Lukas 22

Tauen pasipakatang to’ mauno’ lo’a i Yesus

Mat. 26:1-5,14-16; Mk. 14:1-2,10-11; Yoh. 11:45-53

1Jaji waktu nanga dinen rabarik, mamin mainso’ tauen to’ marami angkaan roti yang na’anen araragi yang iasanen rami Palaloien. Pal. 12:1-27. 2Jaji gulungan imam baraa’en, gulungan toa adaten sipakat, pasipakatang dalanna to’ mauno’ lo’a i Yesus. Alibak datamu tau kole’a atakut dinen ira lo’a ambata tau bayu’en. 3Mamin dinen, andian di dua belasen tau, asanna i Yudas Iskariot. Jaji i Yudas dinen dapakai kole’a i Pangabo, 4daawa lamba’ lo’a gulungan imam baraa’en nanna ambata panyagai saona Alatala. Dapasijarumang barik dalanna to’ maduang lo’a i Yesus lo’da’ mainto’ dakule’a datingkam.

5Jaji dadalinga barik kole’da’ dinen, sasau tapat nyawada’ kole’a i Yudas to’ manggulungi lo’da’. Malola’ani bayada’, to’ dameang duit lo’a i Yudas dinen. 6Jaji i Yudaspi mainya’. Mulai aso dinen daia manyari akal mainto’ dakule’a datingkam dinen i Yesus di waktu kosanna tau.

I Yesus angkaan Rami Palaloien nanna palola’a

Mat. 26:17-30; Mk. 14:12-26; Yoh. 13:21-30; 1Kor. 11:23-25

7Jaji mondok barik asona, di ramina angkaan roti yang na’anen araragi, tauen arung manyambeli anak domba itiang lo’a rami Palaloien. 8Jaji i Yesus manyuro’ lo’a ari Petrus nanna i Yohanes, “Jaji daikin lamba’kin mangamasang lo’ka’ itiang angkaan rami Palaloien,” ingka kenang i Yesus lo’da’.

9Jaji manjarum ira, “Disa ona’ kadakuun kosannam mangamasangen?” ingka kenang ira.

10Jaji manyauti i Yesus, “Daikin duaan,” ingka, “ona’ intamakin lo’a banuaan, andian sidua’en nannin babaka lamba’en yang manyan jawi nanna isi’ danumen.#22:10 Ati’en urang Yahudiin ararang jaji babakaan yang malapang danumen atau manyan jawiin. Dinen daanggap karajana babainyeen. Malola’ poangkin lo’a saona. Jaji barik intama ona’ lo’a saoen, 11katoanang lo’a toa sao inang, Manjarum guruka’, disa kosan tamoeen, kosanku’ angkaan rami Palaloien nanna palola’ku’? ikin ona’ lo’a. 12Maminna barik manjarumin dinen, to’ dapayoang lo’in kamar iaseten, kamar baraa’en yang maminen dakamasang. Inangkin mangamasangen jalu kaanka’,” ingka kenang i Yesus lo’da’.

13Jaji barik ira dinen intama lo’a banuaan, awan dinen tapat, awan daasanen kole’a i Yesus. Jaji dakamasang jalu kaan to’ maramiang aso Palaloien.

14Jaji ada’a barik jama, i Yesus nanna palola’a angkaan di mejaan. 15Jaji manjarum i Yesus lo’da’, “Laun-launna di’en, saja bainginak to’ angkaan maramiang Palaloien di’en nannin, baingin to’ maramiang nampina memen daparinsa’iku’,” ingka kenang. 16“Kole’a manjarumak lo’in, rami Palaloien na’anku’ lalo angkaan lagi’. Angkaan na’an angkaan tabalik, mamin adari baya Alatala mangkama lo’ka’ awan yang dasontoon ilalam acara pestaka’ di’en,” ingka kenang lo’da’.

17Maminna dinen barik dala sawanen dinen, dakasuang nyawaan lo’a amana. Jaji manjarum, “Na angguren di’en,” ingka, “mainyumkin kausanin lo’a dinen. 18Kole’a manjarumak lo’in, danum angguren na’anku’ lalo mainyum lagi’. Mainyum na’an mainyum tabalikku’,” ingka, “mamin adari baya Alatala mangkama lo’ka’,” ingka kenang.

19Mamin dinen laloang dala rotiin, dakasuang nyawaan. Mamin dinen dabala’-bala’, dameang lo’a palola’a. “Na di’en,” ingka, “roti di’en mantuariku’ yang iseraan sampai mate itiang lo’in. Di angkaannin di’en arung itiang parandam lo’ku’,” ingka kenang lo’da’.

