1 Korinto 2
2
Haklaken Jesus Kristu
1Maun-alin sira, uluk bainhira hau baa vizita imi no foo sasin kona ba Maromak, hau la baa ho liafuan aas ka matenek klean. 2Tanba hau desidi atu la hatene buat ida iha imi nia leet, só deit Jesus Kristu, no Nia mate iha krús. 3Bainhira hau hela ho imi, hau fraku, tauk no laran tuk-tuku tebes. 4Hau nia liafuan no mensajen laos liafuan furak ho matenek klean, maibee hatudu Espíritu no kbiit. 5Nunee imi tau fiar ba Maromak nia kbiit, laos ba ema nia matenek klean.
Matenek Klean Hosi Espíritu
6Maibee ami foo sai matenek klean iha ema nia leet nebee iha maturidade.#2:6 Gregu telios, nebee perfeitu, kompletu no pas. Haree 1 Korinto 13:10, 14:20 no Filipe 3:15 no nota. Maibee matenek klean nee laos hanesan matenek klean hosi mundu ka hosi nai ulun sira iha mundu nee, nebee ikus mai sei lakon. 7Maibee ita koalia kona ba Maromak nia matenek klean nebee mistériu no segredu. Molok mundu hahuu, Maromak foo sai ona matenek klean nee hodi foo glória ba ita. 8Nai ulun sira iha mundu nee la kompriende matenek klean nee. Tanba se sira kompriende karik, sira la prega Nai Glória Nain ba krús. 9Maibee hanesan ema hakerek nanis ona,
“Matan seidauk haree, no tilun seidauk rona,
no ema nia fuan laran seidauk hanoin
kona ba buat sira nebee Maromak prepara ona
ba sira nebee hadomi Nia.”#2:9 Haree Isaias 64:4.
10Maibee Maromak hatudu buat sira nee ba ita liu hosi Ninia Espíritu. Tanba Espíritu buka hatene buat hotu, inklui mos buat klean hosi Maromak. 11Tanba see mak hatene ema nia hanoin? Só deit ema nia espíritu iha ninia laran. Nunee mos la iha ema ida nebee kompriende Maromak nia hanoin, só deit Maromak nia Espíritu. 12Agora, ita la simu mundu nia espíritu, maibee Espíritu nebee mai hosi Maromak. Hodi nunee ita bele kompriende buat sira nebee Maromak foo gratis ona ba ita. 13Ami hatoo buat sira nee laos liu hosi hanorin nebee mai hosi ema nia matenek klean, maibee liu hosi hanorin hosi Espíritu. Ami esplika lia loos espirituál nian ba ema espirituál.
14Maibee ema naturál la simu buat sira nebee mai hosi Maromak nia Espíritu. Tanba buat sira nee mak beik ba nia. Nia la bele hatene buat sira nee, tanba ema espirituál deit mak bele kompriende. 15Ema espirituál bele tetu buat hotu, maibee ema ida la bele tetu nia. 16“Tanba see mak hatene Nai nia hanoin atu bele hanorin Nia?”#2:16 Haree Isaias 40:13. Maibee ita iha Kristu nia hanoin.
Currently Selected:
1 Korinto 2: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.