Lukas 13
13
Arungki’ maunjang pikiranka’ yang sala’en
1Jaji barik andian tau ibiringa i Yesus manutul tau Galilea dinen yang mate dauno’ kole’a gubernur Pilatus patanga’an mawa pamindarada’ lo’a Alatala. 2Jaji barik dasauti kole’a i Yesus, “Ai kalo’in ratina tau mate awan dinen? Irasana ikin tau Galilea dinen labi badosa lo’a tau Galilea bokanen kole’a balu’a dinen matena? 3Tentu na’an. Manjarumak lo’in, daikinpi ti’enkin na’an maunjang pikirannin yang sala’en dinen, to’ matekin bea,” ingka kenang i Yesus lo’da’. 4“Ataupun tau di Siloam dinen, yang lapan mantuariin yang mateen daruruni sao batingkaten, irasana ikin kole’a tau yang mateen dinen labi badosa lo’a tau bokanen yang lalako’en di Yerusalem kole’a balu’a dinen matena? 5Tentu na’an. Manjarumak lo’in, daikinpi ti’enkin na’an maunjang pikirannin yang sala’en, matekin bea,” ingka kenang i Yesus lo’da’.
Akat bua’ araan yang na’anen ambua’ dala sama’ jarum
6Jaji barik i Yesus dinen manjarum mamakai sama’ jarum lo’da’, lo’a akat araan. “Andian tau ampuna kobon angguren,” ingka kenang. “Jaji andian akat ara tio’ di tanga’ kobon dinen. Poangsi to’ dasari bua’a lo’a dinen, kosan. 7Jaji manjarum lo’a suro’anna yang tau manuntuani kobonna dinen, Tabang poang akat araan di’en, kosan bua’a. Mamin talung taun kubelena kosan bua’a, ingka kenang. Mala poang to’ angkaanna lo’a inyak tana’en, ingka kenang tau ampuna kobonen dinen.
8“Jaji manjarum suro’anna, Ona’ poang paraampuane. Ambakinto’pi itabang. Kupupuki iak, kusangkol dinen akat araan. 9Ti’ ambua’ taun sera, maam. Ti’en na’an ambua’ bapi, itabang poang, ingka kenang tau panuntuani kobon lo’a tau ampuna kobon angguren dinen,” ingka kenang manjaruma i Yesus.
Tau aboko’en dapamaam di aso Sabaten
10Jaji barik i Yesus di waktu nanga aso Sabaten majar di sao sambayangen. 11Jaji andian bea tau tamba inang, babainye yang maminen lapan belas taun dinen padisa. Aboko’ dinen balakanga, na’an datamu palolok kalena. Yang manyuro’ aboko’ dinen, daanu kole’a jalu ajau’en. 12Jaji barik dakita kole’a i Yesus babainye yang apadisen dinen. Jaji barik manjarum i Yesus lo’a babainye dinen de’i, “Indu’e, maminko alapas barik lo’a padisu dinen,” ingka kenang.
13Laloang dajalaang tanganna lo’a babainye dinen, babainye dinen dakule’ barik palolok kalena sarata mamudi lo’a Alatala.
14Jaji dakita dinen kole’a tau toa sao sambayangen dinen, ajau’ nyawana mamelena lo’a i Yesus, kole’a dapamaama tau dinen di aso Sabaten. Jaji manjarum dinen barik lo’a tau bayu’en, “Aso di’en aso Sabaten. Ada’ki’ mondoken di aso Sabaten manyuro’ pamaama padiska’. Sukup mamin yang anam asoon itiang bakaraja. Suba di anam asoon poang dinen suro’ pamaama kaleka’,” ingka kenang manjaruma toa sao sambayangen. Pal. 20:9-10; Ul. 5:13-14.
15Jaji dasauti kole’a Paraampuanen, “Daikin di’en mamis baba’in masam atenin! Ai lo’a di aso Sabaten, ambata sapinin, ambata keledainin, na’an ipalapas ikin dari pampalungan iawa lo’a danumen ipainyumi?” ingka kenang lo’da’. 16“Na, ti’ inatang pande ipalapas di aso Sabaten, labi lagi’ tau kanturunanna baki’ Abraham. Ai lagi’ pandena ipalapas tamatoa di’en yang aboko’en, yang maminen lapan belas taun idikata kole’a i Pangabo,” ingka kenang dinen manjaruma i Yesus lo’a toa sao sambayangen.
17Jaji bawa’ barik dinen gulungan lawanna maminna i Yesus manjarum awan dinen. Yang tau bayu’en dinen sasau nyawana mamelena lo’a gulungan panyunyuana yang baraa’en dinen.
Jalu akeke’en yang pandeen baraa
Mat. 13:31-33; Mk. 4:30-32
18Jaji manjarum i Yesus lo’da’, “Kangkamanna Alatala, balu’ ai adarina? Jalu ai maamen ipakaien iki’ itiang sama’ jarum lo’a dinen? 19Jaji kenang adarina kangkamanna Alatala, awan lalo tolang sasawiin yang datanam tau. Jaji mamin datanam, tio’ tolang dinen, mainsit, padari akat baraa’en rabarik. Sampai dapat burungen dinen manando’ inang. Kenang adarina kangkamanna Alatala. Mulakata balu’ jalu akeke’ poang, poangsi di adarina dinen palin baraa barik,” ingka kenang lo’da’.
