Yohanes 19

1Jaji barik i Pilatus dinen manyuro’ lo’a tentarana, dasuro’ manyupet lo’a i Yesus. 2Jaji daawa barik kole’a tentaraan dinen, daanu kambu’a, daanam nanna ambata gulungan pati’en, daapis di uluna. Dameang bea sape langkeen kain rajaan. 3Jaji barik maroi lo’a, “Balangke tio’u rajana tau Yahudiin!” ingka kenang, laloang manampar barik lo’a.

4Maminna dinen barik, i Pilatus minsaluan bapi lo’da’. “Na, tau di’en kuawa insaluan bapi lo’in. Bele ikin, kosan kudua’ang kasala’anna yang pandeen idukum,” ingka kenang lo’da’. 5Jaji maruar barik dinen i Yesus, arakambu’ pati’en dinen, arasape rajaan dinen. Jaji manjarum dinen i Pilatusen, “Belejo! Ialalo mantuari dinen!” ingka kenang i Pilatus lo’da’.

6Jaji maminna ira maita lo’a i Yesus, mamuko barik ira, “Uno’ poang! Uno’ poang! Ipanandapa salip!” ingka kenang jarumda’ lo’a i Pilatus.

Jaji manyauti barik i Pilatus, “Na’anak mauno’ yang daiaken, kole’a kosan sala’a kudua’angen yang pandeen idukum mate. Ti’kin mainya’ mauno’, uno’ poang ikin,” ingka kenang jaruma i Pilatus manjaruma lo’da’.

7Jaji manyauti barik ira tau bayu’en, “Adatam dinen, daia arung mate kole’a asanna kalena Anaka Alatala!” ingka kenang ira.

8Jaji maminna barik i Pilatus mandalinga kole’a i Yesus daasan Anaka Alatala, insang atakut dinen daia. 9Jaji mole’ balik ilalam matoani lo’a i Yesus, “Ai daiko di’en, urang aiko?” ingka kenang matoanina lo’a i Yesus. Jaji i Yesus na’an bea manjarumang, na’an kakaji’. 10“Asi lo’a na’annu kakaji’, na’annu manyauti lo’ku’. Ai na’an itamu iko andianna kuasaku’ pande itiang malapasang lo’u, pande bea kupanandapa lo’u maukum mate?” ingka kenang i Pilatus lo’a i Yesus.

11Jaji barik dasauti kole’a i Yesus, “Ai kuasanu dinen lo’ku’? Ti’ okan Alatala manyuro’en, saja kosan kuasanu. Jaji yang baraa’en sala’a, tau maduangen lo’ku’ yang manyeraan lo’ku’ lo’a tangannu. Dinen yang baraa’en sala’a,” ingka kenang.

12Rabarik manaantalinga jarum dinen, i Pilatuspi maruar bapi lo’da’ to’ manyari dalanna to’ palapas lo’a i Yesus. Poangsi ira tau bayu’en mamuko, “Ti’ko malapasang lo’a, okanko lagi’ kawanna Kaisar Raja Roma. Lawannako. Kole’a intain asanen kalena jaji raja, dinen malawan lo’a Kaisar. To’ ipalapas kakaru’ iko!” ingka kenang jarumda’ lo’a i Pilatus.

13Jaji barik maminna manaantalinga dinen i Pilatus, manaantalinga jarum Yahudiin balu’a dinen, daawa barik lo’a i Yesus dinen insaluan laloang aduduk diri’a di ale’ kasaan. Asanna dinen ale’ kasa jarum Ibraniin, Gabata. Ratina sarar batu. 14Jaji iawana lo’a dinen, kira-kira tanga’ asoon di aso mangamasangen to’ maramiang aso Palaloien. Jaji manjarum dinen i Pilatus lo’da’, “Na, di’ lalo rajanin,” ingka kenang dinen lo’da’.

15Jaji mamuko barik ira, “Uno’ poang! Uno’! Ipanandapa salip!” ingka kenang ira.

