Lukas 23

I Yesus daawa di arona i Pilatus

Mat. 27:1-2,11-14; Mk. 15:1-5; Yoh. 18:28-38

1Mamin dinen barik, samuana paurusen sarata akadeng lamba’, mawa lo’a i Yesus lo’a gubernur Pilatus. 2Mondok inang barik, mulai ira dinen maduang lo’a i Yesus. “Tau di’en,” ingka, “idua’ang ikam mawa sala’ lo’a banuanam, manyuro’ malawan lo’a pamarintaan. Dapase’ang lo’am mamayar sukainam lo’a Kaisar. Daasan kalena Kristus, ratina daia dinen asan kalena rajaan. Dinen lalo sala’a,” ingka kenang ira maduanga lo’a i Yesus.

3Jaji barik dakatoanang kole’a i Pilatus lo’a i Yesus, “Ai daiko, iko lalo rajana tau Yahudiin?” ingka kenang.

“Kenang lalo, awan bua jarumu,” ingka kenang i Yesus manyautina.

4Mamin dinen manjarum i Pilatus lo’a ambata imam baraa’en nanna tau babangkulungen inang, “Jaji tau di’en kosan kudua’ang kasala’anna,” ingka kenang. “Na’an kutamu maukum,” ingka kenang i Pilatus lo’da’.

5Jaji manjarum bapi ira, “Poangsi tau dinen,” ingka, “manyuro’ aru lapoang lo’a tauen sasara Yudea nanna pangajaranna. Dari Galilea memen akata sampai mondok lo’a di’en, awan dinen lapoang basana,” ingka kenang ira lo’a i Pilatus.

I Yesus daawa di arona Raja Herodes

6Maminna barik dadalinga awan dinen kole’a i Pilatus, dakatoanang barik lo’da’, “Ai tau di’en, tau Galilea ai?” ingka kenang. 7Jaji maminna barik datamu i Yesus tau panduduk Galilea yang daangkamen kole’a Raja Herodes, i Yesus barik dinen dasuro’ang lo’a Raja Herodes. Kole’a waktu nanga dinen andian Raja Herodes di banua Yerusalem.

8Jaji barik Raja Herodes maminna mangita lo’a i Yesus, sasau nyawana. Balaun mamin Raja Herodes bainginna to’ sidua’ nanna i Yesus. Daia marap to’ maita panyunyuana i Yesus kole’a ambata dongona i Yesus dinen mamin mondok lo’a Raja Herodes. 9Saja bayu’ jalu dakatoanangen lo’a i Yesus. I Yesuspi dinen na’an kakaji’. 10Ambata imam baraa’en, ambata toa adatenpi dinen, samuana balasa pangaduanda’ manu lo’a i Yesus. 11Mamin dinen barik Raja Herodes dinen nanna ambata tentarana mulai mala paradai’an lo’a, mala parangisian. Jaji i Yesus dinen daparakaini nanna kain langke balu’ kain rajaan, laloang dasuro’ang bapi lo’a i Pilatus. 12Aso dinen lalo barik Raja Herodes dinen nanna Gubernur Pilatus mulai sikawan. Nampina dinen simusunaan ira duaan.

I Yesus daukum mate

Mat. 27:15-26; Mk. 15:6-15; Yoh. 18:39—19:16

13Jaji barik i Pilatus dinen manyuro’ kombong ambata imam baraa’en, ambata panguluanen nanna tau bayu’en dinen. 14Jaji manjarum lo’da’, “Na tau di’en,” ingka, “iawa ikin lo’ku’, iaduang ikin awan tau yang mawa sala’ lo’a banuanin. Jaji daiak, maminak mamaraksa lo’a. Kosan kudua’ang kasala’anna yang pandeen idukum awan yang iasanen ikin. 15Raja Herodespi ka’ kenanga, kole’a mamin tau dinen dapole’ lo’ka’. Na, mamin terang barik, kosan kasala’anna yang pandeen idukum mate,” ingka kenang. 16“Jaji kenang poang, kusuro’ supet poang lo’a anak buaku’, laloang kupalapas,” ingka kenang lo’a tau bayu’en dinen.

17[Jaji di rami Palaloien, ti’ awan atoranna kirasoon iantarana tau itaanen di sao ukumanen dinen arung andian dapalapasen kole’a i Pilatus.] 18Jaji barik mamuko tau bayu’en dinen sasarata, “Uno’ poang tau dinen! I Barabas poang ipalapasen lo’am!” ingka kenang ira tau bayu’en. 19Jaji i Barabas dinen, manyuro’ iapisa di sao ukumanen, kole’a daawana tauen malawan. Andian bea tau dauno’en kole’a i Barabas.

