Markus 16
16
I Yesus tio’ baliken
Mat. 28:1-10; Lk. 24:1-12; Yoh. 20:1-10
1Jaji maminna aso Sabaten dinen, ari Maria Magdalena nanna i Maria induna i Yakobus, nanna i Salome mamali inyak. Ratina inyaken dinen, to’ daawa lo’a kubura i Yesus datiang paluluki mantuarina. 2Jaji rabarik imbar asoon di aso Mingguun dinen, ira dinen lamba’ lo’a kuburanen. 3Jaji sijaruman barik ira, “Intain ona’ manggolengen batu baraa’en yang mangaputiin lo’a kubura i Yesus dinen,” ingka kenang.
4Jaji maminna dinen rabarik, dabeleang matada’ inait, dabele batu baraa’en dinen, mamin tagoleng. 5Dalamba’i barik dinen kuburen, dabele andian babaka, anak baruun aduduk di katona. Jaji kainna dinen, kain langkeen ute’-ute’. Jaji atakut. Susa ira dinen mamelena.
6Jaji manjarum lo’da’, “Ada’kin susaan, ada’ atakuten,” ingka. “Daikin manyarikin lo’a i Yesus tau Nasaret yang dasalip. Daia dinen kosan indi’angen. Mamin tio’ balik, mamin talalo,” ingka kenang. “Belejo kosanna de’i, kosan palenga’anna,” ingka kenang lo’da’. 7“Se’, lamba’kin manjarumang lo’a gulungan palola’a lo’a ari Petrus kole’a i Yesus dinen to’ tajolo lo’a Galilea. Inangkin ona’ sidua’en nanna awan bua jarum bayana memen, di tio’a dinen lo’in,” ingka kenang manjaruma lo’a babainye duaan dinen. Mat. 26:32; Mk. 14:28.
8Jaji barik ira babainyeen dinen minsaluan, arari takut-takut. Tatakau ira, kikirik tolanga. Jaji na’an bea dajarumang lo’a intain-intain lasana atakuta.
I Yesus payoang kalena lo’a i Maria Magdalena#16:9 Akat jarum 16:9-20: Ati’en ipasibandingang ambata buku’ Alkitaben yang palin joloon datulisanga, ayat 9 sampai 20 kosan idua’ang inang.
Mat. 28:9-10; Yoh. 20:11-18
9[Jaji barik i Yesus maminna tio’ balik di aso mulakataan dinen, di aso Mingguun, dapayoang kalena tajolo lo’a ari Maria Magdalena. Ialalo dinen yang dasarung tuju jalu ajau’enjo, yang daruruun kole’a i Yesus. 10Jaji barik, lamba’ i Maria dinen, lamba’ lo’da’ arakawanna i Yesus. Arakawanna i Yesus dinen patanga’an susada’ anangis. 11Poangsi ira dinen, maminna barik mandalinga dongo dinen kole’a i Yesus mamin tio’ balik, mamin lalo dakita kole’a ari Maria, alibak kakaru’ ira dinen parasaya’.
I Yesus payoang kalena lo’a palola’a duaan
Mat. 28:16-20; Lk. 24:13-49; Yoh. 20:19-23; PalPa. 1:6-8
12Jaji maminna dinen barik i Yesuspi payoang kalena lo’a palola’a duaan dinen yang tau lamba’en insaluanna banuaan. Laan batora dinen i Yesus dapayoanga kalena lo’da’. 13Jaji ira duaanpi dinen mole’ balik, manjarumang lo’da’ yang palola’a bokanen. Poangsi alibak bapi ira dinen parasaya’.
I Yesus marantang paba’ina lo’a palola’a
14Jaji ira sabelasen patanga’an angkaanna, i Yesus dinen paitang kalena lo’da’. Jaji barik dajarumi ira dinen kole’a bakarasa ateda’, kole’a alibaka ira dinen parasaya’. Kole’a di maminna tio’ balik, dongoda’ yang maminen mangita lo’a de’i, na’an daparasaya’i.
15Jaji barik i Yesus manjarum lo’da, “Daikin barik di’en malamba’ikin kausa maira tatak banuaan, manjarumang Dongo Maamen lo’da’ kausa yang inyaunga galung suanen,” ingka kenang manjaruma i Yesus lo’da’. PalPa. 1:8. 16“Intain ona’ yang parasaya’en laloang ibaptis, daia dinen ikatio’ bua. Sabalika, intain na’anen parasaya’, daia dinen to’ dalao’i nanna ukumanen,” ingka kenang manjaruma i Yesus lo’da’. 17“Yang tau parasaya’en dinen, andian ona’ tanda kuasa. Daira dinen ona’ to’ maruru jalu ajau’en atas asanku’. Dakule’ manjarum ona’ mamakai jarum na’anen datamu tau,” ingka lo’da’. 18“Urar yang pandeen manotok manyuro’ mate, ati’en dajaput kole’da’, kosan jalu manyuro’ mate. Jalu balasa yang pandeen bahaya, ati’en dainyum, kosan jalu manyuro’ mate. Dajalaang ona’ tanganna lo’a tau apadisen, to’ maam barik padisa tauen kole’a,” ingka kenang i Yesus lo’da’.
I Yesus daawa inait
Lk. 24:50-53; PalPa. 1:9-11
19Mamin akaus manjaruma Paraampuan Yesus dinen, daia laloang daangkatang inait laloang aduduk barik di biring katona Alatala. 20Gulungan palola’api dinen laloang tarangkat manjarumang Dongo Maamen. Jaji di lamba’a dinen dagulungi bua kole’a Paraampuanen, dameang tanda lo’da’ mainto’ datamuna kole’a tauen kuasa aien yang manyuro’en lo’da’. Kenang lalo bea.] PalPa. 1:9-11.
Currently Selected:
Markus 16: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
