Yohanes 18
18
I Yesus datingkam
Mat. 26:47-56; Mk. 14:43-50; Lk. 22:47-53
1Jaji barik i Yesus maminna bado’a balu’a dinen, tarangkat nanna palola’a manarear sunge Kidron. Andian kobon inang, laloang intama ira lo’a dinen. 2Jaji i Yudas dinen, tau to’ maduangen lo’a i Yesus lo’a musuna dinen, datamu kosan dinen kole’a biasa ira dua belasen bakumpul nanna i Yesus inang. 3Jaji malola’ i Yudas lo’a kobon dinen mawa gulungan tentara Roma dinen, mawa gulungan panyagaina saona Alatala yang dasuro’en kole’a ambata imam baraa’en nanna tau Parisiin, to’ maningkam lo’a i Yesus. Jaji barik ira yang daawaan dinen, mawa gulungan pakakas suno’, mawa lampu, mawa sulo’en.
4Jaji i Yesus dinen, datamu mamin jalu to’ adariin dinen lo’a. Jaji mondok barik ira, i Yesuspi lamba’ barik di arona tauen mangatoani lo’da’, “Intain to’ isariin ikin?” ingka kenang i Yesus matoanina lo’da’.
5“Yang isariin ikam, i Yesus tau Nasaret,” ingka kenang manyautina lo’a i Yesus.
Jaji barik dasauti kole’a i Yesus, “Iak lalo di’ iaan, i Yesus,” ingka kenang manjaruma i Yesus lo’da’. I Yudaspi dinen tau to’ maduangen dinen, daia akadeng bua ibiringda’. 6Jaji mandalinga jaruma i Yesus dinen laloang ira bibitak. Tatakau ira, tagoleng dinen lo’a balakanga kole’a tatakauna.
7Jaji barik matoani bapi i Yesus, “Intain to’ isariin ikin?” ingka kenang lo’da’.
“I Yesus tau Nasaret,” ingka kenang bapi ira.
8Jaji barik manjarum i Yesus, “Na daiak, maminak jarumang kaleku’ lo’in,” ingka kenang. “Na, ati’en iak yang isariin ikin, suba ira di’en ipalapas,” ingka kenang. 9Ratina kenanga, mainto’ dinen adarina jarum do’ana lo’a Amana de’i, “Yang iseraan iko lo’ku’, kosan serapi inyapen.” 10Jaji maminna dinen de’i, andian basina i Simon Petrus. Jaji datarik basina dinen manyapa’ lo’a pangkama imam baraa’en dinen, akatu barik talingana katoen. Jaji asanna pangkam dinen, i Malkus. 11Jaji manjarum i Yesus, “Ambakinto’ kenang,” ingka. “Ai iasanangak iko to’ alibakku’ manarima’ jalu parinsa’en dari nanna Ama’ku’,” ingka kenang i Yesus lo’a i Petrus. “Taro’ basinu,” ingka kenang. Mat. 26:39; Mk. 14:36; Lk. 22:42; 1Ptr. 2:13-17.
I Yesus daawa di arona i Hanas
Mat. 26:57-58; Mk. 14:53-72; Lk. 22:54-71
12Jaji barik ira dinen gulungan tentara Roma nanna panguluanda’, sarata gulungan panyagai saona Alatala dinen maningkam lo’a i Yesus. Daingkat dinen tanganna, 13daawa lo’a saona i Hanas. I Hanas dinen matoana i Kayapas yang imam baraa’en taun dinen. 14Jaji i Kayapas lalo dinen yang manjarumen lo’a toa Yahudiin, masan lo’a i Yesus, “Dari pada mate tau bayu’en idukum, labi maam mate mantuari seraan itiang lo’ka’ samuaka’,” ingka kenangjo i Kayapas lo’a paurusen. Yoh. 11:49-50.