20Jaji mamin angkaan, awan dinen bapi, dala sawanen dinen dameang lo’da’. Jaji manjarum bapi lo’da’, “Jaji sawan di’en yang daolongangen lo’in, di’ lalo dara’ku’ yang manatap lo’a baya baruun,” ingka kenang. Yer. 31:31-34. 21“Poangsi tau dinen yang to’ maduangen lo’ku’ lo’a musuku’ andian bua nanka’, angkaan bua di mejaan nanku’,” ingka kenang. Msm. 41:10. 22“Daiak di’en Anak Mantuariin tentu to’ talalo ona’ mate awan lalo kaputusanna Alatala. Poangsi mase’ tapat nyawana tau yang maduangen lo’ku’ mainto’ dakule’ku’ datingkam kole’a musuku’,” ingka kenang lo’da’. 23Jaji mulai barik sikatoanan sera lo’a seraan, “Intain te’ tau yang to’ manuun awan dinen?” ingka kenang ira.

Intain yang baraa’en pakaina?

24Jaji barik ira dinen palola’a mulai na’an sikule’. Dapasipaduang soala intain antarada’ yang baraa’en pakaina. Mat. 18:1; Mk. 9:34; Lk. 9:46. 25Jaji manjarum i Yesus lo’da’, “Na kenang lalo tau na’anen paduli lo’a Alatala. Gulungan raja tau okanen Yahudiin dinen, mainya’ jaji ira dinen bagap lo’a ambata gulunganna. Ti’ tau baraa’en pakaina antarada’ dinen mainya’ jaji suro’ paduli kalena lo’a tauen, suro’ kalena iasan Ama Banuaan. 26Poangsi daiki’ laan. Yang tau baraa’en pakaina antaraka’ arung pakeke’ kalena awan lalo tau anak baruun. Yang tau mauluangen arung pakeke’ kalena awan suro’anen. Mat. 23:11; Mk. 9:35; 10:42-44. 27Ai lo’a kalo’in, intain yang musti baraa’en, yang tau angkaanen di mejaanaka, ataupun yang tau manyorongiin, yang suro’anen dinen? Tentu tau angkaanen di meja yang ianggap baraa’en. Poangsi daiak di’en na’an kenang. Daiak di’en lalako’ku’ antaranin di’en awan lalo tau manyorongiin, awan tau mangarajaan itiang lo’in,” ingka kenang. Yoh. 13:12-15. 28“Daikin lalo di’en kawan maamku’. Kapisi ilalam parinsa’ku’, tambakin lapoang ulun sakatio’anen nanku’. 29Ialalo daikin kumeang tugas. Daiak di’en awan bua dasuro’ku’ kole’a Ama’ku’, dameang tugas itiang mangkam, awan dinen bua daiak manyuro’ku’ lo’in. Kumeang tugas lo’in itiang mangkam ona’. 30Mainto’ dinen samanin tamba angkaan di mejaan nanku’ di kangkamanku’. Mainto’ pandenin dinen aduduk di kursi rajaan mamutusi lo’da’ tau kanturunanna baki’ Israel dinen, yang dua belasen sukuna,” ingka kenang i Yesus lo’a palola’a. Mat. 19:28.

I Yesus manjarumang memen kole’a i Petrus ona’ to’ manasal

Mat. 26:31-35; Mk. 14:27-31; Yoh. 13:36-38

31Jaji manjarum i Yesus, “O Simon, Simone, i Pangabo mamin mamita, to’ mangilalai lo’in. Awan lalo baras gandom yang datapen, daia ona’ mangilalaina lo’in. To’ dabele atenu dinen ungka’ suma ampana poang yang kosanen isi’a, ungka’ na’an tapat atenu. 32Poangsi daiak maminak mando’aang lo’u mainto’ kapiko ona’ daawa bibitak, kaparasaya’annu dinen na’an atampus. Rabarik maminnu mole’ balik lo’ku’, daikopi arungko manggulungi lo’a arasairunnu mainto’ insang sana kaparasaya’anna,” ingka kenang lo’a i Petrus.

33Jaji manyauti i Petrus, “O na’anak bibitak, Paraampuane,” ingka kenang. “Maminak bakamas to’ tamba nannu, kapisi di sao ukumanen. Tio’ko-tio’ak, mateko-mateak,” ingka kenang i Petrus lo’a i Yesus.

