Masmur 48
48
Sion omamo Amisy Apa muni mije
1Ransyeran. Masmur vatano susyo Kora wo ratoe.#48:1 Vatano susyo Kora so nanawamo vatano ukinyo ransyerane rai no Yavaro Amisy.
2AMISY Wepi panakoeve rave, weti mamaisyo aura titive
no wama Amisy Apa munijo ntuna no unato ndandinit rai.#48:2 Unate so ndandinit weye omamo unato terave AMISY tuna rai.
3Unate ratuije ranyanyutamo ngkov dave,
munije ratuije mo vatano mine tename so manuga raveti ranayanambe.
Unato Sion#48:3 Sion omamo Yerusalem ama tamo wusyine mije. no no Yerusalem ama ranijo wanansai,
omamo AMISY Akarijo Titi panakoeve Apa norije.
4Amisye Opamo maisyare no no yano orame ama soero ramane rai,
indamu Po Yerusalem raman.
5Waperata akari titi ude awa naite mautan,
wanugan ware maroyaro mansai.
6Weramu arono werananta wo Sion ama vambunine raen upaparo mai,
naije ujaniv bintabo ti unanajibe tatugadi.
7Wenawamo ujaniv muno ututar no ratuije,
wenawamo kikuaji yorame rai maisyare wanya njanjorami arikainye ai wemaisy.
8AMISY Po marova mandamisy maisyare Po ovaro repe augaje ti po nyoman akokoe Tarsis#48:8 Kuruno Ayao Amisy wo ratantona ware munijo Tarsis mamaisyo munijo Spanyol rai. randujai wemaisy.
9Maisyare muno wandanaumbe no wusyinoe, soamo wandaeno wansami rai to,
nai Yerusalem, AMISY Wepi Akari Titi naito munijo ntiti#48:9 Ayao Ibrani mare Yahweh Sabaot, ama ine mare ‘‘AMISY Wepi Akari Titi naito munijo ntiti.’’ Apa munije.
No wama Amisy Apa muni so,
Po raugasya nteto tindimuve muno Po rayaranande ntoa nuge nuganui.
10Reama Amisy, reansaemeno Nya muinyo no tawano reansai rai,
arono reande mbeaje nai no Nya Yavare ama uga.
11Amisy Nya tame mamo vatane wo ranaun no mine tename so,
muno wo nararimbe tenambe.
Winyamo Akarijo Titi mbambunin dave,#48:11 mbambunin dave: ayao Ibrani maisyare so: ‘‘anem ngkove,’’ ama ine mare Amisye Apa vambuninem.
patimu Nyo raugaje mamo mamaisyo Nya moyare rai.
12Syare kawasae Sion mananibe,
syare arikainyo wanya Israel ugwain manayanambe,
weye AMISY Nya ana ndapatimu mamaisy irati Nya ananyao rai.
13Kawasae Israel weap, syare wasarirae Sion rakiani,
wapo ama soere rator,
14wapo ama yano orame ranyanyuto mavabe.
Wapanya wapo ama soero ramane rayasiro mavabe,
indamu wapo rariri akato irati wapa susyo miridi nto mai,
15wapare: ‘‘Tugae rave Opirati Amisye pije,
wama Amisy, wambeaje Aija ntoa nuge nuganui,
Wepirati Po wansaugav tutira ntoa pitawar.’’
Currently Selected:
Masmur 48: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)