I Petrus asasal lo’a i Yesus
Mat. 26:69-70; Mk. 14:66-68; Lk. 22:55-57
15Jaji i Yesus daawa lo’a saona i Hanas, andian dua palola’a yang malola’en, dua nanna i Simon Petrus. Yang seraan dinen sikilala nanna imam baraa’en. Jaji mondok lo’a dinen, laloang intama nanna i Yesus lo’a pakar saoen inang. 16I Petrus daia arantang insaluan di mambangan pakaren. Mamin dinen maruar bapi palola’a seraan dinen manjarum lo’a babainyeen yang tau maruangi mambangan pakaren manyuro’ intama bea lo’a i Petrus. I Petruspi barik daawa intama lo’a pakar saoen.
17Jaji barik babainye dinen, tau maruangi mambangan dinen matoani lo’a i Petrus, “Okan iko lalo palola’a tau dinen?” ingka kenang.
Jaji barik manyauti i Petrus, “Okanak!” ingka kenang i Petrus manyautina.
18Jaji malam dinen adingin. Jaji gulungan suro’an di sao dinen nanna panyagaina matio’ bara apiin. Jaji samuana dinen tauen mamindu inang. I Petruspi dinen tamba mamindu inang kole’a adinginna.
I Yesus daawa mamutusi
Mat. 26:59-66; Mk. 14:55-64; Lk. 22:66-71
19Jaji imam baraa’en dinen matoani lo’a i Yesus, “Ai lo’a palola’u? Ai lo’a jalu iajarangen iko?” ingka kenang.
20Jaji barik dasauti kole’a i Yesus, “Ambata jarumku’ dinen, kosan jalu kulamun. Di arona tau bayu’en lapoang manjarumku’. Disa tau babangkulungen, inang bea manjarumku’, di gulungan sao sambayangen, di saona Alatala,” ingka kenang. 21“Mai daikin mangatoaninin lo’ku’? Ti’en to’ isari ikin jarumku’ suba mangatoanikin poang lo’a tau yang manaantalingaan lo’a jarumku’. Datamu ira,” ingka kenang manjaruma i Yesus lo’a imam baraa’en.
22Jaji barik dasauti kole’a tau panyagaien dinen, datampar dinen lindo’a i Yesus. “Baraniko kakaru’ manjarumu lo’a imam baraa’en,” ingka kenang lo’a i Yesus.
23Jaji barik manyauti i Yesus, “Ati’ sala’ dinen jarumku’ labi maam alit isaksiang lo’ka’ samuaka’. Ti’ na’an sala’, ti’ tapat jarumku’, asi lo’a ratina itamparku’ iko,” ingka kenang manjaruma i Yesus lo’a.
24Mamin dinen i Yesus dasuro’ bapi kole’a i Hanas lo’a i Kayapas yang imam baraa’en taun dinen, daingkatpi tanganna.
I Petrus asasal bapi lo’a i Yesus
Mat. 26:71-75; Mk. 14:69-72; Lk. 22:58-62
25Jaji barik nanga dinen de’i, andian buapi i Petrus inang mamindu di bara apiin. Jaji barik andian dinen tau matoani lo’a i Petrus, “Okan iko palola’a tau dinen?” ingka kenang.
Poangsi i Petrus asasal, “Okan. Okanak palola’a,” ingka kenang.
26Jaji andian bapi pangkama imam baraa’en dinen, sairunna tau dinen de’i yang dasapa’en talingana. “Ada’! Balu’-balu’ ikola’ dinen yang inangen nanna tau dinen di kobonen,” ingka kenang manjaruma dinen lo’a i Petrus.
27Jaji asasal bapi i Petrus, “Okan iak,” ingka kenang. Laloang barik manunturunguk dinen manuken.
I Yesus daawa di arona i Pilatus
Mat. 27:1-2,11-14; Mk. 15:1-5; Lk. 23:1-5
28Jaji barik malam-malam, i Yesus daawa lamba’ dari saona i Kayapas lo’a saona Gubernur Pilatus. Jaji barik ambata toa Yahudiin akadeng poang insaluanna saoen. Alibak intama lo’a dinen kole’a maminna ira dabarese. Mamin dalola’ani sara pamareseen mainto’ pandena tamba angkaan di ramianga Palaloien. 29Jaji i Pilatus yang minsaluanen lo’da’ matoani, “Ai sala’a tau dinen yang iaduangen ikin lo’ku’?” ingka kenang i Pilatus lo’da’ matoanina.
