Yohanes 21

I Yesus payoang kalena lo’a palola’a yang tujuun

1Jaji barik i Yesus paitang bapi kalena lo’a palola’a di dano Tiberias. 2Jaji kenang tutulanna. Ira dinen ari Simon Petrus nanna i Tomas yang daasanen bea anak kampit, bakumpul. Andian bea inang ari Natanael, tau dari banua Kana propinsi Galilea. Andian bapi ira anaka i Sebedeus nanna dua palola’a bokanen. 3Jaji bakumpul ira, manjarum i Simon Petrus lo’da’, “To’ inyapak manjala,” ingka kenang.

“Tambakam,” ingka kenang barik ira. Jaji samuana ira dinen tarangkat mamarau. Jaji barik manjala ira dinen, samalam-malam manjalaang jalana inang, kosan bea dinen ira kule’. Lk. 5:5. 4Imbara asoon barik, andian i Yesus dinen akadeng di biring danoon dinen. Poangsi gulungan palola’a dinen na’an mangilala lo’a.

5Jaji manjarum lo’da’, “Kule’kin, anake?” ingka kenang manjaruma lo’da’.

Jaji barik dasauti kole’da’, “Kosan,” ingka kenang.

6Jaji manjarum bapi i Yesus lo’da’, “Amborang jalanin di katoen inang,” ingka. “Inang ona’ kule’in,” ingka kenang lo’da’. Jaji daamborang kole’da’ malola’ani jaruma i Yesus dinen, bayu’ kule’da’. Na’an dakule’ daangkat lagi’ kole’da’ lasana bayu’a. Lk. 5:6.

7Jaji barik palola’a seraan dinen, yang dakasaangen dinen kole’a i Yesus, daia manjarum, “Dinen lalo Paraampuanka’,” ingka kenang. Jaji dadalinga kole’a i Simon Petrus dapakai bapi dinen sapena, kole’a di manjalana de’i daleka’ dinen sapena. Jaji dapakai bapi sapena laloang marajuk lo’a danumen. 8Yang palola’a bokanen dinen mamarau lo’a biring kabangen, daganding jalada’ dinen yang apano’en nanna lauken. Na’an bea bajao’ lo’a biring kabangen dinen, kira-kira sumilan pulo’ meter poang. 9Jaji mauwat barik ira lo’a biring kabangen, dakita andian bara api, andian lauk. Itutung lauken inang, andian bea rotiin.

10Jaji manjarum bapi i Yesus lo’da’, “Lauken dinen, mawakin sapa dua,” ingka kenang i Yesus lo’da’.

11Jaji barik i Simon Petrus dinen mauwat di parauen manarik jalana dinen lo’a tana’en. Bayu’ dinen kule’a, jalaan andian saratus lima pulo’ tiga gulungan lauk baraa’en. Kapi dinen bayu’ lauken, jalana dinen na’an bea aripak. 12Jaji manjarum i Yesus lo’da’, “Se’, angkaanki’,” ingka kenang lo’da’. Jaji dinen samuana ira kosan barani mangatoani lo’a, intain asanna. Kole’a mamin datamu ratina dinen Paraampuanen. 13Laloang dinen i Yesus manjaput rotiin, datawa’ bua lo’da’. Kenang bapi nanna lauken. 14Jaji dinen katalung kalina payoanga kalena maminna tio’ balika.

I Yesus manyuro’ lo’a i Petrus manuntuani lo’a anak ulun maama

15Jaji maminna angkaan ira, i Yesus manjarum, “O Simon anaka i Yohanes, ai daiko mangasaangko lo’ku’ labi lo’da’ bokanen?” ingka kenang.

Jaji dasauti kole’a i Simon Petrus, “O’ bea, Paraampuanku’. Mamin itamu iko,” ingka kenang i Simon Petrus manyautina lo’a i Yesus.

Jaji manjarum bapi i Yesus lo’a i Simon Petrus, “Ati’ kenang, tuntuani anak dombaku’,” ingka kenang. 16Jaji dakatoani bapi kole’a i Yesus, “O Simon anaka i Yohanes, ai daiko, mangasaangko lo’ku’,” ingka kenang.

“O’ bea,” ingka kenang jaruma dinen i Simon Petrus. “Itamu iko bea,” ingka kenang lo’a i Yesus manyautina.

Jaji i Yesus manyauti lo’a, “Tuntuani gulungan dombaku’,” ingka kenang.

17Jaji katalung kalina mangatoanina i Yesus lo’a i Simon Petrus, “O Simon anaka i Yohanes, ai daiko mangasaangko lo’ku’,” ingka kenang.

I Petruspi dinen susa mamikira dinen kole’a mamin talung kali matoanina balu’a dinen. Jaji barik manyauti lo’a i Yesus, “Paraampuanku’, mamin akaus itamu iko. Itamuna bua iko mangasaangku’ lo’u,” ingka kenang manjaruma i Petrus lo’a.

Jaji manjarum bapi i Yesus lo’a, “Na daiko di’en, manuntuaniko lo’a gulungan dombaku’,” ingka kenang. 18“Manjarumak tapat-tapat lo’u, di baru tio’u, ikule’ iko mangamasang kalenu, laloang lamba’ suka ate. Poangsi rabarik, di atoanu ona’, to’ itanggeang iko tangannu, tau bokanen barik yang mangamasangen lo’u mawa lo’u lo’a jalu ikalibakangen iko,” ingka kenang manjaruma i Yesus. 19Ratina kenanga jaruma i Yesus, dajarumang memen sara matena i Petrus. Matena i Petrus dinen to’ mawa pudi lo’a Alatala. Jaji manjarum i Yesus bapi lo’a, “Malola’ko lo’ku’,” ingka kenang.

I Yesus manjarumang palola’ seraan yang dakasaang jajiin

20Jaji barik maminna dinen, i Petrus koengang kalena, maita dinen lo’a palola’a seraan yang dakasaangen jaji. Palola’a dinen lalojo yang mainso’iin lo’a i Yesus di angkaanda’ mangatoani tau to’ maduangen lo’a i Yesus lo’a musuna mainto’ dakule’a datingkam. Yoh. 13:25. 21Jaji barik i Simon Petrus dinen maita tau dinen, matoani, “Paraampuane, balu’ ai ona’ tau dinen matena?” ingka kenang.

22Jaji barik i Yesus manyauti bapi lo’a, “Dinen okan urusannu. Umpamana tau dinen kusuro’ tio’ sampai mole’ balikku’ lo’a di’en, dinenpi okan bea urusannu,” ingka kenang i Yesus lo’a i Petrus. “Daiko malola’ko poang lo’ku’,” ingka kenang.

23Jaji barik tababar dongoon sarara palola’a, palola’ seraan dinen na’an to’ mate kaingka. Poangsi jaruma i Yesus okan kenang. Daia dinen dakenangina poang ilalam jaruma dinen, “Umpamana tau dinen kusuro’ tio’ sampai mole’ balikku’ lo’a di’en, okan bea urusannu,” ingka kenang inangen.

24Jaji palola’a dinen lalo yang manjarumangen, yang manulisangen. Daikampi mamin itamu ikam jalu itulisangen di’en jalu tapaten kausana.

25Jaji bayu’ bea karajana i Yesus yang bokanen. Kurasa, ati’en datulisang samuana sera-serana, dunia di’en na’an sumana kole’a bayu’a buku’a jalu datulisangen dinen.

Currently Selected:

Yohanes 21: EBE

Highlight

Copy

Compare