Lukas 20

Panguluanen mangatoanang kuasana i Yesus

Mat. 21:23-27; Mk. 11:27-33

1Jaji barik andian asona, i Yesus majar lo’a tauen di saona Alatala, dajarumang Dongo Maamen. Jaji patanga’an majara dinen, mondok bea gulungan imam baraa’en nanna toa adaten 2manjarum lo’a, “Jarumangjo lo’am, intain manugasen lo’u, yang mameang kuasaan lo’u itiang manu jalu di’en? Kuasana intain ipakaien iko?” ingka kenang ira lo’a i Yesus.

3Jaji barik manyauti lo’da’, “Daiakpi mangatoaniak bapi lo’in. Jarumangjo lo’ku’. 4Jaji waktu nanga i Yohanes mambaptis tauna, intain manugasen lo’a? Kuasa dari nanna Alatalaaka, kuasa dari mantuariinaka?” ingka kenang i Yesus lo’da’.

5Jaji barik sijaruman ira manyari akal to’ manyauti lo’a, “Iasan iki’ ona’ kuasana dari Alatala, daiapi tentu mamalas lo’ka’, Mai poang na’annin parasaya’ lo’a, tentu ingka lo’ka’,” ingka kenang ira sijarumanna. 6“Sabalika to’ iasan iki’ kuasana mantuariin, ai lo’a? Samuana tau bayu’en di’en tentu mamarati lo’ka’ nanna batuun. Kole’a samuana parasaya’ tapat lo’a i Yohanes dinen awan panjaruma Alatala,” ingka kenang ira.

7Jaji barik manyauti ira lo’a, “Taua, na’ankam manamu kuasana dinen asala,” ingka kenang ira.

8Jaji manjarum i Yesus, “Na, ati’en na’an itamu ikin, na’anak bea daiak manjarumang lo’in kuasa yang jalu kupolaan di’en,” ingka kenang i Yesus lo’da’.

Tau manuntuani kobon angguren dala sama’ jarum

Mat. 21:33-46; Mk. 12:1-12

9Jaji barik i Yesus manjarum bapi lo’da’ inangen mamakai sama’ jarum, “Andian tau mananam kobon angguren. Jaji kobon angguren dinen dasuro’ tuntuani lo’a tauen. Mamin dinen tarangkat diri’a dinen tau ampuna kobon dinen, lamba’. Balaun na’an mole’. Yes. 5:1. 10Ada’a barik asona, dasuro’ suro’anna lo’a dinen itiang managi pambagian mole’a di kobon anggur dinen. Poangsi mondok lo’a dinen, lo’a tau panuntuani kobon angguren, datiang barik. Dasuro’ lamba’ kosan jalu daawa mole’, tau dasuro’en dinen. 11Andian bapi sera, dasuro’ bapi lo’a dinen. Jaji awan dinen bapi, datiang, dapawa’-awa’ani. Dasuro’ lamba’ kosan jalu daawa mole’. 12Mamin dinen dasuro’ bapi yang kataluun, dalukai bapi, datampeang insaluan.

13“Jaji barik bapikir dinen tau ampuna kobonen, Asi lo’a di’en? Na, di’ barik anakku’ yang kukasaangen, dinen yang kusuro’en lo’a dinen. Ungka’en barik dapaduli anakku’, ingka kenang nyawana.

14“Poangsi mondok rabarik lo’a dinen anaka dinen, dakita kole’da’, sijaruman tau panuntuaniin dinen, Na, di’ anak daarapen lalo di’i yang dasuro’en. Barik ona’ iana lalo ampunaan. Se’ iduno’ iki’ mainto’ kobonna di’en idua’ang barik iki’, ingka kenang sijarumanna sera lo’a seraan. 15Rabarik anaka dinen laloang dauno’. Datampeang bangkayoanna dinen insaluanna kobon dinen,” ingka kenang manutula lo’da’.

“Jaji ai lo’a barik tau ampuna kobon dinen?” ingka kenang i Yesus lo’da’. 16“Tentu dalamba’i kobon dinen, dauno’ tau panuntuaniin dinen. Tentu dasuro’ang bapi kobon dinen lo’a tau bokanen rabarik,” ingka kenang i Yesus lo’da’.#20:16 Bele keterangan di Mk. 12:1-12.

