Lukas 24

I Yesus tio’ balik

Mat. 28:1-10; Mk. 16:1-8; Yoh. 20:1-10

1Jaji di aso Mingguun, malam-malam lamba’a ira babainyeen lo’a kubura i Yesus mawa ambata inyaken yang maminen dakamasang dinen. 2Dabele batu pangaputi dinen mamin dagoleng dari baba’ kuburen. 3Poangsi intama barik lo’a kuburen, kosan bangkayoanna Paraampuan Yesus indinangen. 4Jaji rarao barik nyawada’. Dapikirang barik inang, sadinga poang andianna dua babakaan yang akadengen ibiringda’ dinen. Saja bakilat-kilat kainda’ dinen. 5Jaji atakut ira babainyeen laloang dasunsumang lindo’da’ lo’a tana’en. Jaji manjarum babakaan, “Asi lo’a di kuburanen isarina ikin tau tio’en. Kosan indi’angen. Mamin lalo tio’ balik. 6Asi lo’a jaruma dinen lo’in inang nannin di Galilea. 7Iak di’en Anak Mantuariin to’ daseraak lo’a tanganna tau ajau’en, to’ idukum mateak di kayu salipen. Jaji barik maminak mate, mamin tuli talung aso, daiak to’ tio’ balikak, ingka memenna jarumanga kalena lo’in,” ingka kenang ira duaan. Mat. 16:21; 17:22-23; 20:18-19; Mk. 8:31; 9:31; 10:33-34; Lk. 9:22; 18:31-33. 8Baru’ daparandam kole’da’ ambata jaruma i Yesus dinen.

9Jaji maminna mole’ balik dari kubura, dajarumang bua samuana lo’da’ sabelasen nanna yang bokanen dinen. 10Yang manjarumangen dinen lo’a ambata palola’a ialalo i Maria Magdalena, i Yohana nanna i Maria induna i Yakobus nanna ambata babainye bokanen yang tambaan de’i nanda’. 11Poangsi kapi dajarumang dinen, alibak ira dinen parasaya’. Darasa jarumda’ dinen jarum rabor-rabor poang. 12[Poangsi i Petrus dinen arari daia lo’a kubura. Mondok indinang barik, boboko’ daia inang, dabele kain lenanen dinen inang. Mamin dinen lamba’ barik mangatoani ilalam nyawana ai poang yang adariin inang.] .

I Yesus payoang kalena lo’a palola’a duaan di Emaus

Mk. 16:12-13

13Jaji di aso dinen bua, andian barik dua palola’a yang lamba’en di dalanen lo’a banua Emaus. Banua dinen kira-kira sebelas kilometer jao’a lo’a banua Yerusalem. 14Jaji di palamba’anda’ dinen sijaruman ira duaan pasijarumang ambata jalu adariin dinen. 15Jaji patanga’an sijarumanda’ dinen sisautanen, mondok bea diri’a i Yesus tamba lamba’ nanda’. Mk. 16:12. 16Maita dinen matada’ lo’a i Yesus poangsi na’an daparuarang lo’da’ mangilala lo’a.

17Jaji mangatoani i Yesus, “Ai jalu ipasijarumangen ikin dinen di palamba’in?” ingka kenang lo’da’.

Jaji manaat ira di tanga’ dalanen. Susa lindo’da’ dinen. 18Jaji manjarum sera, i Kleopas asanna, “Ai na’an itamu iko? Antarana tau lalako’en di Yerusalem iko poang na’anen manamu jalu baru adariin inang?” ingka kenang manjaruma lo’a i Yesus.

19“Jalu asi adariin?” ingka kenang i Yesus.

“Jalu adariin lo’a i Yesus tau Nasaret dinen,” ingka kenang ira. “Daia lalo dinen panjaruma Alatala. Bakuasa jaruma, bakuasa bea basana di arona Alatala nanna ambata tau bayu’en dinen. 20Daia dasera lo’a pamarintaan kole’a ambata imam baraa’en nanna panguluanka’ mainto’ dalao’i ukuma. Rabarik i Yesus dinen dapanandapa di salipen,” ingka kenang. 21“Poangsi daikam di’en, arapanam, iasanang to’ ia yang to’ matio’ lo’a tau Israelen. Poangsi okan din poang, aso di’en mamin talung asoon maminna adarina balu’a dinen. 22Jaji aso di’en de’i andian ira babainyeen yang tau nanka’ manyuro’ tatakau lo’am. Kole’a makapen de’i, lamba’ ira lo’a kubura. 23Poangsi na’an dadua’ang bangkayoanna. Mamin dinen mondok barik ira manjarumang lo’am, andian jalu paitang kalena lo’da’, ingka, ambata malaikaten yang masanen lo’a i Yesus mamin tio’ balik. 24Jaji barik maminna dinen andian bua arakawannam lamba’en lo’a dinen to’ mamele. Jaji dabele inang tapat bea awan bua jaruma babainyeen. Poangsi i Yesus diri’a na’an dakita,” ingka kenang ira manutula lo’a i Yesus.

25Jaji manjarum i Yesus lo’da’, “Rabor-raborkin lalo di’i. Saja balaun tapat atenin na’an to’ parasaya’ lo’a jarum bayana ambata panjaruma Alatala! 26Asi lo’a dinen jaruma memen? Kristus dinen arung dadua’ parinsa’en jolo. Baru’ dinen to’ daangkatang lo’a kamaamanna,” ingka kenang i Yesus lo’da’. 27Jaji mulai barik i Yesus majar lo’da’ manarangang tarangkat dari nanna buku’a baki’ Musa nanna ambata buku’ panjaruma Alatala, mondok samuana ambata jalu datulisangen ilalam Jaruma Alatala, dajarumang bayana yang manuju lo’a diri’a.

