Lukas 18

Tau babainye baluun nanna paurusen dala sama’ jarum

1Mamin dinen i Yesus mamakai sama’ jarum lo’da’ to’ datiang sonto lo’da’ kole’a daiki’ arung bado’a lapoang. Na’an pande putus asa. 2“Jaji andian di banua sera,” ingka, “tau dinen paurusen, daia na’an paduli lo’a Alatala, na’an bea paduli lo’a mantuariin. 3Poangsi di banua dinen de’i, andian tau bainye baluun yang andianen panakarana. Daia mamita idurusi lapoang lo’a tau paurusen dinen. Suba gulungiak maurusi lo’a tau malawanen lo’ku’ dinen,” ingka kenang.

4“Jaji balaun barik, mondok lapoang babainye dinen, alibak lapoang paduli lo’a. Jaji barik bapu’ tau paursen lo’a babainye dinen kole’a suro’ urusi lapoanga kalena. Laloang bapikir barik tau paurusen dinen, Daiak di’en, ingka kenang jarumina kalena, na’anak paduli lo’a Alatala, na’anak bea paduli lo’a mantuariin. 5Poangsi daia di’en to’ na’an kudurus, ulu’-ulu’ poang mondoka lo’ku’, bapu’ak damondokiin. Labi maam kudurus lo’a. Kukamuroang, mainto’ daia na’anna mangaru lo’ku’, ingka kenang manjaruma paurusen dinen,” ingka kenang sama’ jaruma i Yesus.

6Jaji manjarum bapi lo’da’, “Jaji taan talinganin lo’a jaruma paurus ajau’en dinen de’i. 7Ti’ mainya’ barik dinen tau ajau’en maurusi lo’a babainye dinen kole’a mondoka lapoang, apa lagi’ maama Alatala. Tentu mainya’ Alatala maurus lo’ka’. Tentu mainya’ maurus lo’ka’ yang daile’ina memen di’en ti’ki’ na’an bapu’ mamita. Tentu na’an mangalibakang lo’ka’, pasti dapatiangki’,” ingka kenang. 8“Manjarumak lo’in, na’an lagi’ balaun daia maurusina. Poangsi mangatoaniak bapi lo’in. Ai lo’a kalo’in, ona’ di mole’ balikku’ Anak Mantuariin? Kudua’ang te’ na’an te’ tau yang parasaya’en indi’ang di duniaan?” ingka kenang manjaruma i Yesus lo’da’.

Tau Parisiin nanna tau panarima’ sukaien dala sama’ jarum

9Jaji i Yesus manjarum bapi lo’a tauen yang tau anggapen kalena tau tapaten, yang mainya’en bagap lo’a tau bokanen. 10“Andian,” ingka kenang jaruma i Yesus lo’da’, “sera tau Parisiin, sera tau panarima’ sukaien. Jaji barik sama lamba’ ira duaan lo’a saona Alatala to’ bado’a. 11Jaji akadeng barik tau Parisiin dinen bado’a inang ilalam batak nyawana, O Alatala, kukasuang nyawa iak lo’u kole’a daiak di’en laanak lo’a mantuari bokanen. Marampas jalu tau na’anak. Mamola kajau’an na’anak. Manyiuk na’anak. Na’anak di’en awan tau panarima’ sukaien yang inangen dinen. 12Daiak di’en duang kali saminggu bapuasaku’. Samuana asel jalu kukule’en, kumeang kausa paresena, sapulo’ paresen, ingka kenang dinen manjaruma tau Parisiin bado’anna.

13“Poangsi dinen tau panarima’ sukaien babajao’ akadenga. Na’an dampe maningara’ mamele inait. Dadongang poang uluna. Databungi arona lasana ajau’a nyawana mamikirang dosana. O Alatala, ingka, kamase’i iak yang tau badosaan di’en, ingka kenang do’anna.

