Yohanes 1

I Yesus yang iasanen Jarum Pangatio’en andianna memen nampina duniaan

1Di nampina andian duniaan, andianna memen tau iasanen i Jarum. Jaji i Jarum daia sarilao’ nanna Alatala, sabenara daira duaan dinen sama Alatalaan. Kol. 1:17. 2Jaji dari akata memen i Jarum dinen sarilao’a nanna Alatala.

3Gulungan ambata jaluun dapanyunyuaanga, samuana malaloi tau dinen. Kosan jalu adariin yang na’anen dapola malaloi i Jarum dinen. 4Tulak nanna i Jarum lalo andianna jalu tio’. Jaji barik tio’a i Jarum dinen, dinen lalo yang marawangiin lo’a anak mantuariin. 5Jalu arawangen dinen marawangipi di araunen, sampai awandi’en marawangina. Na’an kala’ atalo kole’a araunen.

6Jaji andian tau dasuro’en kole’a Alatala, asanna dinen i Yohanes Pambaptis. Mat. 3:1; Mk. 1:4; Lk. 3:1-2. 7Daia dinen pamondoka to’ datiang manjarumang i Jarum dinen lo’a tauen. Ia manyaksiangen kole’a ialalo i Jarum dinen yang jalu arawangen, mainto’ mandalingana kausa tauen ratina, mainto’ tauen parasaya’a lo’a dongo dinen.#1:7 Lo’a Keselamatanka’ Yoh. 3:14b,16-20; PalPa. 4:12; Rm. 3:10-12,20,23,28; 8:1; 1Kor. 15:3-4; Gal. 2:15; Ep. 2:8-9; 2Ptr. 3:9. 8Okan diri’a dinen jalu yang arawangen. Daia dinen suro’anna poang, dasuro’ itiang manjarumang ratina jalu arawangen dinen. 9Kole’a andian mondok lo’a duniaan jalu arawang yang tapaten yang to’ marawangi lo’a anak mantuariin.

10Jaji i Jarum dinen, daia launna lalako’a di duniaan, na’an bua dakilala kole’a tau duniaan. Kapisi ambata jalu duniaan akaus dapadari malaloi tau dinen, pande bea na’an dakilala kole’a tau duniaan. 11Lo’a banuana lalo mondoka, poangsi tau banuana alibak manyialo lo’a. 12Andian poang tau yang manyialoon lo’a, yang parasaya’en lo’a, dinen barik yang pandeen padari anaka Alatala.

13Awan laloon tau iparanakang baruun barik tau manyialoon lo’a. Jaji iparanakang baruun dinen, okan awan paranakang biasaan, okan kole’a kamainya’anna araama’ka’ mantuariin. Yang paranakang baruun dinen dari nanna Alatala. Alatala barik Ama’ka’.

14Jaji i Jarum dinen mondok padari mantuariin. Saja maam sarilao’a nanka’. Maam atena lo’a tauen. Basa tapat lapoang launna lalako’a di duniaan. Jaji daikam maminkam mangita kamaamanna yang palin patut ipudiin dinen, yang daunjukangen kole’a Alatala lo’a Anaka yang jangka’aan seseraan dinen.

15Jaji tau dinen lalo yang dajarumangen kole’a i Yohanes Pambaptis, dapukoang lo’a tauen, “Dinen lalo yang kujarumangen lo’in ijoloon,” ingka. “Andian,” uka’, “Tau mondoken imundiku’. Kapisi imundiku’, daia dinen baraa lagi’ lo’ku’, kole’a daia andianna memen di nampiku’,” ingka kenang manjaruma i Yohanes lo’a tauen. 16Jaji dari atena i Yesus dinen yang palin kasuanganen nanna kamaamanen, daiki’pi samuaka’ manarima’ kamaamanna bea, dameang lapoang lo’ka’. 17Malaloi baki’ Musajo dinen dameangka’ Ukuma Alatala. Rabarik di’en malaloi i Yesus Kristus di’en dameangka’ kamaamanna atena, dameangka’ pangajaranen yang tapaten. 18Kosan tau kala’en mangita lo’a Alatala. Poangsi andian yang manjarumangen lo’ka’. Anaka Alatala yang jangka’a seraan, yang sama saate nanna Amana, ia yang maminen manjarumang amana lo’ka’.

I Yohanes Pambaptis manjarumang kalena

Mat. 3:1-12; Mk. 1:1-8; Lk. 3:3-6,15-17

19Jaji i Yohanes dinen, andian tauen mondok lo’a dari banua Yerusalem. Ambata imamen nanna urang Lewi dasuro’en kole’a toa Yahudiin itiang mangatoani tugasa. Jaji barik, “Antarana ira dabayaangenjo dinen yang tau to’ mondok lo’ka’, intainko di’en?” ingka kenang.