30“Ialalo iawana lo’a di’en kole’a andianna kasala’anna. Ti’ kosan kasala’anna na’an iawa lo’a di’en,” ingka kenang manyautina dinen ira.
31Jaji manyauti dinen i Pilatus, “Ti’ kenang, idukum poang ikin pakai adatin,” ingka kenang manjaruma i Pilatus lo’da’.
“Daikam na’ankam barani. Kole’a ikin pamarinta Roma na’an iparuarang lo’am maukum mate,” ingka kenang ira manyautina lo’a i Pilatus. 32Ratina kenanga, mainto’ adarina jaruma i Yesus dinen manjarumang sara matena, arung daangkatang awan di adat Romaan. Yoh. 3:14; 12:32.
33Maminna dinen barik, i Pilatus dinen mole’ balik intama. Jaji matoani lo’a i Yesus, “Ai daiko di’en, iko lalo rajana tau Yahudiin?” ingka kenang jaruma i Pilatus matoanina.
34Jaji barik dasauti kole’a i Yesus, “Ai daiko matoaninu balu’a dinen lo’ku’? Ai daiko saja memang panamu diri’u, atau mamakai panamu tau?” ingka kenang.
35Jaji barik manyauti bapi dinen i Pilatus, “Aiaka, tau Yahudiinak kalo’u! Okan iak maduangen lo’u. Saja urangu, saja gulungan imam baraa’en maduangen lo’u manyera lo’ku’. Ai daiko kasala’annu?” ingka kenang manjaruma i Pilatus lo’a i Yesus.
36Jaji barik manjarum dinen i Yesus lo’a i Pilatus, “Daiak kangkamanku’ okan di duniaan. Ati’en kangkamanku’ saja di duniaan di’en, tentu palola’ku’ dinen malawan pakarasang lo’ku’ mainto’ na’anku’ dasera lo’a toa Yahudiin. Poangsi kangkamanku’ okan di dunia di’en, ialalo na’anku’ dapakarasang kole’a ambata palola’ku’,” ingka kenang manyautina i Yesus lo’a i Pilatus.
37“Ati’ kenang, daiko saja mangaku’ raja?” ingka kenang i Pilatus lo’a i Yesus.
Jaji manjarum dinen i Yesus, “Raja la’a ti’ to’ kenang. Daiak paranakangku’ mondokku’ lo’a duniaan di’en sera poang tujuanku’ ialalo mainto’ kujarumanga lo’a tauen jalu tapaten. Jaji intain mainya’en lo’a jalu tapaten tentu mainya’ manaantalinga lo’ku’,” ingka kenang manyautina i Yesus lo’a i Pilatus.
38“Ah, balu’ ai, jalu tapaten!” ingka kenang i Pilatus manyautina.
I Yesus daukum mate
Mat. 27:15-31; Mk. 15:6-20; Lk. 23:13-25
Jaji barik i Pilatus lamba’ bapi insaluan lo’a tau Yahudiin. “Jaji tau dinen kosan kudua’ang kasala’anna,” ingka kenang. “Na’an kutamu maukum,” ingka kenang i Pilatus lo’a toa Yahudiin. 39“Poangsi kenang poang. Awan kabiasa’anka’ launna di’en, kiraso di ramianga aso Palaloien, andian tau itaanen di sao ukumanen yang ipalapas. Mainya’kin tau di’en kupalapas, Raja tau Yahudiin?” ingka kenang lo’da’.
40Laloang mamuko ira, “Ada’ palapasa tau dinen! I Barabas poang ipalapasen!” ingka kenang ira mamukoon. Jaji i Barabas dinen tau parampok.
Currently Selected:
Yohanes 18: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
