Markus 15

I Yesus di arona Gubernur Pilatus

Mat. 27:1-4,11-14; Lk. 23:1-5; Yoh. 18:28-38

1Jaji imbara asoon, gulungan Paurusen, ambata imam baraa’en, ambata toa-toaan, ambata toa adaten sipakat. Mamin sipakat, daingkat barik i Yesus daawa lo’a Gubernur Pilatus.

2Jaji barik mondok inang, dakatoani kole’a i Pilatus, “Ai daiko di’en, iko lalo rajana tau Yahudiin?” ingka kenang.

“Kenang lalo, awan bua jarumu,” ingka kenang barik i Yesus.

3Jaji barik daduang sala’a i Yesus dinen, bayu’ aduanga kajau’anna lapoang kole’a gulungan imam baraa’en. 4Jaji manjarum bapi barik Gubernur Pilatus, “Belejo bayu’a kasala’annu daduangen kole’da’. Ai daiko, kosan sautinu?” ingka kenang lo’a i Yesus.

5Poangsi i Yesus na’an lagi’ kakaji’. Jaji Gubernur Pilatus raranga’ nyawana mamikira kole’a na’anna lagi’ dasauti aduan tauen.

I Yesus daukum mate

Mat. 27:15-26; Lk. 23:13-25; Yoh. 18:39—19:16

6Jaji barik di aso rami-ramina, to’ awan atoranna kiraso. Di antarada’ tau itaanen di sao ukumanen andian dapalapasen kole’a i Pilatus, intain poang dapitaan kole’da’. 7-11Jaji ira tau bayu’en mator dinen lo’a i Pilatus.

“Intain dinen yang kupalapasen, tau Raja Yahudiinaka?” ingka kenang i Pilatus. Kenanga dinen kole’a datamu mamin ratina daduanga i Yesus, kole’a lalo kapiayona ira dinen gulungan imam baraa’en.

Jaji di sao ukumanen dinen andian tau pauno’, i Barabas asanna, tau sarantak malawan. Jaji barik ira gulungan imam baraa’en majo-ajo’ lo’a tau yang babangkulungen kole’a andianna dinen i Barabas di sao ukumanen. Dinen yang dasuro’ painsaluanen manyurang lo’a i Yesus.

12Jaji manjarum barik dinen i Pilatus, “Ati’en kenang, ai tau yang iasanen ikin Raja Yahudiin? Iai?” ingka kenang.

13Jaji barik manjarum ira dinen bapi mamuko-muko, dasuro’ uno’, “Uno’ poang ipanandapa salip!” ingka kenang.

14Jaji barik i Pilatus manjarum bapi lo’da’, “Ai ratina Raja Yahudiin to’ idukum mate? Ai sala’a?” ingka kenang.

Poangsi dinen insang dapuko-pukoang kole’da’, “Uno’ poang, ipanandapa salip!” ingka lapoang jaruma lo’a i Pilatus.

15Jaji barik baingin dinen yang i Pilatusen to’ pamaam ate yang tau babangkulungen dinen, dapalapas barik dinen yang i Barabasen. Jaji barik yang i Yesusen dinen dasuro’ supet lo’a tentaraan. Mamin barik dasupet kole’a tentarana, daparuarang lo’da’ to’ dapanandapa di kayu salip sampai mate.

Ambata tentaraan mananawaien lo’a i Yesus

Mat. 27:27-31; Yoh. 19:2-3

16Jaji rabarik, tentarana i Pilatus dinen mawa lo’a i Yesus dinen ilalam saona i Pilatus. Mondok indinangen akombong kausa ambata tentaraan inang. 17Mamin dinen, daparakaini i Yesus nanna pakaian rajaan. Daanu kambu’a, daanam nanna ambata gulungan pati’en, daapis di uluna. 18Mamin dinen barik mulai ira dinen manyialo lo’a i Yesus mangangara’, “Balangke tio’u iko rajana tau Yahudiin!” ingka kenang jarumda’ dinen patatawaien lo’a. 19Mabal sapa dua di uluna, malasui sapa dua. Malingkutut dinen ira manyemba lo’a. 20Mamin akaus patatawaina ira dinen, akaus lapoang panamuna mala paradai’an lo’a i Yesus dinen, baru’ barik daleka’i dinen kain rajaan dinen, baru’ barik parakaini kalena. Daawa barik insaluan to’ dapanandapa salip.

I Yesus dapanandapa salip

Mat. 27:32-44; Lk. 23:26-43; Yoh. 19:17-27

21Jaji barik patanga’an lamba’da’ mawaan dinen lo’a i Yesus, andian barik tau seraan asanna i Simon yang mondok lo’a dinen dari insaluanna banuaan. I Simon dinen urang Kirene, amana ari Aleksander nanna i Rupus. Jaji barik dinen dapaksa, dasuro’ manyan salipa i Yesus. Rm. 16:13. 22I Yesus dinen to’ daawa lo’a kosan dinen asanna Golgota ilalam jarum Ibraniin. Golgota, ti’ awan jarumka’, karampang ulu. 23Jaji mondok indinangen, ira dinen panyorongang angguren lo’a i Yesus yang dabaroken nanna pole’ mur. Poangsi alibak i Yesus dinen mainyum. 24Jaji i Yesus dinen dapanandapa inang. Mamin barik dapanandapa, gulungan kainna i Yesus dinen datawa’-tawa’ pakai tanungan. Intain dinen dadua’ tanunganen dinen, dinen malaan. Msm. 22:19.

