Lukas 19

I Yesus angkaan di saona i Sakeus

1Jaji barik i Yesus lamba’ malaloi banua Yeriko. 2Inang patanga’an lamba’a andian dinen mantuari iasanen i Sakeus, panguluan panarima’ sukaien yang maamen tio’a. 3Daia baingin tapat to’ mamele lo’a i Yesus. Poangsi tauen dinen, bayu’ yang babangkulungen kulilinga i Yesus. Kenang bapi apondok mantuarina, jaji na’an dapat mangita lo’a i Yesus. 4Jaji barik arari tajolo-jolo lo’a tau bayu’en mambit di akat araan kole’a i Yesus to’ malaloi inang.

5Jaji mondok barik i Yesus lo’a dinen, maningara’ barik manjarum lo’a i Sakeus, “Eh Sakeus, tadorko, babariar. To’ lo’a saonuak, to’ sengka’ak di saonu,” ingka kenang. 6I Sakeuspi laloang tador dinen manyialo lo’a i Yesus nanna sasauna nyawana.

7Jaji lamba’ lo’a saona i Sakeus, dakita kole’a tauen intamana lo’a dinen, amumut barik, “Ai Yesus dinen to’ manamue lo’a saona tau badosaan?” ingka kenang tauen.

8Jaji barik akadeng i Sakeus manjarum lo’a i Yesus, “Na barik di’en Paraampuane, daiak aso di’en kutawa’ dua ambata kamaamaku’ lo’a tau masikinen. Kenang bea de’i lo’a tau yang maminen kuakal, to’ kupole’ ampat kali lipat,” ingka kenang.

9Jaji barik dasauti kole’a i Yesus dinen, “Na, ti’ kenang, maam. Daiapi anak kanturunanna baki’ Abraham. Aso di’en bua ikatio’a toa sao di’en dari ukum dosaan. 10Kole’a pamondokku’ Anak Mantuariin kenang lalo, to’ manyari, to’ mangatio’ lo’a tau Israelen yang alingoon lo’a dalanna Alatala,” ingka kenang manjaruma i Yesus lo’a i Sakeus.

Tau yang dameangen tugas dala sama’ jarum

Mat. 25:14-30

11Jaji manjarum i Yesus lo’a tau manaantalingaan de’i lo’a sijarumanna nanna i Sakeus, dakadani bapi jaruma. Dalam palamba’anna dinen, i Yesus mainso’ mamin to’ mondok lo’a banua Yerusalem. Ira dinen daasanang to’ adarina lalo bayana Alatala to’ mangkama lo’ka’ di duniaan awan rajaan. Ialalo manjaruma lo’da’ mamakai sama’ jaruma di’en. 12“Jaji andian tau kanturunan rajaan yang to’ daangkatang lo’a kadudukan rajaan,” ingka kenang. “Jaji to’ lamba’ tau dinen lo’a banua bajao’en datiang maurus dinen, laloang to’ mole’ balik. 13Jaji to’ tarangkat dinen, dakombongang suro’anna sapulo’, dasuro’ang lo’da’ duit amas sapulo’ papaka, maira mantuariin sapapak. Na, duit di’en, ingka, paranak ikin. Ipaguna launna nampiku’ mole’ lo’a di’en, ingka kenang lo’a ambata suro’anna.

14“Poangsi tauen sapa dua di kangkamanna dinen andian yang alibaken lo’a. Jaji dasuro’ tau malola’ imundina dinen, dasuro’ mawa jarum lo’a banua inangen, Alibakkam tau di’en iangkatang padari rajanam, ingka kenang jaruma dapaba’angen dinen.

15“Poangsi dinen di mole’a, mamin lalo daangkatang padari rajada’. Maminna mole’ dinen, dasuro’ madap ambata suro’anna dinen, to’ dasuro’ lapor ambata mole’a duit daparanaken dinen.

16“Jaji mondok yang seraan, Paraampuane, ingka, duitu yang sapapaken mole’ barik sapulo’ papak, ingka kenang lo’a paraampuanna.