14“Jaji manjarumak lo’in, okan dinen tau Parisiin yang daanggap tapat di jolo arona Alatala. Tau panarima’ sukaien dinen de’i di mole’a, ia yang daanggapen tapat di jolo arona Alatala. Kole’a intain yang paraa’en kalena, ia yang to’ dapakeke’en. Intain pakeke’en kalena, ia yang to’ daparaa’en,” ingka kenang manjaruma i Yesus lo’da’. Mat. 23:12; Lk. 14:11.

Gulungan nangkanaken daberkati kole’a i Yesus

Mat. 19:13-15; Mk. 10:13-16

15Jaji barik andian tau mawa nangkanak akeke’en lo’a, to’ dasuro’ japuti lo’da’ bado’a pamondokang jalu maamen lo’a. Jaji datamu kole’a palola’a i Yesus, darada’i tau yang mawaan dinen. 16Poangsi i Yesus dinen mangalong lo’a gulungan nangkanaken, dasuro’ mondok lo’a. Jaji manjarum lo’a palola’a, “Palaloang. Ada’ mangaruun lo’da’. Ada’ pase’anga mondok nangkanaken. Kole’a balu’a dinen lalo tau panduduk kangkamanna Alatala. 17Manjarumak lo’in tapat-tapat. Intain to’ padari panduduk kangkamanna Alatala, arung mole’ nangkanak sama’a, baru’ padari kangkamanna. Ati’en na’an awan dinen, na’an patut adari,” ingka kenang i Yesus lo’da’.

Tau maamen tio’a mananya’ dalan katio’anen

Mat. 19:16-30; Mk. 10:17-31

18Jaji barik andian tau panguluanen mondok lo’a i Yesus, “O Pa’ Guru yang maamen,” ingka, “ai maamen kupolaan mainto’ tio’ku’ salaun-launna?” ingka kenang manjaruma lo’a i Yesus.

19Jaji barik manjarum i Yesus lo’a, “Maisi iasanak iko tau maamen? Ai te’ tujuannu? Kosan tau maamen maminna Alatala,” ingka kenang i Yesus. 20“Jaji kenang. Daiko di’en mamin itamu iko Ukuma Alatala,” ingka.

“Ada’ manyiuken. Ada’ mauno’en. Ada’ mangaliten. Ada’ panganung-nganung saksiin. Paduliki’ lo’a ama’ka’ nanna indu’ka’,”

ingka kenang i Yesus lo’a. Pal. 20:12-16; Ul. 5:16-20.

21“Samuana dinen akaus kulola’ani dari akeke’ku’ mondok lo’a baraaku’,” ingka kenang manyautina lo’a i Yesus.

22Jaji barik dadalinga awan dinen kole’a i Yesus, daiapi laloang manjarum lo’a, “Suma sera poangpi kakurangannu, yang nampiin ikaraja iko,” ingka kenang i Yesus lo’a. “Suba ipet kausa iko jalunu. Tawa’ang dinen ragana lo’a tau masikinen, lo’a tau ajau’en. Ati’en ianu iko kenang, bayu’ ona’ opa’u di Surga,” ingka kenang. “Ti’ mamin ipet iko jalunu dinen, mondokko barik malola’ lo’ku’,” ingka kenang i Yesus lo’a tau dinen.

23Dadalinga barik jaruma i Yesus dinen kole’a tau dinen, ajau’ barik nyawana, susa, kole’a daia dinen bayu’ tapat jaluna. 24Jaji barik i Yesus mamele lo’a tau dinen laloang manjarum, “Yang tau maamen tio’a,” ingka, “badidit tapat masoka padari panduduk kangkamanna Alatala,” ingka kenang. 25“Maunda alit inatang untaan intamana lo’a loang darumen dari pada tau yang maamen masoka padari panduduk kangkamanna Alatala,” ingka kenang manjaruma i Yesus.

26Jaji tau yang mandalingaan jaruma dinen de’i manjarum, “Ati’en kenang, intain poang pandeen dakatio’ dari ukum dosaan?” ingka kenang manjaruma lo’a i Yesus. Mat. 13:12; Mk. 4:25; 10:32-34; Lk. 8:18.

