Lukas 17
17
Ada’ basaka’ mangaru lo’a tauen manyuro’ alao’ ilalam dosaan
Mat. 18:6-7,21-22; Mk. 9:42
1Jaji i Yesus manjarum lo’a palola’a, “Tetap andian lapoang jalu mangaruun lo’a tauen manyuro’ badosa. Poangsi mondok di asona to’ idurusina dosa tauen, ka’ mase’-mase’a tau dinen yang mangaruun. 2Palin aborat dinen ukuma. Maam alit tau dinen itangkare’ani nanna batuun, itampeang mantuarina dinen lo’a danoon, dari pada ia mangaru padari badosa lo’a tau nampiin atoa yang parasaya’en lo’ku’,” ingka kenang lo’da’. Mat. 18:6-7; Mk. 9:42. 3“Jaji jagai kalenin mainto’ na’anka’ mawa tau manyuro’ badosa,” ingka kenang. Mat. 18:15.
“Umpamana arasairunka’ badosaan, arung ijarumi iki’. Ti’ mainya’ maunjang pikiranna yang sala’en, arung iamponi barik iki’. 4Kapisi arapat, kapisi sampai tuju kali saso badosana lo’ka’, tuju kali mole’a lo’ka’ jarumang kalena to’ maunjang pikiran awan dinen, arung iamponi barik,” ingka kenang i Yesus lo’da’.#17:4 Malola’ani ajaranna tau Parisiin dinen, ati’en sampai talung kali tau badosaan lo’ka’, arung iamponi iki’. Poangsi ati’en kaampat kali, na’an parulu lagi’ iamponi iki’. Poangsi i Yesus na’an kenang ajaranna. Mat. 18:22.
Ti’ andian kaparasaya’anka’ katara tolang sasawiin, jaji lalo
5Jaji manjarum palola’a i Yesus lo’a, “Jaji Paraampuane,” ingka kenang, “daikam di’ kaparasaya’annam mamitakam lo’u insang baraa, mainto’ dinen dakadanina kaparasaya’annam,” ingka kenang.
6Jaji dasauti kole’a i Yesus, “Kapi na’an bayu’ kaparasaya’anka’, katara tolang sasawiin, jaji lalo. Manyuro’ki’ lo’a akat kayu murbei suro’ rabut kalena laloang tanamang kalena di danoon,” ingka, “pasti malola’ani panamuka’, ti’ andian kaparasaya’anka,” ingka kenang manjaruma i Yesus lo’a palola’a.
Suro’an yang maamen arung pakeke’ kalena
7“Umpamana andian suro’anka’, isuro’ bakaraja di umaan, atau isuro’ manuntuani dombaan, ti’en mole’ dari umaan, mainya’ki’ te’ mawa angkaan? Se’ adudukko angkaan, iki’ lo’a. Tentu na’an kenang. 8Tentu isuro’ kamasang jalu kaanka’. Kamasang barik jalu kaanku’, iki’ lo’a. Kamasang kalenu itiang manyorongi lo’ku’, tentu kenangki’ lo’a. Maminak daiak angkaan, baru’ daiko angkaan, iki’ lo’a, manjarumka’. 9Ai lo’a te’, ti’ mamin akaus dalola’ani panamuka’, mangasuang nyawaki’ barik lo’a? Na’an mo’i, kole’a dinen lalo tugasa. Tugasa poang yang daawaan. 10Kenang bea daiki’ lo’a Paraampuanka’, ada’ manyari pudiin. Ai yang dasuro’angen lo’ka’ ti’ mamin ikaraja, arung inang manjarumka’, Daikam di’en suro’an poangkam. Karajanam kosan jalu pande ipudi. Malola’ani poangkam lo’a jalu yang dasuro’angen lo’am, iki’ kenang,” ingka kenang manjaruma i Yesus lo’a palola’a.
Mantuari sapulo’ yang akudungen dapamaam kole’a i Yesus
11Jaji barik i Yesus dinen lamba’ lo’a Yerusalem malola’ dalan antarana propinsi Samaria nanna propinsi Galilea. 12Jaji barik to’ intama dinen lo’a banua seraan, andian tau pasidua’ang kalena nanna, mantuari sapulo’en yang tau akudungen. Jaji manaat ira dinen kalongang kalena dari bajao’, 13“O Yesus Paraampuane, kamase’i ikam!” ingka kenang.
14Jaji dakita barik kole’a i Yesus, manjarum daia, “Se’ bea, lamba’kin poang payoang kalenin lo’a imamen,” ingka kenang. Jaji patanga’an lamba’a barik dinen, ira yang sapulo’en, laloang maam kudunga, barese. Im. 14:1-32.
15Jaji barik andian mantuari sera dinen dabele kalena maam, mole’ balik mamudi-mudi lo’a Alatala nanna unyi baraana. 16Jaji mondok di kakina i Yesus laloang paraba’ kalena mantuari dinen, mangasuang nyawa lo’a. Tau dinen tau Samariaan.