17“Jaji manjarum dinen paraampuanna, Maam. Daiko di’en dapatko kuparasaya’i itiang maurusi jalu kakapiten. Jaji di’en barik kumeangko bapi tugas. Mangkamko barik di banua sapulo’en di’en, ingka kenang paraampuanna lo’a suro’anna.

18“Jaji mondok bapi yang kaduaan, Paraampuane, ingka, duitu yang sapapaken mole’ barik limang papak, ingka kenang suro’anna dinen.

19“Jaji manjarum bapi paraampuanna, Maam. Barik di’en kumeangko bapi tugas. Mangkamko barik di banua limaan di’en, ingka kenang lo’a suro’anna.

20“Mamin dinen mondok bapi suro’annen, Na, di’ lalo duitu, ingka kenang lo’a paraampuanna. Kululun iak di kainen, kutaro’. 21Saja atakutak lo’u, kole’a kutamuko tau bakarasko. Pande-pandeko mamakai tolang tau itiang paranak duitu. Okanpi iko yang manaro’en, iko bua yang malaan. Okanpi iko yang mamborangen banyia’en, iko bua yang matamen mala asela, ingka kenang suro’anna dinen.

22“Jaji manyauti dinen paraampuanna, Ajau’ jajiko dinen. Jarum diri’u dinen mamutusiin lo’u. Asi memen? Itamu iko lo’ku’ tau bakarasen. Itamu iko di kosan na’anen kutaro’ jaluun, inang bua malaku’. Itamu iko di kosan na’anen kuambori banyia’en pande kuala asela, ingka kenang. 23Ai memen na’annu mamolaang anaka duitku’? Di mole’ku’ barik pande duitku’ mole’ lo’ku’ nanna anaka, ingka kenang arasina.

24“Jaji manjarum paraampuanna lo’a tau ibiringaan dinen, Duita sapapaken dinen, ala ikin. Meang poang lo’a suro’anku’ dinen yang andianen mole’a sapulo’ papak, ingka kenang lo’da’.

25“Poangsi daia dinen mamin sapulo’ papaka, Paraampuane, ingka kenang ira manyautina.

26“Jaji manyauti dinen paraampuanna, Manjarumak lo’in, intainki’ yang andianen mamin jalu datawa’iin lo’ka’, ti’ ipaguna to’ datambai bapi. Poangsi tau angkosanen jalu ijaput, anu kakapitenpi ti’ na’an dapaguna to’ dala bua ona’, ingka kenang. 27Poangsi ambata musuku’ dinen yang alibaken lo’ku’ iangkat padari rajada’, awa lo’di’. Uno’ poang indi’angen di aroku’, ingka kenang dinen rajaan,” ingka kenang tutulanna i Yesus lo’a tau bayu’en.

I Yesus mondok lo’a Yerusalem awan Rajaan

Mat. 21:1-11; Mk. 11:1-10; Yoh. 12:12-15

28Jaji mamin akaus barik ambata jaruma i Yesus dinen, daiapi laloang lamba’ ijoloda’ lo’a Yerusalem. 29Jaji mondok mainso’ lo’a banua Betpage nanna banua Betania di ukit yang iasanen ukit Saitun inang, i Yesus manyuro’ lo’a palola’a duaan. 30Jaji dapaba’i dinen palola’a, “Lo’a dinenkin, lo’a banua tumbalianen nanka’ dinen. Intamakin ona’ lo’a banua dinen, terus to’ ikita inang anak keledaien yang itunja’angen, yang na’anen kala’ dauwati tau. Dinen laka’i ikin, awa lo’di’,” ingka kenang i Yesus lo’da’. 31“Jaji andian ona’ tau mamele dinen, matoani lo’in, Ai ileka’ina ikin keledai tauen? ingka ona’ dinen. To’ daparulu kole’a Paraampuannam, ikin kenang lo’a,” ingka kenang i Yesus lo’da’.