20Jaji i Yohanes daia na’an malamun. Dajarumang lo’da’ terus terang, “Daiak di’en, okanak Kristus yang dabayaangen malaloi ambata panjaruma Alatalajo,” ingka kenang i Yohanes manyautina.

21Jaji barik manjarum bapi ira, “Ati’enko okan Kristus, aiaka daiko baki’ Elia tau ijoloon yang mondok tabalik lo’a duniaan?” ingka kenang.

“Okan,” ingka kenang.

Jaji barik, “Ati’enko okan baki’ Elia, intainkosi poang? Iko lalo di’en panjaruma Alatala yang dajarumangen to’ mondok lo’ka’?” ingka kenang.

“Okan,” ingka bapi manyautina lo’da’. Ul. 18:15,18; Mal. 4:5.

22Jaji manjarum ira, “Jaji ai ratina karajanu di’en? Jarumang lo’am mainto’ itamuna ikam. Kole’a arung iawa jarum lo’da’ yang manyuro’en lo’am,” ingka kenang ira lo’a.

23Jaji manyauti barik i Yohanes mamakai jaruma baki’ Yesaya panjaruma Alatalajo, “Daiak lalo di’en,

Tau nanna unyi baraa’en manjarumen di kosan ateengen, Kamas-kamaskin pamaami dalan to’ mondoka Paraampuanka’ mainto’ salalasa,”

ingka kenang daia, dala manjarumang ratina tugasa lo’da’. Yes. 40:3.

24Maminna dinen manjarum ira dinen yang dasuro’en kole’a tau Parisiin, 25“Ai daiko poang ratina mondoku lo’a di’en, ati’enko okan Kristus, ti’ko okan baki’ Elia, okan bea Panjarum dinen, pandenu barani mambaptis lo’a tauen,” ingka kenang ira lo’a i Yohanes.

26Jaji barik dasauti bapi kole’a i Yohanes, “Daiak lalo mambaptisen lo’a tauen nanna danumen. Poangsi andian bapi tau akadengen ibiringin yang na’an ikilala ikin,” ingka kenang lo’da’. 27“Daia dinen mondok imundiku’. Poangsi daiak na’anak patut mainso’i lo’a kole’a baraana. Kapisi karaja pangkat yang palin akeke’en, umpamana paleka’ sandala, na’anak patut mangarajaang,” ingka kenang i Yohanes lo’da’.

28Jaji samuana dinen adari di Betania, di sulina sunge Yordan di kosanna i Yohanes mambaptisa lo’a tauen.

Anak Dombana Alatala dapayoang lo’a tauen

29Jaji di aso mina’a, andian i Yohanes maita lo’a i Yesus mondok. Jaji barik manjarum i Yohanes lo’da’, “Na, belejo, dinen lalo Anak Dombana Alatala yang manyautiin lo’a dosana anak mantuariin,” ingka kenang lo’da’. 30“Dinen lalo iaan yang kujarumangen ijolo lo’in di nanga mambaptisku’. Andian, uka’, tau mondoken imundiku’. Poangsi daia baraa lo’ku’ kole’a andianna memen di nampiku’, kenangak memen lo’in indinangjo,” ingka i Yohanes. 31“Daiakpi joloon, na’anak mangilala lo’a tau dinen. Na’anpi kukilala, ratina pamondokku’ di’en mambaptisen lo’a tauen, to’ mamayoang bua, to’ manjarumang tau dinen lo’a tau Israelen,” ingka kenang i Yohanes lo’da’.

32-33Jaji i Yohanes manjarum lo’da’ manyaksi jalu yang adariin, “Daiakpijo dinen, nampiak bea mangilala lo’a i Yesus awan tau yang dabayaangen dinen,” ingka. “Poangsi andianna memenjo ijolo dajarumang kole’a Alatala jalu to’ adariin. Ia bua Alatala yang manyuro’en lo’ku’ mambaptis nanna danumen. Ati’en andian ona’ ikita iko, ingka kenang Alatala, Sumangat Bareseen tador manando’ lo’a tau dinen, dinen lalo iaan yang tau dabayaangen. Ia lalo ona’ yang to’ mambaptis lo’a tauen nanna Sumangat Bareseen, ingka kenang Alatala lo’ku’ memen. Jaji daiak maminak mangita tanda dinen. Andian kukita Sumangat Bareseen tador dari suanen. Balu’ burung merpatiin mondoka. Jaji dinen barik manando’en lo’a i Yesus dinen lalako’ nanna,” ingka kenang lo’da’. 34“Jaji dinen lalo iaan, yang anaka Alatala. Daiak manyaksi lo’in kole’a maminak maita tanda dinen,” ingka kenang i Yohanes lo’da’.