34“Na’an. Manasalko bua ona,” ingka i Yesus, “Manjarumak lo’u, Petruse, nampina manunturunguk manuken aso di’en ona’, daikopi to’ mamin talung kali manasalu lo’ku’,” ingka kenang i Yesus lo’a i Petrus.

I Yesus to’ daanggap tau malawanen

35Jaji manjarum bapi i Yesus lo’da’, “Ai waktu nanga kutugasinjo dinen, yang kupase’angen lo’in mawa ambata tas, ambata sandal ai, andianaka kakurangannin?” ingka kenang lo’da’.

“Kosan,” ingka kenang ira. Mat. 10:9-10; Mk. 6:8-9; Lk. 9:3; 10:4.

36“Na rabarik di’en, ambata duiten ti’ andian, ambata tasen, mawakin. Intain yang angkosanen dinen pedanga, arung dapet dinen ampurona itiang pamali pedang. 37Arungkin basiap, kole’a andianjo memen datulisangen baya di’en yang manujuun lo’ku’,

“Daia dinen daanggap tau malawanen,

ingka kenangjo jalu datulisangen ilalam Jaruma Alatala. Jaji manjarumak lo’in, baya dinen arung adari nanku’. Iak lalo di’en yang daanggap tau malawanen. Mondoka lalo to’ adarina ambata baya dinen yang manujuun lo’ku’,” ingka kenang manjaruma i Yesus lo’da’. Yes. 53:12.

38Jaji manjarum ira, “Belejo Paraampuane, andian pedangam duaan,” ingka kenang.

“Jaji lalo,” ingka kenang i Yesus manyautina.

I Yesus bado’a di Getsemani

Mat. 26:36-46; Mk. 14:32-42

39Jaji awan mairaso i Yesus lamba’ lo’a ukit Saitun. Tamba bea palola’a. 40Jaji mondok barik lo’a dinen, i Yesus manjarum lo’da’, “Bado’akin mainto’ na’annin akaru ona’ manyuro’ alao’ lo’a dosaan,” ingka kenang. 41Mamin dinen i Yesus kapi’ang kalena lo’da’ kira-kira jao’a sapamaratan batu. Jaji barik malingkutut bado’a. 42“Ama’e,” ingka, “ti’ko mainya’, ikapi’ang di’en jalu ajau’en yang to’ adariin lo’ku’ mainto’ na’anna mondok lo’ku’. Poangsi daiko poang panamunu ipakaien. Daiak na’an ipakai,” ingka kenang i Yesus dalam do’ana. 43[Jaji paita bea malaikaten lo’a, tador dari Surga itiang manggulungi lo’a. 44Susa tapat nyawana. Insang kuat bado’ana. Palo’a dinen barik balu’ dara’ baitika lo’a tana’en.] .

45Jaji akadeng barik, tadang bado’ana, mole’ balik lo’a palola’a, tindo’ ira. Saja alolo’ tapat tolangda’ lasana susana nyawada’. 46Jaji manjarum lo’da’, “Asi tindo’in?” ingka. “Asadingkin. Bado’akin, mainto’ na’annin akaru ona’ manyuro’ alao’ lo’a dosaan,” ingka bua lo’da’.

I Yesus datingkam

Mat. 26:47-56; Mk. 14:43-50; Yoh. 18:1-11

47Jaji barik mansangpi manjaruma i Yesus, mondok bea tau bayu’en, dauluang kole’a i Yudas dinen tau di dua belasen dinen. Jaji i Yudas dinen mainso’i barik lo’a i Yesus, to’ manyum lo’a. 48Poangsi manjarum i Yesus, “Ai Yudase,” ingka, “tanda sumen kakaru’ itiang maduang lo’ku’ lo’a musuku’?” ingka kenang lo’a i Yudas.

49Jaji dabele kole’a palola’a, datamu jalu to’ adariin dinen, mangatoani ira, “Ai lo’a Paraampuane, isapa’ nanna basika’, na’an?” ingka kenang ira. 50Jaji andian sera, daiyo’ang basina dasapa’ talingana pangkama imam baraa’en. Akatu talingana katoen.

51Poangsi i Yesus manjarum, “Jaji!” ingka. Laloang dajaput talingana tau dinen, dapamaam.