27Jaji barik i Yesus manyauti, “Jalu na’anen patut ikule’ ikaraja iki’ mantuariin, pande kausa adari ati’en Alatala yang mangarajaan,” ingka kenang manjaruma lo’a palola’a.

28Jaji manjarum barik i Petrus lo’a i Yesus, “Jaji daikam di’en mamin marantang kausa jalunam itiang malola’ lo’u,” ingka kenang lo’a i Yesus.

29Jaji manyauti bapi i Yesus, “Kenanga kenang. Jaji manjarumak lo’in tapat-tapat tetap andian balasa. Ati’enki’ marantang saoka’, marantang bainyeka’, marantang sairunka’, ama’ka’ indu’ka’ atau anakka’ kole’a karajana kangkamanna Alatala, 30pamalasen pasti idua’ang di dunia di’en bayu’ kali lipat. Sarata tio’ka’ ona’ yang salaun-launnaan idua’ang bea,” ingka kenang i Yesus manyautina lo’a i Petrus.

I Yesus manjarumang matena nanna tio’ balika

Mat. 20:17-19; Mk. 10:32-34

31Jaji barik i Yesus mangapi’ang lo’a palola’a lo’a tau bayu’en. Jaji manjarum i Yesus lo’da’, “Jaji lamba’ka’ di’en lo’a Yerusalem, to’ adari barik ambata bayana panjaruma Alatala yang manjarumang jalu to’ adariin lo’ku’ Anak Mantuariin. 32To’ daseraak lo’a tanganna ambata tau okanen Yahudiin. Jaji ira dinen barik yang mananawaien, mala paradai’an lo’ku’, yang pajau’en lo’ku’, yang malasuien lo’ku’. 33Ira dinen to’ manyupet lo’ku’, to’ mauno’ lo’ku’. Jaji barik maminak mate, mamin tuli talung aso, daiak to’ tio’ balikak bua,” ingka kenang i Yesus lo’da’.

34Poangsi ira palola’a na’an manamu tujuanna jaruma i Yesus dinen. Balu’ jalu datutupipi lo’a pikiranna.

I Yesus pamaami tau bautaan

Mat. 20:29-34; Mk. 10:46-52

35Jaji barik i Yesus mamin mainso’ lo’a banua Yeriko. Jaji andian tau bautaan aduduk di biring dalanen yang mamita jaluun lo’a tauen. 36Jaji barik dadalinga lamba’a tau bayu’en inang, daiapi laloang mangatoanang ratina lo’a tauen. 37Jaji tauen manjarum, “O dinen i Yesus tau Nasaret yang lamba’ malaloien lo’ka’,” ingka kenang tauen lo’a tau bautaan.

38Jaji mamuko tau dinen, “O Yesus kanturunanna Raja Daud, kamase’i iak!” ingka kenang tau bautaan. Msm. 118:26.

39Jaji tau lamba’en ijolona i Yesus dinen marada’i lo’a tau dinen, manyuro’ lalako’. Poangsi insang darada’i, insang dapukoang, “O Yesus kanturunanna Raja Daud, kamase’i iak!” ingka kenang.

40I Yesuspi barik manaat inang. Dasuro’ mondok tau bautaan dinen lo’a, 41“Ai yang to’ ipitaan iko lo’ku’?” ingka kenang i Yesus lo’a tau bautaan dinen.

“Paraampuane,” ingka, “kosan jalu bokan kupitaan lo’u. Yang kupitaan mainto’ kukule’a mamele,” ingka kenang tau bautaan lo’a i Yesus.

42Jaji barik i Yesus manjarum lo’a, “Mameleko barik. Maminko maam kole’a kaparasaya’annu,” ingka kenang i Yesus lo’a. 43Laloang maam barik mamelena. Tau dinenpi barik tamba malola’ lo’a i Yesus sarata mamudi-mudi lo’a Alatala. Jaji maminna tau bayu’en mamele awan dinen, ira dinenpi mamudi bea lo’a Alatala.

Currently Selected:

Lukas 18: EBE

Highlight

Copy

Compare