Ama’ku’. Daiakpi kulola’ani parintana Ama’ku’, inang bea timbula mangasaanga lo’ku’ manyuro’ tio’ sikasaang,” ingka kenang i Yesus lo’da’. 11“Jaji manjarumak kenang lo’in mainto’ sasau nyawanin awan bua daiak sasauna nyawaku’, mainto’ kosanna jaji kakuranganna sasauna nyawanin.

12“Jaji andian parintaku’ lo’in. Arungkin tio’ sikasaang. Awan lalo daiak mangasaangku’ lo’in, arung awan dinen bea mangasaangin sera lo’a seraan,” ingka kenang i Yesus lo’da’. Mik. 6:8; Yoh. 13:34; 15:17; 1Yoh. 3:23; 2Yoh. 5. 13“Jaji tau mangasaangen, kosan labi dari pada di’en. Yang tau mainya’en mate manyurang lo’a kawanna itiang patio’ lo’a, dinen lalo pangasaang yang palin maamen,” ingka kenang. 14“Jaji ati’enkin malola’ani parintaku’ daikin lalo kawanku’. 15Daikin kuasankin kawanku’. Na’annak lagi’ masan suro’anku’kin. Yang tau isuro’en dinen, tokena dinen na’an manjarumang urusanna kausana. Poangsi daiak mamin kujarumang kausana lo’in. Ialalo kuasannin kawanku’. Yang kudalingaan tarangkat nanna Ama’ku’, samuana dinen kujarumang kausa lo’in,” ingka kenang lo’da’. 16“Okan ikin maile’iin lo’ku’, iak maile’iin lo’in. Kusuro’kin lamba’ ambua’ bayu’ bua’ yang batako’en, mainto’ Ama’ku’pi rabarik daia mameang lo’in. Ai poang to’ ipitaan ikin atas asanku’, ka’ bea dameangin,” ingka kenang lo’da’. 17“Jaji pesanku’ lo’in, arungkin tio’ sikasaang,” ingka kenang manjaruma i Yesus.

Tau duniaan mangalibakang lo’a tau parasaya’en

18Jaji manjarum bapi Yesus, “Parandamkin. Ti’ tau duniaan mangalibakang lo’in, dinen kole’a mangalibakanga memen lo’ku’. 19Ti’kin sama nanda’ tau duniaan, patut bua ira dinen mangasaang lo’in awan sama diri’a. Ialalo dakalibakangin kole’a daikin jalu kudile’iinkin. Okan lagi’kin sera nanda’,” ingka kenang lo’da’. 20“Arungkin parandam lo’a jarumku’ memen lo’in, ti’en ulun maamen, kosan baraa’en lo’a paraampuanna, uka’ kenang. Jaji ti’ tau parinsa’ lo’ku’ yang Paraampuannin, ialalo daparinsa’inin. Ti’ tau malola’ani pangajaranku’, tentula malola’ani pangajarannin bua. Mat. 10:24; Lk. 6:40; Yoh. 13:16. 21Ialalo kenanga dinen lo’in kole’a ikin lalo palola’ku’, ialalo mangalibakanga lo’in kole’a na’anna memen ira mangilala lo’a tau manyuro’en lo’ku’,” ingka kenang.

22“Ati’en okan diri’ku’ mondok manjarum lo’da’, na’an bea pande ituntut dosada’. Poangsi mondok diri’ku’ lalo, ialalo kosan lagi’ pande dasasalanga dosada’. 23Kole’a ti’ alibak lo’ku’, alibak lo’am dua panaken, alibak bua lo’a Ama’ku’,” ingka kenang i Yesus lo’da’. 24“Ati’en okan di matada’ kupolana jalu laan-laanen yang na’anen kala’ dakita tau, na’an bea pande ituntut dosada’! Poangsi di’en samuana yang jalu kuanuun dinen, mamin dakita kole’da’. Lagi’pi ira mangalibakang lo’am dua panaken. 25Poangsi sabenara dinen adarina manyuro’ adari baya yang datulisangen di Ukumda’ dinen,

Ira mangalibakang lo’ku’ kapisi kosan sala’ku’,

ingka kenangjo bayana ilalam Jaruma Alatala,” ingka kenang i Yesus lo’da’. Msm. 35:19; 69:5.

26Jaji manjarum i Yesus lo’a palola’a, “Jaji to’ mondok ona’ Panggulunginin yang to’ kusuro’en lo’in, ialalo Sumangat Bareseen yang tulak nanna Ama’ku’. Jaji maminna mondok barik, ia yang to’ manyaksi, to’ paitang lo’in manyuro’ lo’in manamu jalu tapaten. 27Daikinpi ona’ to’ tamba beakin manyaksi lo’ku’ kole’a andiankin sarilao’ nanku’ dari mulakata,” ingka kenang i Yesus lo’da’.

Currently Selected:

Yohanes 15: EBE

Highlight

Copy

Compare