Lukas 16
16
Paurus yang makalen dala sama’ jarum
1Jaji barik i Yesus manutul lo’a palola’a, “Andian tau yang bayu’en hartana. Jaji andian suro’anna tau bayu’en hartana dinen yang maurusi ambata jaluna. Rabarik suro’anna dinen datuntut kole’a tauen daasan marugi ambata hartana paraampuanna. 2Jaji barik dasuro madap suro’anna dinen kole’a tau bayu’en hartana dinen, Asi lo’a jarum tau yang kudalingaan dinen? Tapat te’ na’an te’? ingka. Daiko arungko siap itiang malapor tanggung jawapu dinen kole’a daiko di’en kusuro’ tadang lo’a karajanu, lo’a tugasu dinen, ingka kenang dinen manjaruma paraampuanna.
3“Jaji bapikir barik suro’anna dinen de’i, Ai lo’a di’en, dasuro’ tadangak lo’a tugasku’. Daiak di’en na’anak bakajung bakarajaan, aparuk na’an kukule’. To’ mamita poangak lo’a tauen, bawa’ak, ingka kenang ilalam atena. 4Jaji barik bapikir tau dinen, mandua’ang akal, Na, maam paan. Kutamu dalanna. Ona’ barik ti’ akaus tugasku’ di’en, mainya’ barik tauen manyialo lo’ku’ manumpang di saona, ingka kenang nyawana suro’an ajau’en dinen.
5“Jaji dasuro’ madap barik tauen tata sera kole’a suro’an dinen yang tau arautang lo’a samagata. Jaji manjarum lo’a yang mulakataan dinen, Insa’ daiko utangu lo’a paraampuanku’? ingka kenang mangatoanina.
6“O daiak di’en saratus dorom inyak saitunen, ingka kenang.
“Jaji barik manjarum bapi suro’an dinen, Se’ ala kuitansinu, adudukko inang, ingka kenang. Tulis poang dinen lima pulo’, ingka kenang. Utanga dapakurang.
7“Jaji manjarum bapi lo’a kaduaan dinen, Insa’ daiko utangu? ingka kenang.
“Daiak di’en saratus karung gandomen, ingka kenang.
“Jaji manjarum lo’a, Se’ ala kuitansinu. Tulis poang inang lapan pulo’, ingka kenang suro’an dinen, pamiya’a lo’a tauen mainto’ mainya’ ona’ datumpangi kole’a.
8“Jaji barik dinen dapudi suro’anna ilalam kajau’anna dinen kole’a paraampuanna kole’a de’i pande-pandena urusi kalena,” ingka kenang i Yesus. “Kole’a tau duniaan di’en labi pande maurusina kalena dari pada ambata panduduk kangkaman jalu arawangen. 9Jaji manjarumak lo’in, arung ipaguna iki’ ambata kamaaman duniaan itiang panyari kawan. Mainto’ ona’ dinen ti’ mamin akaus ambata kamaaman duniaan, mondok inang di kosanka’ yang itiang salaun-launna, dasialoiki’ barik kole’a kawanka’ yang maminen talalo,” ingka kenang i Yesus lo’da’.
10“Jaji ti’ tau dapaten iparasaya’i itiang maurusi jalu kakapiten, tentu dapat bea iparasaya’i nanna jalu bayu’en. Ti’ tau mainya’ makal maurusina lo’a jalu kakapiten, tentu mainya’ bea makal lo’a jalu bayu’en. 11Jaji daiki’ ti’ na’an dapatki’ iparasaya’i maurusika’ lo’a ambata kamaaman duniaan, intain lagi’ mainya’ parasaya’ lo’ka’ manyera lo’ka’ kamaaman yang tapaten di Surgaan dinen? Tentu ajara’. 12Ti’en na’an maam urusika’ lo’a kamaaman di dunia painjaman di’en, mainya’ te’ dameang lo’ka’ ona’ kamaaman yang tapaten inang?” ingka kenang i Yesus lo’da’.
13“Umpamana pangkam, na’an patut dua paraampuanna yang dalola’aniin. Na’an mainya’! Ati’en yang seraan dakasaang, tentu yang seraan dakalibakangen. Ati’en yang paraampuan seraan dalola’aniin, tentu yang seraan dapebelang. Kenang bea daiki’, ti’ panamuna Alatala ipakaien iki’, na’an patutki’ tama’ lolo to lo’a duiten padari ulunna, kole’a na’an sikule’ panamu duaan dinen,” ingka kenang i Yesus lo’da’. Mat. 6:24.
Ukuma Alatala lagi’pi laku
14Jaji barik ambata tau Parisiin mandalinga dinen jaruma i Yesus de’i. Jaji mangangara’ ira lo’a i Yesus kole’a ira dinen saja mainya’ lo’a duiten. 15Jaji i Yesus manjarum lo’da’, “Ikin lalo tau yang manyaru’en balu’ tau tapaten di arona tauen. Poangsi atenin dinen datamu bua kole’a Alatala. Kole’a jalu yang daragaien kole’a mantuariin, dinen lalo yang dakagaringanen kole’a Alatala,” ingka kenang.