17Jaji barik manjarum bapi i Yesus, “Balu’ mantuari sapulo’ de’i yang maminen kupamam. Isa ira sumilanen?” ingka kenang. 18“Suma sera poang yang mole’en to’ mamudi lo’a Alatala? Yang okanen tau Yahudi bapi lagi’!” ingka kenang manjaruma i Yesus. 19Jaji manjarum bapi i Yesus lo’a tau dinen de’i, “Jaji akadengko, lamba’ko. Maam barik sakinu kole’a kaparasaya’annu,” ingka kenang manjaruma i Yesus lo’a tau dinen de’i.
Nanga inde adarina Kangkamanna Alatala?
Mat. 24:23-28,37-41
20Jaji andian tau Parisiin mangatoani lo’a i Yesus, “Nanga inde ona’ adarina baya Alatala to’ mangkama lo’ka’ awan rajaan?” ingka kenang.
Jaji barik i Yesus manyauti, “Jaji kenang. Kangkamanna Alatala dinen okan jalu ikita. 21Kosan ona’ tau masanen, Belejo! Mondoka lalo! Ataupun, Inang lalo adarina. Na’an kenang. Kole’a kangkamanna Alatala nanka’ lalo adarina, ilalam ateka’,” ingka kenang lo’da’.
22Mamin dinen barik daia manjarum bapi lo’a palola’a, “Daikin ona’ to’ manyari jaji lo’ku’. Baingin jaji to’ sidua’ nanku’ Anak Mantuariin, kapisi sikadang poang. Poangsi na’anak to’ ikita. 23Belejo, inang lalo ia, ingka ona’ tauen. Ataupun, Na, indi’angen lalo, ingka kenang. Ada’ ilola’a ikin. 24Kole’a ati’enak mondok ona’, jelas datamu kole’a tauen maira tatak banuaan. Awan lalo dinen kilaten yang dari sabala’ dinen mamancara lo’a sabala’, awan dinen lalo ona’ paitaku’ di asona pamondokku’ Anak Mantuariin,” ingka kenang. 25“Poangsi nampina adariin awan dinen, arung tadua’ku’ nanna bayu’ parinsa’en. Arungak dakalibakang kole’a tauen di tatakku’ di’en,” ingka kenang lo’da’.
26“Awan lalo di nanga baki’ Nuhjo, awan dinen bua ona’ di asona pamondokku’ Anak Mantuariin. Sadinga poang mondokku’. Mul. 6:5-8. 27Kole’a inangjo na’an bua datamu kole’a tau daukumiin jalu to’ adariin dinen. Angkaan mainyum tauen, siala arainye awan kiraso sampai dinen mondok lo’a asona baki’ Nuh intamana di kapalen. Laloang mansang dinen danumen manampusi lo’da’,” ingka kenang. Mul. 7:6-24.
28“Awan dinen bapi di nanga baki’ Lot. Inangjo tauen angkaan, mainyum, mamali mamet jaluun, mananam jalu, mambangun jaluun awan kiraso. 29Poangsi di asona inyapa di banua Sodom, darantang kole’a i Lot, aso dinen lalo tauen dalao’ina nanna uran apiin, dalao’i nanna belerangen yang manampusiin lo’da’,” ingka kenang lo’da’. Mul. 18:20—19:25.
30“Jaji awan dinen lalo ona’ di asona payoanga kaleku’ Anak Mantuariin. Mondok aso dinen ada’ penting lo’a jalu bokanen. 31Tau di tingkat ibona saoen, ada’ tadoren intama lo’a saoen itiang mala jalu ilalamen. Arung arari poang. Kenang bapi tau di umaan, ada’ mole’ baliken lo’a saoen itiang mala jaluun. Mat. 24:17-18; Mk. 13:15-16. 32Parandam poang dinen bainyena baki’ Lot!” ingka kenang. Mul. 19:26.
33“Jaji kenang. Ada’ penting lo’a hartaan. Intain yang mainya’en marinsa’ malola’anina lo’ku’, yang barani sampai mate, dinen ona’ yang bauntungen, to’ tio’ salaun-launna. Intain mainya’en to’ katio’ poang kalena, yang alibaken marinsa’, dinen ona’ yang arugiin salaun-launna, na’an tio’,” ingka kenang. Mat. 10:39; 16:25; Mk. 8:35; Lk. 9:24; Yoh. 12:25. 34“Jaji manjarumak lo’in, Ona’ malam dinen ti’ dua tau sama tindo’ di ranjang seraan, sera tau dinen to’ daangkatang, sera darantang. 35Ti’ dua babainyeen sama bakaraja mamola tepung, sera dinen to’ daangkatang, sera darantang,” ingka kenang lo’da’. 36[“Ti’ dua babakaan sama aparuken, sera dinen to’ daangkatang, sera darantang.] Anak ulun maamku’ poang yang dalaan,” ingka kenang manjaruma.
37“Disa, Paraampuane?” ingka ira palola’a mangatoanina lo’a.
Jaji manyauti i Yesus mamakai sama’ jaruma, “Ti’en andian bangkayoan jalu, inang lalo takapulunga gulungan burung bauen,” ingka kenang lo’da’.
Currently Selected:
Lukas 17: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