Jaji matoani i Pilatus, “Ai rajanin, isuro’ iduno’a ikin?” ingka kenang lo’da’.

Jaji manjarum ira imam baraa’en, “Kosan rajanam. Rajanam lalo Kaisar,” ingka kenang manyautina ira lo’a i Pilatus.

16Baru’ barik dinen i Yesus daparuarang lo’a tanganda’ dinen, to’ dapanandapa.

I Yesus dapandapa di salipen

Mat. 27:32-38; Mk. 15:21-27; Lk. 23:26,33-43

Rabarik i Yesus dinen daawa kole’da’ 17insaluanna banuaan. Jaji i Yesus minsaluan dinen, dasaan kayu salipa, daawa lo’a kosan dinen yang iasanen Golgota di jarum Ibrani. Golgota dinen ti’ awan jarumka’, karampang ulu. 18Rabarik dinen inang i Yesus dauno’a, dapanandapa di kayu salipen. Andian bapi mantuari duaan dapanandapa bea, sera di katona, sera di kayoko’a. I Yesus dinen itanga’.

19Jaji barik i Pilatus manulis surat. Surat dinen barik dapalakat di kayu salipen. Jaji yang datulisangen kenang, “Di’en lalo i Yesus tau banua Nasaret, Rajana tau Yahudiin,” ingka kenang. 20Jaji bayu’ tau Yudeaan mambasa surat dinen kole’a kosan dinen na’an bajao’ lo’a banua Yerusalem. Mainso’. Jaji dinen datulis ilalam jarum Ibraniin, dalola’ani nanna jarum Latinen nanna jarum Yunaniin. 21Jaji mambasa surat dinen, ira gulungan imamen manjarum lo’a i Pilatus, “Ada’ tulisa dinen sampai iaku’ raja. Arung itulis kenang, Daia dinen asan-asan kalena Rajana tau Yahudiin, baru’ mandua’,” ingka kenang ira lo’a i Pilatus.

22Jaji manyauti dinen i Pilatus, “Mamin lalo kutulis. Na’an lagi’ ipalinang,” ingka kenang.

23Jaji barik gulungan tentaraan dinen maminna i Yesus dapanandapa di kayu salipen, dala barik kainna i Yesus. Datawa’-tawa’ ampat. Dala barik sape langkena, dabele kosan tolang tutuna. 24Jaji barik sijaruman ira, “Ada’ dinen iripaka iki’. Se’ ipolaang tanungan. Indi dadua’en, dinen malaan,” ingka kenang ira. Jaji kenang polana dinen kole’da’ mainto’ adarina baya yang datulisangen ilalam Jaruma Alatala,

Kainku’ datawa’-tawa’ kole’da’. Dapolaan tanungan lo’a sape langkeku’,

ingka kenang ilalam Jaruma Alatala. Im. 21:10; Msm. 22:19. Jaji awan dinen lalo polana dinen gulungan tentaraan.

25Jaji barik andian tau akadengen di biringa kayu salipen, i Maria, induna. Andian bea sairunna induna, i Maria bea asanna, bainyena i Klopas. Andian bea i Maria Magdalena. 26Jaji dakita kole’a i Yesus andian bea inang palola’a yang palin dakasaangen. Jaji manjarum barik i Yesus lo’a induna, “Na, dinen anaku, ia barik manuntuaniin toanu. Malola’ko lo’a,” ingka kenang. 27Jaji manjarum bea barik lo’a palola’a dinen, “Dinen barik indunu. Tuntuani jajalu maam,” ingka kenang lo’a palola’a paba’ina. Jaji dala barik dinen i Maria lo’a saona kole’a palola’a dinen, datuntuani.