16“Tulak dari ijolo memen sampai mondok lo’a i Yohanes, kosan jalu bokanen dajarumangen. Ukuma Alatala nanna ambata buku’ panjaruma Alatala, dinen poang yang dajarumangen. Poangsi maminna mondok i Yohanes, yang dajarumangen barik ialalo dongo yang maamen, manjarumang to’ adarina barik baya Alatala to’ mangkama lo’ka’ awan rajaan. Tauenpi barik tumbas panyunyung to’ masok padari panduduk kangkamanna dinen,” ingka kenang. Mat. 11:12-13. 17“Jaji suanen dinen na’an maunda to’ inyapa. Duniaanpi na’an maunda to’ inyapa. Poangsi maunda alit inyapa suanen nanna duniaan dari pada tapalinna Ukuma Alatala. Kapisi urup keke’, kapisi titika, na’an to’ tapalin. Tetap adari awan tujuanna inang,” ingka kenang i Yesus lo’da’. Mat. 5:18.
18“Jaji tau saraken nanna bainyena yang ijoloon, arainye bapi, daia dinen badosa lo’a bainye jolona sama nanna tau manyiuken. Kole’a bainye baruna dinen sabenara okan bea bainyena. Dinen lalo siuka. Tau sialaan nanna babainye maminen sarak tio’, daiapi badosa,” ingka kenang i Yesus majara lo’da’. Mat. 5:32; 1Kor. 7:10-11.
Tau maamen tio’a nanna tau masikinen dala sonto
19Jaji manutul i Yesus lo’da’, “Jaji andian dinen tau yang maamen tio’a. Daia dinen mamakai sape maam lapoang, kain lenan yang palin maam. Saja angkaan jalu banyanyamen kiraso. 20Andian bea dinen tau ajau’en, tau masikinen, i Lasarus asanna. Jaji i Lasarus dinen alenga’ di biringa mambangan pakar saona tau maamen tio’a dinen. Saja akaus apadis mantuarina dinen nanna luka-lukana. 21Gulungan lukana dasisili lapoang kole’a ambata gulungan asuun. Mase’ batanga i Lasarus dinen, baingin to’ angkaan ambata jalu daunjang dari mejana tau maamen tio’a dinen.
22“Jaji barik mate yang tau ajau’en, yang i Lasarus dinen, laloang dala kole’a malaikaten, daawa lo’a biringa tumate baki’ Abraham. Jaji maminna dinen, mate bea dinen barik yang tau maamen tio’a dinen, laloang bea dakaliang. 23Jaji inang di Neraka barik kosanna tau maamen tio’ajo dinen, saja apadis jaji. Jaji maningara’ barik, mamele bajao’, andian baki’ Abraham, andian bea i Lasarus inang ibiringa. 24Jaji mangalong lo’a baki’ Abraham, O baki’ Abraham kamase’i iak. Mamitaak lo’u, i Lasarus dinen, suro’ salapang tuntung tunjuka lo’a danumen itiang pairisi lila’ku’. Kole’a daiak di’en marinsa’ jaji kole’a apiin, ingka kenang tau maamen tio’ajo dinen.
25“Jaji barik manjarum bapi baki’ Abraham, Anake, suba parandam. Daiko di duniaan, maam tapat tio’u. I Lasaruspi di’en tio’a di duniaan, marinsa’ tapat. Kabalikanna rabarik i Lasarus di’en maam tio’a indi’angen, daikopi dinen marinsa’ tapat, ingka kenang. 26Kenang bapi, ingka, andian jalu paintaraien lo’ka’, yang balu’ parek palin bajalamen di’en mainto’ kosan tau indi’angen pande mondok lo’a dinen. Tau inangenpi kosan pande mondok lo’a di’, ingka kenang baki’ Abraham.
27“Jaji dasauti kole’a tau yang maamen tio’a di duniaan, Ti’ kenang, ingka, kupita jaji lo’u baki’e, suba i Lasarus dinen malamba’i saona ama’ku’. 28Andianpi sairunku’ limaan. Suba i Lasarus manjarum lo’da’. Ada’ sampai malola’a lo’a jalu yang marinsa’en di’en, ingka kenang.
29“Jaji dasauti bapi dinen kole’a baki’ Abraham, Ai lagi’ ilamba’ina. Andian mamin buku’a i Musa. Andian bea dinen surata panjaruma Alatala. Suba ti’ paduli lo’a dinen, ingka kenang.
30“Jaji manjarum tau maamen tio’ajo dinen, Na’an kenang baki’e. Poangsi ti’ andian tau tio’ baliken malamba’i itiang manjarumi lo’da’, tentu mainya’ barik maunjang pikiranna yang sala’en, ingka kenang tau dinen.
31“Jaji manjarum bapi baki’ Abraham, Ati’ alibaka memen paduli lo’a i Musa, alibak paduli lo’a ambata panjaruma Alatala, tentu alibakpi parasaya’ kapisi tau tio’ baliken, ingka kenang manjaruma baki’ Abraham lo’a tau maamen tio’ajo dinen,” ingka kenang tutulanna i Yesus.
Currently Selected:
Lukas 16: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
