Lukas 14
14
I Yesus daasan bakaraja di aso Sabaten
1Jaji barik di aso Sabaten i Yesus angkaan di saona tau Parisiin yang tau baraa’en pakaina. Jaji tauen inang maimpa’ mamele kasala’anna i Yesus. 2Jaji inang bea di arona i Yesus andian tau akambangen, yang dadua’ biri-biri. 3Jaji manjarum barik i Yesus dinen lo’a ambata tau Parisiin nanna toa adaten, “Ai lo’a di adatka’, pande te’, na’an te’ pamaam tau di aso Sabaten?” ingka kenang i Yesus lo’da’. 4Poangsi ira dinen na’an kakaji’. Jaji i Yesus manjaput barik lo’a tau dinen pamaama lo’a padisa. Mamin dinen dapalaloang mole’.
5Jaji maminna dinen barik i Yesus manjarum lo’da’, “Ai lo’a daikin, ti’ anakin atau sapinin alao’ di sumuren di aso Sabaten, na’an te’ ikaraja, iduwatang di tana’en, kapisi aso Sabaten?” ingka kenang manjaruma i Yesus dinen lo’da’. Mat. 12:11. 6Irapi dinen na’an kakaji’.
I Yesus parajari lo’a pangabangen nanna toa saoen
7Jaji barik dabele kole’a i Yesus, ambata pangabangen dinen, samuana pakokoloan to’ aduduk di kosan tau baraa’en pakaina. Jaji i Yesus parajari lo’da’ ilalam parumpama’an di’en, 8“Daiki’ di’en ti’enki’ takampit lo’a ramina tau sialaan,” ingka kenang manjaruma i Yesus lo’da’, “ada’ki’ aduduken di kosan maamen, di kosanna tau baraa’en pakaina. Ungka’en ona’ andian tau labi baraa’en pakaina lo’ka’ yang takampiten. 9Ungka’en mondok barik toa saoen de’i yang mangampitangen, dasuro’ mamalinki’. Suba tau di’en aduduk indi’ang di kosan maamen, ingka bua lo’ka’. Tentu bawa’ki’ barik. Tapaksa barik adudukki’ mamalin lo’a kosan yang dudukan tau akeke’en pakaina. 10Jaji yang labi maam, daiki’ ti’ki’ mondok lo’a tau rami-ramiin, adudukki’ ibalakang lo’a dudukan tau akeke’en pakaina. Jaji barik mondok ona’ toa saoen dinen, Kawane, ingka kenang lo’ka’, dinen sala’ aduduku. Na, indi’ang di dudukan maamen, ingka kenang. Jaji dapamaamki’, daparaaki’ di arona tau yang bayu’en,” ingka kenang i Yesus. Ams. 25:6-7. 11“Kole’a intain tau to’ paraa’en kalena, daia dinen to’ dapakeke’. Intain dinen pakeke’en kalena, daia dinen ona’ to’ daparaa,” ingka kenang i Yesus parajarina lo’a tau dakampitangen dinen. Ams. 25:6-7; Mat. 23:12; Lk. 18:14.
12Maminna dinen barik manjarum bapi i Yesus lo’a tau mangampitangen dinen, yang toa saoen, “Ti’ki’ to’ mangampitang tau tanga’ asoon atau malamen, ada’ki’ dinen mangampitang poang ambata kawanka’, ambata sairunka’, ambata tau maamen. Dinen kosan ratina. Kole’a tau dinen tentu mangampitang bapi lo’ka’. Dabalas mamin kamaamanka’,” ingka kenang. 13“Labi maam ti’ki’ to’ mangampitang, mala pangabangki’ lo’a ambata tau masikinen, tau araboren, ambata tau araiten, tau yang bautaan,” ingka kenang. 14“Baru’ki’ dakamase’i kole’a Alatala. Kole’a ambata tau dinen na’an dapat mamalas lo’ka’. Ona’ maminna ambata tau tapaten ikatio’ balik, baru’ki’ dabalas,” ingka kenang i Yesus parajarina lo’da’.
Tau sikalongan angkaan dala sama’ jarum
Mat. 22:1-10
15Jaji barik andian pangabang yang sarilao’ mejaan nanna i Yesus. Jaji maminna daia mandalinga jaruma i Yesus awan dinen, manjarum daia lo’a i Yesus, “Yang tau angkaanen rami-ramiin inang di kangkamanna Alatala, bauntung lalo ira dinen,” ingka kenang lo’a i Yesus.
16Jaji i Yesus manyauti mamakai sama’ jarum, “Jaji andian tau mangamasang jalu kaan to’ rami-rami. Jaji bayu’ tau dakampitangen lo’a dinen. 17Mamin barik dakamasang jalu kaanen, suro’anna dinen dasuro’ mawa tau, dasuro’ manjarum lo’da’, Se’ tambakin rami-rami nanku’. Kole’a mamin kamas samuana, ingka kenang lo’a tau pangabangen.
18“Poangsi barik samuana sama rata manyari alasan. Andian sera manjarum, O daiak di’en ambatku’pi mamali tana’. Arung kulamba’ipi ijolo kuparaksa, ingka kenang. Minta ma’ap, ingka, na’anak tamba, ingka kenang tau seraan.