52Jaji barik i Yesus manjarum lo’a ambata imam baraa’en, ambata panguluan panyagai saona Alatala, ambata toa-toaan yang to’ malaan lo’a, “Asi to’ mawa basinin, mawa ambata balantanen? Iasanangak to’ ikin parampok? 53Padahal mairaso andianku’ nannin di saona Alatala. Nanga dinen ti’ to’ itingkamak ikin, suba na’an ikule’ itingkam,” ingka kenang i Yesus lo’da’. “Poangsi maam. Di’en lalo lele’annin. Mangkam lalo jalu araunen rabarik,” ingka kenang manyerana. Lk. 19:47; 21:37.

I Petrus manasal lo’a i Yesus

Mat. 26:57-58,69-75; Mk. 14:53-54,66-72; Yoh. 18:12-18,25-27

54Mamin dinen barik i Yesus datingkam, daawa lo’a saona imam baraa’en. Jaji i Petrus malola’ lo’a i Yesus dari bajao’. 55Jaji di pakar saona imam baraa’en dinen andian ira matio’ bara apiin, aduduk inang mamindu. Jaji i Petruspi aduduk inang nanda’. 56Jaji andian suro’an inang babainyeen. Dakita barik i Petrus aduduk inang di biring apiin, dabele-bele. “Tau dinen tau nanda’ bua,” ingka kenang.

57Poangsi i Petrus dinen manasal, “Na’anak mangilala tau dinen!” ingka kenang.

58Jaji na’an balaun bapi andian bapi tau mameleen lo’a, “Daikopi tau nanda’ bua,” ingka kenang.

Laloang manasal bapi daia, “Okanak!” ingka bua.

59Mamin dinen, kira-kira sajam, andian bapi tau manjarum, “Tau di’en tentu tau nanda’ bua, kole’a ia bea tau Galileaan,” ingka kenang.

60Jaji manjarum i Petrus, “Saja na’an kutamu ratina jarumu!” ingka kenang i Petrus manasala. Jaji patanga’an manjaruma dinen manunturunguk bua manuken. 61Jaji Paraampuanen dinen koengang kalena mamele lo’a i Petrus. I Petruspi laloang parandam barik lo’a jaruma i Yesus nanga sijarumanda’ dinen lo’a soal to’ manasala de’i, “Nampina manunturunguk manuken aso di’en, daikopi to’ mamin talung kali manasalen lo’ku’,” ingka kenang dinen i Yesus. 62Laloang maruar i Petrus anangis barik. Sampai sikuk-sikuk anangisa barik dinen i Petrus parandama lo’a jaruma i Yesus.

Ambata tentaraan mala paradai’an lo’a i Yesus

Mat. 26:67-68; Mk. 14:65

63Jaji mulai ambata tau manyagaien manu lo’a i Yesus mala paradai’an lo’a, mabal lo’a. 64Dakaputi lindo’a laloang dababal sarata manjarum, “Asanjo, intain mabalen lo’u?” 65Bayu’ bea bokanen jarumda’ pajau’en lo’a.

I Yesus daawa madap paurusen

Mat. 26:59-66; Mk. 14:55-64; Yoh. 18:19-24

66Jaji imbara asoon barik, dakombongang inang ambata toa-toa Yahudiin, ambata imam baraa’en nanna toa adaten. Mamin dinen i Yesus daawa di aroda’ ambata paurusen dinen.

67Jaji manjarum ira, “Na daiko, jarumang kalenu lo’am. Ai daiko di’en, iko lalo Kristus yang tau dabayaangen dinen?” ingka kenang ira lo’a i Yesus.

Jaji manyauti lo’da’, “Kujarumangpi kale’ku’ lo’in, na’an buakin mainya’ parasaya’ lo’ku’. 68Ti’en iak alit to’ pasijarumang soal dinen nannin, na’an buakin mainya’ manyauti lo’ku’,” ingka kenang. 69“Poangsi tarangkat awandi’en iak di’en Anak Mantuariin to’ aduduk tamba mangkam di biring katona Alatala yang Tau Bakuasaan,” ingka kenang i Yesus lo’da’.

70Jaji mangatoani barik ira sasarata, “Aiaka daiko dinen Anaka Alatala?” ingka kenang ira lo’a i Yesus.

“Iak lalo,” ingka. “Mandua’ jarumin dinen,” ingka kenang i Yesus manyautina.

71Jaji barik manjarum ira, “Ai lagi’ isaksina iki’, balik-balik ikatoananga iki’? Mamin terang sala’. Itamu lalo iki’, mamin idalinga jarum diri’a,” ingka kenang ira.

Currently Selected:

Lukas 22: EBE

Highlight

Copy

Compare