28Jaji barik dinen, to’ mainso’ lo’a banua datujuun dinen, i Yesus balu’-balu’ to’ lamba’pi. 29Poangsi ira dinen mamase’ang lo’a, “Samalamko poang nannam indi’angen kole’a to’ malam mamin matasoon,” ingka kenang lo’a i Yesus. Jaji i Yesus dinen intama bea nanda’ to’ samalam nanda’.

30Jaji ilalam dinen, angkaan ira di mejaan, i Yesus dinen mala rotiin. Dakasuang nyawa barik laloang dabala’-bala’, dameang bua lo’da’. 31Baru’ dinen barik dabuka’ matada’, mangilala barik lo’a i Yesus. Laloang dinen inyap i Yesus. Sadinga poang na’anna dakita. 32Jaji barik sijaruman ira sera lo’a seraan, “Patut bua de’i. Ateka’ dinen saja arawang jaji manaantalingaan lo’a, ambata ajaranna Jaruma Alatala lo’ka’ di dalanen,” ingka kenang dinen jarumda’ sera lo’a seraan.

33Mamin dinen barik laloang akadeng ira lamba’ lo’a Yerusalem. Mondok lo’a dinen dadua’ang barik ira sabelasen dinen nanna arakawanna mamin bakumpul inang. 34Jaji manjarum ira sabelasen, “Tapat mamin tio’ balik Paraampuanka’,” ingka kenang lo’da’ duaan yang mole’ lamba’en lo’a Emaus, “kole’a mamin de’i paitang kalena lo’a ari Simon,” ingka kenang ira. 35Jaji manjarum bua ira duaan, manjarumang jalu adariin dinen di dalanen. Dajarumang i Yesus dinen dakilala barik kole’da’ nanga dabala’a rotiin dinen. Mk. 16:13.

I Yesus marantang paba’ina lo’a palola’a

Mat. 28:16-20; Mk. 16:14-18; Yoh. 20:19-23; PalPa. 1:6-8

36Jaji patanga’an sijarumanda’ dinen, mondok bea diri’a i Yesus akadeng ibiringda’. [Jaji manjarum lo’da’, “Salam,” ingka.] .

37Jaji tatakau barik ira, atakut. Daasanang to’ antu dinen. 38Jaji i Yesus manjarum lo’da’, “Maisi daikin raraona pikirannin? Maisi daikin mangatoanina ilalam nyawanin? 39Belejo tanganku’, belejo kakiku’. Iak lalo di’en! Subakin manjaput lo’ku’, ka’ bea itamuna ikin. Ti’ antu, kosan daginna, kosan tolanga awan daiak di’en,” ingka kenang lo’da’.

40Mamin dinen barik dapayoang tanganna kakina lo’a gulungan palola’a. 41Dinenpi masi badidit ira parasaya’a lasana tatakauna, lasana sasauna nyawana. Jaji barik i Yesus mangatoani bapi lo’da’, “Andian jalu kaannin?” ingka. 42Jaji dameang barik lo’a sakarat lauk yang maminen dangangar. 43Jaji barik dala kole’a i Yesus, dakaan di aroda’.

44Jaji manjarum i Yesus lo’da’, “Di’ lalo yang kujarumangen memenjo lo’in nanga andianku’pi nannin. Samuana bayana yang datulisangen di Ukuma baki’ Musa, di buku’ panjaruma Alatala, di buku’ Masmur, samuana arung adari yang mamayaan lo’ku’,” ingka kenang lo’da’.

45Jaji barik i Yesus majar lo’da’ mamuka’ akal mainto’ datamuna ratina ambata jalu datulisangen ilalam Jaruma Alatala. 46Jaji manjarum lo’da’, “Jaji kenang jalu datulisangen, Kristusen dinen arung dadua’ parinsa’en. Maminna akaus daparinsa’ina, tuli talung asoon, daia arung tio’ balik antarana tau mateen,” ingka kenang. 47“Mamin dinen barik arung ijarumang dongoon lo’a tauen manyuro’ maunjang pikiranna yang sala’en mainto’ daamponina dosana. Arung ijarumang maira tatak banuaan mulai indi’angen di Yerusalem sampai mondok kausa duniaan,” ingka kenang. 48“Jaji ikin lalo saksina lo’a samuana dinen de’i,” ingka kenang lo’da’.

49“Jaji awan lalo bayana Ama’ku’, andian Sumangat Bareseen yang to’ kusuro’ mondok lo’in. Poangsi, ada’kin marantang banua di’en, lalako’kin poang indi’angen launna nampi mondoka di aset lo’in kuasaan,” ingka kenang i Yesus lo’a palola’a. PalPa. 1:4.

I Yesus daawa inait

Mk. 16:19-20; PalPa. 1:9-11

50Jaji barik daawa palola’a minsaluan lo’a banuaan lo’a daerah Betania. Mamin mondok lo’a dinen, daangkatang barik tanganna, mando’aang lo’da’, dapamaam. 51Jaji patanga’an bado’ana dinen, inyap daia, daangkatang inait lo’a Surga. PalPa. 1:9-11. 52Jaji barik samuana dinen manyemba lo’a laloang mole’ lo’a Yerusalem nanna sasauna nyawana. 53Mondok inang rabarik tumbas inang lapoang di saona Alatala, tumbas mamudi lapoang lo’a Alatala.

Currently Selected:

Lukas 24: EBE

Highlight

Copy

Compare