Yohanes 2

I Yesus mamola tanda panyunyuana, danumen dapadari anggur

1Duang aso maminna dinen, andian urusan tau sialaan di banua Kana propinsi Galilea. Jaji induna i Yesus lo’a dinen. 2I Yesuspi nanna palola’a tamba bea nanna pangabangen. 3Jaji barik akaus danum angguren, kosan lagi’. Jaji barik induna dinen mondok lo’a i Yesus manjarumang, “Akaus mamin anggurda’,” ingka kenang lo’a i Yesus.

4Jaji barik manjarum i Yesus dinen lo’a induna, “Na’an, indu’e. Ambakin to’ isuro’ang iko lo’ku’ dinen, kole’a nampi ada’a kuawana tugasku’,” ingka kenang jaruma lo’a induna.

5Jaji barik manjarum induna lo’a ambata suro’an tauen inang. “Ai poang yang dasuro’angen ona’ kole’a anakku’, dinen ikarajaan ikin,” ingka kenang.

6Jaji maminna dinen andian lalo bakam batuun, anam bayu’a yang kira-kira lapan pulo’ liter atau saratus dua pulo’ liter. Ratina bakamen dinen datiang pamareseda’ urang Yahudiin malola’ani atoran agamada’.

7Jaji dasuro’ang barik kole’a i Yesus lo’a ambata suro’anda’ inangen, “Na, bakam dinen, isi’i ikin nanna danumen,” ingka kenang. Jaji daangkutang barik kole’a suro’anda’ dinen sampai apano’ jaji, daisi’i nanna danumen.

8Jaji barik, “Na, awa ikin dinen kakapit lo’a paurus tau sialaan,” ingka kenang. Daawa barik, danyayami, mamin padari anggur.

9Jaji asala angguren dinen na’an datamu kole’a paurus tau sialaan, poangsi ambata suro’anna dinen mamin manamu. Jaji maminna barik danyanyami, dakalong dinen babakaan yang iantat arainyeen. 10Jaji manjarum, “Daiko di’en laan,” ingka kenang. “Kiraso, ti’en andian pangabang, ti’ andian tau siala, jalu banyanyamen tajolo ipainyumangen iki’. Maminna dinen, mamin puas tauen mainyum, baru’ yang anggur biasaan,” ingka kenang. “Jalu di’ laan. Yang biasaan tajolo idinyuma. Yang jalu banyanyamen ipamundi iko,” ingka kenang dinen paurusen lo’a tau sialaan.

11Jaji panyunyuana i Yesus dinen, danum dapola anggur, dinen panyunyuana yang mulakataan. Dapola inang di banua Kana propinsi Galilea. Inang lalo dapayoanga kamaamanna. Jaji barik gulungan palola’a dinen laloang parasaya’ lo’a.

I Yesus mamarese saona Amana

Mat. 21:12-13; Mk. 11:15-17; Lk. 19:45-46

12Jaji barik i Yesus dinen nanna palola’a sarata arainduna, sarata arasairunna lamba’ lo’a banua Kapernaum. Mondok barik inang lalako’. Insa’-insa’ aso poang launna inang. Mat. 4:13.

13Mamin dinen, mamin mainso’ tauen to’ maramiang aso Palaloien. Jaji barik daia lamba’ lo’a Yerusalem. Pal. 12:1-27. 14Mondok inang dakita inang di pakar saona Alatala, datiang tau mamet gulungan ambata inatangen, gulungan sapi dombaan, gulungan burung merpatiin. Andian bea ambata tau panukar duiten yang aduduken inang mangaraja urusanna. 15Jaji barik mamola panyupet dinen i Yesus dari taliin, daburo ambata gulungan inatangen, ambata sapi dombaan yang dapet tauen inang. Gulungan ambata mejaan tau manukar duiten dinen akaus daparaba’, akaus dapasunsang kole’a i Yesus, manyuro’ tambor-ambor duitda’ alao’a lo’a sararen.

16Jaji barik marada’i i Yesus lo’da’ tau mamet burungen, “Palinang ikin inatang di’en! Ai kenang maam-maam mamolanin? Saona Ama’ku’ ipola kakaru’ ikin sao pasar!” ingka kenang.

17Mamin dinen barik, baru’ daparandam kole’a palola’a lo’a jalu datulisangen memen ilalam Jaruma Alatala yang dinenen,

O Alatala, mate-mateak mangamuroangen lo’a saonu,

ingka kenangjo ilalam Jaruma Alatala. Msm. 69:10.

18Jaji barik manjarum ambata toa Yahudiin, “Sampai baraninu. Ai tanda kuasanu, baraninu balu’a dinen?” ingka kenang. “Suba payoang lo’am.”

19“Tanda kuasaku’, kujarumang lo’in, ti’ irurun ikin, iparaba’ ikin sao di’en, kupola baru dalam talung aso,” ingka kenang manyautina i Yesus lo’da’. Mat. 26:61; 27:40; Mk. 14:58; 15:29.

20“Adu! Sampaila daiko dinen! Daikam,” ingka, “ampat pulo’ anam taun mamolanam di’en. Baru’ adari. Daiko ipola iko dalam talung aso!” ingka kenang ira toa adaten lo’a. 21Jaji manjaruma i Yesus dinen mamakai sama’ jarum. Dasama’ang mantuarina lo’a saona Alatala. 22Jaji maminna barik daia dakatio’ balik dari matena, jaruma dinen daparandam barik kole’a palola’a. Jaji parasaya’ barik ira lo’a jalu datulisangen memen ilalam Jaruma Alatala, parasaya’ lo’a jaruma i Yesus dinen.

I Yesus mangilala isi’ ate mantuariin

23Jaji barik, i Yesus launna di Yerusalem, mondok aso Palaloien iramianga. Jaji tau inangen, bayu’ tau parasaya’en lo’a i Yesus kole’a panyunyuana. Bayu’ jalu dakitaan dinen kole’da’. Dinen lalo yang manyuro’ parasaya’. 24Poangsi i Yesus na’an manyandar lo’da’ kole’a mamin dakilala kalakuanda’ kausa. 25Kosan paruluna tauen manjarumang lo’a kole’a mamin datamu isi’ ate tauen.

Currently Selected:

Yohanes 2: EBE

Highlight

Copy

Compare