Yohanes 20

I Yesus tio’ balik

Mat. 28:1-10; Mk. 16:1-8; Lk. 24:1-12

1Jaji di aso Mingguun barik, malam-malam lamba’a barik i Maria Magdalena lo’a kuburen. Dabele dinen batu yang pangaputiin mamin dapalinang dari baba’ kuburen. 2Jaji barik arari dinen i Maria lo’da’ ira duaan, ari Simon Petrus nanna palola’ seraan dinen yang palin dakasaang kole’a i Yesus. “Bangkayoanna Paraampuanka’ mamin inyap kole’da’, na’an itamu ikam kosanna barik,” ingka kenang i Maria lo’da’.

3Jaji barik dinen i Petrus nanna palola’a yang seraan dinen terus lamba’ lo’a dinen, arari. 4Jaji palola’a yang seraan dinen tajolo mondoka lo’a kuburen. 5Boboko’ barik daia inang mamele kain lenan palilitiin dinen inang, poangsi na’an intama. 6Mamin dinen, mondok i Petrus imundina, laloang intama lo’a dinen. Daiapi mamele kain lenan inang. 7Kain yang di uluna i Yesus dinenjo andian bua inang, poang silaan nanna bokanen, dalulun di kosan diri’a. 8Jaji mamin dinen barik, intama bea dinen palola’a seraan yang tajoloon de’i mondoka lo’a kuburen. Dabele barik dinen, laloang parasaya’. 9Kole’a sampai nanga dinen, ira duaan nampi bua manamu ratina jalu datulisangen ilalam Jaruma Alatala yang manjarumangen kole’a i Yesus arung tio’ balik maminna mate. 10Mamin dinen mole’ balik ira dinen lo’a saoda’.

I Yesus marantang paba’ina lo’a palola’a

Mk. 16:9-11

11Jaji i Maria dinen akadengpi inang anangis insaluanna kuburen. Patanga’an anangisa dinen i Maria boboko’ mamele intama, andian jalu dakita. 12Andian malaikat aduduk inang, dua yang arakain ute’-ute’en. Jaji dinen aduduk di kosan palenga’anna bangkayoanna dinen, sera di uluna, sera di kakina. 13Jaji barik ira dinen matoani lo’a, “Mai daiko anangisu?” ingka kenang dinen ira mangatoanina lo’a i Maria.

Jaji barik manyauti dinen i Maria lo’da’ dinen, “Inyap bangkayoanna Paraampuanku’. Na’an kutamu kosanna. Mamin dapalinang tau,” ingka kenang i Maria. 14Jaji koengang kalena barik, mamele, andian tau akadeng inang. I Yesus lalo dinen, poangsi i Maria dinen na’an magilala lo’a. 15Jaji barik manjarum dinen i Yesus lo’a i Maria, “Mai daiko anangisu? Intainsi isariin iko?” ingka kenang.

Jaji barik i Maria dinen daasanang tau panyagai kobon dinen, “O Ama’e, intain yang manuun bangkayoanna Paraampuanku’, ungka’en iko? Subako manjarumang lo’ku’ kosanna, to’ kuala,” ingka kenang manjaruma i Maria lo’a i Yesus.

16Jaji i Yesus manjarum barik lo’a, “Maria’e!” ingka kenang.

Laloang koengang kalena bapi lo’a i Yesus laloang manjarum lo’a pakai jarum Ibrani, “Rabuni!” ingka kenang. Jaji rabuni dinen, ratina guru.

17Jaji barik, “Ada’ manjaputen lo’ku’,” ingka kenang i Yesus lo’a i Maria, “kole’a nampiak di’en mole’ lo’a Ama’ku’. Mole’ko lo’a arasairunku’ dinen jarumang poang lo’da’, to’ mole’ak lo’a tau dinen, ialalo Ama’ku’ yang Amaninen bea, lo’a Alatalaku’ yang Alatalaninen bea,” ingka kenang manjaruma i Yesus lo’a i Maria. 18I Mariapi dinen laloang lamba’ manjarumang lo’a palola’a awan jarum dapasanangen bua, manjarumang kole’a maminna daia sidua’ nanna i Yesus.