25Jaji nanga dapanandapa i Yesus inang di kayu salipen, jam sumilan makapen. 26Tulisan katarangan sala’a yang dapalakat inang di kayu salipa, datulisa kenang, “Di’en lalo Rajana tau Yahudiin,” ingka kenang. 27Jaji di biringa dua bali, andian bapi tau dapanandapaan, tau parampok, sera di katona, sera di kayoko’a. 28[Inang bua dapadari baya datulisangen ilalam Jaruma Alatala,

Daia daanggap tau malawanen, Yes. 53:12.

ingka kenang.] 29Tau yang lamba’en inang mananawai lo’a. Dagiling-gilingang uluna, “Na, daiko dinen yang tau to’ marurun saona Alatala kalo’u, yang to’ pamaamiin dinen dalam talung asoon,” ingka kenang. Mk. 14:58; Yoh. 2:19. 30“Suba katio’ kalenu. Tadorko dari kayu salipen,” ingka kenang. Msm. 22:8; 109:25.

31Gulungan imam baraa’en nanna toa adaten ka’ kenanga. Sibele ira sijaruman mananawaien lo’a, “Tau bokanen dapat dakatio’. Poangsi diri’a na’an dakule’ dakatio’,” ingka. 32“Suba dinen Kristusen, rajana tau Israelen tador dari kayu salipen mainto’ ibelena ikam, mainto’ iparasaya’ina,” ingka kenang jarumda’. Yang tau dapanandapaan dua baliin, tamba bea ira pajau’en lo’a.

I Yesus mate

Mat. 27:45-56; Lk. 23:44-49; Yoh. 19:28-30

33Mamin dinen barik, mondok tanga’ asoon, araun jaluun kausa banuaan. Mondok jam talu araunna. 34Mondok jam talu rabarik dinen, i Yesus dinen mangalong nanna unyi baraana, “Eloi, Eloi, lama sabaktani!” ingka kenang. Jaji ratina dinen, “Alatalaku’, Alatalaku’, asi lo’a irantangku’ iko?” ingka kenang ratina. Msm. 22:2.

35Dadalinga barik kenang kole’a tau akadengen ibiringaan, “Na, belejo. Mangalong lo’a baki’ Elia dini,” ingka kenang. 36Jaji arari tau seraan, maisi’i bunga karangen, jalu balu’ busaan dinen, daisi’i nanna anggur masamen. Mamin dinen datanggeang nanna kayuun, dapainyumang lo’a i Yesus. “Ona’jo,” ingka, “Ibele iki’ ti’ tapat mondoka baki’ Elia to’ mawa tador lo’a,” ingka kenang jaruma tau dinen. Msm. 69:22.

37Mamin dinen, i Yesus mamuko bapi nanna unyi baraana laloang mangatu nyawana. 38Laloang dinen aripak kain siringen di saona Alatala yang manyiringiin kosan yang palin bareseen. Dari ibo mondok inyaung aripaka, abala’ dua kain siringen dinen. Pal. 26:31-33. 39Jaji panguluan tentaraan yang tau akadengen ibiringa i Yesus dinen, dabele awan dinen matena i Yesus, manjarum, “Tapat bua pan Anaka Alatala tau dinen!” ingka kenang tau yang maitaan dinen lo’a.

40Inang bua de’i andian tau babainye yang mameleen lo’a dari bajao’a, i Maria Magdalena. Andian bea i Maria tamanga, induna ari Yusup nanna i Yakobus. Andian bea i Salome. 41Daira lalo malola’en lo’a di Galilea yang manggulungiin lo’a. Bayu’ bea babainye bokanen malola’en lo’a dari Galilea lo’a Yerusalem. Lk. 8:2-3.

I Yesus dakubur

Mat. 27:57-61; Lk. 23:50-56; Yoh. 19:38-42

42Jaji dinen aso Juma’at, aso tau Yahudiin mangamasaang sangarianna lo’a aso Sabaten. Jaji mainso’ to’ pamamalamen, 43andian i Yusup urang banua Arimatea yang pakarasangen nyawana laloang lamba’ lo’a i Pilatus mamita bangkayoanna i Yesus. Jaji i Yusup dinen tau baraa’en pakaina di Paurusen. Daia dinen manyari tapat lo’a bayana Alatala to’ mangkama lo’ka’ awan rajaan. 44Jaji manjarum awan dinen i Yusup lo’a i Pilatus, tatakau atena i Pilatus lo’a dongona mamin mate i Yesus dinen. Jaji barik dasuro’ abas lo’a panguluan tentara dinen ti’ tapat mate. 45Jaji barik dajarumang lo’a i Pilatus, i Pilatus barik dinen mamaruarang bangkayoanna i Yesus dinen. 46Jaji dala barik kain lenan kole’a i Yusup itiang pamalokoon bangkayoanna i Yesus dinen. Laloang dapaindor dinen bangkayoanna, daliliti nanna kainen. Jaji daawa rabarik lo’a kuburen, lo’a loang batu yang dapolaan nanna paat. Daapis ilalam loang kaliin dinen, laloang dagoleng batu baraa’en dinen yang datiang pangaputi baba’ loang kubura. 47Jaji andian mameleen lo’a dinen ari Maria Magdalena nanna Maria induna i Yoses, mamele kosan palenga’an bangkayoanna i Yesus.

Currently Selected:

Markus 15: EBE

Highlight

Copy

Compare