Jaji tauen dinen mandalinga jaruma i Yesus awan dinen, manjarum barik ira, “Ada’! Na’an patut kenang!” ingka kenang ira.

17Jaji barik i Yesus mamele terus lo’da’, “Na ti’ kenang, ai ratina jalu datulisangen ilalam Jaruma Alatala di’en yang manyama’angen lo’a tau dabayaangen? Jaji kenang jalu datulisangen inang,

Andian batu yang na’anen dapaguna kole’a tau pamola sao, daunjang. Batu dinen barik yang padari batu palin pentingen di pambangunanen,

ingka kenangjo di Jaruma Alatala. Msm. 118:22. Jaji kenang lalo ti’en jalu dakamainya’iin kole’a Alatala ikalibakang iki’. 18Intain ona’ tatoroon lo’a batu dinen, daia to’ apolo barik. Intain ona’ dalao’iin nanna batu dinen to’ abobor jaji,” ingka kenang i Yesus lo’da’.

19Jaji barik dasari dalanna to’ indinang maningkama lo’a i Yesus. Kole’a sama’ jarum dinen datamu kole’a toa adaten, kole’da’ imam baraa’en to’ manyama’ang lo’da’ awan tau mangalibakangen lo’a pasuro’a tau ampuna kobonen dinen. Poangsi atakut ira lo’a gulungan tau bayu’en.

Tauen mangatoanang soal bayaran sukaien

Mat. 22:15-22; Mk. 12:13-17

20Jaji ira dinen mamele lapoang lo’a i Yesus. Dasuro’ ambata panojam lo’a, yang manyaru’ balu’a tau tapaten. To’ maimpa’ mangali-ngali jaruma i Yesus, mainto’ taukasang kasala’anna. To’ daduang lo’a kuasana gubernur. 21Jaji to’ mangatoani ambata panojamen dinen lo’a i Yesus, manjarum majo’-ajo’, “Pa’ Guru,” ingka, “daiko di’en tau tapatko. Sama ratako manjarumang dalanna Alatala yang jalu tapaten lo’a tauen. Na’anko atakut lo’a tauen kole’a na’anko manampi’ lo’a tau seraan labi lo’a seraan,” ingka kenang ira lo’a i Yesus. 22“Jaji ai lo’a di adatka’. Daikam di mamayar sukainam, arung lo’a Raja Roma te’, na’an te’?” ingka kenang matoanina lo’a i Yesus.

23Poangsi datamu mamin tujuanda’ kole’a i Yesus. Jaji manjarum lo’da’, 24“Suba payoang lo’ku’ duit dinar sapapaken, to’ kubele,” ingka. “Na, gambara intain di’? Capa intain?” ingka kenang i Yesus lo’da’.

25“Cap Kaisar Raja Roma,” ingka kenang ira lo’a.

“Jaji kenang kausa jaluun. Jalu maminen itamu Kaisar ampunaan, lo’a Kaisar bea mameangin. Jalu maminen itamu Alatala ampunaan, lo’a Alatala bea mameangin,” ingka kenang i Yesus lo’da’.

26Jaji ira dinen na’an dakule’ manyuro’ sala’ jaruma i Yesus di arona tauen. Jaji na’an lagi’ kakaji’ kole’a tatakau lo’a jaruma dinen.

Tauen mangatoanang soal tio’ baliken

Mat. 22:23-33; Mk. 12:18-27

27Jaji rabarik andian tau mondok lo’a i Yesus dari gulungan tau Sadukiin. Jaji ilalam kaparasaya’anda’ tau Sadukiin, kosan tau tio’ balik yang maminen mate. Ti’ mamin mate, akaus poang inang kalo’a. Jaji andian jalu to’ dakatoanang lo’a i Yesus, PalPa. 23:8. 28“Pa’ Guru,” ingka, “andian datulisangen di buku’a baki’ Musa ijolo parintana lo’ka’, umpamana tau babakaan mate, marantang bainyena poangsi kosan anaka, arung sairunna dinen sialaan barik nanna bainye baluna dinen itiang patio’ puri itiang lo’a sairunna,” ingka kenang ira lo’a i Yesus. Ul. 25:5. 29“Jaji manutulkam lo’u. Andian tau tuju pariin. Yang atoaan dinen arainye. Mamin barik arainye, mate barik babaka dinen angkosan anaka. 30Yang kaduaan dinen, arina dinen, ia barik arainyeen lo’a dinen, kosan bapi anaka. Jaji mate bapi. 31Nanna kataluun kenang bapi. Jaji kenang samuana dinen tuju pariin arainye kausa lo’a babainye dinen laloang mate kosan anaka. 32Imundina rabarik, mate bea babainye dinen. 33Jaji ati’en kenang, ai lo’a di asona tauen tio’ balika, intain ampuna babainye dinen, yang ampuna tapaten? Kole’a samuana tuju pariin dinen arainye kausa lo’a babainye dinen,” ingka kenang mangilalaina lo’a i Yesus, dala panaloan lo’a kole’a kosan tau tio’ balik kalo’aan.