Mulakata tauen padari palola’a i Yesus

35Jaji di aso mina’a, andian bapi i Yohanes indinangen nanna palola’a duaan. 36I Yohanes maita dinen barik lo’a i Yesus lamba’a to’ malaloi kosan dinen. Jaji barik, “Na, dinen lalo Anak Dombana Alatala,” ingka kenang lo’a palola’a duaan. 37Jaji barik palola’a duaan dinen malola’ lo’a i Yesus.

38Jaji barik daia koengang kalena, dakita dinen palola’ duaan, i Yesus manjarum, “To’ maikin? Ai yang isariin ikin?” ingka kenang i Yesus matoanina lo’da’ duaan.

Jaji dasauti kole’da’, “Malola’kam lo’u Pa’ Gurue. Disasi kosannu?” ingka kenang lo’a i Yesus.

39Jaji barik manjaruma i Yesus lo’da’ duaan dinen, kira-kira jam ampat pamamalam. Barik, “Lola’ak poang ikin,” ingka kenang. Dalola’ barik kole’a ira dinen lo’a kosanna. Jaji aso dinen barik ira lalako’pi inang nanna i Yesus.

40Jaji ira duaan de’i yang malola’en lo’a i Yesus, asanna yang seraan dinen, i Andreas. I Andreas dinen sairun sat nanna i Simon Petrus. 41Jaji barik laloang dasari i Simon dinen kole’a i Andreas, manjarum, “Maminkam daikam sidua’ nanna Mesias,” ingka kenang. Mesias ratina sabangon nanna Kristus bua, ratina tau yang dabayaangen kole’a Alatala.

42Jaji barik i Simon dinen dapasidua’ang nanna i Yesus. Mamele barik i Yesus lo’a i Simon, “Daiko lalo di’en anaka i Yohanes, asannu i Simon. Poangsi awandi’en rabarik daiko kuasan Kepas,” ingka kenang. Jaji ratina Kepas dinen sabangon nanna Petrus, ratina simpak batu ampar.

43Di aso mina’a barik, i Yesus mamutusi to’ tarangkat lo’a propinsi Galilea. Jaji barik manyari lo’a i Pilipus. “Lola’ak,” ingka barik i Yesus lo’a i Pilipus.

44Jaji dinen yang i Pilipusen, sama banuana nanna ari Andreas nanna i Petrus. Dari banua Betsaida ira taluun. 45Jaji i Pilipus dinen barik pasidua’ang kalena nanna ari Natanael. “Daikam maminkam sidua’ nanna i Yesus, anaka i Yusup tau banua Nasaret,” ingka kenang. “Ialalo dinen tau yang dabayaangen lo’ka’jo yang dajarumangen inang di jalu datulisangen kole’a baki’ Musa lo’a Ukuma Alatala, di jalu datulisangen kole’a ambata panjaruma Alatala,” ingka kenang i Pilipus lo’a i Natanael.

46Jaji manjarum i Natanael, “Na’an patut jalu maamen mondok dari banua Nasaret,” ingka kenang.

Jaji barik manjarum dinen i Pilipus lo’a, “Subala bele.”

47Jaji barik mondok lo’a i Yesus, dakita barik i Natanael mondok, manjarum i Yesus, “Dinen lalo urang Israelen yang saja tapaten, yang na’anen mainya’ to’ makal lo’a tauen.”

48Jaji barik manjarum i Natanael lo’a, “Ai lo’a itamuna iko ateku’?” ingka kenang manjaruma.

“Asi na’anna. Nampina mangalonga i Pilipus lo’u, kukilalako memen atenu di kaungan akat araan inang,” ingka kenang manjaruma i Yesus lo’a.

49Jaji barik manyauti bapi lo’a Yesus, “Pa’ Guru, iko lalo pan Anaka Alatala! Iko lalo rajana tau Israelen!” ingka kenang manjaruma rabarik lo’a i Yesus.

50Jaji barik manjarum i Yesus lo’a, “Ai dinen poang manyuro’en parasaya’ lo’u, kole’a jarumku’ kukilalana memen atenu inyaunga akat araan? Ona’ to’ ikita tapat iko jalu adariin bajao’ maama lo’a dinen!” ingka. 51“Manjarumak tapat-tapat lo’in, ikitaan ona’ ikin suanen tabae’. Ikita ona’ jalu awan lalo malaikata Alatala inait indor lo’ku’ Anak Mantuariin,” ingka kenang manjaruma i Yesus lo’da’. Mul. 28:12.

Currently Selected:

Yohanes 1: EBE

Highlight

Copy

Compare