20Jaji i Pilatus dinen baingen to’ malapasang lo’a i Yesus. Jaji manjarum daia bapi lo’da’ to’ pamiya’. 21Poangsi insang dapuko’ang kole’a tauen, “Uno’ poang, ipanandapa di kayu salip!” ingka kenang ira.

22Jaji manjarum bapi lo’da’ katalung kalina, “Ai ratina to’ idukum matena? Ai sala’a?” ingka kenang. “Kosan sala’a kudua’ang yang pandeen idukum mate. Jaji kusupet poang laloang kupalapas,” ingka kenang i Pilatus lo’da’.

23Poangsi madan-madan tauen mamuko to’ mamaksana dinen lo’a i Pilatus mainto’ i Yesus iduno’ ipanandapa di kayu salipen. Jaji barik atalo i Pilatus. 24I Pilatuspi barik dinen mamutusi, dalao’i ukum awan lalo kamainya’anda’ dinen. 25Dapalapas barik lo’da’ tau dinen de’i yang dapitaan kole’da’, tau daapis di sao ukumanen dinen yang tau mawa malawanen, tau pauno’en. I Yesus barik dinen daparuarang lo’da’, pande daanu samainya’-mainya’a.

I Yesus dapanandapa di kayu salip

Mat. 27:32-44; Mk. 15:22-32; Yoh. 19:17-27

26Jaji barik i Yesus dinen daawa. Jaji patanga’an lamba’da’ dinen mawaan lo’a i Yesus, sidua’ barik nanna tauen, i Simon asanna, tau banua Kirene. Daia mondok lo’a dinen dari insaluanna banuaan. Jaji barik dinen datingkam, dapanyanang kayu salipen di babanga. Dapaksa manyan dinen malola’ imundina i Yesus.

27Saja nyangka’ tauen malola’en lo’a. Andian bea ambata babainyeen yang anangis manyanyarawangen, manangisi lo’a i Yesus dinen. 28Jaji barik i Yesus dinen koengang kalena manjarum lo’da’, “Ikin babainye tau Yerusalem, ada’ iaka inangisiin! Nangisi kalenin, nangisi araanakin. 29Kole’a ona’ di adarina darampasa banuanin, andian jarumin ona’ inang, Bauntung lalo babainye tamanangen. Bauntung batang tau yang na’anen kala’ aranak, yang na’anen maita lo’a matena anaka. Bauntung tau yang na’anen kala’ panusu’ anak, ikin manjarumen ona’. 30Inang lalo ona’ adarina bayana yang datulisangen ilalam Jaruma Alatala,

Ona’ dinen to’ mangalong tauen, Tatarikam! ingka kenang lo’a gulungan ukiten. Lindungikam! ingka kenang ona’ lasana atakuta to’ malamun kalena,

ingka kenang bayana. Hos. 10:8; JD. 6:16. 31Palin susa ka’ada’annin ona’. Kole’a ati’en alit awan di’en ajau’a di tio’a akat kayuun, apa lagi’ ona’ ajau’a ti’ mamin akalas,” ingka kenang sama’ jaruma.#23:31 Manjarumang kole’a basana tauen to’ insang-insang ajau’.

32Jaji andian bapi tau daawa lo’a dinen, dua. Tau ajau’en dua-duana. To’ daukum mate bea. 33Jaji barik mondok lo’a kosan asan yang Karampang Ulu. Jaji mamin mondok indinangen, i Yesus dinen dapanandapa inang nanda’ dua tau ajau’en dinen, sera di katona, sera di kayoko’a. 34Jaji i Yesus mando’aang tau manuun lo’a, “O Ama’e, mamponi poang lo’da’ kole’a na’an datamu kole’da’ ratina basada’ dinen,” ingka kenang do’ana lo’a Amana. Jaji gulungan kainna i Yesus dinen datawa’-tawa’. Ira dinen mananungang. Intain dinen dadua’en kole’a tanungan dinen, dinen ampunaan. Msm. 22:19.

35Jaji akadeng poang tauen kuliling inang mamele lo’a i Yesus. Ambata panguluan Yahudiinpi dinen mala paradai’an lo’a, “Tau bokanen dapat dakatio’,” ingka kenang. “Suba diri’a dakatio’ ti’ tapat-tapat Kristus yang tau datugasen kole’a Alatala,” ingka kenang ira manjarumda’.

