1 Korinto 3
3
Ema Nebee Haksesuk Malu
1Maun-alin sira, hau la bele koalia ho imi hanesan ema espirituál, maibee hanesan ema isin nian, nebee hanesan bebee iha Kristu. 2Hau foo susu been ba imi, laos ai haan toos. Tanba imi seidauk toman atu haan ai haan toos. No too agora mos imi seidauk prontu atu haan ai haan toos. 3Tanba imi sei ema isin nian. Tanba bainhira imi sei laran moras no istori malu hela, laos imi ema isin nian no lao nudar ema deit? 4Tanba bainhira ema ida dehan hela, “Hau tuir Paulo,” no ema seluk dehan, “Hau tuir Apolo,” laos imi moris hanesan ema isin nian deit?
5Nunee see mak Apolo? No see mak Paulo? Ami mak atan sira tuir knaar nebee Nai foo ona ba ami atu imi bele fiar. 6Hau kuda no Apolo rega, maibee Maromak halo moris. 7Entaun nia nebee kuda no nia nebee rega nee laos buat ida, só Maromak deit nebee halo moris. 8Nia nebee kuda no nia nebee rega mak ida deit. No ida-idak sei simu ninia kolen tuir ninia servisu rasik. 9Tanba ami servisu hamutuk ho Maromak. Imi mak Maromak nia toos, no Maromak nia uma.
10Tuir grasa nebee Maromak foo ona mai hau, nudar badaen matenek, hau hada fundasaun, no ema seluk harii uma iha fundasaun leten. Maibee ema ida-idak tenki kuidadu oinsaa mak nia harii uma nee. 11Tanba ema ida la bele hada fundasaun seluk. Tanba fundasaun iha ona, nee mak Jesus Kristu. 12Agora ema bele harii uma iha fundasaun leten ho osan mean, osan mutin, fatuk murak, ai, fafulu ka hare kain. 13Maibee ita sei haree ema ida-idak nia servisu. Tanba Loron sei foo sai servisu nee. Ahi sei hatudu sai nia. Tanba ahi sei koko ema ida-idak nia servisu atu haree servisu nee oinsaa. 14Se ema ida servisu atu harii uma, no uma nee hamriik hela, nia sei simu ninia kolen. 15Se ahi haan ema nia servisu nee, nia sei lakon. Maibee nia rasik sei hetan salvasaun, só hanesan liu hosi ahi deit.
16Imi kompriende ka lae katak imi mak Maromak nia templu, no Maromak nia Espíritu hela iha imi? 17Se ema ida harahun Maromak nia templu, Maromak sei harahun nia. Tanba Maromak nia templu mak santu, no imi mak templu nee.
18Keta bosok imi nia aan. Se ema ida iha imi nia leet hanoin katak nia matenek tuir mundu nee, husik nia sai beik atu nia bele sai matenek. 19Tanba matenek hosi mundu nee mak beik ba Maromak. Tanba ema hakerek nanis ona, “Nia hadau ema matenek iha sira nia planu aat.”#3:19 Hosi Job 5:13. 20No ida fali, “Nai hatene ema matenek nia hanoin, katak sira hanoin saugati deit.”#3:20 Hosi Salmu 94:11. 21Nunee keta gaba aan kona ba ema. Tanba buat hotu mak imi nian: 22maski Paulo, Apolo ka Cefas, ka mundu nee, moris ka mate, buat sira nebee iha agora ka buat sira nebee atu mai. Buat hotu mak imi nian. 23No imi mak Kristu nian, no Kristu mak Maromak nian.
Currently Selected:
1 Korinto 3: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.