20Jaji manjarum bapi lo’da’, “Jaji ai bapi yang maamen itiang sama’ jarum lo’a kangkamanna Alatala, adarina dinen? 21Kangkamanna dinen awan lalo ragi rotiin. Jaji dala dinen tepungen kole’a babainyeen, sakarung. Jaji barik ragi dinen daragiang lo’a dinen, jaji akambang samuana, insang baraa. Kenang ratina kangkamanna Alatala,” ingka kenang i Yesus lo’da’.
Arungki’ intama lo’a mambangan tarapiten
Mat. 7:13-14,21-23
22Jaji barik i Yesus lamba’ kuliling di ambata banuaan, di ambata kotaan majara lo’a tauen. Tujuanna dinen to’ lo’a Yerusalem. 23Jaji andian tau mangatoani lo’a, “Ai lo’a Paraampuane, tau to’ dakatio’en dari ukum dosaan, kakapit poang te’?” ingka kenang lo’a i Yesus.
Jaji manyauti i Yesus, 24“Ti’ki’ to’ intama, arung ikakayai mainto’ ikule’a iki’ intama lo’a mambangan tarapiten. Kole’a ona’ bayu’ tau bainginen to’ intama lo’a dinen, na’an dakule’ intama. Mat. 7:13-14. 25Ti’kin nampi intama, ti’ mamin akadeng toa saoen, mamin lamba’ mangaputi mambanganen, daikin ona’ to’ irantang insaluan. To’ manodok buakin di mambanganen ona’ sarata manjarum, O Pa’, Pa’, bae’angkam, ikin ona’.
“Poangsi ona’ dinen daia to’ manyauti lo’in, Saja na’anak mangilala lo’in. Disa poang asalin? ingka bua ona’.
26“Daikamjo biasakam sarilao’ angkaan nannu, maminko kala’ majar di banuanam, ikin ona’ lo’a.
27“Daiapi dinen to’ manyauti lo’in, Saja na’ankin kukilala. Asalin na’an dampe kutamu. Babajao’kin lo’ku’. Ikin lalo tau mamola kajau’anen, ingka ona’ lo’in,” ingka kenang manjaruma i Yesus. Msm. 6:9; Mat. 7:22-23.
28“Ona’ dinen to’ ikita bua ikin baki’ Abraham, baki’ Isak, baki’ Yakub nanna ambata gulungan panjaruma Alatala inang di kangkamanna Alatala. Poangsi diri’in to’ datampeang insaluan. Manyanyarawangkin ona’ anangisin, to’ ipasikokotang isinin lasana susanin adariin awan dinen,” ingka kenang. Mat. 22:13; 25:30. 29“Bayu’ ona’ dinen to’ tambaan inang angkaan rami-rami di kangkamanna Alatala. Andian ona’ dari timur, dari barat, dari utara nanna salatanen. Mat. 8:11-12. 30Na’an awan yang isangkaan iki’. Ti’ tau akeke’en pakaina awandi’en, ona’ andian pakaina. Kenang bea tau baraa’en pakaina awandi’en, andian ona’ yang padari akeke’ pakaina,” ingka kenang i Yesus. Mat. 19:30; 20:16; Mk. 10:31.
I Yesus manangisi banua Yerusalem
Mat. 23:37-39
31Jaji barik waktu nanga dinen andian tau mondok lo’a i Yesus manjarum, “Daiko dinen mamalinko. Rantang kosan di’en. Kole’a Raja Herodes dinen manyari lo’u, to’ mauno’ lo’u,” ingka kenang lo’a i Yesus.
32Jaji barik i Yesus manyauti, “Ha, sipat palanduk tau dinen,” ingka. “Jarumang poang lo’a, Aso di’en kururupi jalu ajau’en, kupamaam padisa tauen. Mina’ bapi kenang. Di aso kataluun barik, mondokak bua lo’a kosan tujuanku’, ikin lo’a,” ingka kenang i Yesus lo’da’. 33“Jaji daiak pasti dapat lamba’ laloang aso di’en, aso mina’ nanna roana sampai mondok lo’a banua Yerusalem. Kole’a na’an patut panjaruma Alatala mate di kosan bokanen. Arung mate di Yerusalem,” ingka kenang lo’da’.
34Barik dinen manjarum i Yesus maule’-ule’ lo’a tau banua Yerusalem, “Yerusalem, O Yerusalem, ikin lalo tau yang mainya’ mauno’en dinen lo’a ambata panjaruma Alatala, yang mamaratiin nanna batuun lo’a tau mondoken, yang isuro’en lo’in. Baingin jajiak lo’in. Arapatku’ mamin to’ mangumpulang lo’in malindungikin awan lalo manuken mangumpulungang anaka inyaunga sapa,” ingka kenang. “Poangsi daikin alibakin. 35Na, kenang mainya’. Bele ona’ kosan di’en ateenga, kurantang iak poang kenang,” ingka kenang. “Manjarumak lo’in, na’ankin to’ sidua’ bapi nanku’. Sidua’ na’an sidua’ to’ ipaba’iak ikin, Ipamaamko, yang tau mondoken atas asanna Paraampuanen, ikin ona’ lo’ku’,” ingka kenang i Yesus lo’da’. Msm. 118:26.
Currently Selected:
Lukas 13: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