36-38Katarangan sala’a yang dapalakat di kayu salipen ibona uluna inang datulisa, “Di’en lalo Rajana Tau Yahudiin,” ingka kenang. Jaji ambata tentaraanpi dinen mala paradai’an bea lo’a. Dasorongi anggur masamen lo’a laloang manjarum, “Suba katio’ kalenu ti’ko tapat-tapat rajana tau Yahudiin,” ingka kenang.

39Jaji manjarum barik tau ajau’en seraan, yang tau dagantungen inang, tamba pajau’-jau’ lo’a i Yesus, “Ai daiko, Kristusko? Ti’ kenang katio’ kalenujo. Daikampi katio’kam bea!” ingka kenang lo’a i Yesus.

40Poangsi barik manjarum bapi tau ajau’en dinen seraan, “Ai daiko kenangu? Na’anko atakut lo’a Alatala, yang samaki’ taluun di’en idukum mate? 41Poangsi laan daiki’ duaan. Mandua’ lalo ukumka’ kole’a idukum lalo kole’a kajau’anka’. Poangsi tau di’en kosan dampe kasala’anna,” ingka kenang lo’a tau seraan dinen.

42Mamin dinen manjarum bapi tau dinen lo’a i Yesus, “O Yesus,” ingka, “ti’ko mangkam barik, parandamak,” ingka kenang.

43Jaji manyauti i Yesus, “Manjarumak lo’u tapat-tapat, aso di’en bua daiko to’ tamba nanku’ di Pirdaus,” ingka kenang i Yesus lo’a tau dinen.

I Yesus mate

Mat. 27:45-46; Mk. 15:33-41; Yoh. 19:28-30

44Mamin dinen mamin mondok tanga’ asoon, araun jaluun kausa banuaan. Mondok jam talu dinen araunna. 45Na’an barik marawangi matasoon. Laloang abala’ dua kain siringen di saona Alatala yang manyiringiin kosan yang palin bareseen. Pal. 26:31-33. 46Jaji barik i Yesus mamuko nanna unyi baraana, “Ama’e, nyawaku’ di’en kusera barik lo’u,” ingka kenang. Mamin akaus manjaruma kenang, daiapi laloang mangatu nyawana. Msm. 31:6.

47Jaji panguluan tentaraan dinen dabele awan dinen adarina, laloang mamudi lo’a Alatala, “Tentu tau tapaten lalo yang awan dinen matena!” ingka kenang. 48Jaji ambata tau babangkulungen inang to’ mamele lo’a dinen de’i, dabele awan dinen laloang mole’. Databungi aro diri’a sera-serana lasana susana mamikirang kadarianna dinen. 49Poangsi ambata tau yang mangilalaan lo’a i Yesus, nanna ambata babainyeen yang malola’en dinen dari Galilea, samuana akadeng dari bajao’en mamelena lo’a kadarianna dinen. Lk. 8:2-3.

I Yesus dakubur

Mat. 27:57-61; Mk. 15:42-47; Yoh. 19:38-42

50-51Jaji andian tau asanna i Yusup urang banua Arimatea propinsi Yudea. I Yusup dinen tau maamen, tau baloloken. Daia dinen manyari tapat lo’a adarina bayana Alatala to’ mangkama lo’ka’. Tau paurusen bea, i Yusup dinen, poangsi na’an satuju de’i nanna kaputusanda’ dinen yang maukum mateen lo’a i Yesus. 52Jaji lamba’ i Yusup dinen maroi lo’a i Pilatus, mamita lo’a bangkayoanna i Yesus. 53Jaji dapaindor barik bangkayoanna dinen, daliliti nanna kain lenanen. Mamin dinen dapalenga’ di kuburen, di batu daloangen yang na’anen kala’ dapakai. 54Jaji dinen aso Juma’at, aso tau Yahudiin mangamasaang sangarianna lo’a aso Sabaten. Mamin pamamalamen. To’ mulai lalo aso Sabaten dinen.

55Jaji ambata babainyeen dinen yang tambaan nanna i Yesus dari Galilea, ira dinen malola’ lo’a i Yusup mamele lo’a kuburanen, mamele sarana kubura dinen. 56Mamin dinen mole’ barik ira mangamasang ambata inyaken nanna ambata jalu maamen bauna itiang mainyaki bangkayoanna i Yesus. Poangsi sangarianpi barik di aso Sabaten awan lalo yang daparintaangen di Ukuma Alatala. Pal. 20:10; Ul. 5:14.

Currently Selected:

Lukas 23: EBE

Highlight

Copy

Compare