I Yesus payoang kalena lo’a palola’a

Mat. 28:16-20; Mk. 16:14-18; Lk. 24:36-39,47-49

19Jaji barik pamamalamen dinen, aso Mingguun, ambata palola’a dinen samuana bakumpul. Mambangan kosan yang dalalako’iin dinen dakunsi kausana. Atakut dinen ira lo’a toa Yahudiin. Jaji barik dinen mondok barik i Yesus lo’da’ akadeng ibiringda’. Jaji i Yesus manjarum lo’da’, “Manjarumak lo’in manyuro’ maam jaji nyawanin,” ingka kenang i Yesus lo’da’. 20Mamin dinen barik dapayoang tanganna dinen nanna rusuka lo’a gulungan palola’a. Jaji ira dinenpi barik maam jaji nyawana mamelena lo’a Paraampuanda’.

21Jaji barik manjarum bapi i Yesus lo’da’, “Na daiak, manjarumak lo’in manyuro’ maam jaji nyawanin,” ingka kenang. “Awan lalo Ama’ku’ manyuro’en lo’ku’, daiakpi manyuro’ak bapi lo’in,” ingka kenang manjaruma i Yesus lo’da’. 22Jaji barik i Yesus maniap lo’da’ dinen, “Manarima’kin Sumangat Bareseen,” ingka kenang. 23“Daikin rabarik, ati’enkin mamponi dosa tau, dosana tau dinen daamponi bea. Ati’enkin na’an mamponi dosa tauen, tau dinen na’an bea daamponi,” ingka kenang manjaruma i Yesus lo’da’. Mat. 16:19; 18:18; 28:18-19; Mk. 16:15-16.

I Yesus barik jarumang kalena lo’a i Tomas

24Jaji di antarada’ dua belasen, andian sera inyapen dinen palola’a i Yesus, i Tomas asanna. I Tomas dinen daasan bea anak kampit. 25Jaji barik manjarum dinen ira palola’a bokanen, “Andiankam sidua’ nanna Paraampuanka’. Daia dinen mamin tio’ balik!” ingka kenang.

Jaji barik i Tomas dinen na’an parasaya’, “Ti’ okan mataku’ maitaan, ti’ nampi tunjukku’ kujulukangen lo’a tanganna belean lukana yang dapakuangen dinen, na’anak parasaya’. Ti’ nampiin tanganku’ kujalaang lo’a rusuk alukaan dinen dadua’ ajuken, na’anakpi parasaya’,” ingka kenang i Tomas lo’da’ manyautina.

26Jaji barik andian saminggu antarana maminna dinen. Jaji andian bapi kumpulanda’ yang palola’a i Yesus, dakunsi bapi mambanganna kosanda’ dinen. Andian i Tomas barik inang, na’an bea inyap i Tomas. Jaji mondok bapi i Yesus akadeng ibiringda’. Jaji manjarum, “Na manjarumak lo’in manyuro’ maam jaji nyawanin,” ingka kenang lo’da’. 27Mamin dinen dasari bapi dinen i Tomas, “Na, Tomase, tadangko raraoen pikirannu. Parasaya’ko barik. Tunjuku, julukang indi’ang. Beleang matanu lo’a tanganku’. Tangannu tanggeang, jalaang lo’a rusukku’,” ingka kenang lo’a i Tomas.

28Jaji dasauti bapi kole’a i Tomas, “Paraampuanku’e! Alatalaku’e!” ingka kenang.

29Jaji barik, “Mai daiko parasaya’u barik, Tomase? Kole’a maminnu maita lo’ku’, te’i? Awan tau yang parasaya’en kapisi poang nampi maita, bauntung daia yang parasaya’en memen,” ingka kenang manjaruma i Yesus lo’a i Tomas.

Tujuanna buku’ di’en kole’a i Yohanes

30Jaji panyunyuana i Yesus dinen yang dapolaan di matana palola’a, bayu’ bea bokanen yang na’anen itulisang ilalam buku’ di’en. 31Poangsi di’en ratina itulisa mainto’ parasaya’in, mainto’ itamuna ikin kole’a i Yesus ialalo Kristus, tau yang dabayaangen dinen, Anaka Alatala. Mainto’ de’i ti’kin parasaya’, tio’kin barik salaun-launna. 1Yoh. 5:13.

Currently Selected:

Yohanes 20: EBE

Highlight

Copy

Compare