1 Korinto 1
1
Kumprimentus
1Hosi Paulo, nebee Maromak bolu tiha ona tuir Ninia hakarak hodi sai Kristu Jesus nia apostolu, no hosi ita nia maluk Sóstenes.#1:1 Uluk Sostenes mak nai ulun ba sinagoga iha Korinto, Apostolu 18:17.
2Ba Maromak nia igreja iha Korinto,#1:2 Haree istória kona ba igreja hahuu iha sidade Korinto iha Apostolu 18:1-18. ba sira nebee santu iha Kristu Jesus. Nia bolu imi atu sai ema santu hamutuk ho sira hotu iha fatin hotu nebee bolu ita nia Nai Jesus Kristu nia naran. Nia mak sira nia Nai no ita nian.
3Grasa ba imi, no dame, hosi ita nia Aman Maromak no hosi Nai Jesus Kristu.
Agradese
4Hau sempre foo agradese ba hau nia Maromak kona ba imi tanba grasa nebee Maromak foo ona ba imi iha Jesus Kristu. 5Imi sai riku ona iha Nia ho buat hotu, inklui mos iha liafuan hotu no matenek hotu. 6Ida nee akontese ona bainhira sasin kona ba Kristu sai metin iha imi. 7Nunee imi la falta prezenti ida bainhira imi hein ita nia Nai Jesus Kristu nebee sei hatudu aan. 8Nia sei hametin imi too rohan, no imi sei la iha sala ida iha ita nia Nai Jesus Kristu nia loron. 9Maromak mak fiel. Nia bolu imi atu moris hamutuk ho Ninia Oan Mane, ita nia Nai Jesus Kristu.
La Bele Haketak Malu
10Hau husu imi, maun-alin sira, hodi ita nia Nai Jesus Kristu nia naran, atu imi hotu koalia hamutuk. La bele haketak malu maibee sai laran ida neon ida ho hanoin nebee hanesan. 11Hau nia maun-alin sira, ema balu hosi Cloe foo hatene ona mai hau katak imi istori malu. 12Hau koalia hanesan nee tanba imi ida-idak dehan, “Hau tuir Paulo,” ka “Hau tuir Apolo,” ka “Hau tuir Cefas,” ka “Hau tuir Kristu.”#1:12 Apolo hatene koalia diak, Apostolu 18:24-19:1. Cefas mak Pedro, João 1:42. 13Kristu fahe aan ka? Ema prega Paulo ba krús tanba imi ka? Imi simu batizmu hodi Paulo nia naran ka? 14Hau foo agradese ba Maromak katak hau la foo batizmu ba imi ida, só deit Crispus no Gaius. 15Nunee imi ida keta dehan katak imi simu batizmu hodi hau nia naran. 16(Hau mos foo batizmu ba Estéfanas nia uma kain. Maibee hau la hatene se hau foo batizmu ba ema seluk tan ka lae.) 17Tanba Kristu haruka hau, laos atu foo batizmu, maibee atu haklaken evanjelhu, laos ho ema nia liafuan matenek atu nunee Kristu nia krús la sai folin laek.
Maromak Nia Matenek No Kbiit
18Tanba liafuan krús nian mak beik ba sira nebee atu lakon. Maibee ba ita nebee hetan dadaun salvasaun, liafuan nee mak Maromak nia kbiit. 19Tanba ema hakerek nanis ona,
“Hau sei halakon matenek klean hosi ema matenek klean,
no ba sira nebee kompriende Hau sei halo sira nia kompriensaun sai mamuk deit.”#1:19 Hosi Isaias 29:14.
20Ema matenek klean iha nebee? Ema eskriba iha nebee? Ema nebee debate iha mundu nee iha nebee? Laos Maromak halo mundu nia matenek klean sai beik ona? 21Tanba iha Maromak nia matenek klean, mundu la konsege hatene Maromak liu hosi sira nia matenek klean. Tanba Maromak hakarak ami haklaken liafuan nebee beik hodi salva sira nebee fiar. 22Tanba ema Judeu sira husu sinál ida, no ema Gregu sira buka matenek klean. 23Maibee ami haklaken Kristu nebee mate iha krús. Liafuan nee sai fatuk sidi ida ba ema Judeu sira no buat nebee beik ba ema Gregu sira. 24Maibee ba sira nebee Maromak bolu ona, ba ema Judeu sira no ema Gregu sira, Kristu mak Maromak nia kbiit, no Maromak nia matenek klean. 25Tanba buat nebee beik hosi Maromak mak matenek liu fali ema, no buat nebee fraku hosi Maromak mak forti liu fali ema.
26Tanba imi haree oinsaa Maromak bolu imi, maun-alin sira. Tanba imi barak laos ema matenek klean tuir isin. Imi barak la iha kbiit ka laos ema boot. 27Maibee Maromak hili buat sira nebee beik iha mundu atu hamoe ema matenek klean. No Maromak hili buat nebee fraku iha mundu atu hamoe ema forti. 28Maromak hili buat nebee kiik no ema hakribi, no mos buat nebee la iha, atu hamoe buat nebee iha. 29Nunee la iha ema#1:29 Gregu dehan ‘la iha isin ida...’. ida bele gaba aan iha Maromak nia oin. 30Maibee tanba Maromak, imi iha Kristu Jesus nia laran. Jesus mai hosi Maromak hodi sai matenek klean ba ita, no moris loos, laran santu no folin nebee hola fali ita. 31Nunee, hanesan ema hakerek nanis ona, “Nia nebee gaba aan, husik nia gaba aan iha Nai.”#1:31 Haree Jeremias 9:24.
Currently Selected:
1 Korinto 1: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.