19“Andian bapi manjarum, O daiak di’en ambatku’pi mamali sapi kebiri lima pasang. Inyapak di’en to’ kukilalaipi ijolo, ingka kenang. Mita ma’ap. Na’anak tamba daiaki, ingka kenang bapi tau dinen.
20“Andian bapi tau manjarum, Daiak di’en baru’ak arainye. Na’anak dapat tamba, ingka kenang.
21“Jaji mole’ balik suro’anna dinen malapor lo’a paraampuanna. Jaji paraampuanna dinen laloang arasi. Jaji manyuro’ lo’a suro’anna dinen, Se’ lamba’ko babariar. Lamba’ di ambata dalan baraa’en, di dalan akeke’en manyari tau. Ambata tau masikinen, tau araiten, tau bautaan, tau araboren, awa kausa lo’di’, ingka kenang lo’a suro’anna dinen.
22“Jaji dalola’ani jaruma dinen. Jaji barik manjarum lo’a paraampuanna, O Pa’, mamin kulola’ani jarumu dinen. Poangsi na’anpi bua apano’, ingka kenang lo’a paraampuanna.
23“Jaji manjarum bapi paraampuanna, Jaji lamba’ko bapi lo’a ambata dalan insaluannaan banuaan manyari tau. Itarik poang, suro’ mondok mainto’ apano’a saoku’. 24Manjarumak lo’in, antarana ira yang ikampitangen di mulakataan dinen kosan to’ sera yang kuparuarangen angkaan jalu kaanku’ dinen, ingka kenang lo’a suro’anna,” ingka kenang sama’ jaruma i Yesus lo’a ambata pangabangen dinen.#14:24 Ilalam sama’ jarum di’en, yang tajolo dakampitangen kole’a Alatala yang alkibaken tamba, ialalo dinen ambata gulungan anak kanturunanna baki’ Abraham. Alibak ira yang daile’iin malola’ lo’a i Yesus. Jaji Alatala barik mangampitang lo’ka’ tau yang okanen kanturunanna baki’ Abraham. Iki’ lalo barik yang dakampitangen.
Okan maunda tau malola’en lo’a i Yesus
Mat. 10:37-38
25Jaji bayu’ tau yang malola’ lamba’ nanna i Yesus. Jaji barik i Yesus koengang kalena manjarum lo’da’, 26-27“Intain to’ padari palola’ku’ arung tau-tau lo’ku’ atena. Na’an pande labiin mangasaanga lo’a tau bokanen. Maam amana induna, maam anaka babaka babainyeen, maam sairunna, na’an pande labiin mangasaanga lo’da’. Diri’api dinen na’an pande manyagai lo’a diri’a. Mate mainya’, asal poang molola’ laloang lo’ku’. Ti’ na’an kenang na’anpi pande padari palola’ku’,” ingka kenang i Yesus lo’da’. Im. 21:1-4; Ul. 33:9-11; Sak. 12:1-3; Mat. 10:37-38; 16:24; Mk. 8:34; Lk. 9:23.
28“Daiki’ nyawaka’ arung siap-siap mananggung susaan ti’ki’ to’ malola’. Umpamana daiki’ to’ mamola sao balangkeen inait. Tentuki’ mamikir jolo ragana ambata ramuna. Tentu ikira duitka’, ti’ tuli atau na’an. 29Kole’a ona’ ti’ mamin ipakadeng pakayuna, laloang na’an adari, bawa’ki’. Tentu tauen mananawai poang lo’ka’ mamelena. 30Belejo tau dinen, ingka. Insa’ka memen. Datamu pakadeng pakayuna poangsi na’an datamu padari karajana, tentu kenang ingka,” ingka kenang sama’ jaruma i Yesus.
31“Ataupun rajaan, ti’ sikayo nanna raja bokanen, tentu mamikirangpi jolo. Tuli te’ na’an te’ sapulo’ ribu balana ti’ malawan lo’a balaan yang dua’ pulo’ ribuun bayu’a? 32Ti’ umpamana na’an dakule’ manalo kalo’aan, tentu manyuro’ tau itiang mawa pasitamuangen. Nampina memen mainso’ dinen musuna tentu manyari sikamaaman tajolo. Na’an dari sikayo,” ingka kenang i Yesus. 33“Jaji daiki’pi kenang bea. Arungki’ mamikirang tajolo. Intain to’ alibaken marantang unjang samuana, ambakinto’ malola’ lo’ku’. Na’an pande padari palola’ku’,” ingka kenang i Yesus lo’da’ tau malola’en lo’a.
34“Arung gugulung atenin lo’ku’. Umpamana sia’en, sia’en tapat baguna. Poangsi ai lo’a ti’ mamin atawar? Ai lo’a polana manyuro’ mole’ masin rabarik? Na’an ikule’. 35Saja kosan barik ratina. Itiang pupuk na’an, itiang sampuran pupuk na’an. Idunjang poang alit,” ingka kenang i Yesus lo’da’.
“Intain andianen loang talingana arung manaantalinga lo’a jalu idalingaan,” ingka kenang barik lo’da’. Mat. 5:13; Mk. 9:50.
Currently Selected:
Lukas 14: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