32Jaji tau yang dasuro’en dinen laloang lamba’. Jaji kenang tapat, awan bua jaruma i Yesus lo’da’. 33Daleka’i barik dinen keledaien kole’da’, tau ampuna keledaien dinen manjarum lo’da’, “Ai ileka’ina ikin keledai tauen?” ingka bua lo’da’.

34Jaji dasauti kole’da’, “To’ daparulu kole’a Paraampuannam,” ingka kenang ira duaan manyautina.

35Mamin dinen daawa barik anak keledaien mole’ lo’a i Yesus, laloang daampari balakanga nanna ampuroda’, i Yesus dauwatang barik inang. 36Di lamba’a dinen tauenpi dinen bayu’ mamparang ampurona di dalanna itiang manyialo lo’a i Yesus.

37Jaji mondok barik lo’a kosan dalan tadoren lo’a Yerusalem dari ukit Saitun, ambata palola’api dinen mulai mangasuang nyawa, mamudi lo’a Alatala nanna unyi baraa’en kole’a ambata panyunyuaan yang dakitaan dinen,

38 Dapamaam rajanam yang tau mondoken atas asanna Paraampuanen! Sikamaaman di Surga! Ipudi Alatala yang tau lalako’en di kosan palin balangkeen ibo! Msm. 118:26.

ingka kenang jaruma tauen dapukoangen.

39Jaji andian bea tau Parisiin di bangkulungan tau bayu’en. Jaji manjarum lo’a i Yesus, “Pa’ Guru, suba rada’i dinen palola’u!” ingka kenang ira lo’a i Yesus.

40“Manjarumak lo’in,” ingka kenang i Yesus, “ti’ ira dinen na’an manjarum, ti’ lalako’, batuunpi ka’ bea mamukona mawa jarum dinen,” ingka kenang i Yesus lo’da’.

41Jaji mondok lo’a Yerusalem, dakita kole’a i Yesus barik banua dinen, laloang danangisi. 42Jaji manjarum, “Adu, ti’ itamu bea daikin dalan mawaan sikamaamanen, okan na’an maam! Poangsi na’an itamu. Dalamun lo’in ratina,” ingka kenang. 43“Ona’ adarina ambata pangayoanen to’ mangulilingi banuanin mamola tampara’ di biringa pakar tagapen, to’ marapit lo’in. 44Banuanin dinen to’ darampas, datampeang lo’a tana’en. Samuana yang ilalam pakar tagapa banuanu saranak-ranakang to’ datampeang kausanin. Kosan ona’ batu serapi sitataran ibona seraan. Kenang ona’ adarina kole’a daikin dinen na’ankin mangilala, na’ankin manamu ratina. Kole’a aso di’en lalo asona mondoka Alatala to’ matio’ lo’in,” ingka kenang bayana i Yesus lo’a tau banua Yerusalem.

I Yesus mamarese saona Amana

Mat. 21:12-13; Mk. 11:15-19; Yoh. 2:13-16

45Jaji barik i Yesus lamba’ intama lo’a pakar saona Alatala. Jaji mondok ilalam, andian ambata tau badagangen inang. Akaus dauser rabarik, dasuro’ mamalin, dasuro’ minsaluan. 46Laloang majar i Yesus lo’da’, “Asi lo’a jalu datulisangen ilalam Jaruma Alatala dinen,

Saoku’ di’en kutiang sao kosan bado’aan,

ingka kenangjo ilalam Jaruma. Yes. 56:7; Yer. 7:11. Poangsi daikin laan polana kole’in. Ipola barik ikin sao parampasen,” ingka kenang i Yesus lo’da’.

47Jaji i Yesus dinen mairaso bua majara di saona Alatala. Ambata imam baraa’en dinen, ambata toa adaten, nanna gulungan panguluan tau Yahudiin, samuana manyari akal to’ mauno’ lo’a i Yesus. Lk. 21:37. 48Poangsi dasari akala dinen, na’an dadua’ang, kole’a samuana tau bayu’en saja kakadaka manaantalingana lo’a jaruma i Yesus.

Currently Selected:

Lukas 19: EBE

Highlight

Copy

Compare