34Jaji barik dasauti kole’a i Yesus, “Jaji kenang, tau indi’angen tapat siala arainye. 35Poangsi ambata tauen yang daanggapen patut itiang masok lo’a dinen ona’, yang tau marasai katio’ baliken, ira dinen na’an lagi’ siala arainye alaki. 36Na’an lagi’ mate kole’a mamin padari awan malaikaten. Dinen lalo yang anaka Alatala kole’a maminna tio’ balik,” ingka kenang lo’da’. 37“Poangsi lo’a soal tio’ balika tauen, di buku’a baki’ Musapi dinen mambukti bea kole’a tau mateen tio’ balik. Kole’a ilalam tutulan dinen lo’a akat jalu arapati’en yang atutungen, Alatala daasan inang,

Alatalana arabaki’. Lo’a manyembana baki’ Abraham, baki’ Isak nanna baki’ Yakub,

ingka kenangjo inang. Pal. 3:6. 38Na, arabaki’ka’ daasan inang manyemba lo’a Alatala. Okan dinen tau mateen yang dapaten manyemba lo’a Alatala. Tau tio’en lalo yang manyembaan lo’a Alatala. Kole’a kalo’a Alatala samuana mamin tio’, kapisi daia mamin talalo. Daikin di’en sala’ tapat,” ingka kenang i Yesus lo’da’.

39Jaji ambata toa adaten sapa dua manjarum barik lo’a i Yesus, “Mandua’ lalo jarumu, Pa’ Guru!” ingka kenang. Manyera barik. 40Kole’a na’an lagi’ barani ira mangatoanang jaluun lo’a.

I Yesus manjarumang kole’a Kristus ia bea Alatala

Mat. 22:41-46; Mk. 12:35-37

41Jaji barik i Yesus mangatoanang lo’da’, “Ai lo’a pangajaran tau yang masanen lo’a Kristus yang tau dabayaangen dinen, mondoka ona’ dari nanna kanturunanna Raja Daud? 42-43Kole’a baki’ Daud nanga manjarumanga tau dabayaangen dinen di buku’ Masmur mamin diri’a masan,

Manjarum Paraampuanen lo’a Paraampuanku’, Adudukko indi’ang di biring katoku’ sampai akaus atalona gulungan lawannu kole’ku’,

ingka bua jaruma Raja Daud yang datulisangen ilalam Jaruma Alatala. Msm. 110:1. 44Na, pande te’ iasan anak kanturunanna ti’ mamin diri’a mangaku’ Paraampuan lo’a? Poangsi daia pangkata dinen, labi baraa pan dari pada kanturunan awan biasaan,” ingka kenang i Yesus lo’da’.

Dapase’angki’ malola’ani sontona tau Parisiin

Mat. 23:5-7; Mk. 12:38-40; Lk. 11:37-54

45Jaji i Yesus manjarum lo’a palola’a di arona gulungan tau bayu’en, “Maam-maamkin. 46Ada’ ilola’ani basana gulungan toa adaten yang paraa-raa’en kalena, yang mainya’en to’ arayu’ nanna kain langkeen, mainya’ dapaduli tauen di pasaren. Ada’ ilola’anina basada’ yang pakokoloan to’ aduduk di kosan tau baraa’en pakaina di gulungan sao sambayangen, di gulungan rami-rami tauen. Lk. 11:43. 47Ibalakang daira dinen makal-akal itiang marampas saona gulungan bainye baluun. Rabarik di arona tauen balangke-langke bado’ana mainto’ kalo’a na’anna paita kajau’anna. Daira dinen labi baraa ona’ ukumda’,” ingka kenang i Yesus lo’da’.

Currently Selected:

Lukas 20: EBE

Highlight

Copy

Compare