I Yesus mate

Mat. 27:45-50; Mk. 15:33-37; Lk. 23:44-46

28Jaji barik datamu kole’a i Yesus kole’a samuana jalu dinen yang to’ adari lo’a mamin akaus adari. Jaji manjarum bapi i Yesus, mainto’ adarina jalu datulisangen ilalam Jaruma Alatala, “Akaring nyawaku’,” ingka kenang. Msm. 22:16; 69:22. 29Jaji andian bea dinen mangkoken apano’ nanna angguren, anggur masamen. Jaji barik bunga karangen, jalu balu’ busaan, dinen dabasa’i inang, datanggeang lo’a baba’a i Yesus di daan isopen, dapainyumang lo’a. 30Mamin barik dainyum kole’a i Yesus, jaji manjarum, “Mamin akaus,” ingka kenang. Laloang dadongang dinen uluna, akatu nyawana.

Rusuka i Yesus daajuk

31Jaji gulungan toa Yahudiin alibak marantang inang dinen bangkayoanna tau dasalipen dinen sampai di aso mina’a. Kole’a aso dinen aso Jumat, aso mangamasang sangarianna lo’a aso Sabaten. Kenang bapi aso Sabat dinen to maramiang Palaloien. Jaji ambata toa Yahudiin dinen mamita lo’a i Pilatus dasuro’ poto’ang kakida’ laloang paindor dari kayu salipen. 32Jaji lamba’ ira tentaraan, tau daukumiin yang seraan dinen dapoto’ang kakina. Mondok lo’a kaduaan dinen, dapoto’ang bea kakina. 33Poangsi barik mondok dinen lo’a i Yesus dakita kole’da’ mamin mate, jaji na’an dari dapoto’ang kakina. 34Jaji andian tentara seraan, majuk dinen lo’a rusuka i Yesus laloang mondok barik dara’en sarata nanna danumen areang minsaluan inang. 35Yang tau maitaan dinen nanna matana, ialalo di’en yang manyaksiin lo’in mainto’ iparasaya’ina ikin. Yang jarum saksiin di’en saja tapat. Ia yang manamuun saja jalu tapat. 36Jaji ratina i Yesus dinen na’an adari dapoto’ang kakina, manyuro’ adari baya yang datulisangen ilalam Jaruma Alatala,

Kosan to’ serapi tolanga yang dapoto’angen,

ingka kenangjo ilalam Jaruma Alatala. Pal. 12:46; Bil. 9:12; Msm. 34:21. 37Andian bapi baya datulisangen ilalam Jaruma Alatala,

Ona’ dinen tau maminen daajuk kole’da’ to’ dabele-bele kole’da’,

ingka kenangjo ilalam Jaruma Alatala. Sak. 12:10; JD. 1:7.

I Yesus dakubur

Mat. 27:57-61; Mk. 15:42-47; Lk. 23:50-56

38Jaji barik andian tau sera dinen, i Yusup asanna, tau dari banua Arimatea. I Yusup dinen palola’a i Yesus, poangsi malola’a dinen sara malamun kole’a daia atakut lo’a toa Yahudiin. Jaji barik i Yusup dinen lamba’ lo’a i Pilatus to’ mamita bangkayoanna i Yesus, daparuarang bua kole’a i Pilatus. Jaji barik bangkayoanna dinen dala kole’a i Yusup dinen. 39Jaji barik tamba bea i Nikodemus, daawa kira-kira tiga pulo’ ampat kilo inyak muren yang dabaroken nanna garuun. I Nikodemus lalojo dinen lamba’en lo’a i Yesus di malamen. Yoh. 3:1-2. 40Jaji dala bangkayoanna i Yesus kole’da duaan, dainyaki. Daliliti nanna kain lenan malola’ani sarada’ mangamasangen tau mateen. 41Jaji kosan matena i Yesus dinen, mainso’ lo’a dinen andian kubur loang batu yang na’anen kala’ dapakai tau. 42Jaji lo’a dinen daawa bangkayoanna i Yesus, dakubur mala mainso’en, kole’a dinen aso tau Yahudiin mangamasaang sangarianna lo’a aso Sabaten.

Currently Selected:

Yohanes 19: EBE

Highlight

Copy

Compare